“[Mi tin] plannan pa pas i no pa kalamidat, pa duna boso un futuro i un speransa.”​Yeremías 29:11.

 “SPERANSA TA . . . ALGU ESENSIAL PA UN HENDE POR TIN UN BON RELASHON KU DIOS,” e buki Hope in the Age of Anxiety ta menshoná. Tambe e ta bisa: “I e ta e mihó remedi pa vense sintimentunan di no por hasi nada, soledat i miedu.”

Beibel ta rekonosé ku hende tin mester di speransa, pero tambe e ta spièrta tokante speransa falsu. Salmo 146:3 ta bisa: “No konfia den prensnan, den yu di hende, den kende no tin salbashon.” En bes di konfia ku hende por salba nos, ta mihó nos pone konfiansa den nos Kreador ya ku e tin poder pa kumpli ku tur su promesanan. Kiko el a primintí? Laga nos ban wak.

LO NO TIN MALDAT MAS, I HENDE HUSTU LO BIBA NA PAS PA SEMPER: Salmo 37:10 i 11 ta bisa: “Aki poko tempu e malbado lo no t’ei mas . . . Ma e humildenan lo heredá e tera, i lo deleitá nan mes den pas abundante.” Iversíkulo 29 ta bisa ku “e hustunan lo . . . biba . . . pa semper” riba tera.

LO NO TIN GUERA MAS: “[Yehova] ta hasi gueranan stòp te na e fin di tera; e ta kibra bog i ta kòrta lansa na dos; e ta kima e garoshinan ku kandela.”—Salmo 46:8, 9.

LO NO TIN MALESA, SUFRIMENTU NI MORTO MAS: “[Dios lo] seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas.”—Revelashon 21:3, 4.

LO TIN ABUNDANSIA DI KUMINDA PA TUR HENDE: “Lo tin abundansia di maishi den e tera, riba kabes di e serunan.”—Salmo 72:16.

LO TIN UN GOBIÈRNU HUSTU PA HENTER E TERA: E REINO DI KRISTU: “Na [Hesukristu] a wòrdu duná dominio, gloria i un reino, pa tur pueblo, nashon i hende di tur idioma por sirbié. Su dominio ta un dominio eterno ku lo no pasa nunka, i su reino ta un ku lo no wòrdu destruí.”—Daniel 7:14.

Dikon nos por tin sigur ku e promesanan akí lo kumpli? Ora Hesus tabata riba tera, el a demostrá ku e ta kualifiká pa bira Rei. El a kura hende malu, alimentá hende pober i el a resusitá hende morto. Pero mas importante ainda, el a siña hende prinsipionan ku lo yuda nan biba den pas i union pa semper. Ademas, Hesus a profetisá loke lo sosodé den futuro, entre otro algun suseso ku ta indiká ku nos ta bibando den e último dianan.

TORMENTA PROMÉ KU TEMPU DI TRANKILIDAT

Hesus no a profetisá ku durante e último dianan pas i siguridat lo reina; el a profetisá nèt lo kontrali. E señal ku el a duna “di konklushon di e era akí” ta entre otro guera internashonal, hamber, epidemia i temblornan grandi. (Mateo 24:3, 7; Lukas 21:10, 11; Revelashon 6:3-8) Hesus a bisa tambe: “Pa motibu di oumento di maldat, amor di mayoria di hende lo fria.”—Mateo 24:12.

Awe nos ta mira e falta di amor ei na hopi manera. Esei ta eksaktamente loke un eskritor di Beibel a profetisá na 2 Timoteo 3:1 pa 5. Ei nos ta lesa ku “den e último dianan” mayoria di hende lo pensa solamente riba nan mes, riba plaka i plaser. Nan lo ta arogante i violento. Famianan lo no tin kariño pa otro i yunan lo no tende di nan mayornan. I hopi hende lo hasi komo si fuera nan ta masha religioso.

E tormenta ku, na moda di papia, nos ta pasando aden ta proba ku nos ta bibando den e último dianan. I tambe loke nos ta pasando aden ta proba ku e tempu di trankilidat, esta, e pas i trankilidat ku e Reino di Dios lo trese, ta serka. Hesus a duna nos e siguransa ei ora el a profetisá lo siguiente: “E bon notisia akí di e Reino lo ser prediká den henter e tera habitá, komo testimonio pa tur nashon, anto e fin lo yega.”—Mateo 24:14.

Pa hende malbado, e bon notisia akí ta un spièrtamentu, i pa hende hustu, e ta un siguransa ku e promesanan di Dios lo bira realidat. Abo ke haña sa mas tokante e promesanan ei? Si ta asina, nos ta animá bo pa lesa e último página di e revista akí.