Bai na kontenido

Bai na kontenido

Kon Bo Por Tin un Matrimonio Felis?

Kon Bo Por Tin un Matrimonio Felis?

“Laga kada un di boso stima su esposa manera e ta stima su mes; . . . e esposa mester tin rèspèt profundo pa su esposo.”—EFE. 5:33.

KANTIKA: 87, 3

1. Aunke normalmente un matrimonio ta kuminsá ku goso, kiko esnan ku kasa por eksperensiá? (Wak e promé plachi.)

NO TIN sufisiente palabra pa deskribí e felisidat ku ta reina riba e dia di kasamentu ora e brùidehòm mira su bunita brùit kana bini serka dje. Den e tempu ku nan a namorá, nan amor pa otro a krese asina tantu ku nan ta kla pa primintí otro ku nan lo keda fiel na otro p’e restu di nan bida. Klaru ku awor ku nan dos ta bai forma un hogar nobo, nan mester hasi sierto kambio den nan bida. E Palabra di Dios ta duna konseho sabí pa tur hende ku ta kasa, pasobra e Originadó di matrimonio ke pa kos bai bon ku kada pareha i pa nan ta felis. (Pro. 18:22) Pero e Skritura ta bisa bon kla ku hende imperfekto ku kasa “lo haña nan ku difikultat den bida.” (1 Kor. 7:28) Kon bo por tene e difikultatnan ei bou di kontrol? Kon bo por tin un matrimonio felis?

2. Ki tiponan di amor pareha kasá mester mustra na otro?

2 Beibel ta enfatisá e importansia di amor. Den matrimonio mester tin tierno kariño (na griego, filía). Amor romántiko (éros) ta trese plaser, i amor pa famia (storgé) ta vital ora e pareha haña yu. Pero ta amor basá riba prinsipio (agape) ta  pone un matrimonio bai bon. Relashoná ku e klase di amor ei, apòstel Pablo a skirbi: “Laga kada un di boso stima su esposa manera e ta stima su mes; di otro banda, e esposa mester tin rèspèt profundo pa su esposo.”—Efe. 5:33.

E PAPEL DI KADA UN

3. Kon fuerte amor mester ta den matrimonio?

3 Pablo a skirbi: “Esposonan, sigui stima boso esposa, meskos ku Kristu tambe a stima e kongregashon i a entregá su bida p’e.” (Efe. 5:25) Awe, kristiannan ta imitá Hesus su ehèmpel i ta stima otro meskos ku e ta stima nan. (Lesa Huan 13:34, 35; 15:12, 13.) P’esei un kristian su amor den matrimonio mester ta asina fuerte ku lo e ta dispuesto pa muri pa su kasá, si mester. Ma esei lo ta e último kos ku nan lo pensa di hasi si surgi un desakuerdo serio. Pero amor agape “ta wanta tur kos, [ta] kere tur kos, [ta] spera tur kos, [ta] soportá tur kos.” Sí, “amor no ta kaba nunka.” (1 Kor. 13:7, 8) Anto ora parehanan kasá ku ta stima Yehova kòrda riba nan kompromiso pa stima otro i keda fiel na otro, nan lo sigui Yehova su prinsipionan i traha huntu pa resolvé kualke problema ku por surgi.

4, 5. (a) Komo kabes di famia, kiko ta e responsabilidat di un esposo? (b) Kon un esposa mester mira e papel ku su kasá tin komo kabes? (c) Ki ahustenan un pareha kasá mester a hasi?

4 Pablo a papia di e responsabilidatnan di kada kasá ora el a skirbi: “Laga esposanan ta sumiso na nan esposo, manera nan ta sumiso na Señor, pasobra e esposo ta kabes di su esposa meskos ku Kristu ta kabes di e kongregashon.” (Efe. 5:22, 23) Esaki no ta hasi e esposa inferior na su esposo. En realidat, esei ta yuda e esposa kumpli ku e papel ku Dios tabatin na mente pa un esposa ora el a bisa: “No ta bon pa e hòmber [Adam] ta so; lo mi traha un yudadó p’e ku ta pas kuné.” (Gén. 2:18) Meskos ku Kristu, “kabes di e kongregashon,” ta mustra amor, un esposo kristian mester kumpli ku su papel komo kabes ku amor. Ora e hasi esei, su esposa lo sintié sigur i lo ta mas fásil pa e mustra rèspèt na su esposo, apoy’é i keda sumiso na dje.

5 Cathy, [1] kende ta rekonosé ku un hende mester hasi ahuste ora e kasa, a bisa: “Komo soltera, mi tabata independiente i tabata perkurá pa mi mes. Pero ora mi a kasa, mi mester a siña dependé riba mi esposo. No tabata semper fásil, pero nos a hala muchu mas serka di otro ora nos a hasi kosnan manera Yehova ke.” Cathy su kasá, Fred, a bisa: “Tuma desishon nunka no tabata algu fásil pa mi. Anto den matrimonio, mi mester tene kuenta ku dos hende, i esei ta hasi e reto mas grandi. Pero ora mi buska e guia di Yehova pa medio di orashon i skucha bon ora mi kasá ta duna su opinion, ta bira kada bes mas fásil pa mi. Nos ta ègt un tim!”

6. Kon amor ta sirbi komo “e laso perfekto di union” ora surgi problema den matrimonio?

6 Un matrimonio fuerte ta konsistí di dos hende ku ta tene kuenta ku e imperfekshonnan di otro. Nan ta “sigui soportá otro i pordoná otro libremente.” Sí, tur dos lo faya. Ma ora esei sosodé, nan ta haña chèns pa siña di e erornan ei, pa pordoná otro i laga amor reina komo “e laso perfekto di union.” (Kol. 3:13, 14) Ademas, “amor tin pasenshi i ta bondadoso. . . . E no ta keda kòrda e malu ku hende a hasié.” (1 Kor. 13:4, 5) Esposo i esposa mester resolvé malkomprondementu mas pronto posibel. Nan mester  purba di hasi esaki promé ku e dia kaba. (Efe. 4:26, 27) Pa parehanan kasá pidi otro despensa di kurason, nan mester tin humildat i kurashi; pero esei ta un gran yudansa pa resolvé problema i hala mas serka di otro.

TA IMPORTANTE PA MUSTRA KARIÑO NA OTRO

7, 8. (a) Ki konseho Beibel ta duna tokante relashon seksual den matrimonio? (b) Dikon parehanan kasá mester mustra kariño na otro?

7 Beibel ta duna bon konseho ku por yuda parehanan pa nan tin un punto di bista balansá di nan deber matrimonial. (Lesa 1 Korintionan 7:3-5.) Ta importante pa un hòmber tene kuenta ku sintimentu- i nesesidatnan di su kasá. Si e no trata su esposa ku kariño, por bira difísil pa e esposa haña plaser for di e aspekto akí di matrimonio. Beibel ta bisa ku esposonan mester trata nan kasá “segun konosementu.” (1 Ped. 3:7) Kristiannan no mester fòrsa ni eksigí nan kasá pa tene relashon seksual; e deseo pa hasi esei mester surgi di un forma natural. Ta bon pa tene kuenta tambe ku hopi biaha un hende hòmber por eksitá seksualmente mas lihé ku un hende muhé, pero emoshonalmente tur dos mester ta prepará pa e akto.

8 Aunke Beibel no ta duna regla spesífiko tokante kon parehá kasá mester stimulá otro pa yega na e akto seksual, e ta duna algun ehèmpel sí di kon nan por mustra kariño na otro. (Kant. 1:2; 2:6) Parehanan kasá mester trata otro ku tierno kariño.

9. Dikon interes seksual den hende ku no ta bo kasá ta algu inaseptabel?

9 Amor fuerte pa Dios i pa próhimo lo yuda nan pa no laga nada ni niun hende kibra nan laso matrimonial. Algun hòmber i muhé kasá a laga adikshon na pornografia trese tenshon den nan matrimonio òf asta kibr’é. Un pareha kasá mester resistí fuertemente kualke deseo di wak pornografia òf kualke otro interes seksual pafó di matrimonio. Nan no mester duna ni e impreshon ku nan ta flirt ku hende ku no ta nan kasá pasobra esei lo demostrá un falta di amor. Ora nos ta kòrda ku Yehova ta mira loke nos ta hasi i sa kiko ta biba den nos mente, nos lo ta mas determiná pa agrad’é i pa keda moralmente limpi.—Lesa Mateo 5:27, 28; Hebreonan 4:13.

ORA TIN TENSHON DEN MATRIMONIO

10, 11. (a) Kon komun divorsio ta? (b) Kiko Beibel ta bisa tokante separashon? (c) Kiko lo yuda un pareha pa no separá muchu lihé?

10 Problema serio den matrimonio por pone algun pareha pensa riba separashon òf divorsio. Den algun pais, mas ku mitar di tur matrimonio ta kaba na divorsio. Esaki no ta asina komun den e kongregashonnan kristian, pero mas i mas pareha kristian ta haña nan ku problema serio, i esei ta motibu di preokupashon.

11 Beibel ta duna e siguiente instrukshonnan: “Un esposa no mester separá di su esposo; pero si e separá tòg, lag’é keda sin kasa, òf si no, lag’é hasi bon ku su esposo; i un esposo no mester bai laga su esposa.” (1 Kor. 7:10, 11) Separashon ta un kuestion serio. Aunke separashon por parse di ta e solushon pa problemanan serio ku ta surgi, hopi biaha e ta kousa mas problema. Despues ku Hesus a ripití Dios su palabranan ku un hòmber lo bandoná su mama i su tata i pega na su kasá, el a bisa: “No laga ningun hende separá loke Dios a uni bou di un yugo.” (Mat. 19:3-6; Gén. 2:24) Esei ta nifiká ku  ni e esposo ni e esposa no mester “separá loke Dios a uni bou di un yugo.” Yehova ta mira matrimonio komo un union di bida largu. (1 Kor. 7:39) Nos mester tene na mente ku un dia nos tur tin ku duna kuenta i rason na Dios. Esei mester motivá parehanan kasá pa hasi tur nan esfuerso pa resolvé nan problemanan lihé pa esakinan no bira mas grandi.

12. Kiko por pone un pareha pensa riba separashon?

12 Ekspektativanan ku no ta realístiko por ta e kousa di un problema matrimonial. Ora un matrimonio no ta bayendo manera e hòmber òf muhé a ferwagt, e por sintié desepshoná, traishoná òf asta amargá. E manera ku kada un a lanta i e manera ku nan ta reakshoná emoshonalmente tambe por kousa problema. Asuntu di plaka, famia òf lantamentu di yu tambe ta kosnan ku por hiba na desakuerdo. Sinembargo, mayoria di pareha kristian ta yega na un solushon ku tur dos por biba kuné pasobra nan ta laga Dios guia nan. Nan sigur meresé nos elogio!

13. Kiko ta algun motibu bálido pa separá?

13 Den algun kaso, separashon por ta hustifiká. Algun ruman ta skohe pa separá pasobra nan kasá ta nenga di perkurá materialmente pa e famia. Otronan ta separá debí na maltrato físiko severo òf pasobra nan kasá ta pone ku nan no por sirbi Dios. Pero esakinan ta situashonnan eksepshonal. Parehanan kristian ku tin problema serio mester buska yudansa serka e ansianonan. E ruman hòmbernan akí ku tin eksperensia por yuda parehanan apliká konseho ku tin den e Palabra di Dios. Pa resolvé problemanan matrimonial, nos mester pidi Yehova pa su spiritu i pa e yuda nos apliká prinsipionan di Beibel i desplegá e kualidatnan di e fruta di su spiritu.—Gal. 5:22, 23. [2]

14. Kiko Beibel ta bisa e rumannan ku ta kasá ku hende ku no ta sirbi Yehova?

14 Tin ruman ku ta kasá ku hende ku ainda no ta sirbi Yehova. Den e kasonan ei, Beibel ta duna bon motibu pakiko nan tin ku keda ku otro. (Lesa 1 Korintionan 7:12-14.) Sea ku e kasá ku no ta Testigu ta realisá esei òf nò, e ta ser “santifiká” debí ku e ta kasá ku un kreyente. Nan yunan tambe ta ser konsiderá “santu,” pues, ta bou di protekshon divino. Pablo a rasoná: “Esposa, kon bo por sa ku lo bo no salba bo esposo? Òf esposo, kon bo por sa ku lo bo no salba bo esposa?” (1 Kor. 7:16) Kasi tur kongregashon di Testigunan di Yehova tin parehanan kasá den kua esun ku ta Testigu a yuda “salba” su kasá.

15, 16. (a) Ki konseho Beibel ta duna esposanan kristian ku tin kasá ku no ta sirbi Dios? (b) Kiko un kristian mester hasi “si e kasá ku no ta kreyente disidí di bai”?

15 Apòstel Pedro a konsehá esposanan kristian pa keda sumiso na nan esposo, ‘ya ku si tin algun ku no ta obedesé e palabra, nan por gana nan esposo na e fe pa medio di nan kondukta sin papia ni un pia di palabra, komo ku nan esposo ta testigu di e kondukta puru kompañá pa rèspèt profundo di nan esposa.’ Un esposa ku tin “un spiritu suave i trankil, loke ta di gran balor den bista di Dios,” tin mas chèns di trese su esposo den e bèrdat ku un ku tur ora bai ta papia tokante su kreensianan kristian.—1 Ped. 3:1-4.

16 Kiko si un kasá ku no ta Testigu disidí di separá? Beibel ta bisa: “Si e kasá ku no ta kreyente disidí di bai, lag’é bai; den e sirkunstansianan ei un ruman hòmber òf un ruman muhé no ta bou di obligashon di keda kuné, pasobra Dios a yama boso pa biba na pas.” (1 Kor. 7:15) Esaki  no ta nifiká sí ku awor e kristian ta bíblikamente liber pa kasa atrobe, pero e no tin nodi di fòrsa e kasá ku no ta kreyente pa keda kuné. Separashon por trese sierto trankilidat p’e. Anto e ruman por karga e speransa ku un dia su kasá por bini bèk ku e gana di traha huntu pa salba nan matrimonio, i ku tempu, asta bira un sirbidó di Yehova.

MATRIMONIO I LOKE MESTER TA NOS PRIORIDAT

Ora bo ta duna prioridat na kosnan spiritual, bo matrimonio por ta mas felis (Wak paragraf 17)

17. Parehanan kasá mester duna prioridat na kiko?

17 Komo ku nos ta bibando den parti final di “e último dianan,” nos ta pasa den “tempunan krítiko, difísil pa trata kuné.” (2 Tim. 3:1-5) Apesar di esei, si nos keda fuerte den sentido spiritual, nos por bringa kontra e influensianan negativo di e mundu akí. Pablo a skirbi: “No a sobra muchu tempu mas. Di awor padilanti, laga esnan ku tin esposa hasi komo si fuera nan no tin, . . . i esnan ku ta hasi uso di mundu komo si fuera nan no ta us’é plenamente.” (1 Kor. 7:29-31) Pablo no tabata bisa parehanan kasá pa neglishá nan obligashonnan matrimonial. Pero debí ku no a sobra muchu tempu mas, nan mester duna prioridat na kosnan spiritual.—Mat. 6:33.

18. Kon kristiannan por tin un matrimonio felis i eksitoso?

18 Maske nos ta biba den un tempu masha difísil i hopi matrimonio rònt di nos ta kibra, ta posibel pa nos tin un matrimonio felis i eksitoso. Sí, kristiannan kasá ku ta pega na e pueblo di Yehova, ta apliká konseho bíbliko i ta aseptá e guia di Yehova su spiritu santu por konserbá “loke Dios a uni bou di un yugo.”—Mar. 10:9.

^ [1] (paragraf 5) A kambia e nòmbernan.

^ [2] (paragraf 13) Wak e artíkulo “Kiko Beibel Ta Bisa di Divorsio i Separashon?” den apèndiks di e buki “Keda den e Amor di Dios,” pág. 219-221.