“Dios no ta inhustu pa lubidá boso trabou i e amor ku boso a mustra pa su nòmber.”—HEB. 6:10.

KANTIKA: 39, 30

1. Ki deseo nos tur tin, i kiko esaki ta enserá?

KON lo bo sinti ora un hende ku bo konosé i ta respetá lubidá bo nòmber, òf pió ainda, no ta rekonosé bo? Algu asina por ta masha desanimante. Dikon? Pasobra di naturalesa, nos tur tin e deseo pa hende aseptá nos. Pero nos no ke pa hende djis kòrda ken nos ta. Mas bien, nos ke tambe pa nan rekonosé e klase di persona ku nos ta i loke nos a logra.—Num. 11:16; Yòb 31:6.

2, 3. Kiko por pasa ku nos deseo pa ser balorá, i dikon? (Wak e promé plachi.)

2 Sinembargo, meskos ku kualke otro deseo, nos deseo pa ser balorá por bira desbalansá debí na nos imperfekshon. Ademas, e mundu di Satanas por lanta den nos e deseo pa ta importante i famoso. Si esei sosodé, nos no por duna Yehova, nos Tata selestial, e onor i adorashon ku e meresé.—Rev. 4:11.

3 Den tempu di Hesus, algun lider religioso tabatin un punto di bista robes enkuanto rekonosementu. Hesus a  spièrta su disipelnan bisando: “Tene kuidou ku e eskribanan; nan gusta kana rònt den paña largu i pa hende kumindá nan ku rèspèt riba plasa; nan gusta stul te dilanti den snoa i e lugánan di mas prominente na bankete.” El a agregá: “Esakinan lo risibí un huisio mas pisá.” (Luk. 20:46, 47) Na kontraste, Hesus a elogiá un biuda den nesesidat ku a hasi un kontribushon chikitu ku kisas otro hende no a balorá. (Luk. 21:1-4) Ta bisto anto ku Hesus su punto di bista enkuanto rekonosementu tabata masha diferente for di esun di otro hende. E artíkulo akí lo yuda nos keda ku e punto di bista korekto, esta, esun ku Yehova Dios ta aseptá.

E REKONOSEMENTU DI MAS IMPORTANTE

4. Kiko ta e rekonosementu di mas importante ku un hende por haña, i dikon?

4 Kiko ta e rekonosementu di mas importante ku un hende por haña? E rekonosementu ei no ta un diploma di enseñansa superior ni éksito den negoshi ni fama den e mundu di entretenimentu. Al kontrario, e ta loke Pablo a deskribí, ora el a bisa: “Awor ku boso a siña konosé Dios, òf mas bien, awor ku Dios konosé boso, kon boso por bai bèk na e kosnan débil i básiko ku no ta bal nada, i boso ke traha manera esklabo pa nan atrobe?” (Gal. 4:9) Ki un bunita privilegio: Nos por ta konosí pa Dios, e Gobernante Supremo di universo. Yehova ke pa nos tin un bon relashon kuné. Ora e aseptá nos komo su amigu, nos ta logra e propósito di nos bida.—Ekl. 12:13, 14.

5. Kiko nos mester hasi pa Dios konosé nos?

5 Esei tabata e kaso ku Moises. Ora el a supliká Yehova pa lag’é konosé Su kamindanan mas mihó, Yehova a respond’é: “Tambe e kos akí di kual bo a papia, lo mi hasi, pasobra bo a haña grasia den mi bista i mi a konosé bo pa nòmber.” (Éks. 33:12-17) Nos tambe por haña maravioso bendishon ora Yehova konosé nos personalmente. Pero kiko nos mester hasi pa Dios konosé nos, òf konsiderá nos komo su amigu? Nos mester stim’é i dediká nos bida na dje.—Lesa 1 Korintionan 8:3.

6, 7. Kiko por pone nos pèrdè nos relashon ku Yehova?

6 Sinembargo, nos mester kuida nos relashon ku nos Tata den shelu. Meskos ku e kristiannan na Galasia, nos mester evitá di traha komo esklabo pa “e kosnan débil i básiko ku no ta bal nada” di e mundu akí, manera fama i éksito. (Gal. 4:9) E kristiannan ei a progresá te na e punto ku Dios tabata konosé nan. Pero, Pablo a bisa ku e mesun rumannan akí tabata “bai bèk” na e kosnan sin balor. Ku otro palabra, Pablo a puntra nan: “Despues ku boso a yega asina leu, dikon boso lo bai bèk na e kosnan inútil i sin balor ku boso a laga atras?”

7 Esei por sosodé ku nos awe? Sí. Ora nos a konosé e bèrdat, hopi di nos kisas a hasi manera Pablo. Nos a bandoná tur kos ku por a duna nos prominensia den e mundu di Satanas. (Lesa Filipensenan 3:7, 8.) Podisé nos a nenga di sigui enseñansa superior, nos a rechasá un bon trabou òf un oportunidat di gana mas plaka. Nos talentonan musikal òf abilidatnan atlétiko por a duna nos fama i hopi sèn, pero nos a bandoná tur e kosnan ei. (Heb. 11:24-27) Lo ta un bobedat pa lamentá e desishonnan sabí ei i pensa ku nos a pèrdè bon oportunidat. Pensamentu asina por laga nos bai bèk  na e kosnan di mundu, ku ántes nos tabata konsiderá komo kos “débil i básiko ku no ta bal nada.”

SEA DESIDIDU

8. Kiko por yuda nos fortalesé nos determinashon pa haña Yehova su aprobashon?

8 Kon nos por fortalesé nos determinashon pa sigui buska Yehova su aprobashon i no esun di mundu? Pa nos por logra esaki, nos mester kòrda dos faktor importante. Promé, Yehova semper ta duna su aprobashon na hende ku ta sirbié fielmente. (Lesa Hebreonan 6:10; 11:6) Yehova ta balorá kada un di su sirbidónan. I pa e, lo e ta “inhustu” si e ignorá esnan ku ta fiel na dje. Yehova semper “konosé esnan ku ta pertenesé na dje.” (2 Tim. 2:19) E “konosé e kaminda di e hustunan” i sa kon pa libra nan for di prueba.—Sal. 1:6; 2 Ped. 2:9.

9. Duna ehèmpel ku ta mustra kon Yehova a demostrá ku su pueblo tabatin su aprobashon.

9 Na algun okashon, Yehova a demostrá na un manera asombroso ku su pueblo tabatin su aprobashon. (2 Kró. 20:20, 29) Tuma por ehèmpel e manera ku Yehova a salba su pueblo na Laman Kòrá ora ku Fárao su ehérsito poderoso tabata persiguí nan. (Éks. 14:21-30; Sal. 106:9-11) E suseso ei tabata asina espektakular ku, mas o ménos 40 aña despues, ainda hende ku tabata biba na e parti di mundu ei tabata papia di dje. (Hos. 2:9-11) Ta bon pa nos kòrda kon Yehova a demostrá su amor i poder den pasado, pasobra pronto nos lo haña nos ku e atake di Gòg di Magòg. (Eze. 38:8-12) E tempu ei, nos lo ta masha gradisidu ku nos a buska e aprobashon di Dios i no esun di mundu.

10. Ki otro faktor nos mester tene na mente?

10 E di dos faktor importante ku nos mester tene na mente ta: Yehova por duna nos su aprobashon den maneranan ku nos no ta spera. Hende ku ta hasi bon obra djis pa otronan mira, lo no haña rekompensa serka Yehova. Dikon nò? Pasobra, manera Hesus a bisa, nan ta haña nan rekompensa kaba ora otro hende ta elogiá nan. (Lesa Mateo 6:1-5.) Di otro banda, Yehova, kende “den sekreto ta mira,” ta mira esnan ku no ta haña rekonosementu pa e bon obranan ku nan ta hasi. E ta tuma nota di nan obranan i ta rekompensá, òf bendishoná, nan. Sinembargo, tin biaha Yehova ta rekompensá nos na maneranan ku nos no ta spera. Ban wak algun ehèmpel.

UN HÓBEN HUMILDE A HAÑA UN REKOMPENSA KU E NO A SPERA

11. Kon Yehova a demostrá Maria ku e tabatin Su aprobashon?

11 Ora e tempu a yega pa Hesus bini na tera, Yehova a skohe Maria, un hóben bírgen i humilde, pa bira mama di e yu spesial akí. Maria tabata biba na Názarèt, un stat insignifikante ku tabata leu for di Herúsalèm i su bunita tèmpel. (Lesa Lukas 1:26-33.) Dikon Dios a skohe Maria? Angel Gabriel a bisa Maria ku el a “haña aprobashon di Dios.” E kòmbersashon ku Maria tabatin ku su famia Elisabèt a demostrá ku Maria tabata un persona spiritual. (Luk. 1:46-55) Pues, Yehova a opservá Maria, i el a mira ku Maria tabata un persona fiel. P’esei, Maria a haña e privilegio ei ku e no a spera.

12, 13. Kon Hesus a risibí onor ora el a nase i ora su mayornan a hib’é tèmpel?

12 Ora Maria a duna lus na Hesus, Yehova no a laga e funshonarionan òf e  gobernantenan prominente di Herúsalèm i Bètlehèm sa loke a sosodé. Mas bien, el a manda angel pa avisá e humilde wardadónan di karné den kunuku pafó di Bètlehèm. (Luk. 2:8-14) E wardadónan di karné akí a bishitá e yu resien nasí. (Luk. 2:15-17) Siguramente, Maria i Hose mester a keda masha felis di a mira kon Hesus a ser onrá. Yehova su manera di hasi kos ta diferente for di esun di Diabel. Ora Satanas a manda algun astrólogo pa bishitá Hesus i su mayornan, e notisia tokante Hesus su nasementu a pone henter Herúsalèm bira aribabou. (Mat. 2:3) Finalmente, e notisia ei a resultá den morto di hopi mucha inosente.—Mat. 2:16.

13 Kuarenta dia despues ku Hesus a nase, Maria mester a ofresé un sakrifisio na Yehova na e tèmpel di Herúsalèm ku tabata keda mas o ménos nuebe kilometer for di Bètlehèm. (Luk. 2:22-24) Segun ku Maria tabata biaha huntu ku Hose i Hesus, kisas lo el a puntra su mes si e saserdote lo a hasi algu spesial pa onra Hesus. Hesus a haña onor sí, pero no na e manera ku Maria a spera. Mas bien, Yehova a usa Simeon, un hòmber “hustu i temeroso di Dios,” i profeta Ana, un biuda di 84 aña, pa anunsiá ku Hesus lo a bira e Kristu, e Mesías primintí.—Luk. 2:25-38.

14. Ki bendishon Maria a haña di Yehova?

14 Awor kiko di Maria? Yehova a mustra onor na dje pa e echo ku fielmente el a kuida i lanta Hesus? Sí. Dios a laga registrá den Beibel loke Maria a hasi i bisa. Aparentemente, durante Hesus su sirbishi di tres aña i mei, Maria no tabata por a kompañ’é. Kisas, komo ku Maria tabata biuda, e mester a keda Názarèt. Pa e motibu ei, e no por tabata presente na hopi evento importante. Pero Maria por tabata presente sí ora Hesus tabata serka di muri. (Huan 19:26) Despues, Maria tabata huntu ku e disipelnan na Herúsalèm promé ku nan a risibí spiritu santu na Pentekòste. (Echo. 1:13, 14) Pues, kasi sigur e tambe a ser ungí huntu ku e otro disipelnan. Si ta asina, esei ta nifiká ku el a haña e oportunidat di ta huntu ku Hesus pa semper den shelu. Ki un bunita rekompensa pa su sirbishi fiel.

HESUS A HAÑA YEHOVA SU APROBASHON

15. Tempu ku Hesus tabata riba tera, kon Yehova a demostrá ku Hesus tabatin su aprobashon?

15 Hesus no tabata ke onor di e lidernan religioso òf polítiko di su tempu. Pero lo e mester a sintié masha animá ora ku Yehova na tres okashon a papia kuné direktamente for di shelu. Nèt despues di Hesus su boutismo den Riu Hordan, Yehova a bisa: “Esaki ta mi Yu stimá, esun ku tin mi aprobashon.” (Mat. 3:17) Evidentemente, Huan Boutista tabata e úniko otro persona ku a tende e palabranan ei. Mas o ménos ún aña promé ku Hesus a muri, tres di su apòstelnan a skucha Yehova bisa: “Esaki ta mi Yu stimá, esun ku tin mi aprobashon; skuch’é.” (Mat. 17:5) Finalmente, djis un par di dia promé ku Hesus su morto, Yehova a bolbe papia ku su Yu for di shelu.—Huan 12:28.

Kiko bo ta siña for di e manera ku Yehova a demostrá su aprobashon na Hesus? (Wak paragraf 15-17)

16, 17. Kon Yehova a onra Hesus na un manera ku Hesus no a spera?

16 Hesus tabata sa ku hende lo a yam’é un blasfemadó i ku lo el a muri un morto bergonsoso. Apesar di esei, el a pidi pa Yehova su boluntat kumpli i no esun di dje. (Mat. 26:39, 42) Hesus no tabata ke e aprobashon di mundu, sino esun  di su Tata. P’esei, el “a soportá morto na un staka di tormento, sin preokupá ku e bèrgwensa ku esei a trese kuné.” (Heb. 12:2) Kon Yehova a demostrá ku Hesus tabatin su aprobashon?

17 Ora ku Hesus tabata riba tera, el a ekspresá su deseo pa bolbe haña e gloria ku e tabatin tempu ku e tabata den shelu huntu ku su Tata. (Huan 17:5) Pero, no tin ningun indikashon ku Hesus tabata spera mas ku esei. E no a spera di haña un rekompensa spesial pasobra el a hasi Yehova su boluntat riba tera. Pero kiko Yehova a hasi? El a onra Hesus na un manera ku Hesus no a spera: Yehova a resusit’é na “un puesto mas haltu.” Ademas, Yehova a dun’é algu ku te na e momento ei ningun persona no a risibí, esta, bida inmortal den shelu. * (Flp. 2:9; 1 Tim. 6:16) Ki un rekompensa sobresaliente pa Hesus su fieldat!

18. Kiko lo yuda nos evitá di buska aprobashon di e mundu akí?

18 Kiko lo yuda nos evitá di buska aprobashon di e mundu akí? Nos mester tene na mente ku Yehova semper ta demostrá su aprobashon na su sirbidónan fiel i hopi biaha ta rekompensá nan na maneranan ku nan no ta spera. Dios tin hopi rekompensa pa nos den futuro. Mientrastantu, segun ku nos ta perseverá bou di prueba i difikultat den e mundu malbado akí, laga nos semper kòrda ku e mundu akí ta pasa bai huntu ku kualke aprobashon ku e por ofresé nos. (1 Huan 2:17) Nos Tata Yehova, ku ta stima nos, ‘no ta inhustu pa lubidá nos trabou i e amor ku nos ta mustra pa su nòmber.’ (Heb. 6:10) Sí, lo e duna nos su aprobashon den maneranan ku kisas nos no por ni imaginá!

^ par. 17 Kisas esaki tabata un rekompensa ku Hesus no a spera komo ku e Skritura Hebreo no ta menshoná inmortalidat.