Bai na kontenido

Bai na kontenido

Den e kumplimentu moderno di e profesia, e hòmber ku e estuche ku kos di skirbi aden ta representá Hesukristu, esun ku ta marka hende ku lo sobrebibí

Pregunta di Lektor

Pregunta di Lektor

Den e vishon di Ezekiel, ken e hòmber ku e estuche ku kos di skirbi aden i e seis hòmbernan ku arma di destrukshon ta simbolisá?

Nan ta representá e ehérsito spiritual ku tabata enbolbí den e destrukshon di Herúsalèm i ku lo ta enbolbí tambe den e destrukshon di e sistema malbado di Satanas na Armagedon. Dikon nos tin mester di un splikashon nobo?

Promé ku aña 607 promé ku Kristu, Yehova a duna Ezekiel un vishon di kiko lo a sosodé den Herúsalèm apóstata promé ku e stat akí a ser destruí. Den e vishon ei, Ezekiel a mira hopi maldat. Ademas, el a mira seis hòmber ku arma di destrukshon i “entre nan tabatin un hòmber bistí na paña di lino ku un estuche ku kos di skirbi aden.” (Eze. 8:6-12; 9:2, 3) E hòmber a haña e siguiente enkargo: “Pasa duars dor di e stat . . . i pone un señal riba frenta di e hòmbernan ku ta suspirá i keha pa motibu di tur e abominashonnan ku ta wòrdu hasí den dje.” I e hòmbernan ku arma di destrukshon a haña e enkargo pa mata tur hende den e stat ku no tabatin e señal, òf marka. (Eze. 9:4-7) Kiko nos ta siña di e vishon akí, i ken ta e hòmber ku e estuche ku kos di skirbi aden?

Ezekiel a haña e vishon akí na aña 612 promé ku Kristu, i su promé kumplimentu lo tabata ora e ehérsito di Babilonia lo a destruí Herúsalèm, algu ku lo a tuma lugá djis sinku aña despues. Aunke e babilonionan tabata hende pagano, Yehova a permití nan destruí Herúsalèm, usando nan asina pa kastigá su pueblo desobediente. (Yer. 25:9, 15-18) Pero e destrukshon ei no mester a sosodé pa loko. E hustu lo no a ser destruí huntu ku e malbado. Yehova a tuma medida pa salba e hudiunan ku no tabata di akuerdo ku e kosnan repudiabel ku tabata sosodé den e stat.

Ezekiel no tabata enbolbí den e trabou di marka hende ni den e destrukshon di e stat. Ta e angelnan lo a dirigí e destrukshon. Pues, mediante e vishon akí, nos por haña un bista di loke ta sosodé den e region selestial. Yehova a manda su angelnan pa destruí e malbadonan ma tambe pa separá e hustunan for di e malbadonan pa e hustunan haña salbashon. *

Den pasado, nos a splika ku e hòmber ku e estuche ku kos di skirbi aden ta representá e restu di kristiannan ungí di nos tempu. Nos tabata pensa ku hende ku reakshoná faborablemente na e mensahe ku nos ta prediká ta ser marká pa sobrebibí. Ma den e último añanan akí, nos a mira ku ta nesesario pa duna un splikashon nobo. Di akuerdo ku Mateo 25:31-33, Hesus ta esun ku ta husga hende. Lo e hasi esaki durante e tribulashon grandi ora e separá hende paresido na karné, ku lo sobrebibí, for di hende paresido na kabritu, ku lo ser destruí.

Ku e splikashon nobo akí, kiko nos ta siña for di e vishon di Ezekiel? Tin por lo ménos sinku punto:

  1.  Durante e tempu promé ku e destrukshon di Herúsalèm, Ezekiel i Yeremías a sirbi komo vigilante pa spièrta e nashon tokante e binidero destrukshon, meskos ku Isaías tambe a hasi esei mas promé. Awe, Yehova ta usa un grupo chikitu di su sirbidónan ungí pa alimentá su pueblo i spièrta otro hende promé ku e tribulashon grandi dal aden. Anto, tur ‘sirbidó di kas’ di Kristu na nan turno ta partisipá den plama e mensahe di spièrtamentu.—Mat. 24:45-47.

  2.  Meskos ku Ezekiel, e sirbidónan di Dios djawe tampoko no ta enbolbí den e trabou di marka hende pa salbashon. Nan ta simplemente plama e mensahe di Yehova, ku ta parti di e trabou  di prediká, ku nan ta hasi ku yudansa di angel.—Rev. 14:6.

  3.  Meskos ku den tempu di Ezekiel, awe niun hende no ta haña un marka literal riba nan frenta. Kiko hende mester hasi pa nan por haña un marka simbóliko pa salbashon? Nan mester aseptá e mensahe ku nos ta prediká, bisti e personalidat kristian, dediká nan mes na Yehova i apoyá e rumannan di Kristu lealmente. (Mat. 25:35-40) Hende ku hasi e kosnan akí lo risibí e marka pa salbashon durante e binidero tribulashon grandi.

  4.  Den e kumplimentu moderno di e profesia, e hòmber ku e estuche ku kos di skirbi aden ta representá Hesukristu, esun ku ta marka hende ku lo sobrebibí. Hende di e multitut grandi lo haña nan marka ora nan ser husgá komo karné durante e tribulashon grandi. Esaki lo habri kaminda pa nan haña bida eterno aki riba tera.—Mat. 25:34, 46. *

  5.  Den e kumplimentu moderno di e profesia akí, e seis hòmbernan ku arma di destrukshon ta representá Hesus su ehérsito selestial ku é mes na kabes. Pronto nan lo destruí e nashonnan i tur maldat.—Eze. 9:2, 6, 7; Rev. 19:11-21.

Ora nos komprondé e lèsnan balioso akí, nan lo fortalesé nos konfiansa ku Yehova lo no destruí e hustu huntu ku e malbado. (2 Ped. 2:9; 3:9) Ademas, e ta rekordá nos di e importansia di e trabou di prediká den nos tempu. Tur hende mester skucha e mensahe di spièrtamentu promé ku e fin yega.—Mat. 24:14.

^ par. 6 Hende manera Baruk (e sekretario di Yeremías), e etiope Ebed-melek i e rekabitanan a ser salbá maske nan no a haña un marka literal riba nan frenta. (Yer. 35:1-19; 39:15-18; 45:1-5) Nan a haña un marka simbóliko pa haña salbashon.

^ par. 12 E fiel ungínan no tin nodi di risibí e marka di salbashon akí. Nan lo risibí nan seyo final sea promé ku nan muri òf promé ku e tribulashon grandi kuminsá.—Rev. 7:1, 3.