Bai na kontenido

Bai na kontenido

Beibel Ta Sigui Kambia Bo Bida?

Beibel Ta Sigui Kambia Bo Bida?

“Transformá boso mes dor di renobá boso mente.”—ROM. 12:2.

KANTIKA: 61, 52

1-3. (a) Ki kambionan por ta difísil pa nos hasi despues di nos boutismo? (b) Si ta mas difísil ku nos a pensa pa hasi progreso, ki preguntanan nos por hasi nos mes? (Wak e promé plachi.)

ORA Kevin [1] a konosé e bèrdat, e tabatin masha gana di haña un amistat será ku Yehova. Pero, pa hopi aña, e tabata gèmbel, huma, bebe pisá i usa droga. Pa haña Dios su aprobashon, Kevin mester a stòp ku e práktikanan akí ku Beibel ta kondená. El a logra esaki ora el a konfia den Yehova i den e poder ku Su Palabra tin pa kambia hende.—Heb. 4:12.

2 Despues di boutismo, Kevin a stòp di hasi kambio den su bida? Nò, pasobra ainda e tabatin ku kultivá i refiná su kualidatnan kristian. (Efe. 4:31, 32) Por ehèmpel, el a ripará ku tabata difísil pa kontrolá su beis. El a atmití: “Tabata mas difísil pa siña kontrolá mi beis ku stòp di praktiká mi bisionan di ántes.” Orashon i estudio di Beibel profundo a yud’é hasi e kambionan nesesario.

 3 Meskos ku Kevin, hopi di nos mester a hasi kambio grandi den bida promé ku nos a batisá pa kumpli ku e rekisitonan básiko di Beibel. Despues di boutismo, nos a ripará ku nos tin ku sigui hasi kambio, asta esnan ku ta ménos bisto, pa nos por imitá Dios i Kristu mas mihó. (Efe. 5:1, 2; 1 Ped. 2:21) Kisas nos a ripará por ehèmpel ku nos ta muchu krítiko, tin miedu di hende, tin e tendensia di hasi redu òf tin otro debilidat. Bo ta haña ku ta mas difísil ku bo a pensa pa hasi e kambionan akí? Si ta asina, kisas bo ta puntra bo mes: ‘Mi a hasi kambio grandi kaba, pues dikon ta asina difísil pa mi hasi kambio mas chikitu? Kon mi por sigui laga Beibel hasi kambio den mi bida i asina progresá?’

SEA REALÍSTIKO

4. Dikon nos no por agradá Yehova den tur kos?

4 Ora nos a siña konosé Yehova, nos a bin stim’é i deseá di henter nos kurason pa hasi loke ta agrad’é. Pero maske kon grandi e deseo ei ta, nos imperfekshon ta pone ku no ta tur ora nos ta logra esei. Nos por sinti nos meskos ku apòstel Pablo, kende a skirbi: “Mi tin e deseo, ma no e kapasidat di hasi loke ta bon.”—Rom. 7:18; Sant. 3:2.

5. Ki kambionan nos a hasi promé ku nos a batisá, pero kon nos debilidatnan por ta afektando nos ainda?

5 Nos a bandoná práktikanan pekaminoso ku por stroba nos di forma parti di e kongregashon kristian. (1 Kor. 6:9, 10) Sinembargo, ainda nos ta imperfekto. (Kol. 3:9, 10) Pues, no ta realístiko pa pensa ku despues di boutismo, òf asta despues di hopi aña den e bèrdat, nos lo no kometé fayo, sufri un rekaida òf haña nos ta lucha ku tendensia òf motivashon inkorekto. De echo, kisas nos ta luchando ku sierto inklinashon pa añanan largu.

6, 7. (a) Kiko ta hasi posibel ku nos por ta amigu di Yehova apesar ku nos ta imperfekto? (b) Dikon nos no mester keda sin pidi Yehova pordoná nos?

6 Nos imperfekshon heredá no mester stroba nos di tin un amistat ku Dios i di sigui sirbié. Pensa riba esaki: Ora Yehova a hala nos serka dje i nos a bira su amigu, e tabata sa ku tin biaha nos lo faya. (Huan 6:44) Ya ku Dios konosé nos i sa kiko tin den nos kurason, e tabata sa ki tendensianan imperfekto lo ta un reto pa nos. I e tabata sa ku de bes en kuando nos lo peka. Apesar di esaki, tòg Yehova ke ta nos amigu.

7 Amor a motivá Dios pa duna nos un regalo presioso, esta, e sakrifisio di reskate di su Yu stimá. (Huan 3:16) Si nos arepentí i pidi Yehova pordon pa nos pikánan a base di e sakrifisio di reskate, nos por tin e konfiansa ku lo e pordoná nos, i nos lo keda su amigu. (Rom. 7:24, 25; 1 Huan 2:1, 2) Akaso nos mester keda sin probechá di e benefisionan di e reskate pasobra nos ta sinti ku nos ta impuru debí na nos pikánan? Klaru ku nò! Esei lo ta komo si fuera nos ta keda sin usa awa pa laba man pasobra nan ta sushi. No lubidá ku e reskate ta pa pekadó ku arepentí. Anto danki na e reskate ei nos por tin un amistat ku Yehova maske nos ta imperfekto.—Lesa 1 Timoteo 1:15.

8. Dikon nos no tin ku sera wowo pa nos debilidatnan?

8 Klaru ku nos no ta djis sera wowo pa nos debilidatnan. Pa nos kultivá un amistat ku Yehova, nos mester sigui hasi esfuerso pa imitá Dios i Kristu i pa ta e tipo di hende ku nan ke pa nos ta.  (Sal. 15:1-5) Ademas, e ta enserá ku nos mester hasi esfuerso pa tene nos tendensianan imperfekto bou di kontrol i asta eliminá nan si ta posibel. Sea ku nos a kaba di batisá òf tin hopi tempu den e bèrdat, nos tin ku “sigui ser reahustá.”—2 Kor. 13:11.

9. Kon nos por sa ku nos por sigui bisti e personalidat nobo?

9 Nos mester sigui hasi esfuerso pa “ser reahustá” i demostrá ku nos tin “e personalidat nobo.” Pablo a rekordá su rumannan: “Boso mester kita e personalidat bieu ku ta di akuerdo ku boso komportashon di ántes i ku ta ser ruiná pa motibu di su deseonan engañoso. I boso mester sigui renobá e forsa ku ta motivá boso mente, i bisti e personalidat nobo ku a ser kreá segun e boluntat di Dios den berdadero hustisia i lealtat.” (Efe. 4:22-24) E ekspreshon “sigui renobá” ta indiká ku bisti e personalidat nobo ta un proseso kontinuo. Esaki ta ègt un animashon! E ta sigurá nos ku sin importá kuantu tempu nos ta sirbiendo Yehova, nos por sigui hasi progreso den kultivá i refiná e kualidatnan kristian ku ta forma parti di e personalidat nobo. Sí, Beibel por sigui kambia nos bida.

DIKON E TA ASINA DIFÍSIL?

10. Kiko nos tin ku hasi pa sigui hasi kambio ku yudansa di e Palabra di Dios, i ki preguntanan por surgi?

10 Nos mester hasi hopi esfuerso si nos ke sigui laga e Palabra di Dios kambia nos. Pero dikon nos tin ku hasi asina tantu esfuerso? Si Yehova ta bendishoná nos esfuersonan, lo no mester ta mas fásil pa hasi progreso spiritual? Yehova no por simplemente sòru pa nos tendensianan inkorekto no ta asina fuerte pa nos por desplegá kualidatnan kristian sin hasi muchu esfuerso?

11-13. Dikon Yehova ta ferwagt ku nos ta hasi esfuerso pa vense nos debilidatnan?

11 Ora nos pensa riba e universo, nos ta mira ku Yehova tin gran poder. Por ehèmpel, kada sekònde solo ta transformá sinku mion tòn di su materia den energia. Aunke ta un parti chikitu so di e energia ei ta drenta e atmósfera di nos planeta, e ta proveé sufisiente kalor i lus pa sostené bida riba tera. (Sal. 74:16; Isa. 40:26) Ademas, Yehova por duna su sirbidónan poder, òf forsa, ora nan tin mester di esei. (Isa. 40:29) Pero dikon Dios no ta duna nos e forsa pa vense tur nos debilidatnan sin ku nos tin ku lucha ku nan òf siña di nos fayonan?

12 Yehova a duna nos un bunita regalo, esta, boluntat liber. Ora nos skohe pa hasi Dios su boluntat i ta hasi nos bèst pa kumpli kuné, nos ta mustra kuantu nos ta stima Yehova, kuantu nos ta deseá di agrad’é i ku nos ta apoyá su soberania. Satanas a insinuá ku Yehova no tin derecho di goberná. P’esei, komo un Tata selestial masha gradisidu, e ta balorá e esfuersonan ku nos ta hasi di kurason pa apoyá su soberania. (Yòb 2:3-5; Pro. 27:11) Ma si Yehova yuda nos di tal manera ku nos no tin nodi di hasi niun klase di esfuerso pa vense tendensia imperfekto pa nos por agrad’é, e ora ei nos lo no por demostrá ku di bèrdat nos ta leal i ta apoyá su soberania.

13 P’esei, Yehova ta bisa nos pa ‘hasi tur nos esfuerso’ pa kultivá kualidatnan kristian. (Lesa 2 Pedro 1:5-7; Kol. 3:12) E ta ferwagt ku nos ta traha duru pa tene nos pensamentu- i sintimentunan bou di kontrol. (Rom. 8:5; 12:9) Ora ku di kurason nos ta hasi esfuerso, nos ta realisá ku ainda Beibel ta kambiando  nos bida i esei ta duna nos un gran satisfakshon.

SIGUI LAGA BEIBEL KAMBIA BO BIDA

14, 15. Kiko nos por hasi pa kultivá kualidatnan ku Yehova ta stima? (Wak e kuadro “ Beibel i Orashon A Kambia Nan Bida.”)

14 Kiko nos por hasi pa kultivá kualidatnan kristian i agradá Yehova? Nos mester bai mas aleu ku disidí pa nos mes kiko nos tin ku traha ariba. Mas bien, nos tin ku laga Dios guia nos i sigui hasi esfuerso, pasobra Romanonan 12:2 ta bisa: “Stòp di laga e mundu akí forma boso, ma transformá boso mes dor di renobá boso mente, pa boso por komprobá pa boso mes kiko ta e boluntat di Dios, ku ta bon, agradabel i perfekto.” Pa medio di Yehova su Palabra i su spiritu, e ta yuda nos diserní kiko ta su boluntat, e ta yuda nos kumpli kuné i hasi e kambionan nesesario pa nos por kumpli ku su rekisitonan. Pa nos logra esei, nos mester hasi esfuerso pa lesa Beibel tur dia, meditá riba loke nos a lesa i pidi Dios pa spiritu santu. (Luk. 11:13; Gal. 5:22, 23) Segun ku nos ta laga spiritu santu guia nos i akudí na e Palabra di Dios pa nos por tin e mesun punto di bista ku Yehova, nos lo por pensa, papia i hasi manera e ke. Pero asina mes, nos tin ku keda alerta pa nos debilidatnan no pone nos kai.—Pro. 4:23.

Lo ta bon pa bo nota sierto teksto bíbliko i warda sierto artíkulo ku por yuda bo vense bo debilidatnan i repasá nan (Wak paragraf 15)

15 Banda di lesa Beibel tur dia, nos tin ku studia e Palabra di Dios huntu ku publikashonnan basá riba Beibel pa nos por imitá e kualidatnan maravioso di Yehova. Algun ruman a haña ku ta práktiko pa nota sierto teksto bíbliko i warda sierto artíkulo for di E Toren di Vigilansia òf ¡Despertad! ku por yuda nan kultivá kualidatnan kristian òf vense un debilidat, i kada tantu tempu nan ta repasá nan.

16. Dikon nos no mester desanimá si nos progreso spiritual ta bai pokopoko?

16 Si bo ta sinti ku bo progreso spiritual ta bai pokopoko, kòrda ku ta tuma tempu pa bo krese i kultivá kualidatnan kristian. Esei ta un proseso kontinuo. Nos mester tin pasenshi miéntras ku nos ta hasi esfuerso pa laga Beibel sigui hasi kambio positivo den nos bida. Na prinsipio, nos lo tin ku obligá nos mes pa hasi loke ta bíblikamente korekto. No opstante, ku tempu, mas nos hasi nos bèst pa imitá Yehova den nos abla i akshonnan, mas fásil i natural lo ta pa nos pensamentu- i akshonnan ta manera e ke.—Sal. 37:31; Pro. 23:12; Gal. 5:16, 17.

 KÒRDA RIBA LOKE TA SPERA NOS

17. Si nos ta leal na Yehova, kiko ta spera nos den futuro?

17 Sirbidónan leal di Yehova tin e speransa di bira perfekto un dia i lo tin e privilegio di sirbié pa semper. E tempu ei, nos lo no tin un lucha mas pa desplegá kualidatnan kristian ma lo hasi esei ku plaser. Mientrastantu, danki na e reskate, nos por sirbi nos Dios amoroso. Aunke nos ta imperfekto, nos por hasi esei si nos sigui hasi esfuerso pa laga su Palabra sigui transformá nos bida.

18, 19. Kon nos por ta sigur ku Beibel tin poder pa sigui kambia nos bida?

18 Kevin, ku nos a menshoná anteriormente, a traha duru pa kontrolá su beis. El a meditá riba prinsipionan bíbliko, a apliká nan i a aseptá yudansa i konseho di otro ruman. Den transkurso di algun aña, Kevin a hasi hopi progreso. El a kualifiká pa bira un sirbidó ministerial, i pa e último 20 añanan, e ta sirbi komo un ansiano di kongregashon. Asina mes, e ta mira ku e tin ku keda alerta i sigui lucha pa e no sufri un rekaida spiritual.

19 E eksperensia di Kevin ta mustra ku Beibel ta yuda sirbidónan di Dios sigui hasi kambio positivo den nan bida. P’esei, nunka stòp di laga e Palabra di Dios sigui transformá nos i hasi nos amistat ku Yehova mas fuerte. (Sal. 25:14) Segun ku Yehova ta bendishoná nos esfuersonan, nos lo mira bon kla ku Beibel por sigui kambia nos bida.—Sal. 34:8.

^ [1] (paragraf 1) A kambia e nòmber.