ORA un hende smail ku bo di orea pa orea, kon bo ta reakshoná? Kasi sigur abo tambe lo smail kuné i lo bo sinti bo mas kontentu. Sí, un sonrisa sinsero, sea di un amigu òf di un hende ku bo no konosé, ta kontagioso i ta pone bo sinti bon. Un señora ku yama Magdalena a bisa: “Georg, mi defuntu esposo, tabatin un sonrisa ku ta pone bo sinti bon. Ora nos tabata wak otro, mi tabata sinti un trankilidat i siguridat.”

Un smail sinsero ta muestra di sintimentunan positivo manera alegria, felisidat i goso. Sin duda, nos “smail . . . ta parti di nos naturalesa,” segun un artíkulo ku a sali den e korant online Observer di Association for Psychological Science. E artíkulo a bisa ku asta un bebi resien nasí por “komprondé bon ki mensahe un ekspreshon di kara ta transmití.” E artíkulo a bisa tambe: “No ta informashon práktiko so un smail ta transmití na hende, sino tambe informashon ku ta influensiá nan komportashon.”

Investigadónan na e Universidat di Harvard na Merka a studia un grupo di pashènt di edat avansá i nan reakshon na e ekspreshon di kara di e personal médiko. E investigadónan a bisa ku ora e pashèntnan tabata sinti ku e ekspreshon di kara di e personal médiko “tabata transmití kariño, interes i empatia,” e pashèntnan tabata sinti nan mas satisfecho i nan salú mental i físiko tabata mehorá. Pero ora e  personal médiko no tabata kariñoso, e salú di e pashèntnan tabata bai atras.

Ora bo smail, bo ta hasi bo mes tambe un fabor. Dikon? Pasobra estudionan ta indiká ku bo ta haña mas konfiansa i felisidat i ménos strès. Pero un kara rabiá por tin un efekto nèt kontrali.

NAN SMAIL “TABATA LANTA MI ÁNIMO”

Magdalena, kende nos a menshoná na prinsipio di e artíkulo akí, tabata un Testigu di Yehova. Durante Segundo Guera Mundial e nazinan a manda e ku vários otro miembro di su famia na e kampo di konsentrashon di Ravensbrück na Alemania pasobra nan a nenga di aseptá e ideologia nazi. Magdalena a bisa: “Tabatin biahanan ku e wardadónan di prezu tabata prohibí nos di papia ku otro prezu. Pero nan no tabatin kontrol riba nos ekspreshon di kara. E simpel echo ku mi mama i mi ruman muhé tabata smail ku mi, esei so kaba tabata lanta mi ánimo i duna mi forsa pa sigui perseverá.”

Podisé bo ta sinti ku e ansiedatnan di bida no ta duna bo masha motibu pa smail. Pero kòrda ku bo sintimentunan ta influensiá bo pensamentunan. (Proverbionan 15:15; Filipensenan 4:8, 9) Pues, maske ku kisas no ta fásil pa konsentrá riba kosnan positivo i agradabel, purba di hasié ki ora ku ta posibel. * Kiko por yuda bo? Lesamentu di Beibel i orashon a yuda hopi hende pa logra esei. (Mateo 5:3; Filipensenan 4:6, 7) Bo tabata sa ku Beibel ta menshoná e palabranan “felis” i “goso” sientos di biaha? Pues, lo ta bon pa lesa un òf dos página pa dia. Ken sa, kisas esei lo yuda bo smail mas tantu.

Ademas, no warda te ora un hende smail ku bo. Tuma inisiativa, smail ku otro hende i drecha nan dia. Sí, mira bo smail komo un regalo di Dios ku por hasi tantu abo mes komo otro hende mas felis.

^ par. 8 Wak e artíkulo “Abo Tin un Bankete Konstantemente?” den e ¡Despertad! di novèmber 2013.