Bai na kontenido

Bai na kontenido

Loke e “Oloshi di Huisio Final” ta pronostiká lo no kumpli, pasobra Dios a primintí ku hende i tera lo tin un futuro maravioso

 TÓPIKO PRINSIPAL | E MUNDU AKÍ A BAI FOR DI MAN??

Kiko Beibel Ta Bisa?

Kiko Beibel Ta Bisa?

HOPI siglo pasá Beibel a profetisá tokante e kosnan malu ku ta pasando den mundu. Pero Beibel a profetisá spesífikamente tambe ku humanidat ta bai tin un futuro maravioso. Komo ku un gran parti di profesia bíbliko a kumplí kaba te den e detaye chikitu, ta bale la pena pa wak kiko Beibel ta bisa.

Laga nos analisá un par di profesia di Beibel:

  • “Nashon lo lanta kontra nashon i reino kontra reino, i lo tin skarsedat di kuminda i temblor den un lugá tras di otro.”—Mateo 24:7.

  • “Den e último dianan lo bini tempunan krítiko, difísil pa trata kuné. Pasobra hende lo stima nan mes, stima plaka; nan lo ta bromadó, arogante, blasfemadó, desobediente na mayornan, malagradesí, desleal, sin kariño; nan lo no ta dispuesto pa sera ningun akuerdo; nan lo ta kalumniadó, sin dominio propio, feros, sin amor pa loke ta bon, traidor, kabesura, hinchá di orguyo, ku ta stima plaser en bes di stima Dios.”—2 Timoteo 3:1-4.

Algun hende lo bisa ku e profesianan ei ta deskribí e mundu akí ku ta bayendo for di man. I den un sentido, bèrdat kos a bai for di man i hende no tin kontrol riba e mundu akí. Segun Beibel, hende simplemente no tin e sabiduria ni e poder pa solushoná e problemanan akí permanentemente. Esei ta eksaktamente loke e siguiente tekstonan di Beibel ta mustra:

  • “Tin un kaminda ku ta parse bon den bista di hende, ma su fin ta e kaminda di morto.”—Proverbionan 14:12.

  • “Hende a ehersé outoridat riba un otro hende pa su daño.”—Eklesiástes 8:9.

  • “No ta keda na hende pa dirigí su pasonan.”—Yeremías 10:23.

Si laga e mundu akí pa su kuenta, probablemente un katástrofe mundial lo tuma lugá. Pero esei lo no sosodé. Dikon no? Wak kiko Beibel ta bisa:

  • Dios “a establesé tera riba su fundeshinan, pa asina esei no kita for di su lugá nunka mas.”—Salmo 104:5.

  • “Un generashon ta bai i un generashon ta bin, ma tera ta permanesé pa semper.”—Eklesiástes 1:4.

  • “E hustunan lo heredá e tera, i lo biba den dje pa semper.”—Salmo 37:29.

  • “Lo tin abundansia di maishi den e tera, [i] riba kabes di e serunan.”—Salmo 72:16.

 E tekstonan di Beibel akí ta duna un kontesta konkreto. Kontaminashon, skarsedat di kuminda i di awa òf un epidemia mundial lo no kaba ku humanidat. I un holokousto nuklear tampoko lo no kaba ku mundu. Dikon nò? Pasobra Dios tin e futuro di nos planeta bou di kontrol. Ta bèrdat ku Dios a permití hende hasi loke nan ke. Pero nan lo sufri e konsekuensia di e desishonnan ku nan ta tuma. (Galationan 6:7) E mundu akí no ta manera un trein ku a pèrdè kontrol i lo terminá den un desaster. Dios a pone un límite na e daño ku hende lo por kousa nan mes.—Salmo 83:18; Hebreonan 4:13.

Pero no ta esei so; Dios lo sòru tambe pa reina “pas abundante.” (Salmo 37:11) E punto di bista positivo ku e artíkulo akí ta papia di dje ta duna nos un idea di e maravioso futuro ku Beibel ta primintí i ku miónes di Testigu di Yehova a haña sa di dje ora nan a studia Beibel.

Nos komo Testigu di Yehova ta un hermandat mundial ku ta konsistí di hòmber i muhé di tur edat i di tur rasa i kultura. Nos ta adorá e úniko Dios berdadero. Beibel ta bisa ku su nòmber ta Yehova. Nos no tin miedu di futuro pasobra Beibel ta bisa: “Asina SEÑOR, kende a krea e shelunan, ta bisa (E ta e Dios, kende a forma tera i a trah’é; el a estables’é, i no a krea esaki pa e keda bashí, ma el a form’é pa e wòrdu habitá): ‘Ami ta SEÑOR, i no tin ningun otro.’”—Isaías 45:18.

E artíkulo akí a trata algun di e siñansanan di Beibel enkuanto e futuro di tera i di hende. Si bo ta deseá mas informashon, wak lès 5 di e foyeto Dios Tin Bon Notisia pa Nos! publiká pa Testigunan di Yehova i disponibel riba www.jw.org/pap.

Ademas, bo por wak e vidio Dikon Dios A Krea Mundu? riba www.jw.org/pap. (Bai na PUBLIKASHON > VIDIO)