Bai na kontenido

Bai na kontenido

 Kasualidat Òf Diseño?

Dikon e Vruminga Koló di Plata di Sahara Por Wanta Hopi Kalor?

Dikon e Vruminga Koló di Plata di Sahara Por Wanta Hopi Kalor?

E vruminga koló di plata di Sahara (Cataglyphis bombycina) ta un di e insektonan ku por wanta mas tantu kalor. Mèrdia, den e higra di solo di Sahara, tur enemigu di e vruminga koló di plata ta bai skonde den sombra. Esei ta e momento ku e vruminga akí ta kore sali for di su nèshi pa buska kuminda ku ta konsistí di entre otro insektonan ku a muri pa motibu di e kalor inmenso.

[50] μm

Pensa un ratu riba lo siguiente: Loke ta protehá e vruminga koló di plata ta un kapa di lana spesial ku e tin parti ariba i na banda di su kurpa i tambe un kapa spesial sin lana ku e tin parti abou di su kurpa. Su lana (1, 2), ku ta lizu i koló di plata briante, ta manera tubunan triangular hopi chikitu (3). Pues kada tubu tin tres banda. Dos banda ta keda parti pafó i ta gròf for di prinsipio te final, anto e parti ku ta keda paden ta lizu. E diseño akí tin dos funshon. Na promé lugá, e lana ta reflehá rayonan kayente i invisibel di solo. Na di dos lugá, e ta yuda e vruminga deshasí di e kalor ku su kurpa a apsorbá di e ambiente rònt di dje. I e parti abou di e kurpa ku ta sin lana ta reflehá e rayonan invisibel ku ta sali for di e suela di e desierto. *

[10] μm

E diseño di e vruminga koló di plata ta yuda e temperatura di su kurpa keda bou di 53,6 grado Celsius. Esaki ta e temperatura máksimo ku e por wanta. E insekto chikitu akí a inspirá sientífikonan pa diseñá un supstansia ku ta sirbi komo un kapa spesial ku por fria algu sin usa fan òf otro aparato.

Kiko bo ta pensa? E protekshon ku e vruminga koló di plata di Sahara tin a bini di evolushon òf di kreashon?

^ par. 4 E vruminga tin algun bentaha mas. E tin un proteina spesial den su kurpa ku kalor intenso no por daña fásilmente. Ademas, e tin pia largu ku ta tene su kurpa na un distansia for di e suela kayente i ku ta yud’é kore lihé. I komo ku e por orientá hopi bon, e por yega masha lihé na su nèshi bèk.