HENDE TA ÚNIKO DEN DIFERENTE MANERA. NOS POR SKIRBI, PINTA, TRAHA KOS I NOS TA HASI PREGUNTANAN IMPORTANTE DI BIDA MANERA: Dikon e universo ta eksistí? Di unda nos a bini? Kiko ta e propósito di bida? Kiko lo sosodé ku nos den futuro?

Algun hende no ta hasi nan mes e preguntanan akí, pasobra nan ta sinti ku ta imposibel pa haña kontesta pa nan. I tin otro hende ta pensa ku no ta bale la pena pa hasi e preguntanan ei, pasobra tòg bida ta e resultado di un proseso di evolushon. Profesor di historia i biologia William Provine a bisa: “No tin ni diosnan ni propósito.” El a bisa tambe ku “regla no tin ningun fundeshi i bida no tin ningun propósito.”

Pero no ta tur hende tin e punto di bista ei. Nan ta mira ku leinan di wiskunde, ku ta presis i bon pensá, ta dirigí e universo. Nan ta keda impreshoná pa e ekselente diseño den naturalesa ku hende ta purba di imitá. I nan bida di tur dia ta yuda nan mira ku mester tin un mente inteligente tras di tur e diseñonan kompliká i ku tur esei no por a bini di su mes.

E manera di pensa ei a motivá algun hende ku ta kere den evolushon pa bolbe analisá nan punto di bista. Laga nos wak dos ehèmpel.

DR. ALEXEI MARNOV, NEUROSIRUHANO. Alexei a bisa: “Na skol nan a siña mi ateismo i evolushon. I tur hende ku tabata kere den Dios, nan tabata konsiderá komo ignorante.” Pero na 1990, Alexei su punto di bista a kuminsá kambia.

El a splika: “Semper mi ta purba di komprondé e motibu tras di un asuntu, manera por ehèmpel den kaso di e selebro humano. No ta nada straño ku hende a deskribí e órgano maravioso akí komo e struktura mas kompliká ku ta eksistí. Pero ki sentido tin ku e selebro por warda asina tantu informashon i desaroyá asina tantu abilidat si bida di hende ta asina kòrtiku? Esei no ta lógiko. P’esei mi a kuminsá puntra mi mes: Dikon nos ta aki? Kiko ta e propósito di bida? Despues ku mi a reflekshoná seriamente riba e asuntu, mi a yega na e konklushon ku mester tin un Kreador.”

Komo ku Alexei ke a haña sa e propósito di bida, el a kuminsá studia Beibel. Ku tempu su esposa, kende ta un dòkter i un ateista, tambe a kuminsá studia, aunke na prinsipio el a hasi esei djis pa mustra su kasá ku e ta robes. Pero awor, nan tur dos ta konvensí ku Dios ta eksistí, i danki na Beibel, nan sa kiko ta Dios su propósito pa humanidat.

DR. HUABI YIN, SIENTÍFIKO. Señora Huabi Yin a studia scheikunde, i durante hopi aña el a studia plasma, ku ta ser konsiderá komo e di kuater estado di materia. E plasma ku bo ta haña den solo ta konsistí prinsipalmente di elektron i ion positivo. *

Huabi a bisa: “Ora nos komo sientífiko ta studia fenómenonan natural, semper nos ta topa ku órden sumamente impreshonante ku ta e resultado di leinan presis. Mi tabata puntra mi mes: Ken a establesé e leinan ei? Si e kandela ku nos ta usa pa kushiná mester di un hende pa kontrol’é, ken a establesé e leinan ku ta kontrolá e temperatura di solo? Ku tempu, mi a yega na e konklushon ku e kontesta mas lógiko ta: ‘Na prinsipio Dios a krea e shelunan i tera.’”—Génesis 1:1.

Ta bèrdat ku siensia a yuda nos komprondé “kon” fenómenonan natural ta funshoná, por ehèmpel, kon e neuronnan den nos selebro ta funshoná i kon solo ta produsí lus i kalor. Pero manera Alexei i Huabi a siña, Beibel ta kontestá e “motibu” tras di un asuntu: Dikon e universo ta eksistí? Dikon tin leinan ku ta kontrolá e universo? I dikon nos ta eksistí?

Tokante tera, Beibel ta bisa: “[Dios] no a krea esaki pa e keda bashí, ma el a form’é pa e wòrdu habitá.” (Isaías 45:18) Sí, Dios a krea tera ku un propósito na mente, i manera nos lo mira den e siguiente artíkulo, e propósito ei tin di haber ku nos speransa pa futuro.

^ par. 10 Otro estadonan di materia ta sólido, líkido i gas.