LOKE ESAKI TA NIFIKÁ

Traha huntu komo un tim ta nifiká ku un esposo ku su esposa ta traha manera un piloto ku su ko-piloto ku tin e mesun plan di vuelo. I asta ora problema presentá, kada un ta pensa no riba “ami” sino “nos.”

PRINSIPIO DI BEIBEL: “Nan no ta dos mas, sino ún karni.”—Mateo 19:6.

“Ora bo ta kasá, bo no por pensa riba bo so mas. Tantu esposo komo esposa mester kooperá ku otro pa e matrimonio por bai bon.”—Christopher.

DIKON ESEI TA IMPORTANTE?

Ora un problema presentá, un esposo ku un esposa ku no ta traha huntu komo un tim ta inkliná na ataká otro en bes di ataká e problema. I asina un problema chikitu ta bira grandi.

“Traha huntu komo un tim ta sumamente importante den un matrimonio. Si ami ku mi kasá no ta traha huntu komo tim, nos lo ta djis dos hende ku ta biba ku otro den e mesun kas. I esei lo kousa problema ora nos mester tuma desishonnan importante.”—Alexandra.

LOKE BO POR HASI

PUNTRA BO MES:

  • Mi ta konsiderá ku e plaka ku mi ta gana ta “di mi so”?

  • Mi mester ta sin mi kasá pa mi por relahá kompletamente?

  • Mi no ta wòri ku e famianan di mi kasá maske e sí ta pegá ku nan?

PAPIA KU OTRO TOKANTE LO SIGUIENTE:

  • Den ki aspekto(nan) di nos matrimonio nos ta traha bon komo un tim?

  • Den ki aspekto(nan) nos por mehorá?

  • Kiko nos por hasi pa nos por kooperá mas mihó ku otro?

ALGUN SUGERENSIA

  • Imaginá bo ku matrimonio ta un wega di tènis. Kiko boso por hasi pa hunga den e mesun tim en bes di kontra otro?

  • En bes di pensa “Kon ami por gana?” pensa “Kon nos por gana?”

“No pensa riba ken tin rason òf no. Ta hopi mas importante pa boso tin pas i armonia den boso matrimonio.”—Ethan.

PRINSIPIO DI BEIBEL: “No buska boso mes interes so, ma tambe interes di otro hende.”—Filipensenan 2:3, 4.