Bo a tuma tempu pa lesa e último edishonnan di E Toren di Vigilansia? Wèl, wak si bo por kontestá e siguiente preguntanan:

Kiko ruman hòmbernan manera superintendente di sirkuito i ansiano mester hasi ora nan haña instrukshon for di e organisashon di Dios?

Nan mester obedesé mesora. Nan por puntra nan mes: ‘Mi ta yuda mi rumannan den sentido spiritual? Mi ta dispuesto pa aseptá i apoyá e instrukshonnan ku mi ta haña?’—w16.11, pág. 11.

Na ki tempu kristiannan berdadero a bai den koutiverio na Babilonia?

Esaki a sosodé djis despues di morto di e apòstelnan. Na e tempu ei, un grupo di klero a kuminsá aparesé. Iglesia i Estado a kuminsá promové kristianismo apóstata i a purba di stroba e mensahe ku kristiannan ungí, semehante na trigu, tabata proklamá. Pero den e dékadanan promé ku 1914, e ungínan a kuminsá sali for di Babilonia.—w16.11, pág. 23-25.

Dikon e trabou di Lefèvre d’Étaples tabata importante?

Durante e dékada di 1520, Lefèvre a tradusí Beibel na franses i a hasié disponibel pa hende komun. Su manera di splika e pasashinan bíbliko tabatin influensia riba Martin Luther, William Tyndale i John Calvin.—wp16.6, pág. 10-12.

Kiko ta e diferensia entre “mente fihá riba karni” i “mente fihá riba spiritu”? (Rom 8:6)

Hende ku tin nan mente fihá riba karni ta enfoká riba e deseonan i tendensianan di e karni imperfekto, i konstantemente ta glorifiká i papia di e kosnan di e karni. Esei ta hiba na morto. Un persona ku mente fihá riba spiritu ta laga su bida drei rònt di kosnan relashoná ku Dios i su pensamentunan. E kristian ei ta laga spiritu santu dirigié i lo e haña bida i pas.—w16.12, pág. 15-17.

Ki ta algun manera práktiko pa aliviá ansiedat?

Pone prioridat, sea realístiko, traha tempu pa relahá tur dia, disfrutá di Dios su kreashon, mantené un bon sentido di humor, hasi ehersisio regularmente i sosegá bon.—w16.12, pág. 22-23.

Kon “Enok a ser transferí pa e no mira morto”? (Heb. 11:5)

Ta parse ku Dios a transferí Enok na un manera suave di bida pa morto sin ku el a ripará ku e tabata muriendo.—wp17.1, pág. 12-13.

Dikon ainda ta importante pa nos ta modesto?

Un hende modesto no ta pensa demasiado di su mes i ta konsiente di su limitashonnan. Nos mester pensa riba kon nos manera di komportá nos mes por afektá otro hende i no tuma nos mes muchu na serio.—w17.01, pág. 18.

Ki prueba tin ku Dios a dirigí e kuerpo gobernante den promé siglo, meskos ku e ta dirigiendo e Kuerpo Gobernante awe?

Ku yudansa di spiritu santu, e kuerpo gobernante a komprondé e bèrdatnan di Beibel. Ku yudansa di angel, nan a supervisá e trabou di prediká i a dependé riba e Palabra di Dios ora nan tabatin ku duna guia. E pruebanan akí ta konta pa nos tempu tambe.—w17.02, pág. 26-28.

Kiko ta yuda nos mira e reskate komo algu presioso?

Tin kuater faktor: Ken a duna e reskate, dikon el a dun’é, ki sakrifisio tabata enbolbí i ki nesesidat esaki a yena. Nos mester meditá riba e faktornan ei.—wp17.2, pág. 4-6.

Un kristian por kambia un desishon ku el a tuma kaba?

Nos mester kumpli ku nos palabra. Pero, tin biaha ta nesesario pa nos rekonsiderá nos desishon. Despues ku e hendenan di Nínive a arepentí, Dios a kambia su desishon. Tin biaha, kambio di sirkunstansia òf informashon nobo por pone ku nos tin ku hasi meskos.—w17.03, pág. 16-17.

Dikon hasimentu di redu ta malu?

E por hasi ku un problema ta sali for di man i bira pió. Sea ku nos tin rason òf nò, ora nos ta papia malu di otro hende, esei nunka lo no mehorá e asuntu.—w17.04, pág. 21.