Bai na kontenido

Bai na kontenido

Bo Ta Balorá Yehova Su Propio Buki?

Bo Ta Balorá Yehova Su Propio Buki?

“Ora boso a risibí e palabra di Dios, . . . boso no a asept’é komo palabra di hende sino, manera loke e ta di bèrdat, komo e palabra di Dios.”—1 TES. 2:13.

KANTIKA: 114, 113

1-3. (a) Kiko lo por tabata e problema entre Evodia i Síntike? (Wak e promé plachi.) (b) Kon nos por evitá e tipo di problemanan ei?

YEHOVA su sirbidónan ta balorá su Buki santu, esta, Beibel. Komo ku nos ta hende imperfekto, nos tur sa haña konseho bíbliko. Kon nos ta reakshoná? Tuma e ehèmpel di dos kristian di promé siglo, Evodia i Síntike. E dos muhénan ungí akí tabatin problema serio ku otro. Ki problema nan tabatin? Beibel no ta bisa esei. Pero laga nos imaginá e siguiente situashon.

2 Suponé ku Evodia a invitá algun ruman na su kas pa un komementu i pa pasa un ratu ameno. Síntike no a haña invitashon, pero despues el a tende kon dushi tur hende a pasa. Síntike lo a pensa: ‘Mi no por kere ku Evodia no a invitá mi! M’a kere ku e ta mi mihó amiga.’ Síntike a sintié traishoná i a kuminsá duda den Evodia i asta deskonfi’é. Pues Síntike a organisá su mes komementu i a invitá e mesun rumannan ku tabata na kas di Evodia pero no a invit’é. E problema entre Evodia i Síntike por a kibra e pas di henter e kongregashon. Beibel no ta bisa nos kiko a pasa despues, pero e ruman muhénan akí lo  mester a aseptá apòstel Pablo su konseho duná ku amor.—Flp. 4:2, 3.

3 Awe, e tipo di situashonnan akí sa kousa problema den e kongregashonnan di e pueblo di Yehova. Sinembargo, nos por resolvé e problemanan ei, òf asta evitá nan, si nos apliká konseho ku tin den e Palabra di Dios. I si nos ta balorá Yehova su propio Buki, nos lo apliká su instrukshonnan den nos bida.—Sal. 27:11.

DIOS SU PROPIO BUKI I HENDE SU SINTIMENTUNAN

4, 5. Ki konseho Beibel ta duna enkuanto kontrolá nos emoshonnan?

4 No ta fásil pa kontrolá nos sintimentu-, òf emoshonnan, ora nos sinti ku hende a insultá nos òf a trata nos na un manera inhustu, por ehèmpel, pa motibu di nos rasa, koló di kueru òf otro aspekto físiko. I lo ta aun mas doloroso si ta un ruman spiritual a hùrt nos. E Palabra di Dios ta kontené konseho ku por yuda nos trata ku e karakterístika desagradabel akí di imperfekshon?

5 For di prinsipio di kreashon humano, Yehova ta opservá kon hende ta trata otro. E ta tuma nota di nos emoshon- i akshonnan. Ora nos laga nos emoshonnan dominá nos pensamentunan, nos por papia òf hasi kos ku por duel nos despues. Pues ta masha sabí di nos parti pa apliká e konseho bíbliko pa kontrolá nos emoshonnan i evitá di sinti nos di hùrt muchu lihé. (Lesa Proverbionan 16:32; Eklesiástes 7:9.) Sin duda, nos tur tin ku hasi nos bèst pa ta ménos krepchi i pa ta kla pa pordoná. Pa Yehova i Hesus, ta masha importante pa nos pordoná otro. (Mat. 6:14, 15) Puntra bo mes: ‘Mi mester pordoná mas? Mi mester hasi mas esfuerso pa kontrolá mi emoshonnan?’

6. Dikon nos mester tene kuidou pa nos no bira amargá?

6 Hende ku no ta tene nan emoshonnan bou di kontrol hopi biaha ta bira amargá. Komo resultado, otro hende ta hala pia for di nan. Un ruman ku ta amargá por ta un mal influensia den kongregashon. Kisas e ta purba di skonde su amargura, òf asta su rabia, pero su mal aktitut “lo wòrdu revelá dilanti di e asamblea [òf, “kongregashon,” NW].” (Pro. 26:24-26) E ansianonan ta usa Beibel pa yuda un ruman asina mira ku amargura, odio i renkor ta karakterístikanan ku no ta pas den e organisashon di Dios. Yehova su propio Buki presioso ta papia masha kla tokante esei. (Lev. 19:17, 18; Rom. 3:11-18) Abo lo sigui su guia?

KÒRDA KON DIOS TA GUIA NOS

7, 8. (a) Kon Yehova ta dirigí e parti terenal di su organisashon? (b) Kua ta algun instrukshon ku nos ta haña den Beibel, i dikon nos tin ku obedesé nan?

7 Yehova ta dirigí i alimentá e parti terenal di su organisashon pa medio di “e esklabo fiel i prudente” bou di guia di Kristu, “kabes di e kongregashon.” (Mat. 24:45-47; Efe. 5:23) Meskos ku e kuerpo gobernante di promé siglo, e esklabo akí ta aseptá Dios su palabra, òf mensahe, inspirá i ta balor’é. (Lesa 1 Tesalonisensenan 2:13.) Kua ta algun instrukshon ku Beibel ta duna nos pa nos benefisio?

8 Beibel ta manda nos asistí regularmente na nos reunionnan. (Heb. 10:24, 25) Ademas, e ta animá nos pa nos tin e mesun kreensianan bíbliko. (1 Kor. 1:10) E Palabra di Dios ta bisa nos pa pone e Reino na promé lugá den nos bida. (Mat. 6:33) Tambe e Skritura ta enfatisá nos responsabilidat i privilegio di  prediká di kas pa kas, na lugánan públiko i di duna testimonio informal. (Mat. 28:19, 20; Echo. 5:42; 17:17; 20:20) Ademas, Dios su Buki ta dirigí ansianonan kristian pa mantené Dios su organisashon limpi. (1 Kor. 5:1-5, 13; 1 Tim. 5:19-21) Anto Yehova ta eksigí pa tur hende ku ta parti di su organisashon terenal ta limpi, tantu den sentido físiko komo spiritual.—2 Kor. 7:1.

9. Kua ta e úniko medio ku Hesukristu ta usa pa yuda nos komprondé e Palabra di Dios?

9 Kisas algun hende ta pensa ku nan por interpretá Beibel riba nan mes. Pero Hesus a nombra “e esklabo fiel” komo e úniko medio pa distribuí kuminda spiritual. Desde 1919, Hesukristu glorifiká ta usando e esklabo ei pa yuda su siguidónan komprondé Dios su propio Buki i sigui su guia. Si nos obedesé instrukshon ku nos ta haña den Beibel, e kongregashon lo keda limpi, i nos lo mantené e pas i union ku mester reina den dje. P’esei, kada un di nos tin ku puntra nos mes: ‘Mi ta leal na e medio ku Hesus ta usa awe?’

E GAROSHI DI YEHOVA TA MOVE KU GRAN VELOSIDAT!

10. Kon e buki di Ezekiel ta deskribí e parti selestial di Yehova su organisashon?

10 E Palabra skirbí di Yehova ta siña nos tokante e parti selestial di su organisashon. Por ehèmpel, profeta Ezekiel a haña un vishon den kua el a mira un garoshi den shelu ku ta representá e parti selestial di Dios su organisashon. (Eze. 1:4-28) Yehova ta kore e garoshi akí, i e ta bai kaminda su spiritu mand’é. Anto e parti selestial di su organisashon ta dirigí e parti terenal. No tin duda ku e garoshi ei ta moviendo padilanti. Djis pensa riba e diferente kambionan ku a tuma lugá den Yehova su organisashon durante e último dékada i kòrda ku ta é ta tras di nan. Awor ku Kristu i su angelnan santu ta serka di destruí e mundu malbado akí, Yehova su garoshi ta move ku gran velosidat pa vindiká su soberania i santifiká su santu nòmber.

Nos ta masha gradisidu pa e trabou duru di tur e trahadónan boluntario di konstrukshon (Wak paragraf 11)

11, 12. Kiko ta algun kos ku e organisashon di Yehova ta logrando?

11 Pensa un ratu riba loke e parti terenal di Yehova su organisashon ta logrando den e último dianan akí. Konstrukshon. Sientos di ruman a traha duru pa yuda konstruí e ofisina prinsipal nobo di Testigunan di Yehova na Warwick, New York, Merka. Bou di guia di e Departamento Mundial di Diseño i Konstrukshon, míles di boluntario rònt mundu ta traha duru pa konstruí mas Salòn di Reino i amplia fasilidatnan di sukursal. Nos ta masha gradisidu pa tur e trahadónan boluntario inkansabel ei ku ta traha duru riba e proyektonan akí. Kòrda ku Yehova ta bendishoná predikadónan di Reino rònt mundu ku ta kontribuí fielmente i na un manera humilde ku loke nan por pa yuda finansiá e proyektonan ei.—Luk. 21:1-4.

 12 Edukashon bíbliko. Pensa riba e vários skolnan bíbliko ku ta duna siñansa divino. (Isa. 2:2, 3) Nos tin e Skol di Sirbishi di Pionero, e Skol pa Predikadó di Reino, e Skol di Galaad, e Skol pa Bètelita Nobo, e Skol pa Superintendente di Sirkuito i Nan Esposa, e Skol pa Ansiano di Kongregashon, e Skol di Ministerio di Reino i e Skol pa Miembro di Komité di Sukursal i Nan Esposa. No tin duda ku Yehova ta gusta siña su pueblo! Nos ta promové edukashon bíbliko riba nos website tambe, jw.org, kaminda nos tin publikashon den sientos di idioma. E website tin, entre otro, rúbrika spesial pa mucha i famia i tambe un sekshon di notisia. Abo ta hasi uso di e website den sirbishi i durante boso Adorashon Komo Famia?

SEA LEAL NA YEHOVA I APOYÁ SU ORGANISASHON

13. Komo fiel sirbidónan di Yehova, ki responsabilidat nos tin?

13 Ta un privilegio pa ta parti di Yehova su organisashon! Komo ku nos konosé Dios su normanan i sa kiko e ta rekerí di nos, nos tin e responsabilidat di hasi loke ta korekto i apoyá su soberania. E mundu akí ta mas i mas degenerá. Pero meskos ku Yehova, nos tambe mester “odia maldat.” (Sal. 97:10) Nos no ke ta manera hende malbado ku ta “yama loke ta malu, bon, i loke ta bon, malu.” (Isa. 5:20) Nos ke agradá Dios, i p’esei nos ta hasi nos bèst pa keda limpi den sentido físiko, moral i spiritual. (1 Kor. 6:9-11) Nos ta stima Yehova i ta pone nos konfiansa den dje. Ademas, nos ta skohe pa demostrá nos lealtat na dje i biba segun su normanan ku ta skirbí bon kla den su Buki presioso. Nos ta hasi tur nos esfuerso pa kumpli ku e normanan ei na unda ku nos por ta, sea na kas, na trabou, na skol òf den kongregashon. (Pro. 15:3) Ban wak den ki manera mas nos por demostrá nos lealtat na Dios.

14. Kon mayornan kristian ta demostrá lealtat na Yehova?

14 Den lantamentu di yu. Mayornan kristian ta demostrá lealtat na Yehova ora nan ta lanta nan yunan segun su Palabra. Mayornan ku ta stima Dios no ta laga kustumbernan lokal influensiá e manera ku nan ta lanta nan yunan. Un famia kristian no ta imitá e spiritu di mundu. (Efe. 2:2) Por ehèmpel, un tata kristian lo no pensa: ‘Den e pais akí, ta hende muhé ta eduká yu.’ Beibel ta masha kla riba e punto akí. E ta bisa: “Tatanan, . . . sigui lanta [boso yunan] den e disiplina di Yehova i inkulká su manera di pensa [òf, instrukshon; guia] den nan.” (Efe. 6:4) Un tata i un mama ku ta teme Dios ke pa nan yunan ta manera Samuel, ya ku Yehova tabata kuné segun ku e tabata krese.—1 Sam. 3:19.

15. Kon nos ta demostrá nos lealtat na Dios ora nos tin ku tuma desishon importante?

15 Ora di tuma desishon. Un manera pa demostrá nos lealtat na Dios ora nos tin ku tuma desishon importante ta di buska yudansa den su Palabra i mediante su organisashon. Pa ilustrá e importansia di esei, laga nos konsiderá un tópiko delikado ku hopi mayor ta haña nan kuné. Ta asina ku algun imigrante tin e kustumber di manda nan yunan resien nasí na nan pais natal pa nan famianan einan kuida, pa asina nan por sigui traha i gana plaka. Ta bèrdat ku esaki ta un desishon personal, pero nos tin ku kòrda ku nos ta responsabel dilanti di Dios pa e desishonnan ku nos ta tuma. (Lesa Romanonan 14:12.) Lo ta sabí pa tuma desishon importante enkuanto nos famia i  otro asuntu di bida sin buska drechi kiko Beibel ta bisa? Klaru ku nò! Nos mester di e yudansa di nos Tata selestial pasobra nos no por dirigí nos pasonan.—Yer. 10:23.

16. Ki desishon un mama mester a tuma ora su bebi a nase, i kiko a yud’é tuma e desishon korekto?

16 Un señora estranhero kier a manda su bebi resien nasí serka welanan di e bebi ku ta biba na su pais natal. Tempu e bebi a nase, Testigunan di Yehova a kuminsá studia Beibel ku e señora. El a hasi progreso i a siña ku e responsabilidat ku Dios a dun’é komo mayor ta di lanta su yu pa sirbi Yehova. (Sal. 127:3; Pro. 22:6) E señora a roga Yehova, manera e Skritura ta animá nos pa hasi, pa haña sa kiko e mester a hasi. (Sal. 62:7, 8) Ademas, el a papia frankamente ku e ruman ku tabata studia Beibel kuné i tambe ku algun ruman di e kongregashon. El a konkluí ku no tabata bon pa e manda su bebi serka e welanan, apesar di preshon di parti di su famia i amigunan. Su kasá a keda asina impreshoná ku e manera ku e kongregashon a yuda su esposa i nan bebi ku el a aseptá un estudio di Beibel i a kuminsá bai e reunionnan huntu ku su kasá i yu. Bo no ta kere ku e mama akí a sinti ku Yehova a skucha su orashon hasí di kurason? Sigur ku sí!

17. Ki instrukshonnan nos a haña relashoná ku studiantenan di Beibel?

17 Ora di sigui instrukshon. Un otro manera importante ku nos ta demostrá lealtat na Dios ta di sigui instrukshon ku nos ta haña di su organisashon. Pensa por ehèmpel riba e sugerensianan ku nos a haña relashoná ku nos studiantenan di Beibel. Un di nan ta pa ora nos kuminsá un estudio di Beibel usando e buki Kiko Beibel Ta Siña Realmente?, nos tuma algun minüt na final di kada seshon di estudio pa hala e studiante su atenshon na aspektonan di nos organisashon. Pa hasi esaki, nos por usa e vidio Kiko Ta Sosodé na un Salòn di Reino? i e foyeto Ken Awe Ta Hasi e Boluntat di Yehova? Tambe nos a haña e rekomendashon pa despues ku nos kaba di studia e buki Beibel Ta Siña ku un studiante progresivo, nos studia e buki Keda den e Amor di Dioskuné, asta si pa e tempu ei el a batisá kaba. (Kol. 2:7) Abo ta sigui e instrukshonnan akí di Yehova su organisashon?

18, 19. Kiko ta algun motibu pakiko nos mester ta gradisidu na Yehova?

18 Nos tin hopi motibu pa ta gradisidu na Yehova. Danki na dje nos tin bida; si no tabata p’e, nos lo no por move ni eksistí mes. (Echo. 17:27, 28) Tambe el a duna nos un regalo masha presioso, esta, su propio buki, Beibel. Nos ta gradisidu p’e i ta asept’é komo Dios su mensahe, meskos ku e kristiannan na Tesalónika a risibí e Palabra di Dios i a asept’é.—1 Tes. 2:13.

19 E Palabra skirbí di Dios a yuda nos hala serka Yehova, i é na su turno a hala serka nos. (Sant. 4:8) Nos Tata selestial a duna nos e maravioso privilegio di por forma parti di su organisashon. Nos ta apresiá e bendishonnan akí mashá! E salmista a ekspresá e sintimentu akí na un manera masha bunita, ora el a kanta: “Duna gradisimentu na SEÑOR, pasobra e ta bon, pasobra su miserikòrdia [òf, “amor leal,” NW] ta pa semper.” (Sal. 136:1) Salmo 136 ta menshoná e refrein “su miserikòrdia [òf, amor leal,] ta pa semper” 26 biaha. Si nos ta leal na Yehova i na su organisashon, lo e duna nos bida eterno i lo e ta pa semper leal na nos.