“Kita e personalidat bieu ku su práktikanan.”—KOL. 3:9.

KANTIKA: 121, 142

1, 2. Kiko hende a yega di bisa di Testigunan di Yehova?

HOPI hende a yega di bisa ku sirbidónan di Yehova tin kualidatnan ekselente. Por ehèmpel, relashoná ku nos rumannan na Alemania nazi, e outor Anton Gill a skirbi: “E nazinan tabata odia e Testigunan di Yehova mashá. . . . Pa 1939, tabatin 6.000 di nan den [kamponan di konsentrashon].” Pero el a sigui bisa ku apesar di e persekushon severo ku e Testigunan a pasa aden, nan tabata konfiabel i trankil, nan tabata leal na Dios i uní ku otro.

2 Resientemente, algun hende na Suráfrika tambe a ripará e kualidatnan atraktivo di e pueblo di Dios. Un tempu, Testigunan di Yehova koló skur i koló kla den e pais ei no por a asosiá libremente ku otro. Pero, riba djadumingu 18 di desèmber 2011, tabata masha bunita pa mira mas ku 78.000 ruman di diferente rasa na Suráfrika i paisnan den bisindario den e stadion di mas grandi na Johannesburg disfrutá di un programa spiritual. Un manager di e stadion a bisa di e rumannan ku tabata einan: “Di tur e multitut di hende ku mi a yega di mira den e stadion akí, esaki ta esun ku a komportá su mes mas mihó. Tur hende ta nèchi bistí. I boso a limpia e stadion  masha bon mes. Pero mas ku tur kos, boso di bèrdat ta multirasial.”

3. Kiko ta hasi nos hermandat úniko?

3 Remarkenan asina di hende ku no ta Testigu ta mustra ku nos hermandat internashonal ta realmente úniko. (1 Ped. 5:9) Pero kiko ta hasi nos asina diferente for di kualke otro organisashon? Ku yudansa di Dios su Palabra i ku su spiritu santu, nos ta hasi hopi esfuerso pa “kita e personalidat bieu.” Anto na su lugá, nos ta “bisti e personalidat nobo.”—Kol. 3:9, 10.

4. Kiko nos lo analisá den e artíkulo akí, i dikon?

4 Unabes nos kita e personalidat bieu, nos no mester bistié bèk. Den e artíkulo akí nos lo mira kon nos por kita e personalidat bieu, dikon ta urgente pa hasi esei i dikon ta posibel pa hasi kambio sin importá kon enbolbí un hende ta den práktikanan robes. Tambe nos lo analisá kiko rumannan ku tin hopi aña den e bèrdat por hasi pa no bisti e personalidat bieu mas. Dikon ta importante pa nos haña e rekordatorionan ei? Lamentablemente, algun ruman ku un tempu tabata sirbi Yehova no a tene kuidou i a bai bèk na nan práktikanan di ántes. Pues nos tur mester tuma e spièrtamentu akí na serio: “Laga esun ku ta kere ku e ta pará, tene kuidou pa e no kai.”—1 Kor. 10:12.

“MATA” KUALKE DESEO “PA LOKE TA FORNIKASHON”

5. (a) Splika dikon ta urgente pa kita e personalidat bieu. (Wak e promé plachi.) (b) Segun Kolosensenan 3:5-9, ki práktikanan ta pertenesé na e personalidat bieu?

5 Kiko lo bo hasi si bo paña susha, i kisas asta kuminsá hole stinki? Lo bo kit’é mas lihé posibel. Di igual manera, mesora nos mester obedesé e mandamentu di Dios pa stòp ku tur práktika ku ta bai kontra e personalidat di Dios. Nos ke hasi kaso di Pablo su instrukshon pa e kristiannan di su tempu: “Boso tin ku pone tur e kosnan akí leu for di boso.” Ban trata dos di e práktikanan pekaminoso ku Pablo a menshoná: fornikashon i impuresa.—Lesa Kolosensenan 3:5-9.

6, 7. (a) Kon e palabranan di Pablo ta mustra ku nos mester tuma medidanan drástiko pa kita e personalidat bieu? (b) Ki tipo di bida Sakura tabata hiba, i kiko a dun’é forsa pa stòp ku e bida ei?

6 Fornikashon. E nifikashon di e palabra original di Beibel tradusí komo “fornikashon” ta inkluí relashon seksual entre hende ku no ta legalmente kasá ku otro i homoseksualidat. Pablo a bisa e rumannan pa “mata e inklinashonnan di [nan] kurpa,” esta, pa nan eliminá kualke deseo “pa loke ta fornikashon.” Pablo a mustra bon kla ku nos mester tuma medida drástiko pa kita tur mal deseo. Anto nos por gana e lucha kontra deseonan pekaminoso.

7 Wak kiko a pasa ku e mucha muhé Sakura * di Hapon. Segun ku e tabata krese, e tabata lucha ku soledat i tabata sinti un bashí den su bida. For di tempu ku e tabatin 15 aña, el a kuminsá tene relashon seksual ku diferente hende pa e kombatí su soledat. Ku hopi bèrgwensa el a atmití: “Komo resultado, mi a hasi tres aborto.” El a sigui konta: “Na komienso, mi tabata haña un sintimentu di siguridat ora mi tabata hasi sèks i tabata pensa ku hende tabata stima mi i ku nan tabatin mester di mi. Pero mas mi tabata tene relashon seksual, mas insigur mi tabata sinti mi.” El a sigui ku e bida ei te tempu e tabatin 23 aña. Pero despues el a kuminsá studia Beibel ku e Testigunan.  Sakura a gusta loke el a siña, i ku yudansa di Yehova e por a vense sintimentunan profundo di kulpa i bèrgwensa i a stòp ku práktikanan inmoral. Awor Sakura ta traha pionero regular i no ta sintié su so mas. En bes di esei, el a bisa: “Mi ta masha kontentu ku mi por disfrutá di Yehova su amor dia aden dia afó.”

VENSE PRÁKTIKANAN IMPURU

8. Kiko ta algun kos ku por hasi nos impuru den bista di Dios?

8 Impuresa. E palabra original di Beibel tradusí komo “impuresa” ta un término hopi amplio ku ta inkluí hopi mas ku djis pikánan seksual. E por referí na práktikanan dañino manera humamentu òf kontamentu di chistenan dòbel sintí. (2 Kor. 7:1; Efe. 5:3, 4) E ta apliká tambe na práktikanan impuru ku un hende ta hasi den privá, manera lesa bukinan ku ta lanta deseo seksual òf wak pornografia, ku por hiba na e práktika impuru di masturbashon.—Kol. 3:5. *

9. Kiko por ta e konsekuensianan di “pashon” deskontrolá?

9 Hende ku tin kustumber di wak pornografia ta lanta “pashon” ku por pone nan bira adikto na sèks. Algun investigashon ta indiká ku hende ku a atmití di tin un deseo fuerte pa wak pornografia ta demostrá e mesun síntomanan di adikshon ku hende ku ta adikto na droga i alkohòl. No ta nada straño anto ku wakmentu di pornografia tin su konsekuensianan, manera, sintimentu profundo di kulpa, ménos produktividat na trabou, un bida di famia infelis, divorsio i suisidio. Despues ku un hòmber a logra vense su adikshon na pornografia pa un aña largu, el a bisa ku por fin e por respetá su mes atrobe.

10. Kon Ribeiro a vense su adikshon na pornografia?

10 Hopi hende ta hiba un lucha konstante pa keda leu di pornografia. Pero, manera e kaso di Ribeiro di Brazil ta mustra, nan por gana e lucha akí. Ribeiro a sali for di kas tempu e tabata tiner i ku tempu el a kuminsá traha na un fábrika di resiklá papel, kaminda e tabata haña material pornográfiko pa wak. E ta konta: “Pokopoko mi a bira adikto. E kos a bira asina malu ku mi no por a warda pa e mucha muhé ku mi tabata biba kuné sali kas pa mi por a wak vidionan pornográfiko.” Despues, un dia na trabou, Ribeiro a wak un stapel di buki ku mester a ser resiklá i a mira e buki titulá E Secreto pa Felicidad den Famia. El a kue i les’é. Loke el a siña a motiv’é pa studia Beibel ku Testigunan di Yehova, pero a tum’é hopi tempu pa stòp ku su mal hábito. Kiko a yud’é finalmente? El a splika: “Mediante orashon, estudio di Beibel i meditashon riba loke mi a siña, mi apresio pa e kualidatnan di Dios a oumentá te ora mi amor pa Yehova a bira mas fuerte ku mi deseo pa wak pornografia.” Ku yudansa di e poder di Dios su Palabra i di su spiritu santu, Ribeiro a logra kita su personalidat bieu, el a batisá i awor e ta sirbi komo ansiano di kongregashon.

11. Kiko un hende mester hasi pa e keda leu for di pornografia?

11 Ripará ku Ribeiro mester a hasi mas ku djis studia Beibel pa e por a logra vense su adikshon. E mester a tuma tempu pa laga e mensahe di Beibel yega na su kurason. Mediante orashon i meditashon, su amor pa Dios a bira mas fuerte ku su deseo intenso pa wak pornografia. Ora nos desaroyá un amor fuerte pa Yehova i un odio pa loke ta malu, nos lo  tin e determinashon pa keda leu for di pornografia.—Lesa Salmo 97:10.

PONE RABIA, PAPIAMENTU DI KOS OFENSIVO I GAÑAMENTU UN BANDA

12. Kiko a yuda Stephen pone rabia i papiamentu di kos ofensivo un banda?

12 Hende ku ta kla pa rabia hopi biaha ta ekspresá nan rabia usando abla ofensivo. Klaru ku e kondukta ei no ta hiba na un bida di famia felis. Stephen, un tata na Australia, ta konta: “Mi tabata papia hopi palabra malu i mi tabata rabia pa kualke kos chikitu. Ami ku mi kasá a separá tres biaha, i nos tabata den proseso di divorsio.” Pero despues e Testigunan a kuminsá studia Beibel ku e pareha. Kiko tabata e resultado ora Stephen a kuminsá apliká konseho di Beibel? El a bisa: “Nos bida di famia a drecha hopi. Ku yudansa di Yehova, awor mi tin un sintimentu profundo di pas i trankilidat, miéntras ku promé, mi tabata manera un bòm di amargura i rabia ku tabata kla pa eksplotá pa kualke kos chikitu ku a iritá mi.” Awe, Stephen ta sirbi komo sirbidó ministerial, i su kasá ta pionero regular pa hopi aña kaba. E ansianonan di e kongregashon kaminda Stephen ta bai a bisa: “Stephen ta un ruman ketu, e ta traha duru i e ta humilde.” Nan no por kòrda ku nan a yega di mir’é rabia. Pero na ken Stephen ta duna krédito pa e kambio den su personalidat? El a bisa: “Niun di e bunita bendishonnan akí lo no ta parti di mi bida si mi no a aseptá Yehova su yudansa pa kambia mi personalidat kompletamente.”

13. Dikon rabia ta asina peligroso, i ki spièrtamentu Beibel ta duna?

13 Ku bon motibu anto, Beibel ta spièrta nos pa evitá rabia, gritamentu i papiamentu di kos ofensivo. (Efe. 4:31) Lamentablemente, hopi biaha e tipo di kondukta ei ta sali for di man i ta kaba den violensia. E mundu kisas ta mira kondukta violento komo algu normal, pero e ta desonrá nos Kreador. Hopi hende mester a kita e mal kondukta ei promé ku nan por a bisti e personalidat nobo.—Lesa Salmo 37:8-11.

14. Ta posibel pa hende agresivo bira humilde?

14 Wak e ehèmpel di Hans, kende ta sirbi komo ansiano di un kongregashon na Austria. E koordinadó di e kuerpo di ansiano di e kongregashon kaminda Hans ta bai a bisa: “E ta un di e rumannan di mas humilde ku lo bo por konosé.” Pero no ta semper e tabata humilde. Tempu e tabata un tiner, el a kuminsá bebe di mas, i komo resultado, el a bira agresivo. Den su rabia, un biaha ku e tabata burachi, el a mata su namorada i a haña 20 aña di kastigu di prizòn. Na prinsipio, bida den prizòn no a kambia Hans su personalidat agresivo. Ku tempu, Hans su mama a pidi un ansiano pa tuma kontakto ku Hans den prizòn, i el a kuminsá studia Beibel. Hans ta konta: “Tabata un lucha pa mi a kita mi personalidat bieu. Tekstonan di Beibel ku a animá mi ta Isaías 55:7, ku ta bisa: ‘Laga e malbado bandoná su kaminda,’ i 1 Korintionan 6:11, ku ta papia di hende ku a bandoná nan mal echonan, bisando: ‘Esei ta loke algun di boso tabata.’ Durante hopi aña, Yehova ku hopi pasenshi a yuda mi mediante su spiritu santu pa bisti e personalidat nobo.” Despues ku Hans a sinta 17 aña i mei di kastigu di prizòn, el a sali komo un kristian batisá. E ta bisa: “Mi ta gradisidu pa Yehova su gran miserikòrdia i pordon.”

15. Ki práktikanan ta komun, pero kiko Beibel ta bisa tokante nan?

15 Banda di papiamentu di kos ofensivo, gañamentu tambe ta un karakterístika  di e personalidat bieu. Por ehèmpel, ta masha normal ku hende ta gaña riba nan papel di belasting òf ta gaña pa evitá di para responsabel pa nan pikánan. Kontrali na esei, Yehova ta e “Dios di bèrdat.” (Sal. 31:5NW) P’esei, e ta rekerí pa “kada un” di su sirbidónan “papia bèrdat ku su próhimo” i pa nan “no gaña.” (Efe. 4:25; Kol. 3:9) Pues, nos mester papia bèrdat asta si esei por ta bergonsoso òf inkumbiniente.—Pro. 6:16-19.

KON NAN A GANA E LUCHA?

16. Kiko por yuda un hende kita e personalidat bieu?

16 Un hende no por kita karakterístikanan di su personalidat bieu riba su mes forsa. E rumannan menshoná den e artíkulo akí, esta, Sakura, Ribeiro, Stephen i Hans, mester a lucha hopi pa stòp ku nan práktikanan robes. Nan a gana e lucha ora nan a habri nan mente i kurason pa e poder di Dios su Palabra i di su spiritu santu. (Luk. 11:13; Heb. 4:12) Pa nos por benefisiá di e poder ei, nos tin ku lesa Beibel tur dia, meditá riba loke nos ta lesa i hasi orashon konstantemente pa nos haña sabiduria i forsa pa apliká konseho di Beibel. (Hos. 1:8; Sal. 119:97; 1 Tes. 5:17) Tambe nos ta benefisiá di Dios su Palabra i di su spiritu santu ora nos ta prepará pa reunion i asistí na nan. (Heb. 10:24, 25) Ademas, nos ke hasi bon uso di e vários maneranan mediante kua Dios su pueblo rònt mundu ta haña kuminda spiritual.—Luk. 12:42.

Kiko por yuda nos kita e personalidat bieu? (Wak paragraf 16)

17. Kiko nos lo analisá den e siguiente artíkulo?

17 Nos a trata vários práktika robes ku kristiannan mester evitá pa semper. Pero ta esei so nos mester hasi pa haña Dios su aprobashon? Nò. Nos mester bisti e personalidat nobo tambe. Den e siguiente artíkulo nos lo trata diferente aspekto di e personalidat nobo ku tin ku bira parti di nos bida.

^ par. 7 A kambia algun nòmber den e artíkulo akí.

^ par. 8 Wak kapítulo 25 di e buki Lo que los jóvenes preguntan. Respuestas prácticas (volumen 1).