“Na bo mi ta halsa mi wowonan, abo, kende ta sintá riba bo trono den e shelunan.”—SAL. 123:1.

KANTIKA: 143, 124

1, 2. Kiko ta enserá fiha nos bista riba Yehova?

NOS ta biba den “tempunan krítiko” ku ta “difísil pa trata kuné” i bida lo bira mas difísil promé ku Yehova trese un mundu nobo kaminda lo tin berdadero pas. (2 Tim. 3:1)Pues, nos ta hasi bon di puntra nos mes: ‘Serka ken mi ta buska yudansa i guia?’ Kisas mesora nos ta kontestá “serka Yehova,” i esei ta e mihó kontesta.

2 Kiko buska yudansa serka Yehova ta enserá? I kon nos por hasi sigur ku nos bista ta keda fihá riba dje segun ku nos ta enfrentá situashonnan difísil i kompliká den bida? Hopi siglo pasá, un salmista a rekonosé ku ta masha importante pa nos fiha nos bista riba Yehova ora nos tin mester di yudansa. (Lesa Salmo 123:1-4.) El a kompará esei ku un sirbidó ku ta fiha su bista riba su shon pa haña yudansa. Kiko e salmista tabata ke men? Wèl, un sirbidó no solamente ta stèns riba su shon pa risibí kuminda i protekshon, sino e ta opservá su shon konstantemente pa diserní kiko ta su deseonan i kon pa kumpli ku nan. Meskos tambe, diariamente nos mester analisá e Palabra di Dios pa nos haña sa kiko ta Yehova su boluntat  pa nos personalmente i pa sigui su guia. E ora ei so nos por tin sigur ku Yehova ta duna nos yudansa ora nos tin mester di dje.—Efe. 5:17.

3. Kiko por stroba nos di fiha nos bista riba Yehova?

3 Aunke nos sa ku nos mester fiha nos bista tur ora riba Yehova pa yudansa, tòg tin bes nos por ser distraí. Esei ta eksaktamente loke a pasa ku Marta, un bon amiga di Hesus. E “tabata okupá ku hopi kos di hasi.” (Luk. 10:40-42) Si algu asina por a sosodé ku un persona fiel ku tabata huntu ku Hesus, no mester sorprendé nos ku esei por sosodé ku nos tambe. Kiko anto por stroba nos di fiha nos bista riba Yehova? Den e artíkulo akí, nos lo analisá kon loke otro hende ta hasi por distraí nos òf stroba nos. Tambe nos lo siña kon pa mantené nos bista fihá riba Yehova.

UN HÒMBER FIEL TA PÈRDÈ SU PRIVILEGIO

4. Dikon nos lo por keda sorprendí ku Moises a pèrdè e privilegio di drenta e Tera Primintí?

4 Moises a fiha su bista riba Yehova pa haña guia. Sí, “el a sigui firme komo si fuera el a mira Esun ku ta invisibel.” (Lesa Hebreonan 11:24-27.) E relato di Beibel ta bisa nos ku “nunka mas a lanta un profeta na Israel manera Moises, kende SEÑOR a konosé kara-kara.” (Deu. 34:10) Pero, maske Moises tabatin un amistat será ku Yehova, tòg el a pèrdè e privilegio di drenta e Tera Primintí. (Num. 20:12) Kiko a pone Moises trompeká?

5-7. Ki problema a surgi djis despues ku e israelitanan a bandoná Egipto, i kon Moises a trata ku e situashon?

5 Ménos ku dos luna despues ku e israelitanan a bandoná Egipto, asta promé ku nan yega Seru Sinaí, un problema serio a surgi. E pueblo a kuminsá keha pa motibu di falta di awa. Nan a murmurá kontra Moises, i e situashon a bira asina serio ku Moises a kuminsá sklama na Yehova, bisando: “Kiko lo mi hasi ku e pueblo akí? Djis akí nan ta piedra mi.” (Éks. 17:4) Yehova a kontestá i a duna Moises instrukshon bon kla. E mester a kohe su bara i dal e baranka na Horèb i awa lo a brota for di dje. Nos ta lesa: “Asina Moises a hasi den bista di e ansianonan di Israel.” E israelitanan a bebe nan barika yen i e problema a ser resolvé.—Éks. 17:5, 6.

6 E relato di Beibel ta bisa nos ku Moises “a yama e lugá Masa i Meriba pa motibu di e pleitu di e yunan di Israel, i pasobra nan a pone SEÑOR na prueba, bisando: ‘SEÑOR ta meimei di nos, sí òf nò?’” (Éks. 17:7) E dos nòmbernan ei ta apropiá pasobra nan ta nifiká “Pone na Prueba” i “Pleita.”

7 Kiko Yehova a pensa tokante loke a sosodé na Meriba? El a mira nan komportashon komo un akshon direkto kontra dje komo nan Dios i no komo djis un rebelion kontra Moises. (Lesa Salmo 95:8, 9.) Klaramente anto, e israelitanan tabata robes. Na e okashon ei, Moises a hasi loke tabata korekto pasobra el a buska Yehova su yudansa i a sigui su guia.

8. Ki problema a surgi serka di fin di e biahe di 40 aña den desierto?

8 Sinembargo, kiko a sosodé ora un situashon similar a surgi un 40 aña despues, kasi na final di nan biahe den desierto? E israelitanan a bolbe haña nan mes na un lugá ku despues a ser yamá Meriba. Pero esaki tabata un sitio diferente, serka di Kades, pegá ku e frontera  di e Tera Primintí. * Un biaha mas e israelitanan a keha pa motibu di falta di awa. (Num. 20:1-5) Pero na e okashon akí, kos a resultá diferente pa Moises.

9. Ki instrukshon Moises a haña, pero kiko el a hasi? (Wak e promé plachi.)

9 Kon Moises a reakshoná na e rebelion ei? Atrobe el a akudí na Yehova pa haña su guia. Pero e biaha akí Yehova no a bisa Moises pa dal e baranka. Dios a bis’é pa e kohe su bara, reuní e pueblo dilanti di e baranka anto papia ku e baranka. (Num. 20:6-8) Sinembargo, Moises no a papia ku e baranka. Mas bien, el a saka su frustrashon i a grita esnan ku tabata pará einan: “Skucha awor, boso rebeldenan; nos mester hasi awa sali for di e baranka akí pa boso?” Anto el a dal e baranka, no un biaha so, sino dos biaha.—Num. 20:10, 11.

10. Kon Yehova a reakshoná?

10 Yehova a rabia ku Moises i a bira furioso. (Deu. 1:37; 3:26) Dikon Yehova a reakshoná asina? E por tabatin di hasi ku algun faktor. Manera nos a menshoná kaba, kisas Yehova a bira indigná pa motibu ku Moises no a sigui e instrukshonnan nobo ku el a risibí.

11. Kon e echo ku Moises a dal e baranka lo por a pone e israelitanan duda si ta Yehova a hasi e milager?

11 Kisas tin un otro motibu. E formashon di baranka den bisindario di e promé Meriba ta un tipo di granit duru. Ni maske kon duru un hende dal granit, niun hende no ta spera pa awa sali for di dje. Sinembargo, e formashon di baranka rònt di e di dos Meriba ta kompletamente diferente i ta konsistí di un kalki mas moli. Ya ku e sorto di kalki ei ta manera sefta, den e áreanan ei tin reservanan di awa bou di tera ku hende por usa. P’esei, ora Moises a dal e baranka ei dos bes e israelitanan por a pensa ku e awa ku a sali for di e baranka tabata for di e reservanan natural i no pasobra Yehova a hasi un milager. Moises a dal e baranka en bes di papia kuné. Esei lo a pone e israelitanan minimisá e fuente di e milager? * Nos no sa sigur.

KON MOISES A REBELDIÁ

12. Pa ki otro motibu Yehova por tabata rabiá ku Moises i Aron?

12 Tin un otro splikashon pakiko Yehova a rabia ku Moises i tambe ku Aron. Tuma nota loke Moises a bisa e pueblo: “Nos mester hasi awa sali for di e baranka akí pa boso?” Ora Moises a usa e palabra “nos,” probablemente el a referí na su mes i Aron. E palabranan ei a indiká un gran falta di rèspèt pa Yehova komo e berdadero Fuente di e milager ei. E posibilidat akí ta parse di ser konfirmá den e palabranan ku nos ta lesa na Salmo 106:32 i 33, ku ta bisa: “Nan a provok’é [Yehova] na rabia na e awanan di Meriba, i pa nan motibu a bai malu ku Moises; pasobra nan a rebeldiá kontra su spiritu, i sin pensa mes el a papia ku su lepnan.” * (Num. 27:14) Loke sea tabata e kaso, Moises su komportashon a minimisá e onor ku Yehova ta meresé. Yehova  a papia ku Moises i Aron i a bisa nan: “Boso a rebeldiá kontra mi òrdu.” (Num. 20:24) Un piká basta serio!

13. Dikon e huisio ku Yehova a apliká den e kaso di Moises tabata apropiá i tambe konsistente?

13 Moises ku Aron a dirigí e pueblo di Yehova i esaki a pone un grado haltu di responsabilidat riba nan. (Luk. 12:48) Manera nos sa, Yehova no a permití henter un generashon di israelita drenta e tera di Kanan pa motibu di nan rebelion. (Num. 14:26-30, 34) Pues ta apropiá i konsistente pa Yehova apliká e mesun huisio den e kaso di rebelion di Moises. Meskos ku e otro rebeldenan, e tampoko no por a drenta e Tera Primintí.

KIKO A KOUSA E PROBLEMA?

14, 15. Kiko a pone Moises rebeldiá?

14 Kiko a pone Moises manifestá un aktitut rebelde asina? Ban analisá un biaha mas loke Salmo 106:32 i 33 ta bisa, esta: “Nan a provok’é na rabia na e awanan di Meriba, i pa nan motibu a bai malu ku Moises; pasobra nan a rebeldiá kontra su spiritu, i sin pensa mes el a papia ku su lepnan.” Aunke e israelitanan a provoká Yehova, ta Moises tabata esun ku a rebeldiá, òf a bira amargá. Su falta di dominio propio a pone ku el a papia sin pensa riba e konsekuensianan.

15 Moises a laga e komportashon di otro hende strob’é di fiha su bista riba Yehova. Na e promé okashon, Moises a trata e asuntu korektamente. (Éks. 7:6) Sinembargo, ta posibel ku despues di a trata ku e israelitanan rebelde pa dékadanan, el a bira kansá i frustrá. Kisas Moises tabata pensa solamente riba su mes sintimentunan en bes di pensa kon e por a glorifiká Yehova?

16. Dikon nos mester ta interesá den e komportashon di Moises?

16 Si un profeta fiel manera Moises por ser distraí i trompeká, meskos por pasa ku nos tambe. Meskos ku Moises, nos ta a punto di drenta un tera simbóliko, e mundu nobo ku Yehova a primintí nos. (2 Ped. 3:13) Niun di nos lo no ke pèrdè e privilegio spesial ei. Sinembargo, pa nos por logra nos meta, nos mester fiha nos bista riba Yehova i semper hasi esfuerso pa hasi su boluntat. (1 Huan 2:17) Ki lès nos por siña for di e fayo di Moises?

NO LAGA KOMPORTASHON DI OTRO HENDE DISTRAÉ BO

17. Kiko lo yuda nos pa no laga frustrashon dominá nos?

17 No laga frustrashon dominá bo. Asta si nos tin ku trata ku e mesun problema bes tras bes, “laga nos no stòp di hasi loke ta bon, pasobra na e debido tempu nos lo kosechá si nos no kansa.” (Gal. 6:9; 2 Tes. 3:13) Ora nos haña nos ku situashonnan difísil òf diferensia di personalidat frekuentemente, nos por mustra dominio propio den loke nos ta bisa i hasi? (Pro. 10:19; 17:27; Mat. 5:22) Ora otro hende ta iritá nos, nos ta hasi bon di ‘laga lugá pa rabia.’ Rabia di ken? Rabia di Yehova. (Lesa Romanonan 12:17-21.) Si nos ta fiha nos bista riba Yehova, nos ta mustra rèspèt i ta laga lugá pa su rabia, esta, spera riba dje ku pasenshi pa e tuma akshon ora e mira ku ta nesesario. Si nos tuma vengansa, den un sentido, esei lo ta un falta di rèspèt flagrante pa Yehova.

18. Kiko nos tin ku kòrda ora nos ta risibí instrukshon?

18 Sòru di sigui e instrukshonnan mas resien. Nos ta sigui e instrukshonnan di mas resien ku Yehova a duna  nos? Si ta asina, nos lo no insistí pa semper hasi kosnan na e manera ku nos a hasi nan den pasado. Mas bien, nos lo ta kla pa sigui kualke instrukshon nobo ku Yehova ta duna nos pa medio di su organisashon. (Heb. 13:17) Na mes momento, nos lo ta kouteloso pa “no bai mas leu di loke ta pará skirbí.” (1 Kor. 4:6) Di e manera ei, nos ta tene nos bista fihá riba Yehova.

Ki lès nos mester siña for di e manera ku Moises a reakshoná pa motibu di fayo di otro hende? (Wak paragraf 19)

19. Kon nos por evitá di daña nos relashon ku Yehova asta ora nos tin ku trata ku fayonan di otro hende?

19 No laga fayo di otro hende daña bo relashon ku Yehova. Si nos tene nos bista figurativo fihá riba Yehova, nos lo no permití komportashon di otro hende pone nos bira amargá òf daña nos relashon ku Dios. Esaki ta masha importante spesialmente si, meskos ku Moises, nos tin un grado di responsabilidat den e organisashon di Dios. Aunke ta bèrdat ku kada un di nos mester ‘sigui traha ku temor i temblamentu pa alkansá salbashon,’ nos mester kòrda ku Yehova no ta husga nos a base di un sèt di norma rígido i infleksibel. (Flp. 2:12) Mas bien, mas responsabilidat nos tin, mas ta ser eksigí di nos. (Luk. 12:48) Pero si di bèrdat nos ta stima Yehova, nada no por pone nos trompeká òf separá nos for di su amor.—Sal. 119:165; Rom. 8:37-39.

20. Kiko nos mester ta determiná pa hasi?

20 Den e tempunan difísil akí, laga nos fiha nos bista konstantemente riba Yehova, kende ta ‘sintá riba su trono den shelu,’ pa nos por diserní kiko ta su boluntat. Nos lo no ke laga komportashon di otro hende daña nos relashon ku Yehova. E relato di loke a sosodé ku Moises ta graba e lès akí bon kla den nos mente i kurason. Pues, en bes di rabia pa motibu di imperfekshon di hende rònt di nos, laga nos keda determiná pa “nos wowo ta riba [Yehova] nos Dios, te ora ku e tene miserikòrdia di nos.”—Sal. 123:1, 2.

^ par. 8 Esaki tabata un lugá diferente for di e Meriba ku a keda serka di Refidim. Kontrali ku e promé sitio, esun akí a keda den bisindario di Kades i no di Masa. Sinembargo, tur dos sitio a ser yamá Meriba pa motibu di e pleitamentu ku a tuma lugá einan.—Wak e mapa na Sekshon 7 den e foyeto Yudansa pa Studia e Palabra di Dios.

^ par. 11 Tokante e relato akí, Profesor John A. Beck ta bisa: “Segun un tradishon hudiu, e rebeldenan a kritiká Moises bisando: ‘Moises konosé e naturalesa di e barankanan akí! Si e ke demostrá ku e por hasi milager, lag’é saka awa pa nos for di e otro tipo di baranka akí.’” Ta klaru ku esaki ta un simpel tradishon.

^ par. 12 Wak e “Preguntas de los lectores” den La Atalaya di 15 di òktober 1987.