Bai na kontenido

Bai na kontenido

“Nan Amor A Konmové Nos”

“Nan Amor A Konmové Nos”

RIBA djasabra 25 di aprel 2015, un temblor di un magnitut di 7,8 a sagudí Nepal. Nepal ta un pais yen di seru ku ta keda panort di India. E temblor a tuma lugá mas o ménos 80 kilometer nortwèst di e kapital Kathmandu. Lamentablemente mas ku 8.500 hende a muri. Esaki tabata e desaster natural ku a kousa mas tantu morto den historia di Nepal. Ademas, e temblor a destruí mas ku mei mion kas. Mayoria di e 2.200 Testigunan di Yehova na Nepal tabata biba den e área kaminda e temblor a tuma lugá. Lamentablemente, un Testigu i su dos yunan a pèrdè nan bida.

Un Testigu ku yama Michelle a bisa: “E temblor a sosodé nèt ora ku e kongregashonnan den e áreanan mas afektá tabatin nan reunionnan kristian. Si e temblor a tuma lugá ora mayoria di e rumannan tabata na kas, mas ruman lo a pèrdè nan bida.” Dikon esnan ku tabata na reunion a skapa? Wèl, e diseño di Salòn di Reino a hunga un papel masha importante den esei.

“AWOR SÍ NOS TA KOMPRONDÉ DIKON”

For di nan fundeshi bin ariba e Salònnan di Reino moderno na Nepal ta diseñá pa wanta temblor. Man Bahadur, kende ta traha den konstrukshon di Salòn di Reino, a bisa: “Hopi biaha hende ta puntra nos ta dikon nos ta traha un fundeshi asina sólido pa un edifisio relativamente chikitu. Awor sí nos ta komprondé dikon.” Despues di e temblor, e Testigunan ku ta supervisá e trabou na Nepal a duna aprobashon pa Salònnan di Reino fungi komo shelter. Apesar ku tabatin vários temblor leve despues di esun prinsipal, Testigunan di Yehova i nan bisiñanan tabata sinti nan sigur den e shelternan ei.

Testigunan di Yehova i nan bisiñanan a keda na vários Salòn di Reino ku a fungi komo shelter

Mesora e ansianonan lokal a kuminsá buska e miembronan di kongregashon ku nan no por a haña. Un Testigu ku yama Babita a bisa: “E ansianonan a pone bienestar di e kongregashon promé ku esun di nan mes. Nan amor a konmové nos.” Un dia despues di e temblor, tres miembro di e komité ku ta supervisá e trabou di Testigunan di Yehova na Nepal huntu ku e superintendentenan biahero, òf sirbidónan di sirkuito, a kuminsá bishitá e kongregashonnan pa nan evaluá kiko ta e nesesidatnan i pa sostené e ansianonan lokal.

Gary Breaux, di e ofisina prinsipal di Testigunan di Yehova, a bishitá e víktimanan di e temblor

Seis dia despues di e temblor, Gary Breaux, di e ofisina prinsipal di Testigunan di Yehova ku ta keda na Merka, a bishitá Nepal, huntu ku su esposa Ruby. Ruman Reuben, un miembro di e komité di Nepal a bisa: “Pa motibu di e konfushon ku tabata reina na Kathmandu i e temblornan leve ku a sigui despues, nos no tabata sigur si Ruman Breaux lo por a yega. Pero e tabata determiná pa bini, i nos ta kontentu ku el a logra! E Testigunan lokal a apresiá su bishita mashá.”

“NOS A BIRA MAS SERÁ KU NOS RUMANNAN SPIRITUAL”

Silas, kende ta traha den e ofisina di Testigunan di Yehova na Nepal, a bisa: “Asina ku telefòn tabata traha atrobe, el a kuminsá rin sin stòp. Testigunan di Yehova rònt mundu tabata preokupá pa nos. I maske algun di nan ta papia idiomanan ku nos no ta komprondé,  nos a sinti ku nan ta stima nos i ta kla pa duna nos un man.”

Un tim médiko di Testigu di Yehova di Europa a yuda e víktimanan

Despues di e temblor, pa vários dia, e Testigunan lokal tabata trese kuminda pa esnan ku tabata kedando na e Salòn di Reino. Ademas, un poko despues ku a forma un Komité di Ousilio, artíkulonan di primera nesesidat a kuminsá drenta Nepal, prinsipalmente for di Bangladesh, India i Hapon. I despues di un par di dia, un tim médiko di sinku Testigu di Yehova di Europa a yega i a forma un sentro médiko na un di e Salònnan di Reino. Mesora nan a pone man na obra; nan tabata saminá e kondishon físiko di e víktimanan i tambe yuda nan karga nan doló emoshonal.

E palabranan di un señora ku yama Uttara ta duna nos un idea kon hopi ruman a sinti. Uttara a bisa: “E temblor tabata horibel i spantoso. Pero despues, nos a bira mas será ku nos rumannan spiritual.” Sí, e amor di e sirbidónan di Yehova no a fria pa motibu di e temblor. Al kontrario, nan a haña mas amor pa Yehova i pa nan rumannan den fe.