“Fe ta . . . e demostrashon kla di realidatnan ku [hende] no ta mira.”—HEB. 11:1.

KANTIKA: 41, 69

1, 2. Ki preshon hóbennan por haña nan kuné awe, i segun Proverbionan 2:10-12, ki pasonan nan por dal pa trata ku esaki?

“BO TA mustra muchu sabí pa bo ta kere den Dios.” Asina un kompañera di skol a bisa un ruman muhé na Gran Bretaña. Un ruman hòmber na Alemania a skirbi: “Pa mi dosentenan, e relato bíbliko di kreashon ta un mito. Nan ta asumí ku e alumnonan ta kere den evolushon.” Un ruman muhé yòn na Fransia a bisa: “E dosentenan na mi skol ta keda masha asombrá ku ainda tin alumno ku ta kere den Beibel.”

2 Bo ta un hóben ku ta sirbi Yehova kaba òf ta awor bo a kuminsá siña di Yehova? Bo ta haña bo ku e preshon pa aseptá ideanan popular, manera esun di evolushon, en bes di kere den un Kreador? Si ta asina, tin algun paso ku bo por dal pa fortalesé bo fe i manten’é fuerte. Un di nan ta usa diskreshon, òf bo kapasidat di pensa, un don ku Dios a duna bo. Esei lo protehá bo di filosofia di mundu ku por kaba ku bo fe.—Lesa Proverbionan 2:10-12.

3. Kiko nos lo analisá den e artíkulo akí?

3 Berdadero fe ta basá riba konosementu eksakto di Dios. (1 Tim. 2:4) Pues ora bo ta studia e Palabra di Dios i nos publikashonnan basá riba Beibel, no djis pasa ariba ariba den e informashon. Usa bo kapasidat di pensa pa bo “kapta e sentido” di loke bo ta lesa. (Mat. 13:23) Awor, laga nos wak kon  studiando di e manera ei lo yuda bo haña hopi “evidensia konvinsente” ku Yehova ta nos Kreador i ku Beibel ta su Palabra.—Heb. 11:1, nota.

KON BO POR FORTALESÉ BO FE?

4. Dikon un hende mester tin fe pa kere den evolushon òf den kreashon, i p’esei kiko nos tur mester hasi?

4 Hende a yega di bisa bo ku nan ta kere den evolushon pasobra e ta basá riba siensia i ku nan no ta kere den Dios pasobra nan no a yega di mir’é? Hopi hende ta pensa asina. Pero ta bon pa nos tene esaki na mente: Bon mirá, sin importá kiko un hende ta kere tokante Dios òf evolushon, e mester tin fe pa kere esei. Kon asina? Wèl, ta bèrdat ku nos niun no a yega di mira Dios ni mira algu ser kreá. (Huan 1:18) Pero no tin niun hende, sea ku e ta un sientífiko òf nò, ku a yega di mira un forma di bida evolushoná bira un otro forma di bida. Por ehèmpel, niun hende no a yega di mira un rèptil evolushoná i bira un mamífero. (Yòb 38:1, 4) Pues, ta nos tur tin ku analisá e evidensianan ku nos tin i usa nos kapasidat di pensa pa saka konklushonnan lógiko. Relashoná ku kreashon, apòstel Pablo a skirbi: “[Dios] su kualidatnan invisibel, esta, su poder eterno i Divinidat, ta ser mirá bon kla for di kreashon di mundu padilanti, ya ku nan ta bisto den e kosnan trahá, di manera ku e hendenan ei no tin èksküs.”—Rom. 1:20.

Segun ku bo ta rasoná ku hende, hasi bon uso di e hèrmèntnan ku ta disponibel (Wak paragraf 5)

5. Ki hèrmèntnan e organisashon di Yehova ta proveé pa yuda nos usa nos kapasidat di pensa?

5 E verbo “realisá” ta nifiká rekonosé algu ku kisas no ta visibel òf bisto mesora. (Heb. 11:3) Esaki ta nifiká ku nos tin ku usa nos mente tambe, i no solamente nos wowo i orea. E organisashon di Yehova ta proveé hopi informashon bon dokumentá ku por yuda nos “mira” nos Kreador ku wowo di fe. (Heb. 11:27) Nos por haña algun di e informashonnan ei den e foyetonan Bida Ta Obra di un Kreador? i El origen de la vida. Cinco cuestiones dignas de análisis. Ademas, tin e vidio Las maravillas de la creación revelan la gloria de Dios i e buki ¿Existe un Creador que se interese por nosotros? Den nos revistanan tambe nos ta haña ekselente kuminda spiritual. Por ehèmpel, vários biaha ¡Despertad! ta publiká entrevista ku sientífikonan i otro  hende ku ta splika dikon nan ta kere den Dios awor. E sekshon “¿Casualidad o diseño?” ta duna ehèmpel di diseñonan maravioso ku tin den naturalesa. I hopi biaha sientífikonan ta purba di imitá esakinan.

6. Kiko ta algun di e benefisionan di usa e hèrmèntnan ku nos tin disponibel, i kon abo ta benefisiá di nan?

6 Relashoná ku e dos foyetonan ku nos a menshoná den paragraf kuater, un ruman hòmber di 19 aña di Merka a bisa: “E foyetonan ei ta di gran balor pa mi. Mi a studia nan hopi biaha.” Un ruman muhé na Fransia a skirbi: “E artíkulonan ‘¿Casualidad o diseño?’ ta fasiná mi! Nan ta mustra ku e mihó ingenieronan por imitá e diseñonan kompliká di naturalesa, pero nunka nan lo no por igualá nan.” E mayornan di un hobensita di 15 aña na Suráfrika a bisa: “Hopi biaha, e promé kos ku nos yu ta lesa den ¡Despertad! ta e sekshon di entrevista.” Kiko di abo? Bo ta saka pleno probecho di e publikashonnan akí? Nan por yuda bo fe bira manera un palu ku tin rais profundo. Di e manera ei, bo fe por yuda bo para firme kontra siñansa falsu ku ta manera bientunan fuerte.—Yer. 17:5-8.

BO FE DEN BEIBEL

7. Dikon Dios ke pa bo usa bo kapasidat di pensa?

7 Ta malu pa puntra si siñansanan di Beibel ta bèrdat? Di ningun manera! Yehova ke pa bo usa bo “kapasidat di pensa” pa bo konvensé bo mes di e bèrdat. E no ke pa bo kere algu djis pasobra otro hende ta kere. Pues, usa bo kapasidat di pensa pa bo haña konosementu eksakto. E ora ei, e konosementu ei por bira un fundeshi firme pa berdadero fe. (Lesa Romanonan 12:1, 2; 1 Timoteo 2:4.) Un manera pa haña e konosementu ei ta di studia tópikonan ku bo ke sa mas di dje.

8, 9. (a) Ki tópikonan algun hende lo skohe pa studia? (b) Ki benefisio algun ruman a saka ora nan a meditá riba loke nan a studia?

8 Algun hende a skohe pa analisá profesianan bíbliko òf e eksaktitut históriko, arkeológiko i sientífiko di Beibel. Un profesia fasinante ku bo por analisá ta esun na Génesis 3:15. E teksto ei ta introdusí e tema prinsipal di Beibel, esta, e vindikashon di Dios su soberania i e santifikashon di su nòmber pa medio di e Reino. E versíkulo ei, usando idioma figurativo, ta splika kon Yehova lo kaba ku tur sufrimentu ku ta afligí hende desde e tempu ku Adam ku Eva a rebeldiá. Kon bo por hasi un estudio di Génesis 3:15? Un manera ta di traha un liña di sekuensia kronológiko di suseso. Riba dje bo por skirbi tekstonan ku ta mustra kon gradualmente Dios a revelá mas detaye tokante e personanan i e kosnan ku e profesia akí ta papia di dje i ku ta duna prueba ku lo e kumpli sigur. Segun ku bo ta mira kon e tekstonan akí ta na armonia ku otro, sigur lo bo konkluí ku ta “spiritu santu tabata guia” e profeta- i eskritornan di Beibel.—2 Ped. 1:21.

9 Un ruman hòmber na Alemania a skirbi: “E Reino ta e tema prinsipal di Beibel i ta kore manera un liña kòrá den dje. Esei ta asina aunke ku ta alrededor di 40 hòmber a skirbi Beibel. Anto hopi di e personanan akí a biba den periodonan di tempu diferente i no tabata konosé otro personalmente.” Un artíkulo di estudio den E Toren di Vigilansia di 15 di desèmber 2013 ku ta papia di e nifikashon di e Pasku Hudiu a konmové un ruman muhé di Australia mashá. E selebrashon spesial ei tin un konekshon estrecho ku Génesis 3:15 i e yegada di e Mesías. E ruman a skirbi: “E artíkulo ei a laga mi mira kon maravioso Yehova ta. Mi a keda masha impreshoná kon e por a bini ku un  selebrashon ku a konta pa e israelitanan i ku despues a kumpli den Hesus. Mi mester a ègt para ketu ora mi a realisá ki un nifikashon profétiko e sena di Pasku Hudiu tabatin.” Kon bini e ruman akí a sinti asina? El a meditá profundamente riba loke el a lesa i a “kapta e sentido.” Esaki a yud’é fortalesé su fe i hala mas serka Yehova.—Mat. 13:23.

10. Kon e onestidat di e eskritornan di Beibel ta fortalesé nos fe den loke nan a skirbi?

10 Un otro tópiko ku ta fortalesé nos fe ku nos por studia ta e kurashi i onestidat di e hòmbernan ku a skirbi Beibel. Hopi eskritor di antigwedat a skirbi kos bon so tokante nan lidernan i nan nashonnan. Pero, e profetanan di Yehova semper a papia bèrdat. Nan tabata dispuesto pa skirbi tokante e imperfekshonnan di nan pueblo i asta di nan reinan. (2 Kró. 16:9, 10; 24:18-22) I nan no a skonde nan mes fayonan ni esnan di otro sirbidó di Yehova. (2 Sam. 12:1-14; Mar. 14:50) Un ruman hòmber yòn na Gran Bretaña a bisa: “E tipo di onestidat ei ta masha skars. E ta duna nos aun mas konfiansa ku Beibel ta bini di Yehova.”

11. Kon hóbennan por haña mas apresio pa e balor di prinsipionan di Beibel?

11 E prinsipionan ku Beibel ta kontené ta konvensé hopi hende ku Beibel ta inspirá pa Dios. (Lesa Salmo 19:7-11.) Un ruman muhé yòn na Hapon a skirbi: “Mi famia ta masha felis ora nos apliká siñansa di Beibel. Nos ta disfrutá di pas, union i amor.” Prinsipionan di Beibel ta protehá nos di adorashon falsu i di superstishonnan ku ta sklabisá hopi hende. (Sal. 115:3-8) Filosofia ku ta bisa ku Dios no ta eksistí tin influensia riba hende? Sí, pasobra filosofianan manera esun di evolushon ta hasi komo si fuera naturalesa ta un dios ya ku nan ta atribuí poder na dje ku en realidat ta pertenesé na Yehova. I hende ku ta bisa ku Dios no ta eksistí ta pretendé ku nos futuro ta kompletamente den nos mes man. Pero nan no por duna hende un speransa pa un mihó futuro.—Sal. 146:3, 4.

RASONÁ KU HENDE

12, 13. Kon ta un manera efikas pa papia tokante Beibel òf kreashon ku kompañero di skol, dosente òf otro hende?

12 Kon bo por ta efikas ora di rasoná ku hende tokante Beibel i kreashon? Promé, no asumí muchu lihé ku bo sa kiko otro hende ta kere aden. Tin hende ta bisa ku nan ta kere den evolushon pero nan ta sinti tambe ku Dios ta eksistí. Nan ta pensa ku Dios a usa evolushon pa krea diferente forma di bida. Otronan ta bisa ku nan ta kere den evolushon pasobra nan ta pensa ku si e no ta bèrdat, lo e no ta algu ku mucha ta siña na skol. I tin otro hende a stòp di kere den Dios pasobra nan a keda desapuntá ku religion. Pues ora bo ke papia ku un hende tokante e orígen di bida, ta bon pa bo hasié pregunta promé pa bo sa kiko e ta kere aden. Si bo ta rasonabel i ta kla pa skucha, e na su turno lo ta habrí pa skucha bo.—Tito 3:2.

13 Si ta parse ku un hende ta kritiká bo pasobra bo ta kere den kreashon, ku takto bo por puntr’é: “Kon bo ta pensa ku bida por a kuminsá sin un Kreador?” Bo por bis’é tambe ku si ta bèrdat ku bida ta produkto di evolushon, e promé forma di bida, por ehèmpel un sèl, mester por a reprodusí, esta, traha kopia di su mes pa por a sigui eksistí. I un profèser di kímika a bisa ku pa esei sosodé, e sèl lo tabatin mester di algun kos:  (1) flishi ku ta proteh’é, (2) e kapasidat pa haña i prosesá energia, (3) informashon den su genenan (DNA) i (4) e kapasidat pa kopia e informashon ei. El a agregá: “Hende ta keda  asombrá di mira ku asta e forma di bida di mas simpel tin un diseño masha kompliká.”

14. Kiko bo por hasi si bo ta sinti ku bo no ta prepará pa papia tokante evolushon òf kreashon?

14 Si bo ta sinti ku bo no ta prepará pa papia tokante evolushon òf kreashon, bo por purba di usa e rasonamentu simpel ku Pablo a usa. El a skirbi: “Ta hende a traha tur kas, ma esun ku a traha tur kos ta Dios.” (Heb. 3:4) Esei ta un manera lógiko i masha efikas di rasoná ku ta mustra bon kla ku ta un mente inteligente a traha e diseñonan kompliká di kreashon. Ademas, bo por usa un publikashon ku ta pas ku e tema akí. Un ruman muhé a usa e dos foyetonan menshoná anteriormente pa papia ku un yònkuman ku a bisa ku e no ta kere den Dios i ku e ta kere den evolushon. Mas o ménos un siman despues, e yònkuman a rekonosé: “Awor sí mi ta kere den Dios.” E kòmbersashon akí a hiba na un estudio di Beibel, i e yònkuman akí a bira nos ruman.

15, 16. Kon bo por papia ku hende tokante Beibel, i ku ki meta?

15 Ora bo ke rasoná ku un hende ku tin duda tokante Beibel, bo por usa e mesun prinsipionan: purba di saka afó kiko e ta kere aden i ki tópikonan ta interes’é. (Pro. 18:13) Si e ta interesá den siensia, lo e ta mas habrí pa skucha ora bo hala su atenshon riba puntonan ku ta mustra ku Beibel ta eksakto riba tereno sientífiko. Otro hende lo keda impreshoná ora nan mira kon e profesianan di Beibel ta kumpli i ku e relatonan ku e ta kontené ta eksakto. Òf bo por papia tokante e prinsipionan ku Beibel ta kontené, manera esnan ku nos ta haña den e Sermon Riba Seru.

16 Kòrda ku bo meta mester ta pa yega na kurason di hende i no pa diskutí ku nan. Pues, sea un bon skuchadó. Hasi pregunta sinsero i ekspresá bo mes ku suavedat i rèspèt, spesialmente ora bo ta papia ku hende mas grandi ku bo. Asina nan lo ta mas inkliná pa respetá bo kreensianan. Nan lo mira tambe ku bo a tuma tempu pa meditá riba bo kreensianan. Esei ta algu ku hopi hóben no ta hasi. Klaru ku ta bon pa tene na mente ku bo no ta obligá pa kontestá hende ku djis ke diskutí ku bo òf hasi chèrchi di bo kreensianan.—Pro. 26:4.

HASI E BÈRDAT DI BO MES

17, 18. (a) Kiko por yuda bo hasi e bèrdat di bo mes? (b) Ki pregunta nos lo kontestá den e siguiente artíkulo?

17 Pa bo tin un fe fuerte, bo mester tin mas ku djis un konosementu básiko di Beibel. Pues koba i buska na un manera profundo den e Palabra di Dios, komo si fuera ta tesoro skondí bo ta buska. (Pro. 2:3-6) Hasi bon uso di otro hèrmènt ku nos tin, manera e BIBLIOTEKA ONLINE Watchtower i e Guia pa Buska Informashon den Publikashonnan di Testigunan di Yehova. Ademas, un di e mihó maneranan pa fortalesé bo fe ta di lesa Beibel kompleto. Kisas bo por pone komo meta pa bo lesa henter e Beibel den un periodo di 12 luna. Rekordando e tempu ku e tabata hóben, un superintendente di sirkuito a bisa: “Algu ku a konvensé mi ku Beibel ta e Palabra di Dios ta e echo ku mi a les’é kompleto. Ta e ora ei numa mi a ègt komprondé e relatonan di Beibel ku mi a siña tempu mi tabata chikitu. Esei a yuda mi kuminsá krese spiritualmente.”

18 Mayornan, boso ta hunga un papel importante den e desaroyo spiritual di boso yunan. Kon boso por yuda nan haña un fe fuerte? E siguiente artíkulo lo kontestá e pregunta akí.