BO TA bou di atake! Bo enemigu prinsipal, Satanas, ta usa un arma peligroso kontra bo. Kiko e ta usa? Ideanan engañoso! Un arma spesialmente diseñá pa ataká bo mente.

Apòstel Pablo tabata sa kon peligroso e ideanan engañoso di Satanas ta, pero no ta tur kristian tabata alerta pa esei. Por ehèmpel, aparentemente algun ruman na Korinto a kuminsá konfia demasiado den nan mes i a pensa ku nan tabata asina fuerte den e bèrdat ku nunka nan no por a kai. (1 Kor. 10:12) Ta pa e motibu akí Pablo a spièrta e rumannan, bisando: “Mi tin miedu ku di un manera òf otro, meskos ku e kolebra a gaña Eva ku su astusia, boso mente tambe lo por ser korumpí i asina desviá for di e sinseridat i puresa ku Kristu meresé.”—2 Kor. 11:3.

E echo ku Pablo tabata hopi preokupá ku e asuntu akí ta mustra ku nos no por ta satisfecho ku nos mes. Pa bo evitá ku e ideanan engañoso di Satanas ta daña bo mente, bo mester rekonosé kon peligroso nan ta i protehá bo mes di nan.

KON PELIGROSO IDEANAN ENGAÑOSO TA?

Kiko ta ideanan engañoso? Esei ta informashon ku ta diseñá pa gaña hende i manipulá nan manera di pensa i hasi. Algun hende ta kompará ideanan engañoso ku “mentira, malisia, engaño, manipulashon, brainwash i guera mental i emoshonal” i ta konektá e ideanan akí ku “táktikanan korupto, perhudisial i inhustu.”—Propaganda and Persuasion.

Kon peligroso ideanan engañoso ta? Nan ta manera gas venenoso ku ta invisibel, sin holó i ku gradualmente ta  influensiá nos manera di pensa sin ku nos ripará. Sosiólogo Vance Packard, a opservá: “Hopi di nos ta ser influensiá i manipulá mas ku nos ta kere.” Segun un otro eksperto, bou di e influensia akí, “fásilmente [hende] ta kometé e lokuranan di mas teribel,” manera ‘genosidio, guera, odio rasial, intoleransia religioso i hopi otro tipo di kosnan irashonal.’—Easily Led—A History of Propaganda.

Pues awor, si hende mes por gaña nos ku nan informashon engañoso, kiko Satanas por logra? El a opservá komportashon di hende for di prinsipio. Beibel ta bisa ku “henter mundu” ta den su poder. Satanas por usa kualke parti di su mundu pa plama su mentiranan. (1 Huan 5:19; Huan 8:44) Satanas ta asina bon den “siega mente” di hende ku awor e ta “gaña henter e tera habitá.” (2 Kor. 4:4; Rev. 12:9) Kon bo por rechasá su ideanan engañoso?

PREPARÁ BON PA DEFENDÉ BO MES

Hesus a duna un bèrdat simpel pa kombatí e mentiranan di Satanas, ora el a bisa: “Konosé e bèrdat, i e bèrdat lo hasi boso liber.” (Huan 8:31, 32) Pero komo ku bèrdat ta un di e promé víktimanan, abo, meskos ku kualke otro sòldá den furor di bataya, mester di informashon konfiabel pa stroba enemigunan di engañá bo. Yehova a duna nos esaki, i den e páginanan di Beibel, bo por haña tur informashon ku bo mester pa bo por bringa kontra e mentiranan di Satanas.—2 Tim. 3:16, 17.

Pero klaru, Satanas sa esaki. P’esei e ta usa su sistema pa desanimá hende di lesa i studia Beibel. No kai den su trampa! (Efe. 6:11) Bo mester bira “kompletamente kapas pa komprondé plenamente” e bèrdat. (Efe. 3:18) Esei lo eksigí hopi esfuerso di bo. Pero kòrda riba e bèrdat básiko akí ku outor Noam Chomsky a bisa: “Niun hende no ta bai hinka e bèrdat den bo mente. Esei ta algu ku bo mes tin ku buska pa sa.” Pues “buska pa sa” i ser diligente den “analisá e Skritura tur dia.”—Echo. 17:11.

Pa bo evitá ku e ideanan engañoso di Satanas ta daña bo mente, bo mester rekonosé kon peligroso nan ta i protehá bo mes di nan

Tene na mente ku Satanas no ke pa bo pensa kla ni rasoná bon riba asuntunan. Dikon? Segun un obra di konsulta, ideanan engañoso “ta funshoná mihó si hende . . .  ta ser desanimá pa pensa lógiko.” (Media and Society in the Twentieth Century) Pues nunka no keda satisfecho i aseptá tur loke bo ta tende. (Pro. 14:15) Bo mester usa e abilidatnan ku Dios a duna bo i bo kapasidat di pensa pa hasi e bèrdat di bo mes.—Pro. 2:10-15; Rom. 12:1, 2.

KEDA UNÍ

Ekspertonan ku ta plania strategia militar ta usa mentira pa hinka miedu den e sòldánan enemigu i kita nan gana di bringa. Nan por pone sòldá enemigu bringa otro òf gaña nan pa apartá nan mes for di e ehérsito. Supuestamente un general aleman a atmití ku un motibu pakiko Alemania a pèrdè Promé Guera Mundial tabata pasobra hende “a ser hipnotisá pa medio di mentira di parti di e enemigu, manera un kolebra ta hipnotisá un konènchi.” Satanas ta usa trikinan similar pa dividí nos, por ehèmpel, e ta purba di instigá pleitu i desakuerdo entre rumannan òf ta purba di laga rumannan isolá nan mes pa motibu ku nan ta pensa ku Yehova su organisashon a kometé un inhustisia kontra nan.

No lag’é gaña bo! Laga e Palabra di Dios guia bo. Por ehèmpel, pa mantené union entre rumannan, Beibel ta animá nos pa nos sigui “pordoná otro libremente” i pa ta lihé den resolvé desakuerdo. (Kol. 3:13, 14; Mat. 5:23, 24) Beibel ta spièrta tambe pa nos no isolá nos mes for di e kongregashon. (Pro. 18:1) Analisá bo mes i wak kon fuerte bo defensa kontra Satanas su mentiranan ta. Puntra bo mes: ‘Kon mi a reakshoná e último biaha ku un ruman a faya kontra mi? Mi a reakshoná na un manera ku a agradá Dios òf Satanas?’—Gal. 5:16-26; Efe. 2:2, 3.

NO LAGA BO KONFIANSA MENGUA

Un sòldá ku kuminsá deskonfiá su lider lo no bringa bon. Hende ku ta trata di persuadí otronan mediante mentira i engaño ta purba di kibra e laso di konfiansa entre un sòldá i su lider. Nan por usa lemanan manera: “Bo no por konfia bo lider!” i “No lag’é hiba bo na desaster!” I pa hasi kos pió, na un manera astuto, nan por hasi mal uso di kualke fayo ku e lider por hasi. Satanas tambe ta hasi esaki. E ta sigui purba di  debilitá bo konfiansa den hende ku Yehova ta usa pa dirigí su pueblo.

Kiko ta bo defensa? Sea determiná pa keda pegá ku e organisashon di Yehova i apoyá e rumannan ku ta dirigí apesar di nan imperfekshon. (1 Tes. 5:12, 13) No “pèrdè kabes muchu lihé” ora bo enfrentá loke ta parse atakenan di apóstata òf di otro gañadónan, maske loke nan bisa por parse bèrdat. (2 Tes. 2:2; Tito 1:10) Sigui e konseho ku e hóben Timoteo a haña, esta, pega na e bèrdat ku bo a siña i kòrda unda bo a siñ’é. (2 Tim. 3:14, 15) Siguramente tin hopi evidensia ku ta demostrá ku bo por konfia den e medio ku Yehova ta usando pa kasi shen aña kaba pa guia nos den e kaminda di e bèrdat.—Mat. 24:45-47; Heb. 13:7, 17.

NO TENE MIEDU

Tene na mente ku tin biaha, Satanas ta ataká nos mas direktamente. Tin bes e ta trata di hinka miedu den nos, “usando asina un di e formanan di mas bieu di mentira i engaño.” (Easily Led—A History of Propaganda) Por ehèmpel, un profesor britániko ku yama Philip M. Taylor a skirbi ku e asirionan tabata dominá nan enemigunan usando “un táktika di teror kombiná ku mentira i engaño.” Satanas lo usa miedu di hende, miedu di persekushon, miedu di morto i kualke otro sorto di miedu pa purba di dominá bo i pone bo stòp di sirbi Yehova.—Isa. 8:12; Yer. 42:11; Heb. 2:15.

No laga Satanas usa miedu pa debilitá bo determinashon òf kibra bo integridat. Hesus a bisa: “No tene miedu di esnan ku ta mata e kurpa i despues di esaki no por hasi nada mas.” (Luk. 12:4) Tene pleno konfiansa den Yehova su promesa pa protehá bo, pa duna bo “e poder ku ta surpasá esun di hende” i pa yuda bo kontra tur loke por duna bo miedu i laga bo entregá.—2 Kor. 4:7-9; 1 Ped. 3:14.

Ta klaru ku lo bo por enfrentá situashonnan ku por duna bo miedu i kibra bo determinashon. Pero kòrda ki animashon Yehova a duna Hosue: “Sea fuerte i tene kurashi! No tembla ni desmayá, pasobra SEÑOR bo Dios ta ku bo unda ku bo bai.” (Hos. 1:9) Si ansiedat poderá di bo, hasi orashon na Yehova mesora i kont’é tur bo preokupashonnan. Bo por tin sigur ku ‘e pas di Dios lo protehá bo kurason i bo mente’ pa asina bo por tin e forsa pa rechasá Satanas su mentira i engaño.—Flp. 4:6, 7, 13.

Bo ta kòrda e palabranan engañoso ku e mensahero asirio Rabsakes a usa kontra e pueblo di Dios? Ku otro palabra el a bisa: ‘Nada no por protehá boso for di Asiria. Ni boso Dios, Yehova, no por hasi nada pa boso.’ El a asta tribi di bisa: ‘Yehova mes a bisa nos pa destruí e pais.’ Kon Yehova a respondé? El a bisa: “No laga e palabranan ku bo a tende, ku kualnan e sirbidónan di rei di Asiria a blasfemá mi, spanta bo.” (2 Rei. 18:22-25; 19:6) Despues Yehova a manda un angel destruí 185.000 asirio den ún anochi.—2 Rei. 19:35.

SEA SABÍ I SEMPER SKUCHA YEHOVA

Bo a yega di wak un pelíkula kaminda un hende no ta ripará ku nan ta hink’é den trampa? Bo a pensa den bo mes: ‘No ker’é! Nan a gaña bo!’ Awor imaginá bo kon e angelnan ta grita e mesun mensahe na abo: “No kere Satanas su mentiranan!”

Pues, sera bo orea pa bo no tende Satanas su palabranan engañoso. (Pro. 26:24, 25) Skucha Yehova i konfia den dje den tur loke bo ta hasi. (Pro. 3:5-7) E ta stima bo i ta animá bo pa: “Sea sabí, mi yu, i hasi mi kurason kontentu.” (Pro. 27:11) Asina lo bo protehá bo mente i gana e bataya!