Bai na kontenido

Bai na kontenido

 UN GOBIÈRNU KU LO SOLUSHONÁ E PROBLEMA

“Lo No Tin Fin na . . . Pas”

“Lo No Tin Fin na . . . Pas”

Nashonnan Uní ta animá tur hende pa kooperá ku otro, respetá derecho humano i pa protehá medio ambiente. Kiko ta e motibu? Pasobra, manera Maher Nasser di UN Chronicle a bisa: “Kambio di klima, krímen organisá, mas i mas inhustisia, problema di refugiado, terorismo global i malesa kontagioso ta afektá hende . . . rònt mundu.”

Otronan a bai mas leu ku esei. E filósofo, poeta i polítiko italiano Dante (1265-1321) i e físiko Albert Einstein (1879-1955) a apoyá e idea di un gobièrnu mundial. Dante a kere ku pas lo no dura den un mundu ku ta dividí polítikamente. El a sita e palabranan di Hesukristu ora el a bisa ku un “reino ku ta dividí ta kaba na nada.”—Lukas 11:17.

Poko despues di Segundo Guera Mundial, durante kua dos bòm atómiko a ser usá, Albert Einstein a skirbi un karta habrí pa e Asamblea General di Nashonnan Uní. El a bisa: “Nashonnan Uní mester aktua mas lihé posibel pa krea e sirkunstansianan adekuá pa pone fundeshi pa un berdadero gobièrnu mundial ku lo garantisá siguridat internashonal.”

Pero, nos por ta sigur ku e polítikonan ku lo forma parti di e gobièrnu poderoso ei lo no bira korupto, inkompetente òf opresivo? Òf nan lo ta mesun malu ku e otro gobernantenan? E preguntanan ei ta hasi nos kòrda riba e palabranan di e historiadó britániko Lord Acton, kende a bisa: “Poder tin e tendensia di korumpí, i poder apsoluto ta korumpí na un grado apsoluto.”

Sinembargo, si nos ke disfrutá di berdadero pas, nos mester ta uní. Pero kon nos por logra e meta ei? Akaso esei ta un meta realístiko? Beibel ta kontesta ku sí. Nos por i lo logra e meta ei. Kon? No pa medio di un gobièrnu mundial ku polítikonan korupto, sino mas bien, pa medio di un gobièrnu ku Dios mes a establesé. Ta Dios so tin derecho di goberná humanidat. I e lo hasi esei mediante su gobièrnu, ku Beibel ta yama “e Reino di Dios.”—Lukas 4:43

“LAGA BO REINO BINI”

Ora Hesukristu a hasi e Orashon di Nos Tata, e tabatin e Reino di Dios na mente. El a bisa: “Laga bo Reino bini. Laga bo boluntat sosodé . . . riba tera.” (Mateo 6:9, 10) Sí, e Reino di Dios lo perkurá pa Dios su boluntat tuma lugá riba Tera, i no e boluntat di hende egoista i haragan pa poder.

E Reino di Dios ta ser yamá tambe “e Reino di shelu.” (Mateo 5:3) Dikon? Pasobra maske e Reino di Dios lo goberná Tera, e lo hasi esei for di shelu. Djis pensa loke esei lo nifiká pa nos. E gobièrnu ei lo no eksigí niun tipo di belasting for di su siudadanonan. Ki un alivio esei lo ta!

Manera e palabra “reino” ta indiká, e Reino di Dios ta un gobièrnu ku tin un Rei, Hesukristu, kende a risibí outoridat di Dios. Beibel ta bisa tokante Hesus:

  • “E gobernashon lo ta riba su skouder . . . Lo no tin fin na e oumento di su gobernashon i di pas.”—Isaías 9:6, 7.

  •   “Na dje a wòrdu duná dominio, gloria i un reino, pa tur pueblo, nashon i hende di tur idioma por sirbié. Su dominio . . . lo no pasa nunka.”—Daniel 7:14.

  • “E reino di mundu awor ta pertenesé na nos Señor [Dios] i na su Kristu.”—Revelashon 11:15.

Manera e Orashon di Nos Tata ta primintí, Dios su Reino lo kumpli ku Dios su propósito aki riba Tera. Bou di e Reino akí, nos planeta lo ta limpi i yen di bida atrobe, pasobra nos lo siña kuid’é manera mester ta.

I mas importante, e Reino di Dios lo eduká su súpditonan. Tur hende lo siña respetá e mesun normanan i lo no tin desakuerdo ni divishon mas. Isaías 11:9 ta bisa: “Nan lo no kousa daño ni destrukshon . . . pasobra tera lo ta yen di e konosementu di SEÑOR, manera awa ta tapa laman.”

Hende na tur parti di Tera lo ta uní i lo biba na pas ku otro. Esei ta lokual ku Nashonnan Uní kier a logra. Salmo 37:11 ta bisa ku nan “lo deleitá nan mes den pas abundante.” Ku tempu, nos lo no usa palabranan manera “krímen,” “polushon,” “pobresa” i “guera” mas. Pero ki tempu esei lo sosodé? Na ki tempu e Reino di Dios lo kuminsá goberná Tera? Kon e Reino di Dios lo goberná? I kon abo por benefisiá di e Reino di Dios? Laga nos ban wak.