Bai na kontenido

Bai na kontenido

“Konfia den Yehova i Hasi Loke Ta Bon”

“Konfia den Yehova i Hasi Loke Ta Bon”

“Konfia den Yehova i hasi loke ta bon . . . , i trata ku fieldat.”—SAL. 37:3, NW.

KANTIKA: 133, 63

1. Ku ki abilidatnan remarkabel Yehova a krea hende?

YEHOVA a krea hende ku abilidatnan remarkabel. El a duna nos e kapasidat di pensa pa asina nos por resolvé problema i plania pa futuro. (Pro. 2:11NW) El a duna nos poder pa kumpli ku nos plannan i logra nos metanan. (Flp. 2:13) Ademas, el a krea nos ku un konsenshi, esta, un sentido di loke ta bon i malu, ku por yuda nos evitá di hasi malu i korigí nos erornan.—Rom. 2:15.

2. Kiko Yehova ta ferwagt di nos?

2 Yehova ta ferwagt di nos ku nos ta hasi bon uso di nos abilidatnan. Dikon? Pasobra e ta stima nos i e sa ku nos lo sinti nos bon ora nos usa e regalonan akí. Mediante su Palabra, hopi biaha Yehova ta animá nos pa usa nos abilidatnan pa hasi loke ta bon. Por ehèmpel, den e Skritura Hebreo nos ta lesa: “E plannan di hende balente siguramente ta kondusí na abundansia” i “tur loke bo man haña pa hasi, hasié ku tur bo forsa.” (Pro. 21:5; Ekl. 9:10) I den e Skritura Griego nos ta lesa: “Tanten ku nos tin e oportunidat, laga nos hasi loke ta bon pa ku tur hende” i “te na e grado ku kada un di [nos]  a risibí un don, us’é pa sirbi otro.” (Gal. 6:10; 1 Ped. 4:10) Klaramente anto, Yehova ke pa nos hasi loke nos por pa benefisiá nos mes i otro hende.

3. Ki limitashonnan hende tin?

3 Na mes momento, Yehova sa ku hende tin su limitashonnan. Riba nos mes, nunka nos lo por eliminá imperfekshon, piká i morto, ni nos no por kontrolá otro hende pasobra nos tur tin boluntat liber. (1 Rei. 8:46) Anto sin importá kuantu konosementu òf eksperensia nos haña, semper nos lo ta manera mucha na komparashon ku Yehova.—Isa. 55:9.

Ora bo ta enfrentá difikultat, “konfia den Yehova i hasi loke ta bon”

4. Kiko nos lo konsiderá den e artíkulo akí?

4 Den tur situashon nos mester dependé riba Yehova su guia i konfia ku lo e sostené nos i hasi loke nos no por hasi riba nos mes. Na mes momento, nos tin ku hasi loke nos por i tuma medida práktiko pa resolvé problema i yuda otro hende. (Lesa Salmo 37:3. *) Ku poko palabra, nos mester “konfia den Yehova i hasi loke ta bon”; nos tin ku “trata ku fieldat.” Relashoná ku esaki, ban wak kiko nos por siña for di e ehèmpelnan di Noe, David i otro fiel sirbidónan di Yehova, ku a konfia den dje i a tuma medidanan práktiko. Manera nos lo mira, esaki a enserá ku nan mester a distinguí entre loke nan no por a hasi i loke nan por a hasi, anto hasi esei.

DEN UN MUNDU YEN DI MALDAT

5. Den tempu di Noe, den ki kondishon e mundu tabata?

5 Noe tabata biba den un mundu “yen di violensia” i inmoralidat. (Gén. 6:4, 9-13) E tabata sa ku un dia Yehova lo a pone un fin na e mundu malbado ei. Apesar di esei, Noe lo mester tabata afligí pa motibu di e kondishonnan malu ei. Noe a rekonosé ku tabatin kos ku e no por a hasi ma tabatin kos ku e por a hasi.

Oposishon den e trabou di prediká (Wak paragraf 6-9)

6, 7. (a) Kiko Noe no por a hasi? (b) Kon nos situashon ta meskos ku esun di Noe?

6 Loke Noe no por a hasi. Apesar ku Noe a prediká Yehova su mensahe di spièrtamentu fielmente, e no por a fòrsa hende malbado rònt di dje pa aseptá e  mensahe ni e no por a pone e Diluvio yega mas lihé. Noe mester a konfia ku Yehova lo a kumpli ku Su promesa di kaba ku maldat i konfia ku lo el a hasi esei na su debido tempu.—Gén. 6:17.

7 Nos tambe ta biba den un mundu yen di maldat, ku Yehova a primintí di destruí. (1 Huan 2:17) Pero nos no por fòrsa hende pa aseptá ‘e bon notisia di e Reino’ ni nos no por hasi nada pa pone e “tribulashon grandi” kuminsá mas trempan. (Mat. 24:14, 21) Meskos ku Noe, nos mester tin un fe fuerte i konfia ku pronto Dios lo intervení. (Sal. 37:10, 11) Nos ta konvensí ku Yehova lo no laga e mundu malbado akí sigui eksistí pa ni ún dia mas tantu ku el a fiha p’e.—Hab. 2:3.

8. Kon Noe a enfoká riba loke sí e por a hasi? (Wak e promé plachi.)

8 Loke sí Noe por a hasi. En bes di entregá debí na loke e no por a hasi, el a enfoká riba loke e por a hasi. Komo “un predikadó di hustisia,” Noe a proklamá fielmente e mensahe di spièrtamentu ku Yehova a dun’é. (2 Ped. 2:5) Sin duda, esaki a yuda Noe mantené su fe fuerte. Ademas di e trabou di prediká, el a usa su abilidat- i su kapasidatnan físiko i mental pa kumpli ku e trabou ku Dios a dun’é di konstruí un arka.—Lesa Hebreonan 11:7.

9. Kon nos por imitá e ehèmpel di Noe?

9 Meskos ku Noe, nos ta hasi esfuerso pa nos tin “hopi di hasi den e trabou di Señor.” (1 Kor. 15:58) E trabou akí por enserá konstruí i mantené lugánan di adorashon, traha komo boluntario na asamblea i kongreso òf na un sukursal òf ofisina di tradukshon. Riba tur kos, nos ta keda okupá den e trabou di prediká, sabiendo ku e trabou akí lo fortalesé nos speransa pa futuro. Un ruman muhé fiel a pon’é asin’akí: “Ora bo papia ku otro hende tokante e bendishonnan ku e Reino di Dios lo trese, bo ta realisá ku bo oyentenan no tin niun klase di speransa i ku nan no ta mira un solushon pa nan problemanan.” Sí, ora nos partisipá den e trabou di prediká, nos lo mira futuro for di un punto di bista mas positivo ainda i nos lo ta mas determiná pa nunka  entregá den e kareda di bida.—1 Kor. 9:24.

ORA NOS PEKA

10. Den ki situashon David a hañ’é?

10 Yehova a bisa ku Rei David tabata ‘un hòmber ku tabata na agrado di su kurason.’ (Echo. 13:22) Por lo general, David tabata un hòmber fiel na Yehova. Asina mes, na algun okashon el a kometé piká grave. El a kometé adulterio ku Bètsabé. Anto pa kolmo, el a purba di tapa e piká ora el a manda pa kasá di Bètsabé, Urías, muri den guera. David a bai asina leu di laga Urías mes hiba e karta ku su sentensia di morto. (2 Sam. 11:1-21) Finalmente, David su pikánan a sali na kla. (Mar. 4:22) Ora esei a sosodé, kon David a reakshoná?

Pikánan di pasado (Wak paragraf 11-14)

11, 12. (a) Despues ku David a peka, kiko e no por a hasi? (b) Si nos arepentí despues di kometé piká grave, nos por ta sigur ku Yehova lo hasi kiko pa nos?

11 Loke David no por a hasi. E no por a kambia loke el a hasi ni e no por a skapa di e konsekuensianan di su pikánan. De echo, David a eksperensiá algun di e konsekuensianan ei pa restu di su bida. (2 Sam. 12:10-12, 14) Pues, e mester tabatin fe. E mester a konfia ku si el a arepentí di kurason, Yehova lo a pordon’é i yud’é karga e konsekuensianan di su pikánan.

12 Komo hende imperfekto, nos tur ta peka. Algun piká ta mas grave ku otro. Den algun kaso, nos no por drecha e daño ku nos a kousa i nos lo tin ku siña biba ku e konsekuensianan. (Gal. 6:7) Pero nos por ta sigur ku Yehova lo ten’é na su palabra i ku si nos arepentí, e ta dispuesto pa sostené nos durante tempu difísil, asta si ta nos mes a kousa nos difikultatnan.—Lesa Isaías 1:18, 19; Echonan 3:19.

13. Kon David a bolbe haña Yehova su aprobashon?

13 Loke sí David por a hasi. David a permití Yehova yud’é rekuperá den sentido spiritual. Un manera ku el a hasi esei ta ora el a aseptá korekshon di profeta Natan, Yehova su representante. (2 Sam. 12:13) Ademas, David a hasi orashon i konfesá su pikánan i a ekspresá su deseo sinsero pa bolbe haña Yehova su aprobashon. (Sal. 51:1-17) En bes di laga sintimentu di kulpa molesti’é, David a siña for di su fayonan. Sí, nunka mas el a bolbe kometé e pikánan grave ei. Añanan despues, el a muri fiel i su ehèmpel di integridat ta wardá den Yehova su memoria.—Heb. 11:32-34.

14. Kiko nos por siña for di e ehèmpel di David?

14 Kiko nos por siña for di e ehèmpel di David? Si nos kometé piká grave, nos tin ku arepentí di kurason i pidi Yehova pordoná nos. Nos mester konfesá nos pikánan na Yehova. (1 Huan 1:9) Ademas, nos tin ku bai serka e ansianonan, kendenan por duna nos yudansa spiritual. (Lesa Santiago 5:14-16.) Ora nos probechá di Yehova su provishonnan, nos ta mustra ku nos ta konfia den su promesa di pordoná nos i kura nos den sentido spiritual. Despues di esei, nos mester siña for di nos fayonan, sigui padilanti den Yehova su sirbishi i wak futuro ku konfiansa.—Heb. 12:12, 13.

DEN OTRO SITUASHONNAN

Problema ku salú (Wak paragraf 15)

15. Kiko nos ta siña for di e ehèmpel di Ana?

15 Probablemente, bo por pensa riba otro fiel sirbidónan di Yehova di pasado ku a konfia den dje i a tuma medidanan práktiko. Por ehèmpel, Ana tabata steril i e mes no por a hasi nada pa remediá su situashon. Pero el a konfia ku Yehova lo  a konsol’é, pues el a sigui rindi adorashon na e tabernakel i a deshogá su mes den orashon. (1 Sam. 1:9-11) Esei sigur ta un bon ehèmpel pa nos, no ta bèrdat? Ora nos ta trata ku problema di salú òf otro difikultatnan ku no ta den nos man, nos ta tira nos ansiedatnan riba Yehova i ta konfia ku e ta interesá den nos. (1 Ped. 5:6, 7) I nos ta hasi loke nos por pa benefisiá di e reunionnan kristian i otro provishonnan spiritual.—Heb. 10:24, 25.

Yu ku a stòp di sirbi Yehova (Wak paragraf 16)

16. Kiko mayornan por siña for di e biehitu Samuel?

16 Kiko di mayornan fiel na Yehova ku tin yu ku a stòp di sirbié? E biehitu Samuel no por a fòrsa su yunan adulto pa keda leal na e normanan hustu ku el a siña nan. (1 Sam. 8:1-3) E mester a laga e asuntu den man di Yehova. Apesar di esei, Samuel por a mantené su integridat i agradá su Tata selestial, Yehova. (Pro. 27:11) Awe, tin hopi mayor kristian ku ta den un situashon similar ku esun di Samuel. Nan tin konfiansa ku meskos ku e tata den e ilustrashon di e yu pèrdí, Yehova ta kla pa duna un bon biní na tur pekadó ku arepentí. (Luk. 15:20) Mientrastantu, e mayornan akí ta traha duru pa keda leal na Yehova ku e speransa ku nan ehèmpel por motivá nan yu pa bolbe na e tou.

Problema finansiero (Wak paragraf 17)

17. Dikon e ehèmpel di e biuda pober ta animá nos?

17 Pensa tambe riba e biuda pober den tempu di Hesus. (Lesa Lukas 21:1-4.) E no por a hasi nada enkuanto e práktikanan korupto ku tabata sosodé den e tèmpel. (Mat. 21:12, 13) I lo e no por a hasi mashá tampoko pa mehorá su situashon finansiero. Asina mes, boluntariamente el a kontribuí ku “dos sèn pretu,” ku tabata “tur loke e tabatin.” E biuda fiel ei a demostrá pleno konfiansa den Yehova i tabata sa ku si e pone kosnan spiritual na promé lugá, Yehova lo a perkurá pa su nesesidatnan físiko. Su konfiansa a motiv’é pa e apoyá adorashon berdadero den e tempu ei. Di mes manera, nos ta konfia ku si nos buska promé e Reino, Yehova lo sòru pa nos tin tur loke nos mester.—Mat. 6:33.

18. Duna ehèmpel di un ruman den tempu moderno ku tabatin e punto di bista korekto.

18 Hopi di nos rumannan den tempu moderno ta demostrá e mesun konfiansa ei den Yehova i ta tuma medidanan práktiko. Por ehèmpel, Malcolm a keda fiel te na su morto na aña 2015. Atraves di dékadanan ku e ku su kasá a sirbi Yehova, nan a pasa den tempu bon i den tempu malu. El a bisa: “Bida sa tin su kosnan inesperá, insigur i asta duru pa trata kuné. Ma Yehova ta bendishoná hende ku ta dependé riba dje.” Malcolm su konseho ta: “Pidi Yehova yuda bo pa ta mas produktivo i aktivo posibel den su sirbishi. Enfoká riba loke bo por hasi, no riba loke bo no por hasi.” *

19. (a) Dikon nos teksto di aña pa 2017 ta na su lugá? (b) Kon lo bo apliká e teksto akí den bo bida?

19 Segun ku e sistema di kosnan akí ta “bai di malu pa pió,” nos por ferwagt di enfrentá mas i mas difikultat. (2 Tim. 3:1, 13) Pues ta mas importante ku nunka pa nos no laga e difikultatnan ei molestiá nos. Mas bien, nos mester kultivá pleno konfiansa den Yehova i hasi tur loke ta na nos alkanse. Ta na su lugá anto ku nos teksto di aña pa 2017 ta: Konfia den Yehova i hasi loke ta bon.—Sal. 37:3.

^ par. 4 Salmo 37:3 (NW): “Konfia den Yehova i hasi loke ta bon; biba riba tera, i trata ku fieldat.”

^ par. 18 Wak E Toren di Vigilansia di 15 di òktober 2013, pág. 17-20.

Nos teksto di aña pa 2017 ta: Konfia den Yehova i Hasi Loke Ta Bon—Salmo 37:3 (NW)