“Bendishoná ta e nashon ku su Dios ta SEÑOR, e pueblo ku el a skohe pa su propio herensia.”—SAL. 33:12.

KANTIKA: 40, 50

1. Dikon nos por bisa ku Yehova ta doño di tur kos? (Wak e promé plachi.)

YEHOVA ta doño di tur kos! Na dje “ta pertenesé shelu i e shelu di shelunan, tera i tur loke tin den dje.” (Deu. 10:14; Rev. 4:11) Anto komo ku ta Yehova a krea hende, nos tambe ta pertenesé na dje. (Sal. 100:3) Sinembargo, atraves di historia, Yehova a skohe sierto grupo di hende pa pertenesé na dje na un manera spesial.

2. Ken Beibel ta bisa ta pertenesé na Yehova na un manera spesial?

2 Por ehèmpel, Salmo 135 ta bisa ku e fiel sirbidónan di Yehova di Israel di antigwedat tabata “su tesoro pekuliar,” òf spesial. (Sal. 135:4) Ademas, e buki di Oséas a profetisá ku algun hende ku no tabata israelita lo a bira parti di e pueblo di Yehova. (Osé. 2:23) E profesia ei a kumpli ora ku Yehova a inkluí hende ku no tabata hudiu entre esnan skohí pa reina huntu ku Kristu. (Echo. 10:45; Rom. 9:23-26) E “nashon santu” ei ta Yehova su “propiedat spesial” na un manera sobresaliente, pasobra su miembronan a ser ungí ku spiritu santu i skohí pa biba den shelu. (1 Ped. 2:9, 10) Pero, mayoria di kristian fiel awe tin e speransa di biba pa semper riba tera. Kiko di nan? Wèl, Yehova ta yama nan  tambe su “pueblo” i su “skohínan.”—Isa. 65:22.

3. (a) Ken awe tin un amistat spesial ku Yehova? (b) Kiko nos lo analisá den e artíkulo akí?

3 Awe, e “tou chikitu,” ku tin e speransa di biba den shelu, ta sirbi Yehova den union komo “ún tou,” huntu ku ‘e otro karnénan,’ ku tin e speransa di biba riba tera. (Luk. 12:32; Huan 10:16) No tin duda ku nos ke demostrá Yehova ku nos ta masha gradisidu pa e amistat spesial ei ku e ta permití nos tin kuné. E artíkulo akí lo analisá vários manera ku nos por demostr’é nos gratitut pa e onor spesial akí.

NOS TA DEDIKÁ NOS BIDA NA YEHOVA

4. Ki ta un manera ku nos por gradisí Yehova pa nos amistat spesial kuné, i kon Hesus tambe a hasi esei?

4 Un manera ku nos ta demostrá nos apresio na Yehova ta ora nos dediká nos bida na dje. Ora nos batisá, nos ta rekonosé formalmente dilanti di tur hende ku Yehova a bira nos doño i ku nos ke hasi su boluntat. (Heb. 12:9) Hesus tambe a hasi esei. Ora el a batisá tabata komo si fuera el a bisa Yehova: “Pa hasi bo boluntat, o mi Dios, ta un delisia pa mi.” (Sal. 40:7, 8) Hesus a presentá su mes pa hasi e boluntat di Dios, aunke for di su nasementu e tabata forma parti di un nashon dediká na Yehova.

5, 6. (a) Kon Yehova a sintié ora Hesus a batisá? (b) Duna un ehèmpel pa mustra kon Yehova ta sintié ora nos dediká nos mes na dje.

5 Kon Yehova a sintié ora Hesus a batisá? Beibel ta bisa: “Despues ku Hesus a batisá, el a sali mesora for di awa, i shelu a habri, i Huan a mira e spiritu di Dios baha riba dje manera un palomba. Ademas, tabatin un stèm for di shelu ku a bisa: ‘Esaki ta mi Yu stimá, esun ku tin mi aprobashon.’” (Mat. 3:16, 17) Hesus ya tabata pertenesé na Yehova, tòg Yehova a keda masha kontentu di mira ku su Yu tabata dispuesto pa usa su bida pa sirbi é so. Asina tambe Yehova ta keda masha kontentu ora nos dediká nos bida na dje, i lo e bendishoná nos.—Sal. 149:4.

6 At’akí un ehèmpel pa mustra kon Yehova ta sintié: Imaginá ku un hòmber a planta hopi flor bunita den su hardin. Un dia, su yu muhé chikitu ta kita un flor i ta dun’é e flor komo regalo. Maske tur e flornan ta di e tata, e ta keda masha kontentu ku su yu a dun’é e flor ei komo muestra di su amor. Sin duda, pa e tata, esei ta e flor di mas bunita den henter su hardin. Asina tambe Yehova ta keda masha kontentu ora nos disidí di dediká nos bida na dje i sirbi é so.—Éks. 34:14.

7. Kon Malakías ta yuda nos komprondé kiko Yehova ta sinti pa hende ku ta sirbié di buena gana?

7 Lesa Malakías 3:16. Pero dikon ta asina importante pa bo dediká bo bida na Yehova i batisá? Ta bèrdat ku bo ta pertenesé na Yehova for di ora bo nase, meskos ku tur otro hende. Ma ta ora bo dediká bo mes na Yehova, bo ta demostrá bon kla ku bo ta asept’é komo bo Rei i ku bo ke hasi su boluntat. Pensa un ratu kon kontentu Yehova lo sintié ora bo hasi esei. (Pro. 23:15) Yehova, na su turno, konosé tur hende ku ta sirbié di buena gana, i e ta skirbi nan nòmber den su “buki di memoria.”

8, 9. Kiko Yehova ta ferwagt di hende ku nan nòmber ta skirbí den su “buki di memoria”?

8 Pero tin sierto rekisito ku nos tin ku kumpli kuné pa Yehova skirbi nos nòmber den su “buki di memoria.” Malakías  a bisa spesífikamente ku nos tin ku ‘teme Yehova i onra su nòmber [òf, “meditá riba su nòmber,” NW].’ Si nos ta adorá kualke otro kos òf persona ku no ta Yehova, lo e kita nos nòmber for di e buki di bida.—Éks. 32:33; Sal. 69:28.

9 Pues, nos dedikashon na Yehova ta enserá mas ku djis primintié di hasi su boluntat i despues batisá. E kosnan ei nos ta hasi un biaha so, i djis despues nan ta bira kos di pasado. Pero nos ta pone nos mes na Yehova su banda i ta su sirbidó ora ku tur dia nos ta demostrá ku echo ku nos ta obedes’é, tantu awor komo den futuro, pa restu di nos bida.—1 Ped. 4:1, 2.

NOS TA RECHASÁ E DESEONAN DI MUNDU

10. Ki diferensia bisto mester tin entre hende ku ta sirbi Yehova i esnan ku no ta sirbié?

10 Den e artíkulo anterior, nos a analisá e relatonan bíbliko di Kain, Sálomon i e israelitanan. Nan tur a bisa ku nan ta adorá Yehova, pero nan echonan a demostrá ku nan no tabata adorá é so. E ehèmpelnan ei ta mustra klaramente ku hende ku di bèrdat ta pertenesé na Yehova mester mustra bon kla ku nan ta odia loke ta malu i ta stima loke ta bon. (Rom. 12:9) Despues ku Malakías a menshoná e “buki di memoria,” Yehova a bisa ku lo tin un diferensia bisto “entre e hustu i e malbado, entre un ku ta sirbi Dios i un ku no ta sirbié.”—Mal. 3:18.

11. Dikon mester ta bisto pa otro hende ku ta Yehova so nos ta adorá?

11 Un otro manera ku nos por demostrá nos apresio na Yehova pa e echo ku el a skohe nos komo su pueblo ta: ‘Tur hende mester por mira bon kla’ ku nos ta hasi progreso spiritual. (1 Tim. 4:15; Mat. 5:16) Puntra bo mes: ‘Otro hende por mira ku mi ta kompletamente leal na Yehova? Mi ta buska chèns pa laga hende sa ku mi ta un Testigu di Yehova?’ Yehova lo keda masha tristu si despues ku el a skohe nos pa forma parti di su pueblo nos tin bèrgwensa di bisa  hende ku nos ta pertenesé na dje.—Sal. 119:46; lesa Marko 8:38.

Nos manera di biba ta demostrá bon kla ku nos ta un Testigu di Yehova? (Wak paragraf 12, 13)

12, 13. Dikon no ta fásil pa identifiká algun Testigu komo sirbidó di Yehova?

12 Ta tristu pa bisa, pero tin algun Testigu ta imitá “e spiritu di mundu,” i p’esei nan no ta masha diferente for di hende ku no ta sirbi Dios. (1 Kor. 2:12) “E spiritu di mundu” ta pone hende konsentrá riba nan propio ‘deseonan di karni.’ (Efe. 2:3) Por ehèmpel, apesar di tur e konsehonan ku nos ta haña, tin ruman ainda ta skohe pa bisti na un manera inmodesto. Nan ta bisti paña pèrtá i sunú, asta ora nan ta bai reunion. Òf nan kabei ta pelá òf peñá na stailnan ekstrabagante. (1 Tim. 2:9, 10) Komo resultado, ora nan ta ku otro hende, ta difísil pa sa ken ta pertenesé na Yehova i ken ta “amigu di mundu.”—Sant. 4:4.

13 Tin otro maneranan ku algun Testigu ta demostrá ku nan no a rechasá e komportashon di mundu firmemente. Por ehèmpel, na reunionnan sosial, nan komportashon i manera di baila ta inaseptabel pa kristian. Òf riba retnan sosial nan ta pone sierto potrèt di nan mes i komentario ku no ta pas pa personanan spiritual. Kisas nan no a kometé un piká grave i haña disiplina den kongregashon, pero nan por ta un mal influensia pa e rumannan ku ta hasi esfuerso pa mantené un kondukta ekselente.—Lesa 1 Pedro 2:11, 12.

No laga hende ku no ta kompletamente na e banda di Yehova influensiá bo

14. Kiko nos mester hasi pa protehá e amistat spesial ku nos tin ku Yehova?

14 Tur kos den mundu ta konsentrá riba “deseo di karni, deseo di wowo i kana broma ku loke bo tin.” (1 Huan 2:16) Pero komo ku nos ta pertenesé na Yehova, nos ta “rechasá tur loke ta kontra boluntat di Dios i tambe deseonan mundano, i . . . biba ku sano huisio, hustisia i deboshon na Dios den e tempu akí.” (Tito 2:12) Tur kos ku nos ta hasi—nos manera di papia, nos kustumbernan di kome i di bebe, nos paña i areglo personal i nos manera di traha—mester laga hende ku ta opservá nos mira ku nos ta pertenesé na Yehova.—Lesa 1 Korintionan 10:31, 32.

 NOS TA “STIMA OTRO INTENSAMENTE”

15. Dikon nos mester trata nos rumannan ku amor i bondat?

15 Nos ta demostrá kuantu nos ta apresiá e amistat spesial ku nos tin ku Yehova na e manera ku nos ta trata nos rumannan. Nan tambe ta pertenesé na Yehova. Si nos keda tene esei na mente, nos lo trata nos rumannan semper ku amor i bondat. (1 Tes. 5:15) Hesus a bisa su siguidónan: “Na esaki tur hende lo sa ku boso ta mi disipelnan, esta, si boso ta stima otro.”—Huan 13:35.

16. Ki ehèmpel basá riba e Lei di Moises ta demostrá loke Yehova ta sinti pa su sirbidónan?

16 Laga nos wak un ehèmpel ku por yuda nos komprondé kon nos mester trata otro den kongregashon. E artíkulonan di uso di e tèmpel di Yehova tabata dediká, òf apartá, pa ser usá pa adorashon puru so. E Lei di Moises a splika en detaye kon e levitanan mester a kuida e artíkulonan akí, i ken ku no a sigui e instrukshonnan akí mester a ser matá. (Num. 1:50, 51) Pensa un ratu: Si pa Yehova tabata asina importante pa hende trata e ophetonan ei sin bida ku rèspèt, lo ta muchu mas importante ainda p’e pa hende trata su sirbidónan dediká i leal bon! Nos ta balioso pa Yehova. P’esei, el a bisa ku ‘esun ku mishi ku boso ta mishi ku mi pret’i wowo.’—Zak. 2:8.

17. Na kiko Yehova ta ‘presta atenshon i tende’?

17 Ta interesante ku Malakías a bisa ku Yehova ta ‘presta atenshon i tende’ kon su sirbidónan ta papia ku otro. (Mal. 3:16) Sí, “Yehova konosé esnan ku ta pertenesé na dje.” (2 Tim. 2:19) E ta bon na haltura di delaster un kos ku nos ta papia i hasi. (Heb. 4:13) Yehova ta tuma nota ora ku nos no ta bondadoso ku nos rumannan. Pero tambe nos por tin sigur ku e ta tuma nota ora nos ta hospitalario, generoso i bondadoso ku otro, i tambe kla pa pordoná otro.—Heb. 13:16; 1 Ped. 4:8, 9.

YEHOVA “NO TA BANDONÁ SU PUEBLO”

18. Kon nos por demostrá apresio pa e onor di ta parti di e pueblo di Yehova?

18 Sin duda, nos ta ansioso pa demostrá nos apresio na Yehova pa e onor di ta parti di su pueblo. Nos sa ku e mihó desishon ku nos por a tuma tabata di dediká nos bida na dje i asina rekonosé ku é ta nos doño. Aunke nos ta biba “meimei di un generashon trosí i pèrvèrso,” nos ke pa hende mira ku nos ta “inosente i ireprochabel” i ku nos “ta bria komo kargadó di lus den mundu.” (Flp. 2:15) Nos ta rechasá maldat por kompleto. (Sant. 4:7) I nos ta stima i respetá nos rumannan, pasobra nan tambe ta pertenesé na Yehova.—Rom. 12:10.

19. Kon Yehova ta rekompensá hende ku ta pertenesé na dje?

19 Beibel ta primintí: “SEÑOR no ta bandoná su pueblo.” (Sal. 94:14) Maske kiko lo por pasa ku nos, e promesa akí ta sigur. Ni sikiera morto no por stroba Yehova di stima nos. (Rom. 8:38, 39) “Si nos ta biba, nos ta biba pa Yehova, i si nos muri, nos ta muri pa Yehova. P’esei, sea ku nos biba òf nos muri, nos ta pertenesé na Yehova.” (Rom. 14:8) Nos ta anhelá pa e dia yega ora ku Yehova lo resusitá tur su amigunan leal ku a muri. (Mat. 22:32) For di awor kaba nos ta disfrutá di hopi bendishon. Manera Beibel ta bisa: “Bendishoná ta e nashon ku su Dios ta SEÑOR, e pueblo ku el a skohe pa su propio herensia.”—Sal. 33:12.