Bai na kontenido

Bai na kontenido

Kon Bo Por Adaptá na Bo Kongregashon Nobo?

Kon Bo Por Adaptá na Bo Kongregashon Nobo?

ALLEN * a bisa: “Mi tabata poko preokupá pa muda bini akí. Mi no tabata sa si lo mi a haña amigu òf si e rumannan lo a gusta mi.” Allen ta adaptando su mes na un kongregashon nobo ku ta keda mas ku 1.400 kilometer for di kaminda e tabata biba.

Si bo a muda bai un otro kongregashon, kisas bo tambe ta un poko preokupá. Kiko por yuda bo adaptá? Kiko bo por hasi si e proseso di adaptá ta mas difísil ku loke bo a spera? Di otro banda, si abo no a muda bai un otro kongregashon, kiko bo por hasi pa yuda rumannan ku a muda bini bo kongregashon?

KON BO POR ADAPTÁ BO MES I PROGRESÁ?

Pensa riba e ehèmpel akí: Ora bo saka un palu for di tera pa plant’é otro kaminda, bo mester kòrta mayoria di su raisnan. E proseso ei ta duna e palu strès. Unabes ku bolbe planta e palu, mesora e mester kuminsá saka rais nobo. Di igual manera, e echo ku bo a bai un otro kongregashon kisas por duna bo strès. Den bo kongregashon anterior, bo a saka ‘rais’ den sentido ku bo a sera amistatnan ku bo ta balorá mashá i bo tabatin un rutina spiritual ku bo a kustumbrá kuné. Pero awor bo tin ku saka rais nobo pa progresá den un ambiente nobo. Kiko por yuda bo? Ban analisá algun prinsipio di Beibel ku por yuda bo hasi esei.

Un hende ku regularmente ta lesa e Palabra di Dios ta “manera un palu, plantá kantu di koridanan di awa, ku ta duna su fruta na su tempu, i su blachi no ta marchitá; i tur loke ku e hasi ta prosperá.”Sal. 1:1-3.

Meskos ku un palu regularmente mester di awa pa e keda salú, asina tambe un kristian regularmente mester alimentá su mes ku e Palabra di Dios pa e keda spiritualmente fuerte. P’esei, sigui lesa Beibel tur dia i sigui bai reunion regularmente. Ademas, sigui ku e bon kustumber di hasi estudio personal i tene Adorashon Komo Famia riba un base regular. Bo ta bai tin mester di e mesun provishonnan spiritual ku bo tabatin mester di dje na bo kongregashon anterior.

“Esun ku duna di bebe tambe lo haña di bebe.”Pro. 11:25.

Lo bo sinti bo animá i lo bo adaptá mas lihé ora bo partisipá plenamente den sirbishi. Kevin, kende ta un ansiano, a bisa: “Loke a yuda ami ku mi kasá tabata di traha pionero ousiliar asina ku nos a yega na nos kongregashon nobo. Asina nos a siña konosé e rumannan, e pioneronan i e teritorio masha lihé.” Roger, kende a muda bai un teritorio ku ta keda mas ku 1.600 kilometer for di kaminda e tabata biba, ta bisa: “E mihó manera pa adaptá na un kongregashon nobo ta pa bai den sirbishi mas tantu posibel. Ademas, laga e ansianonan sa ku bo ta dispuesto pa yuda den kualke manera, por ehèmpel pa limpia e Salòn di Reino, pa duna parti boluntario òf pa buska un ruman pa bai reunion. Ora e rumannan mira ku bo ta kla pa yuda, lo ta mas fásil pa nan bira bo amigu.”

“Habri boso kurason hanchu.”2 Kor. 6:13.

Ta importante pa mustra amor na mas ruman. Despues ku Melissa ku su famia a bai un otro kongregashon, nan a enfoká riba sera amistat ku e rumannan. E ta konta: “Nos tabata asosiá ku e rumannan  promé i despues di reunion. Esei a duna nos e chèns pa kòmbersá ku nan i no djis kumindá nan so.” Esaki a yuda nan kòrda nòmber di e rumannan mas lihé. Ademas, nan a habri nan kurason hanchu i a mustra hospitalidat, algu ku a fortalesé e amistatnan nobo ku nan a sera. Melissa ta konta: “Nos a interkambiá number di telefòn pa asina nan por a tuma kontakto ku nos i inkluí nos den aktividatnan spiritual òf otro aktividatnan.”

Si e idea so di sera konosí ku hende nobo ta preokupá bo, bo por kuminsá ku algu simpel. Por ehèmpel, bo por smail, asta si bo no tin masha gana di hasi esei na promé instante. Un smail ta atraé hende na bo. Al fin i al kabo, “wowo ku ta bria ta alegrá kurason.” (Pro. 15:30) Rachel, kende a muda bai leu for di kaminda e tabata biba, ta konta: “Di naturalesa mi ta masha tímido. Tin biaha mi tin ku fòrsa mi mes pa papia ku e rumannan den mi kongregashon nobo. Na Salòn di Reino, mi ta aserká kualke ruman ku ta sintá sin ta papia ku niun hende. Kisas e ta mes tímido ku mi.” Dikon no pone meta pa kòmbersá ku un hende nobo promé òf despues di kada reunion?

Di otro banda, den e promé simannan, podisé bo ta masha ansioso pa konosé hende nobo. Pero despues ora kos bira normal, e sintimentu ei por baha. Anto e ora ei kisas bo tin ku hasi esfuerso pa sigui sera mas amistat.

Ora saka un palu for di tera pa plant’é otro kaminda, e ta haña strès, pero despues e ta saka rais nobo

TUMA BO TEMPU PA ADAPTÁ

Tin palu ku ta tuma mas tantu tempu pa saka rais i bira firme den un ambiente nobo. Di igual manera, no ta tur ruman ta adaptá mesun lihé na un kongregashon nobo. Si bo a bai un kongregashon nobo algun tempu pasá pero ainda bo no a adaptá bo mes, e siguiente prinsipionan di Beibel por yuda bo:

“Laga nos no stòp di hasi loke ta bon, pasobra na e debido tempu nos lo kosechá si nos no kansa.”Gal. 6:9.

Si bo no a logra adaptá lihé manera bo a spera, tuma bo tempu. Por ehèmpel, hopi misionero ku a bai e Skol di Galaad ta keda pa vários aña na e pais kaminda nan a ser asigná promé ku nan bai bishitá nan pais natal. Esei ta yuda nan sera amistat ku e rumannan lokal i adaptá nan mes na un kultura diferente.

Alejandro, kende a muda diferente biaha, sa ku bo no por pone e proseso di adaptá bai mas lihé. E ta konta: “Despues di e último biaha ku nos a muda, mi kasá a bisa mi ku tur su amiganan ta den e kongregashon ku nos a bai laga!” Alejandro a rekordá su kasá ku el a bisa e mesun kos dos aña promé, e último biaha ku nan a muda. Pero durante e dos añanan ei, su kasá a mustra interes den e rumannan i rumannan ku e no tabata konosé a bira su bon amiganan.

“No bisa: ‘Pakiko e dianan di ántes tabata mihó ku esakinan?’ Pasobra no ta for di sabiduria bo ta puntra esaki.”Ekl. 7:10.

Evitá di kompará bo kongregashon nobo ku esun anterior. Kisas e rumannan den bo kongregashon nobo ta mas reservá òf mas mondig ku bo a kustumbrá kuné. Purba di enfoká riba nan bon kualidatnan, meskos ku lo bo ke pa nan enfoká riba bo bon kualidatnan. Algun ruman ku a muda bai un otro kongregashon, ta ripará ku nan tin ku puntra  nan mes: ‘Di bèrdat mi ta stima “henter e asosiashon di rumannan”?’—1 Ped. 2:17.

“Sigui pidi, i boso lo risibí.”Luk. 11:9.

Sigui pidi Yehova yuda bo. Un ansiano ku yama David a bisa: “No djis hunga duru. Tin hopi kos ku nos por hasi solamente ku yudansa di Yehova. P’esei pidié yuda bo!” Rachel, menshoná anteriormente, ta di akuerdo ku esei. E ta konta: “Si ami ku mi kasá sinti ku nos no ta parti di e kongregashon, nos ta hasi orashon spesífikamente tokante esei i ta pidi Yehova pa ‘por fabor yuda nos mira si nos ta hasiendo algu ku ta pone ku e rumannan no ta sinti nan atraí na nos.’ I despues nos ta purba di pasa mas tempu ku e rumannan.”

Mayornan, si boso yunan ta lucha pa adaptá nan mes, tuma tempu pa hasi orashon ku nan tokante e asuntu. Bo por sòru pa nan tin bon asosiashon ku lo animá nan, i asina nan lo sera amistatnan nobo.

YUDA RUMANNAN NOBO SINTI NAN NA KAS

Kiko bo por hasi pa yuda rumannan nobo ku a bini den bo kongregashon? Purba di ta un bon amigu for di prinsipio. Pa bo hasi esei, purba di imaginá kiko abo lo apresiá si bo tabata nobo i hasi esei. (Mat. 7:12) Bo por invitá rumannan nobo pa djòin bo den bo Adorashon Komo Famia òf pa wak e programa mensual riba JW Broadcasting? Òf bo por pidi nan pa traha ku bo den sirbishi? Ademas, si bo invitá nan pa bin kome serka bo, nan lo no lubidá bo muestra di hospitalidat. Den ki otro manera práktiko bo por yuda rumannan ku ta nobo den bo kongregashon?

Carlos a bisa: “Ora nos a yega na nos kongregashon nobo, un ruman muhé a duna nos un lista di lugá ku tin produkto na bon preis. Esei a yuda hopi.” Rumannan ku ta bini di un klima diferente lo keda kontentu ora bo siña nan ki paña pa bisti den e klima nobo ku por ta kayente, friu òf ku hopi áwaseru. Tambe bo por konta nan tokante e komunidat i e kreensianan religioso di hende den teritorio pa asina nan por ta mas efikas den sirbishi.

BO ESFUERSONAN TA BALE LA PENA

Allen, menshoná na komienso, tin mas ku un aña den su kongregashon nobo. E ta kòrda: “Na prinsipio, mi mester a fòrsa mi mes pa konosé e rumannan. Pero awor nan ta manera mi famia, i mi ta felis.” Allen a realisá ku ora el a muda, e no a pèrdè niun amigu. Mas bien, el a haña mas amigu, ku muy probablemente lo keda su amigunan pa semper.

^ par. 2 A kambia algun nòmber.