Bai na kontenido

Bai na kontenido

Rechasá Mundu Su Manera di Pensa

Rechasá Mundu Su Manera di Pensa

“Tene kuidou pa ningun hende no kue boso den nan gara pa medio di filosofia i engaño bano . . . di mundu.”—KOL. 2:8.

KANTIKA: 38, 31

1. Ki konseho apòstel Pablo a duna e kristiannan na Kolósas? (Wak e promé plachi.)

APÒSTEL Pablo a skirbi su karta pa e kristiannan na Kolósas na fin di su promé enkarselashon na Roma, rònt di aña 60-61. El a bisa nan kon importante ta pa haña e “komprondementu ku [Dios] su spiritu ta duna.” (Kol. 1:9) Mas aleu el a agregá: “Mi ta bisa esaki pa ningun hende no gaña boso ku argumentonan konvinsente. Tene kuidou pa ningun hende no kue boso den nan gara pa medio di filosofia i engaño bano ku ta basá riba tradishon di hende, segun e kosnan básiko di mundu i no segun e siñansanan di Kristu.” (Kol. 2:4, 8) Despues Pablo a splika dikon algun idea popular di mundu ta robes i dikon hopi hende ta gusta mundu su manera di pensa. Por ehèmpel, esei por laga un hende sintié mas sabí i superior ku otro hende. Pablo a skirbi e karta pa yuda e rumannan rechasá mundu su manera di pensa i práktikanan robes.—Kol. 2:16, 17, 23.

2. Dikon nos lo trata algun ehèmpel di mundu su manera di pensa?

2 Hende ku ta pensa manera mundu ta pensa no ta hasi kaso di prinsipionan di Beibel, i nan influensia tiki tiki por debilitá nos fe. Awe, nos tur ta haña nos konfrontá ku mundu su manera di pensa, ku ta ser promové na televishon, riba Internet,  na trabou òf na skol. Den e artíkulo akí, nos lo analisá kon nos por evitá di laga mundu su manera di pensa influensiá nos. Nos lo trata sinku ehèmpel di mundu su manera di pensa i mira kon nos por rechasá nan.

NOS MESTER KERE DEN DIOS?

3. Kiko hopi hende ta kere, i dikon?

3 “Mi por ta un bon hende sin kere den Dios.” Na hopi pais, ta normal pa tende hende bisa ku nan no ta kere den Dios i ku nan no ta interesá den religion. Kisas nan no a analisá e pregunta si Dios ta eksistí, pero nan ta gusta e idea di ta liber pa hasi loke nan ke. (Lesa Salmo 10:4.) Den bista di mundu, otro hende kisas ta pensa ku nan ta sabí ora nan bisa: “Mi por tin normanan haltu sin kere den Dios.”

4. Kon nos por rasoná ku un hende ku no ta kere den un Kreador?

4 Ta lógiko pa pensa ku no ta eksistí un Dios ku a krea tur kos? Ora un hende buska kontesta den siensia pa saka afó si bida ta obra di un Kreador òf nò, e kantidat di informashon ku e por haña por lag’é keda konfundí. Pero en realidat, e kontesta ta simpel. Por ehèmpel, meskos ku mester di un hende pa konstruí un edifisio, asina tambe mester tin un Kreador ku a krea sernan bibu. De echo, asta e sèlnan di mas simpel ta mas kompliká ku kualke kas pasobra un sèl por reprodusí su mes, algu ku un kas no por hasi. Sèl tin un manera pa warda i kopia informashon pa por dupliká nan mes. Ken a diseñá sèl? Beibel ta kontestá: “Ta hende a traha tur kas, ma esun ku a traha tur kos ta Dios.”—Heb. 3:4.

5. Kiko nos por bisa tokante e idea ku un hende no mester kere den Dios pa sa kiko ta bon i malu?

5 Kon nos por rasoná ku un hende ku ta pensa ku e no tin nodi di kere den Dios pa sa kiko ta bon i malu? Beibel ta rekonosé ku asta hende ku no ta kere den Dios por tin bon norma. (Rom. 2:14, 15) Por ehèmpel, nan ta respetá i ta stima nan mayornan. Pero si nan no ta kere ku tin un Kreador ku tin e derecho di bisa kiko ta bon i malu, nan por tuma mal desishon. (Isa. 33:22) Hopi hende awe ta haña ku e kondishonnan deplorabel di e mundu akí ta duna prueba ku hende mester di e yudansa di Dios. (Lesa Yeremías 10:23.) Pues nos mester resistí e idea ku un hende ku no ta kere den Dios por determiná kiko ta bon i malu sin e guia di Dios.—Sal. 146:3.

NOS MESTER DI RELIGION?

6. Kiko hopi hende ta pensa di religion?

6 “Bo por ta felis sin ta parti di un religion.” E idea akí ta atraé hopi hende pasobra nan ta mira religion komo algu laf i ku no ta sirbi pa nada. Ademas, hopi religion ta alehá hende for di Dios pasobra nan ta siña hende tokante fièrnu di kandela, ta pidi nan miembronan diesmo òf ta mete den asuntunan polítiko. No ta nada straño ku mas i mas hende ta kere ku nan por ta felis sin ta parti di un religion. Un hende asina por bisa: “Mi ta interesá den kosnan spiritual, pero mi no ke ta parti di un religion.”

7. Kon adorashon berdadero ta yuda nos haña felisidat?

7 Ta bèrdat ku un hende por ta felis sin ta forma parti di un religion? Sin duda un hende por ta felis si e no ta parti di religion falsu, pero un hende no por tin berdadero felisidat si e no tin amistat ku Yehova, kende Beibel ta yama “e Dios felis.” (1 Tim. 1:11) Tur loke Dios ta hasi ta bon pa hende. Su sirbidónan ta felis pasobra nan ta enfoká riba yuda otro  hende. (Echo. 20:35) Por ehèmpel, wak kon adorashon berdadero ta yuda hasi nos famia felis. Adorashon berdadero ta siña nos pa onra i respetá nos kasá, pa konsiderá e voto matrimonial algu sagrado, pa no kometé adulterio, pa siña yunan respetá otro hende i pa demostrá amor sinsero. Komo resultado, adorashon berdadero ta uni sirbidónan di Dios, ta permití nan forma parti di un kongregashon felis i di un hermandat mundial.—Lesa Isaías 65:13, 14.

8. Kon nos por usa Mateo 5:3 pa rasoná riba e pregunta: Kiko ta hasi hende felis?

8 I kiko di e idea ku un hende por ta felis sin sirbi Dios? Pensa riba e pregunta akí: Kiko ta hasi hende felis? Algun hende ta haña satisfakshon den trabou, deporte òf hòbi. Otro hende ta haña satisfakshon den nan esfuersonan pa kuida nan famia òf amigunan. Aunke tur e kosnan akí por laga nos sinti nos bon, nos bida tin un propósito mas elevá ku ta duna nos felisidat pa semper. Na kontraste ku bestia, nos por konosé nos Kreador i sirbié fielmente. Dios a traha nos di tal manera ku ora nos ta sirbié, nos ta sinti nos felis. (Lesa Mateo 5:3.) Por ehèmpel, fiel sirbidónan di Dios ta haña hopi goso i animashon ora nan ta reuní huntu pa adorá Yehova. (Sal. 133:1) Tambe nan ta gosa di un hermandat uní, nan tin un bida limpi i un bunita speransa.

NOS MESTER BIBA SEGUN NORMANAN MORAL?

9. (a) Ki idea tokante relashon seksual ta komun awe? (b) Dikon e Palabra di Dios ta prohibí relashon seksual promé ku matrimonio?

9 “Dikon relashon seksual pafó di matrimonio ta malu?” Hende por bisa nos: “Bo mester gosa di bida. Dikon bo no tin mag di tene relashon seksual promé ku bo kasa?” E idea ku un kristian mester tolerá inmoralidat seksual ta robes. Dikon? Pasobra e Palabra di Dios ta prohibí inmoralidat seksual. * (Lesa 1 Tesalonisensenan 4:3-8.) Komo ku ta Yehova a krea nos, e tin derecho di traha lei pa nos. E lei di Dios ta permití relashon seksual solamente entre un hòmber i un muhé ku ta kasá ku otro, i esei ta loke el a stipulá pa matrimonio. Dios ta duna nos lei pasobra e ta stima nos, i nan ta pa nos mes bon. Famianan ku ta obedesé e leinan di Dios tin amor i rèspèt pa otro i ta sinti nan sigur. Dios no ta tolerá hende ku ta desobedesé su lei deliberadamente.—Heb. 13:4.

10. Kon un kristian por keda leu for di inmoralidat seksual?

10 E Palabra di Dios ta siña nos kon pa keda leu for di inmoralidat seksual. Un manera importante ku nos por hasi esaki ta ora nos ta kontrolá loke nos ta wak. Hesus a bisa: “Ken ku sigui wak un muhé ku pashon, ya kaba a kometé adulterio kuné den su kurason. Awor bon, si bo wowo drechi ta pone bo trompeká, sak’é tira afó.” (Mat. 5:28, 29) P’esei, un kristian lo evitá di wak pornografia òf skucha muzik ku letranan inmoral. Apòstel Pablo a skirbi: “Mata e inklinashonnan di boso kurpa pa loke ta fornikashon.” (Kol. 3:5) Ademas, nos mester kontrolá loke nos ta papia di dje i loke nos ta pensa ariba.—Efe. 5:3-5.

 NOS MESTER SIGUI UN KARERA DEN MUNDU?

11. Dikon e idea di sigui un karera den mundu por atraé algun hende?

11 “Un bon karera ta e klave pa felisidat.” Hopi hende ta animá nos pa nos sigui un karera den bida. Un karera asina por duna nos státus, outoridat i rikesa. Hopi hende ta haña ku ta importante pa nos tin un karera den bida, i un kristian por kuminsá pensa meskos.

12. Un karera den mundu lo hasi bo felis?

12 Ta bèrdat ku un karera ku ta duna nos poder i prestigio ta hiba na felisidat duradero? Nò. Kòrda e kaso di Satanas. E tabatin e deseo pa dominá otronan i pa nan atmir’é. Aunke ku den un sentido el a haña loke e ta gusta, e ta rabiá i no ta felis. (Mat. 4:8, 9; Rev. 12:12) E satisfakshon ku un karera por duna nos ta limitá. E no ta nada na komparashon ku e goso duradero ku nos ta haña ora nos yuda otro hende konosé Yehova i su siñansanan pa nan por biba pa semper. Ademas, e spiritu di e mundu akí ta hopi kompetitivo. E ke pa nos ta mihó ku otro hende i ta fomentá yalursheit, pero al final e ta manera “korementu tras di bientu.”—Ekl. 4:4.

13. (a) Kon nos mester mira nos trabou? (b) Segun apòstel Pablo su karta pa e rumannan na Tesalónika, kiko a dun’é un goso profundo?

13 Ta bèrdat ku nos mester traha pa gana nos pan di kada dia, i no tin nada malu den buska un trabou ku nos ta gusta. Pero nos trabou no mester ta e kos di mas importante den nos bida. Hesus a bisa: “Ningun hende no por ta esklabo di dos doño, pasobra sea lo e odia esun i stima e otro òf lo e pega na esun i despresiá e otro. Boso no por ta esklabo di Dios i di Rikesa.” (Mat. 6:24) Ki un goso nos ta haña ora nos bida ta enfoká riba adorá Yehova i siña otro hende tokante su Palabra. Un hende ku a eksperensiá esei tabata apòstel Pablo. Tempu e tabata yòn, el a sigui un karera prominente den hudaismo, pero ta ora el a kuminsá prediká i hasi disipel i a mira kon hende tabata reakshoná na e mensahe di Dios i kon nan a kambia nan bida, el a haña berdadero felisidat. (Lesa 1 Tesalonisensenan 2:13, 19, 20.) Niun otro karera no ta duna nos un goso asina.

Ora nos ta yuda hende benefisiá di e sabiduria di Dios, nos ta haña un goso duradero (Wak paragraf 12, 13)

 NOS POR RESOLVÉ PROBLEMANAN DI MUNDU?

14. Dikon e idea ku hende por resolvé nan propio problemanan por atraé hopi hende?

14 “Hende por resolvé nan mes problemanan.” E idea akí por atraé hopi hende. Dikon? Pasobra si esaki ta bèrdat, esei lo nifiká ku hende no tin mester di e guia di Dios i ku nan por hasi loke nan ta haña ta bon. Ademas, e idea ku hende por resolvé nan mes problemanan por zona konvinsente, pasobra segun algun estudio, guera, krímen, malesa i pobresa ta menguando. Un rapòrt ta bisa: “E motibu dikon humanidat ta mas mihó ta pasobra hende a disidí pa hasi e mundu un mihó lugá.” Pero esei ta bèrdat? Hende ta resolviendo e problemanan ku a pone nan sufri pa asina tantu tempu? Pa nos por kontestá e pregunta akí, laga nos analisá e problemanan ei mas a fondo.

15. Dikon nos por bisa ku e problemanan di humanidat ta grave?

15 Guera. E dos gueranan mundial a mata mas o ménos 60 mion hende. Desde e fin di Segundo Guera Mundial, hende no a siña kon pa evitá guera. Pa 2015, un kantidat di 65 mion hende a haña nan fòrsá ta bandoná nan kas pa motibu di guera òf persekushon. Na 2015 so kaba, 12.4 mion hende mester a muda bai otro kaminda. Krímen. Aunke algun tipo di krímen a baha na algun lugá, otro tipo di krímen, manera krímen via Internet, violensia doméstiko i terorismo a oumentá drástikamente. Ademas, hopi hende ta kere ku rònt mundu tin mas i mas korupshon. Hende no por eliminá krímen. Malesa. Tin algun malesa ku hende a logra kontrolá. Pero un rapòrt ku a ser publiká na 2013 a bisa ku kada aña, mas o ménos nuebe mion hende bou di 60 aña ta muri pa motibu di problema ku kurason, atake selebral, kanser, problema ku halamentu di rosea i diabétis. Pobresa. Segun Banko Mundial, e kantidat di hende ku ta sufri di pobresa ekstremo na Afrika so kaba a oumentá di 280 mion na 1990 pa 330 mion na 2012.

16. (a) Dikon ta e Reino di Dios so por resolvé problemanan di humanidat? (b) Tokante ki bendishon di e Reino Isaías i un salmista a profetisá?

16 E sistema ekonómiko i polítiko awe ta den man di hende egoista ku no por kaba ku guera, krímen, malesa i pobresa. Solamente e Reino di Dios por hasi esei. Wak kiko Yehova lo hasi pa humanidat. Guera. E Reino di Dios lo eliminá tur loke ta kousa guera, manera egoismo, korupshon, patriotismo, religion falsu i Satanas mes. (Sal. 46:8, 9) Krímen. E Reino di Dios ya kaba ta siñando miónes di hende pa stima i konfia otro, algu ku ningun gobièrnu humano no por hasi. (Isa. 11:9) Malesa. Yehova lo bendishoná su pueblo ku salú perfekto. (Isa. 35:5, 6) Pobresa. Yehova lo kaba ku pobresa i lo proveé pa su pueblo spiritualmente i físikamente, algu muchu mas balioso ku rikesa material.—Sal. 72:12, 13.

“SA KON BOSO MESTER KONTESTÁ”

17. Kon nos por rechasá mundu su manera di pensa?

17 Si bo tende un idea di mundu ku ta pone bo fe na prueba, investigá kiko Beibel ta bisa tokante e asuntu i papia ku un ruman ku tin eksperensia. Analisá dikon e idea ei ta atraé bo, dikon e ta robes i kon bo por refut’é. Nos tur por protehá nos mes kontra mundu su manera di pensa ora nos sigui e konseho ku Pablo a duna na e kongregashon na Kolósas: “Sigui kana den sabiduria pa ku hende di pafó . . . Sa kon boso mester kontestá kada persona.”—Kol. 4:5, 6.

^ par. 9 Hopi hende no sa ku e pasashi na Huan 7:53–8:11 ku tin den algun Beibel no ta parti di e manuskritonan original skirbí bou di inspirashon. A base di e pasashi akí, algun hende ta kere ku ta solamente un hende sin piká por bisa ku un otro hende ta kulpabel di a kometé adulterio. Pero e lei ku Dios a duna e nashon di Israel a bisa: “Si haña un hòmber ta drumi ku un muhé kasá, e ora ei nan tur dos mester muri.”—Deu. 22:22.