Bai na kontenido

Bai na kontenido

Dikon Ainda Modestia Ta Importante?

Dikon Ainda Modestia Ta Importante?

“Sabiduria ta ku hende modesto.”—PRO. 11:2, NW.

KANTIKA: 38, 69

1, 2. Kon bini Dios a rechasá Saul? (Wak e promé plachi.)

ORA Rei Saul di Israel di antigwedat a kuminsá su reinado, e tabata un hòmber modesto i respetá. (1 Sam. 9:1, 2, 21; 10:20-24) Pero poko despues ku el a bira rei, el a aktua vários biaha ku arogansia. Ora Dios su profeta Samuel no a yega Gilgal na e tempu ku el a primintí, Saul a pèrdè pasenshi. E filisteonan tabata prepará pa bringa kontra Israel i miedu a pone e israelitanan kuminsá bandoná e ehérsito di Saul. Lo el a pensa: ‘Mi tin ku hasi algu, anto purá.’ Pues, el a ofresé un sakrifisio na Dios, algu ku e no tabata outorisá pa hasi. Yehova no a keda niun tiki kontentu kuné.—1 Sam. 13:5-9.

2 Ora Samuel a yega Gilgal, el a skual Saul. En bes di aseptá e korekshon, Saul a bini ku èksküs, purba di tira falta riba otro hende i minimisá loke el a hasi. (1 Sam. 13:10-14) Despues, un seri di suseso a tuma lugá ku a pone ku Saul a pèrdè su reinado, i pió ainda, e aprobashon di Yehova. (1 Sam. 15:22, 23) Apesar di un bon komienso, Saul su bida a terminá den un desaster kompleto.—1 Sam. 31:1-6.

3. (a) Kiko hopi hende ta pensa di modestia? (b) Ki preguntanan nos mester kontestá?

 3 Den e mundu kompetitivo djawe, hopi hende ta sinti ku nan tin ku sobresalí riba otro hende pa nan por bai padilanti, i nan ta hasi esei a kosto di modestia. Por ehèmpel, un aktor famoso ku despues a bira polítiko a bisa un biaha: “Modestia no ta un palabra ku ta konta pa mi, ni aworakí ni den futuro.” Pero dikon ainda modestia ta importante? Kiko ta modestia, i kiko e no ta? Kon nos por keda modesto ora nos haña nos ku difikultat òf ora otro hende ta preshoná nos? Den e artíkulo akí, nos lo kontestá e promé dos preguntanan. I den e siguiente artíkulo, nos lo kontestá e di tres pregunta.

DIKON TA IMPORTANTE PA NOS TA MODESTO?

4. Kon nos por definí un ‘piká di arogansia’?

4 Beibel ta hasi un kontraste entre modestia i arogansia. (Lesa Proverbionan 11:2. *) David a pidi Yehova pa yud’é pa e no kometé “pikánan di arogansia.” (Sal. 19:13) Kiko ta “pikánan [òf, aktonan,] di arogansia”? Esei ta ora un hende hasi algu ku e no tin derecho ni outoridat pa hasi, kisas pasobra el a pèrdè pasenshi òf e ta orguyoso. Debí na imperfekshon, tin biaha nos tur por ta un poko arogante. Pero manera e ehèmpel di Rei Saul ta mustra, si nos krea e kustumber di komportá nos asina, tardi òf trempan, nos ta haña problema serio ku Dios. Salmo 119:21 ta bisa di Yehova: “Bo ta reprendé e arogantenan.” Dikon e ta hasi esei?

5. Dikon pikánan di arogansia ta algu serio?

5 Pikánan di arogansia ta mas serio ku djis fayonan inosente. Di promé, ora nos no ta modesto, nos no ta mustra onor na Yehova komo esun ku tin e derecho di ta nos Soberano. Di dos, si nos hasi algu ku nos no tin outoridat pa hasi, probablemente nos lo haña nos ku problema ku otro hende. (Pro. 13:10) I di tres, ora nos akto di arogansia sali na kla, kisas nos ta keda na bèrgwensa òf asta humiá. (Luk. 14:8, 9) Ora nos komportá nos na un manera arogante, e resultado lo no ta nada bunita. Manera e Skritura ta mustra, semper ta sabí pa ta modesto.

KIKO MODESTIA TA ENSERÁ?

6, 7. Kiko ta humildat, i ki relashon tin entre humildat i modestia?

6 Modestia i humildat ta estrechamente ligá ku otro. Den Beibel, humildat ta referí na un persona ku no ta orguyoso ni arogante. (Flp. 2:3) Un persona humilde por lo general ta un hende modesto, e no ta duna muchu importansia na su abilidat- i kapasidatnan, e ta dispuesto pa rekonosé su fayonan i ta aseptá sugerensia i idea nobo. Yehova ta stima hende humilde mashá.

7 Segun Beibel, un hende modesto no ta pensa demasiado di su mes i ta konsiente di su limitashonnan. Den e idioma original di e teksto, aparentemente e énfasis ta riba e efekto ku esei mester tin riba e manera ku e persona ta trata otro hende.

8. Kiko ta indiká ku ya un hende no ta pensa òf komportá su mes mas na un manera modesto?

8 Kiko por indiká ku ya nos no ta pensa òf komportá nos mas na un manera modesto? Wèl, nos por kuminsá tuma  nos mes muchu na serio òf duna demasiado importansia na nos privilegionan. (Rom. 12:16) Podisé nos ta hala muchu atenshon na nos mes na un manera inapropiá. (1 Tim. 2:9, 10) Òf por ta nos ta para riba nos opinionnan a base di nos ideanan personal òf simplemente pasobra nos tin sierto posishon òf kontaktonan. (1 Kor. 4:6) Ora nos kuminsá komportá nos asina, hopi biaha nos no ta ripará mes ku ya nos no ta modesto mas i ku nos a bira arogante.

9. Kiko a pone algun hende bira arogante? Duna algun ehèmpel bíbliko.

9 Nos por kuminsá falta modestia si nos no tene nos deseonan karnal bou di kontrol. Ambishon egoista, envidia i rabia deskontrolá a pone hopi hende kometé pikánan di arogansia. Personahenan bíbliko manera Absalon, Uzías i Nabukodonosor a laga nan deseonan inkorekto dominá nan, i komo ku nan tabata arogante, Yehova a humiá nan.—2 Sam. 15:1-6; 18:9-17; 2 Kró. 26:16-21; Dan. 5:18-21.

10. Dikon nos tin ku evitá di saka konklushon tokante otro hende su motivashonnan? Duna un ehèmpel bíbliko.

10 Pero tin mas motibu pakiko tin biaha un hende por falta modestia. Tuma por ehèmpel e relatonan ku nos ta haña na Génesis 20:2-7 i Mateo 26:31-35. Ta arogante Abimelek i Pedro a bira? Akaso nan a laga nan deseonan inkorekto dominá nan? Òf simplemente nan no tabata sa tur detaye, òf kisas esei a kue nan for di base? Ya ku nos no por lesa kurason, nos lo mustra amor i sabiduria si nos evitá di saka konklushon robes tokante otro hende su motivashonnan.—Lesa Santiago 4:12.

REKONOSÉ BO LUGÁ DEN E ORGANISASHON DI DIOS

11. Kiko nos tin ku sa pa nos por ta modesto?

11 Pa nos por ta modesto, nos mester sa kiko ta nos lugá den e organisashon di Dios. Yehova ta un Dios di òrdu, i e ta duna kada un di nos un lugá òf ròl den e kongregashon. Kada kristian su ròl den e kongregashon ta úniko, pero nos tur ta konta. Debí na Yehova su bondat inmeresí, el a duna kada un di nos sierto don, rekurso, abilidat òf talento ku nos por usa pa glorifik’é i pa benefisiá otro hende. (Rom. 12:4-8) Yehova a konfia nos ku un trabou importante, i esei ta trese onor, konfiansa i responsabilidat.—Lesa 1 Pedro 4:10.

Kiko nos por siña for di Hesus su ehèmpel ora nos asignashon kambia? (Wak paragraf 12-14)

12, 13. Dikon nos no mester keda straño si tempu tempu nos ròl den e organisashon di Dios kambia?

12 Ma ku tempu, nos ròl den e organisashon di Dios por kambia. Wak e ehèmpel di Hesus. Na komienso, e tabata su so ku Yehova. (Pro. 8:22) Despues el a yuda Dios krea otro kriaturanan spiritual, e universo i por último, hende. (Kol. 1:16) Mas despues, Hesus a haña un ròl nobo riba tera, promé, komo un bebi indefenso i despues, komo un adulto. (Flp. 2:7) Despues di su morto sakrifisial, el a bolbe na shelu komo un spiritu pa bira Rei di e Reino di Dios na 1914. (Heb. 2:9) I esei lo no ta su último kambio di asignashon. Despues di Hesus su Reinado di Mil Aña, lo e entregá e Reino na Yehova pa asina “Dios por ta tur kos pa tur hende.”—1 Kor. 15:28.

13 Asina tambe, nos por ferwagt ku tempu tempu nos asignashon por kambia, hopi biaha debí na e desishonnan ku nos ta tuma. Por ehèmpel, bo tabata soltero pero despues bo a kasa? Bo a  haña yu? Bo a simplifiká bo bida pa drenta e sirbishi di tempu kompleto? Kada un di e desishonnan akí a bini ku sierto privilegio i responsabilidat. Ora sirkunstansia kambia, nos por haña nos limitá den loke nos por hasi, òf nos por hasi yùist mas. Bo ta hóben òf un adulto? Bo ta bon di salú òf bo tin problema ku salú? Yehova semper ta wak kua ta e mihó manera pa e usa nos den su sirbishi. E no ta ferwagt demasiado di nos i ta keda masha kontentu ku tur loke nos hasi p’e.—Heb. 6:10.

14. Sea kual sea nos situashon, kon modestia por yuda nos haña goso i satisfakshon?

14 Hesus tabatin goso den tur su asignashonnan, i nos tambe por tin e goso ei. (Pro. 8:30, 31) Un hende modesto lo ta satisfecho ku su asignashon- òf responsabilidatnan den e kongregashon. E no ta preokupá si lo e haña mas privilegio den futuro ni e no ta preokupá tokante logronan di otro hende. En bes di esei, e ta hinka tur su energia den haña goso i satisfakshon den e asignashon ku e tin na e momento akí pasobra e sa ku esei ta bini di Yehova. Na mes momento, di kurason e ta respetá e ròl i lugá ku Yehova a duna otro rumannan. Ora nos ta modesto, nos lo tin plaser den apoyá otro ruman i duna nan onor.—Rom. 12:10.

LOKE MODESTIA NO TA NIFIKÁ

15. Kiko nos por siña for di Gideon su ehèmpel di modestia?

15 Gideon tabata un ehèmpel sobresaliente den ser modesto. Ora Yehova su angel a aparesé na dje, mesora el a bisa ku e tabata di un famia humilde. (Hues.  6:15) Despues ku el a aseptá e asignashon di Yehova, el a hasi sigur ku el a komprondé eksaktamente kiko Yehova tabata ke pa e hasi i a buska Yehova su guia. (Hues. 6:36-40) Gideon tabata un hòmber balente i yen di kurashi. Sinembargo, e tabata sabí i kouteloso. (Hues. 6:11, 27) E no a probechá di su asignashon pa haña prominensia. En bes di esei, asina ku el a haña un chèns, el a bolbe gustosamente na su asignashon anterior.—Hues. 8:22, 23, 29.

16, 17. Kiko un hende modesto ta tene kuenta kuné ora di pensa riba progreso spiritual?

16 Ser modesto no ta nifiká ku nunka nos no por hasi esfuerso pa haña òf aseptá mas privilegio di sirbishi. E Skritura ta animá nos tur pa hasi progreso. (1 Tim. 4:13-15) Semper esaki ta nifiká ku nos ta haña otro asignashon? No nesesariamente. Ku Yehova su bendishon, nos por hasi progreso spiritual den kualke asignashon ku nos tin aworakí. Nos por sigui desaroyá e abilidatnan ku Dios a duna nos i hasi mas pa otro hende.

17 Un hende modesto ta wak kiko e tin ku kumpli kuné den un asignashon nobo promé ku e asept’é. E ta hasi un evaluashon franko di su sirkunstansianan pa wak si e por kumpli ku e trabou. Por ehèmpel, lo e por tuma mas trabou òf responsabilidat sin neglishá otro asuntunan importante? E por delegá un parti di su trabou aktual pa e por kumpli ku e responsabilidat nobo? Si e kontestá un òf tur e dos preguntanan akí ku un ‘nò,’ kisas na e momento akí tin otro ruman ku sí lo por kumpli ku e tarea ei. Un análisis realístiko di nos situashon huntu ku orashon lo yuda nos evitá di aseptá un tarea ku nos situashon no ta permití nos kumpli kuné manera mester ta. Modestia por pone nos bisa ‘nò.’

18. (a) Kiko modestia lo motivá nos pa hasi ora nos aseptá un asignashon òf ròl nobo? (b) Kon Romanonan 12:3 ta yuda nos pa ta modesto?

18 Gideon su ehèmpel ta kòrda nos ku ora nos aseptá un asignashon nobo, nos no por kumpli kuné si nos no tin Yehova su guia i bendishon. Al fin i al kabo, nos a haña e invitashon pa “kana ku modestia ku [nos] Dios.” (Mik. 6:8, NW) Pues, kada biaha ku nos aseptá mas responsabilidat, nos tin ku hasi orashon i meditá riba loke Yehova ta siña nos den su Palabra òf mediante su organisashon. Nos tin ku kana samsam ku e pasonan firme di Yehova. Kòrda ku ta Yehova su humildat i no nos mes abilidat òf kapasidat ta ‘hasi nos grandi.’ (Sal. 18:35, NW) P’esei, ora nos skohe pa kana ku modestia ku Dios, nos lo no pensa ni muchu hopi ni muchu tiki di nos mes.—Lesa Romanonan 12:3.

19. Dikon nos mester ta modesto?

19 Un hende modesto ta duna Yehova e onor ku e meresé pasobra Yehova ta nos Kreador i Soberano Universal. (Rev. 4:11) Modestia ta yuda nos keda satisfecho i produktivo den e asignashon ku Yehova a duna nos den su organisashon. E ta yuda nos keda onesto i promové union entre e pueblo di Yehova. Ademas, e ta motivá nos pa pone interes di otro hende promé ku esun di nos mes i ta animá nos pa ta kouteloso, i asina nos ta evitá di kometé fayonan grave. Pa e motibunan akí, ainda modestia ta un kualidat importante pa e pueblo di Dios i Yehova ta apresiá tur esnan ku ta kultiv’é. Pero kiko si nos haña nos ku difikultat òf ora otro hende ta preshoná nos? E siguiente artíkulo lo mustra nos kon nos por keda modesto den tal situashonnan.

^ par. 4 Proverbionan 11:2 (NW): “Ora arogansia bini, desonor tambe lo bini; ma sabiduria ta ku hende modesto.”