Bai na kontenido

Bai na kontenido

Saka Pleno Probecho di Tur e Provishonnan di Yehova

Saka Pleno Probecho di Tur e Provishonnan di Yehova

“Ami, Yehova, ta bo Dios, Esun ku ta siña bo benefisiá bo mes.”—ISA. 48:17, NW.

KANTIKA: 117, 114

1, 2. (a) Kiko Testigunan di Yehova ta pensa di Beibel? (b) Kua parti di Beibel bo ta gusta mas?

TESTIGUNAN DI YEHOVA ta stima Beibel. E ta duna guia konfiabel i ta yuda nos haña konsuelo i speransa. (Rom. 15:4) Nos ta mira Beibel, no komo un kolekshon di pensamentu humano, sino “manera loke e ta di bèrdat, komo e palabra di Dios.”—1 Tes. 2:13.

2 Sin duda, nos tur tin un parti di Beibel ku mas nos ta gusta. Algun ruman gusta lesa e Evangelionan, pasobra nan ta deskribí e bunita personalidat di Yehova ku su Yu a reflehá. (Huan 14:9) Otro ruman gusta lesa e partinan di Beibel ku ta kontené profesia, manera e buki di Revelashon, ku ta duna un ñapa di “e kosnan ku tin ku sosodé pronto.” (Rev. 1:1) I sin duda nos tur lo a yega di saka konsuelo for di e buki di Salmonan òf lèsnan práktiko for di e buki di Proverbionan. Beibel di bèrdat ta un buki pa un i tur.

3, 4. (a) Kiko nos ta pensa di nos publikashonnan? (b) Ki publikashonnan nos tin pa gruponan spesífiko di hende?

3 Komo ku nos ta stima Beibel, nos ta stima nos publikashonnan basá riba Beibel tambe. Por ehèmpel, nos ta balorá e kuminda spiritual ku nos ta haña den buki, foyeto, revista i  otro literatura. Nos sa ku e provishonnan akí ku ta bini di Yehova ta yuda nos keda spiritualmente alerta, bon alimentá den sentido spiritual i “firme den fe.”—Tito 2:2.

4 Banda di e publikashonnan pa Testigunan di Yehova, nos ta haña material basá riba Beibel ku ta pa un grupo spesífiko di hende. Algun di e materialnan akí ta diseñá spesialmente pa hóben i otro material ta diseñá pa yuda nan mayornan. Hopi di e materialnan akí, sea imprimí òf riba nos website, ta diseñá pa hende ku no ta Testigu. E abundansia di kuminda spiritual ei ta pone nos kòrda ku Yehova a kumpli ku su promesa di “prepará un bankete luhoso pa tur pueblo.”—Isa. 25:6.

5. Di kiko nos por ta sigur?

5 Kasi sigur, mayoria di nos ta deseá di tin mas tempu pa lesa Beibel i publikashon basá riba Beibel. Nos por tin sigur ku Yehova ta apresiá e esfuerso ku nos ta hasi pa ‘usa nos tempu di e mihó manera’ pa lesa Beibel regularmente i hasi estudio personal. (Efe. 5:15, 16) Pa ta sinsero, no ta semper nos ta logra bai a fondo den tur kuminda spiritual ku ta disponibel pa nos. Pero, tin algu ku nos tin ku tene kuidou kuné. Kiko esei ta?

6. Kiko por stroba nos di benefisiá di algun provishon di Yehova?

6 Nos mester tene kuidou pa nos no pèrdè e chèns di saka benefisio for di algun provishon spiritual keriendo ku nan no ta apliká na nos. Por ehèmpel, kiko si un parti di Beibel no ta parse relevante pa nos? Òf kiko si un publikashon no ta spesífikamente diseñá pa nos? Nos tin e tendensia di pasa ariba ariba den e informashon òf asta keda sin les’é mes? Si ta asina, nos ta keda sin saka benefisio for di e informashon. Kon nos por evitá di kai den e trampa ei? Riba tur kos, nos kada un mester tene na mente ku ta Dios ta e Fuente di tur nos provishonnan spiritual. Yehova a bisa mediante profeta Isaías: “Ami, Yehova, ta bo Dios, Esun ku ta siña bo benefisiá bo mes.” (Isa. 48:17, NW.) Ta bon pa nos konsiderá tres sugerensia ku por yuda nos benefisiá di tur parti di Beibel i vários tipo di kuminda spiritual ku ta disponibel pa nos.

SUGERENSIA PA YUDA BO BENEFISIÁ DI LESAMENTU DI BEIBEL

7. Dikon nos mester lesa Beibel ku un mente habrí?

7 Lesa ku un mente habrí. Beibel ta bisa bon kla ku “henter e Skritura ta inspirá di Dios i ta probechoso.” (2 Tim. 3:16) Ta bèrdat ku algun parti di Beibel tabata dirigí na sierto persona òf grupo di hende. P’esei nos tin ku lesa Beibel ku un mente habrí. Un ruman hòmber a bisa: “Ora mi lesa Beibel, mi ta purba di kòrda ku por tin diferente lès ku mi por saka for di un relato.” El a agregá: “Ora mi kòrda riba esei, e ta yuda mi wak mas aleu di loke ta opvio.” Promé ku nos lesa e Palabra di Dios, ta bon pa nos pidi Yehova yuda nos keda ku un mente habrí i duna nos sabiduria pa nos komprondé e lèsnan ku e ke pa nos siña.—Èsd. 7:10; lesa Santiago 1:5.

Abo ta saka mayor probecho di bo lesamentu di Beibel? (Wak paragraf 7)

8, 9. (a) Ora nos ta lesa Beibel, ki preguntanan nos por hasi nos mes? (b) Kiko e rekisitonan pa ansiano kristian ta siña nos di Yehova?

8 Hasi pregunta. Segun ku bo ta lesa un pasashi di Beibel, para un ratu i puntra bo mes: ‘Kiko esaki ta siña mi di Yehova? Kon mi por apliká e informashon akí den mi bida? Kon mi por us’é pa yuda otro hende?’ Ora nos meditá  riba e preguntanan ei, sin duda, nos lo saka pleno probecho for di nos lesamentu di Beibel. Tuma por ehèmpel e rekisitonan bíbliko pa ansiano. (Lesa 1 Timoteo 3:2-7.) Ya ku mayoria di nos no ta sirbi komo ansiano, kisas nos ta pensa ku e tekstonan akí no ta masha aplikabel na nos. Pero, ora nos analisá algun posibel kontesta pa e siguiente preguntanan, nos lo mira ku e rekisitonan ei por benefisiá nos tur den vários manera.

9 Kiko esaki ta siña mi di Yehova? Ora Yehova a duna e rekisitonan akí, el a mustra ku e ta pone normanan haltu pa hòmbernan nombrá. E ta ferwagt ku nan ta pone un bon ehèmpel, i e ta tene nan responsabel pa e manera ku nan ta trata e kongregashon, “ku el a kumpra ku sanger di su Yu.” (Echo. 20:28) Yehova ke pa nos sinti nos safe bou di kuido di e wardadónan di karné spiritual ei, esta, e ansianonan. (Isa. 32:1, 2) Pues ku esei na mente, e rekisitonan bíbliko ta pone nos kòrda kuantu Yehova ta interesá den nos.

10, 11. (a) Ora nos lesa di e rekisitonan pa ansiano, kon nos por apliká e informashon den nos bida? (b) Kon nos por usa e informashon ei pa yuda otro hende?

10 Kon mi por apliká e informashon akí den mi bida? Kada tantu tempu, un ansiano mester eksaminá su mes a base di e rekisitonan spiritual ei pa wak den ki área e por mehorá. Un ruman hòmber ku “ta hasi esfuerso pa bira un superintendente” mester analisá e rekisitonan ei pasobra e mester hasi su bèst pa kumpli ku nan mas mihó posibel. (1 Tim. 3:1) De echo, kada kristian por siña for di e rekisitonan ei komo ku Yehova ta ferwagt ku tur kristian ta kumpli ku mayoria di nan. Por ehèmpel, nos tur mester ta rasonabel i di sano huisio. (Flp. 4:5; 1 Ped. 4:7) Ora e ansianonan duna prueba di ta “ehèmpel pa e tou,” nos por siña for di nan i “imitá nan fe.”—1 Ped. 5:3; Heb. 13:7.

11 Kon mi por usa e informashon ei pa yuda otro hende? Nos por usa e lista di rekisito pa ansiano pa yuda hende interesá òf studiante di Beibel mira kon diferente ansianonan di Testigunan di  Yehova ta for di klero di kristiandat. Ademas, ora nos repasá e lista akí, nos lo por mira kuantu esfuerso e ansianonan di nos mes kongregashon ta hasi pa yuda nos. Ora nos meditá riba tur loke nan ta hasi, nos lo haña mas ‘rèspèt pa esnan ku ta traha duru entre nos.’ (1 Tes. 5:12) Anto mas rèspèt nos mustra na e rumannan ku ta traha duru akí, mas goso nan lo tin.—Heb. 13:17.

12, 13. (a) Ki sorto di investigashon nos por hasi ku e hèrmèntnan ku nos tin? (b) Duna un ehèmpel di kiko nos por siña ora nos buska informashon ku no ta bisto mesora.

12 Hasi investigashon. Nos por usa e hèrmèntnan ku nos tin disponibel pa buska informashon tokante:

  • Ken a skirbi e parti akí di Beibel?

  • Na unda i dikon el a ser skirbí?

  • Ki susesonan importante a tuma lugá ora un eskritor tabata skirbi un buki di Beibel?

E informashon akí por yuda nos saka lès ku no ta bisto mesora.

13 Tuma por ehèmpel Ezekiel 14:13 i 14, ku ta bisa: “‘Si un nashon peka kontra mi dor di transgresá grandemente, i mi saka mi man kontra dje, destruí su provishon di pan, manda hamber riba dje i kòrta kita tantu hende komo bestia for di dje, maske e tres hòmbernan aki: Noe, Daniel i Yòb tabata ayanan, nan lo por a libra solamente nan mes dor di nan hustisia,’ SEÑOR Dios ta deklará.” Ora nos hasi investigashon, nos ta haña sa ku Ezekiel a skirbi e parti akí rònt di aña 612 promé ku Kristu. Pa e tempu ei, Noe i Yòb a muri dia bieu, i Dios a keda kòrda nan fieldat. Ma Daniel sí tabata na bida ainda. De echo, lo e tabatin rònt di 20 aña ora Yehova a bisa ku e tabata mes hustu ku Noe i Yòb. E lès? Wèl, Yehova ta tuma nota di e integridat di tur su sirbidónan fiel, asta di esnan yòn, i ta balorá esei.—Sal. 148:12-14.

BENEFISIÁ DI UN VARIEDAT DI PUBLIKASHON

14. Kon material ku ta ser publiká pa hóben ta yuda nan, i kon otro hende tambe por benefisiá di nan? (Wak e promé plachi.)

14 Meskos ku nos ta saka benefisio ora nos ta studia tur parti di Beibel, asina tambe nos por benefisiá di tur kuminda spiritual ku nos risibí. Laga nos konsiderá algun ehèmpel. Material pa hóben. Durante último añanan, Yehova a proveé hopi material pa hóben. [1] Algun di e materialnan akí a ser diseñá pa yuda e hóbennan trata ku preshon na skol i e difikultatnan ku adolesensia sa trese kuné. Kon nos tur por benefisiá ora nos lesa e tipo di informashon ei? Ora nos hasi esei, nos ta kòrda riba loke nos hóbennan fiel ta enfrentá. E ora ei nos lo ta mihó prepará pa yuda nan.

15. Dikon kristiannan adulto mester ta interesá den informashon pa hóben?

15 Hopi di e difikultatnan ku e materialnan akí ta trata no ta problema ku hóbennan so ta enfrentá. Nos tur tin ku defendé nos fe, tene nos emoshonnan bou di kontrol, para firme kontra preshon di pareu i evitá mal asosiashon i entretenimentu insaludabel. E materialnan pa hóben ta trata e temanan akí i hopi mas. Akaso kristiannan adulto mester sinti ku e publikashonnan ku ta dirigí na hóben no ta konta pa nan? Niun ora so! Aunke e material ta ser presentá di tal manera ku e ta atraé hóbennan, e informashon ta basá riba prinsipionan bíbliko ku semper ta al kaso, i nos tur por benefisiá di e provishonnan spiritual akí.

16. Ku kiko mas nos publikashonnan ta yuda e hóbennan?

 16 Banda di yuda hóbennan trata ku problema, nos publikashonnan ta yuda nan krese spiritualmente i hala serka Yehova. (Lesa Eklesiástes 12:1, 13.) Aki tambe kristiannan adulto por saka benefisio. Por ehèmpel, e ¡Despertad! di aprel 2009 tabatin e artíkulo titulá Los jóvenes preguntan. ¿Cómo disfrutar la lectura de la Biblia? E artíkulo akí a inkluí vários sugerensia i un kuadro ku un hóben por kòrta i hinka den su Beibel pa usa komo referensia. Adultonan tambe a benefisiá di e artíkulo ei? Un esposa i mama di 24 aña di edat a bisa: “Semper mi tabatin problema ku lesamentu di Beibel. Mi a pone e sugerensianan den e artíkulo akí na práktika, i mi ta hasi bon uso di e kuadro. Awor mi ta lesa Beibel ku smak. Mi ta mira kon e bukinan di Beibel ta konektá ku otro manera un tela di hak masha bunita hinká den otro. Nunka promé mi no tabata asina entusiasmá ku lesamentu di Beibel.”

17, 18. Kon nos por benefisiá ora nos lesa material pa públiko? Duna un ehèmpel.

17 Material pa públiko. For di 2008 nos ta disfrutando di e edishon di estudio di E Toren di Vigilansia, ku ta spesialmente pa Testigunan di Yehova. Pero kiko di nos revistanan ku ta prinsipalmente pa e públiko en general? Nos por saka benefisio ora nos lesa nan tambe? Sigur ku sí. Pensa riba lo siguiente: Imaginá ku promé ku e diskurso públiko kuminsá, bo ta mira un hende ku bo a invitá na Salòn di Reino. Sin duda, bo ta masha kontentu. Segun ku e diskursante ta duna su diskurso, muy probablemente bo ta pensa riba e bishitante ei. Ta komo si fuera bo ta skucha e diskurso ku “oreanan” di e persona ei i ta puntra bo mes kon e informashon ei por yud’é kambia su bida. Despues di skucha e diskurso ei, bo ta haña mas apresio pa e tema ku a ser tratá.

18 Nos por eksperensiá algu similar ora nos lesa material ku a ser skirbí pa públiko en general. Por ehèmpel, e edishon públiko di E Toren di Vigilansia ta trata vários tema bíbliko na un manera ku un persona ku no ta Testigu por komprondé. I esei ta konta tambe pa hopi di e artíkulonan ku ta sali riba jw.org, manera esnan den e sekshon “Pregunta Ku Beibel Ta Kontestá” i “Pregunta Ku Hopi Hende Sa Hasi.” Ora nos lesa e informashon ei, nos ta haña mas apresio pa e bèrdatnan bíbliko ku nos konosé bon kaba. Ademas, nos lo por siña maneranan nobo pa splika nos kreensianan ora nos ta den sirbishi. Meskos tambe, e ¡Despertad! ta fortalesé nos konvikshon ku e Dios berdadero ta eksistí i ta yuda nos defendé nos kreensianan.—Lesa 1 Pedro 3:15.

19. Kon nos por mustra gratitut pa e provishonnan di Yehova?

19 Ta bisto anto ku Yehova a duna nos un abundansia di provishon pa satisfasé nos “nesesidat spiritual.” (Mat. 5:3) Laga nos sigui hasi uso di tur e provishonnan spiritual ku ta disponibel pa nos. Asina nos lo mustra nos gratitut na Esun ku ta siña nos pa benefisiá nos mes.—Isa. 48:17.

^ [1] (paragraf 14) E materialnan ei ta inkluí e buki Lo que los jóvenes preguntan. Respuestas prácticas, Tomo 1 i 2. I tambe e seri “Loke Hóbennan Sa Puntra,” ku ta disponibel solamente online.