Bai na kontenido

Bai na kontenido

Hóben​​—⁠Kon Bo Por Prepará pa Boutismo?

Hóben​​—⁠Kon Bo Por Prepará pa Boutismo?

“Pa hasi bo boluntat, o mi Dios, ta un delisia pa mi.”—SAL. 40:8.

KANTIKA: 51, 58

1, 2. (a) Dikon boutismo ta algu serio? (b) Kiko un persona mester tin sigur di dje promé ku e batisá, i dikon?

BO TA un hóben ku tin pensá di batisá? Si ta asina, esei ta e privilegio di mas grandi ku kualke hende por tin. Manera e artíkulo anterior a mustra, boutismo ta algu serio. E ta mustra ku bo a dediká bo bida na Yehova, esta, ku bo a hasi un promesa solèm na dje. Bo a primintié ku lo bo sirbié pa semper i ku e kos di mas importante den bo bida ta pa hasi su boluntat. Pues bo mester batisá solamente ora bo ta sufisiente madurá, ora e desishon ei ta bini di bo mes i ora bo a komprondé kiko dedikashon ta.

2 Pero kiko si bo no tin sigur ku bo ta kla pa boutismo? Òf kiko si abo ke batisá pero bo mayornan ta sinti ku bo tin ku warda un tempu, kisas te ora bo haña mas eksperensia den hiba un bida kristian? Sea kual sea e kaso, no desanimá. Usa e tempu ei pa hasi mas progreso, i lo no dura muchu ku lo bo por batisá. Ku esei ei na mente, bo por pone meta relashoná ku: (1) bo konvikshonnan, (2) bo  akshonnan i (3) bo apresio pa e reskate.

BO KONVIKSHONNAN

3, 4. Ki lès hóbennan por saka for di e ehèmpel di Timoteo?

3 Pensa un ratu riba kon lo bo kontestá e siguiente preguntanan: ‘Dikon mi ta kere ku Dios ta eksistí? Kiko ta konvensé mi ku Beibel ta e Palabra inspirá di Dios? Dikon mi ta pensa ku ta mihó pa biba segun e normanan moral di Dios en bes di imitá e estilo di bida di e mundu akí?’ E preguntanan ei no ta pa lanta duda den bo. Mas bien, nan por yuda bo apliká e konseho di apòstel Pablo: “Komprobá pa boso mes kiko ta e boluntat di Dios, ku ta bon, agradabel i perfekto.” (Rom. 12:2) Pero dikon e kristiannan na Roma mester a komprobá pa nan mes algu ku ya kaba nan a aseptá?

4 Ban wak e ehèmpel bíbliko di Timoteo. E tabata konosé e Skritura bon, pasobra “for di chikitu” su mama i su wela a siñ’é e bèrdat. Apesar di esei, Pablo a urgi Timoteo: “Sigui den e kosnan ku bo a siña i a keda konvensí di dje.” (2 Tim. 3:14, 15) Pues Timoteo tabatin sigur ku el a haña e bèrdat, i el a hasi e bèrdat di su mes. El a asept’é, no pasobra su mama i su wela a bis’é pa hasi esei, sino pasobra el meditá riba e bèrdat i a keda konvensí di dje.—Lesa Romanonan 12:1.

5, 6. Dikon ta importante pa bo siña usa bo “kapasidat di pensa” ora bo ta yòn?

5 Kiko di abo? Podisé bo konosé bèrdatnan bíbliko pa hopi tempu kaba. Si ta asina, ta bon pa bo pone komo meta pa analisá pakiko bo ta kere den loke bo ta kere. Esei lo duna bo mas konvikshon ainda i lo yuda bo pa bo no laga e preshon di bo pareunan, e pensamentu di mundu òf ni bo mes sintimentunan influensiá bo.

6 Si bo siña usa bo “kapasidat di pensa” for di ora bo ta yòn, lo bo por sa kon pa kontestá preguntanan manera: “Kon bo por sa ku di bèrdat Dios ta eksistí? Kon por ta ku Dios semper a eksistí? Dikon un Dios di amor ta permití maldat?” Ora bo ta prepará pa kontestá preguntanan asina, nan lo no debilitá bo fe. Al kontrario, lo bo sinti bo motivá pa hasi mas estudio personal.

7-9. Splika kon e seri riba jw.org titulá “Kiko Beibel Ta Siña Realmente?” por yuda bo para pa loke bo ta kere.

7 Estudio personal profundo por yuda bo kontestá pregunta, kita kualke duda ku bo por tin i fortalesé bo konvikshon. (Echo. 17:11) Nos tin diferente publikashon ku por yuda bo ku esei. Algu ku a yuda hopi hende ta e foyeto El origen de la vida. Cinco cuestiones dignas de análisis i e buki ¿Existe un Creador que se interese por nosotros? Ademas, hopi hóben gusta e seri di guia pa estudio riba jw.org titulá “Kiko Beibel Ta Siña Realmente?” for di kua nan ta saka hopi benefisio. Pa bo por hañ’é, bai na e tab di SIÑANSA DI BEIBEL. Kada un di e guianan akí ta diseñá pa yuda bo fortalesé bo konfiansa den un tópiko di Beibel.

8 Bo konosé bo Beibel, i p’esei kisas lo ta fásil pa kontestá e preguntanan ku tin den e guianan. Pero kiko ta hasi bo asina sigur di bo kontestanan? E guianan di estudio ta yuda bo rasoná riba vários teksto i ta animá bo pa skirbi dikon bo ta kere den nan. Nan por yuda bo pensa kon lo bo splika otro  hende bo kreensianan bíbliko. E seri online titulá “Kiko Beibel Ta Siña Realmente?” a yuda hopi hóben para pa loke nan ta kere. Si bo tin akseso na nan, bo por inkluí nan den bo estudio personal.

9 Ora bo komprobá pa bo mes ku esaki ta e bèrdat, bo ta dal un stap mas serka di bo boutismo. Un ruman muhé yòn a bisa: “Promé ku mi a disidí di batisá, mi a studia Beibel i a mira ku esaki ta e religion berdadero. I kada dia ku pasa, mi ta keda mas konvensí di esei.”

BO AKSHONNAN

10. Dikon un kristian batisá tin ku demostrá ku su akshonnan ku e tin fe?

10 Beibel ta bisa: “Fe riba su so, si e no tin obra, ta morto.” (Sant. 2:17) Si bo tin un fe fuerte, lo bo demostrá esei ku bo akshonnan. Ki tipo di akshon? Beibel ta papia di “kondukta santu” i “obranan ku ta demostrá deboshon na Dios.”—Lesa 2 Pedro 3:11.

11. Splika kiko e ekspreshon “kondukta santu” ta nifiká.

11 Pa bo ‘kondukta ta santu,’ bo mester ta moralmente limpi. Kon ta bai ku esei? Pensa por ehèmpel riba e último seis lunanan. Bo a demostrá ku bo a entrená bo “kapasidat di komprondé” pa distinguí loke ta bon for di loke ta malu? (Heb. 5:14) Bo por pensa riba okashonnan ku bo a resistí tentashon òf preshon di pareu? Ora bo ta na skol, bo kondukta ta un bon ehèmpel pa otronan? Bo ta defendé bo kreensianan en bes di purba di ta manera bo kompañeronan di klas djis pa nan no tenta bo? (1 Ped. 4:3, 4) Ta bèrdat ku niun hende no ta perfekto. Asta sirbidónan di Yehova ku a sirbié pa hopi aña por ta tímido i tin difikultat pa defendé e bèrdat. Pero un persona dediká na Yehova lo ta orguyoso di por karga e nòmber di Dios, i lo e demostrá esei ku su kondukta.

12. Kua ta algun ‘obra ku ta demostrá deboshon na Dios,’ i kon bo mester mira nan?

12 Awor, kiko di e “obranan ku ta demostrá deboshon na Dios”? Algun di e obranan akí ta aktividatnan di kongregashon, manera bai e reunionnan i prediká. Ademas, nan ta inkluí aktividatnan spiritual ku otro hende no ta mira, manera bo orashonnan i estudio personal. Un persona ku a dediká su bida na Yehova lo no mira e aktividatnan akí komo un karga. Mas bien, lo e tin e mesun aktitut ku Rei David, kende a bisa: “Pa hasi bo boluntat, o mi Dios, ta un delisia pa mi; bo lei ta den mi kurason.”—Sal. 40:8.

13, 14. Ki hèrmènt por yuda bo hasi “obranan ku ta demostrá deboshon na Dios,” i kon algun hóben a benefisiá di dje?

13 Página 308 i 309 di e buki Lo que los jóvenes preguntan. Respuestas prácticas (volumen 2) tin algun pregunta ku lo yuda bo pone meta. Algun di e preguntanan akí ta: “Kon spesífiko bo orashonnan ta, i kiko nan ta revelá tokante bo relashon ku Yehova? Kiko bo sa studia den bo estudio personal? Bo ta bai sirbishi asta ora bo mayornan no bai?” E página di tarea tin tambe espasio pa bo nota bo metanan ku bo ke pone relashoná ku bo orashonnan, estudio personal i sirbishi.

14 Hopi hóben ku tin pensá di batisá ta haña ku e página di tarea ei ta un hèrmènt masha balioso. Un ruman muhé yòn ku yama Tilda a bisa: “Mi a  usa e página di tarea pa pone meta. Un pa un mi a logra e metanan ei, i despues di mas o ménos un aña, mi tabata kla pa boutismo.” Patrick, un ruman hòmber yòn, tambe a benefisiá di e página di tarea. El a bisa: “Mi tabata sa kaba kiko tabata mi metanan, pero loke a yuda mi traha mas duru pa logra nan ta ora mi a skirbi nan.”

Lo bo sigui sirbi Yehova asta si bo mayornan no ta hasi esei? (Wak paragraf 15)

15. Dikon boutismo mester ta un desishon ku ta bini di bo mes?

15 Un di e preguntanan ku mas ta pone bo pensa ta: “Lo bo sirbi Yehova asta si bo mayornan i amigunan stòp di hasi esei?” Kòrda ku komo un kristian dediká i batisá, ta bo mes tin ku sòru pa bo relashon ku Yehova. Bo sirbishi na dje no ta dependé di otro hende, ni sikiera di bo mayornan. Bo kondukta santu i obranan ku ta demostrá deboshon na Dios ta mustra ku bo a hasi e bèrdat di bo mes i ku bo ta hasi esfuerso pa kualifiká pa boutismo.

BO APRESIO PA E RESKATE

16, 17. (a) Kiko mester motivá un persona pa bira un kristian? (b) Kon bo por ilustrá e apresio ku nos tin pa e reskate?

16 Un hòmber bon vèrsá den e Lei di Moises a puntra Hesus: “Kua ta e mandamentu di mas grandi di Lei?” Hesus a kontest’é: “Stima Yehova bo Dios ku henter bo kurason, ku henter bo alma i ku henter bo mente.” (Mat. 22:35-37) Pues Hesus a splika ku ta amor pa Yehova mester motivá un persona pa batisá i bira un kristian. Un di e mihó maneranan pa bo haña mas amor pa Yehova ta ora bo meditá riba e regalo di mas grandi ku Yehova a proveé pa nos, esta, e sakrifisio di reskate di su Yu. (Lesa 2 Korintionan 5:14, 15; 1 Huan 4:9, 19.) Ora bo pensa riba e reskate i kiko esaki ta nifiká pa bo, lo bo sinti bo motivá pa mustra bo apresio p’e.

17 Bo por kompará bo apresio pa e reskate asin’akí: Imaginá ku bo ta hogando i un hende ta salba bo. Lo bo djis bai kas, seka bo kurpa i lubidá loke e persona a hasi pa bo? Klaru ku nò! Lo bo ta masha gradisidu ku e persona ei a salba bo, i ta danki na dje ku bo ta na bida. Meskos tambe, nos mester ta masha gradisidu na Yehova i Hesukristu pa e reskate. Sin dje, den un sentido, nos tur lo hoga den piká i morto. Pero ta danki na nan gran amor nos tin e oportunidat pa biba pa semper den un paradeis riba tera.

18, 19. (a) Dikon bo no mester tin miedu pa dediká bo bida na Yehova? (b) Den ki sentido sirbishi na Yehova lo permití bo hiba un mihó bida?

 18 Bo ta apresiá loke Yehova a hasi pa bo? Si esei ta e kaso, lo ta na su lugá pa bo dediká bo bida na dje i batisá. Kòrda, dedikashon ta un promesa solèm ku bo ta hasi na Yehova ku lo bo hasi su boluntat pa semper, kueste loke kueste. Bo mester tin miedu pa hasi un promesa asina? Niun ora so! Kòrda ku Yehova ke lo mihó pa bo, i e ta “rekompensá esnan ku ta hasi esfuerso pa busk’é.” (Heb. 11:6) Dedikashon i boutismo lo no duna bo un mal bida. Al kontrario, lo bo bai hiba un mihó bida. Un ruman hòmber di 24 aña ku a batisá promé ku e tabata un tiner a bisa: “Si mi a warda un tiki mas pa batisá, kisas lo mi tabatin mas konosementu, pero e desishon pa dediká mi bida na Yehova a protehá mi pa mi no sigui tras di metanan di mundu.”

19 Yehova no ta manera Satanas, kende sí ta masha egoista i no ta interesá mes den bo. Satanas no por ofresé bo nada bon si bo siguié. I esei ta lógiko pasobra kon e por ofresé bo algu ku e mes no tin? E no tin niun bon notisia ni un speransa pa futuro. E úniko kos ku e por ofresé bo ta un futuro tristu pasobra ta esei so a ked’é.—Rev. 20:10.

20. Kiko un hóben por hasi pa e por progresá i yega na dedikashon i boutismo? (Wak tambe e kuadro “ Algun Hèrmènt pa Yuda Bo Krese Spiritualmente.”)

20 Ta bisto anto ku e mihó desishon ku bo por tuma ta di dediká bo bida na Yehova. Bo ta kla pa dal e paso ei? Si ta asina, no vasilá pa hasié! Di otro banda, si bo tin mester di mas tempu, hasi uso di e sugerensianan den e artíkulo akí pa yuda bo sigui hasi progreso. Pablo a skirbi e filipensenan: “Te asina leu ku nos a progresá, laga nos sigui kana na un manera ordená den e mesun kaminda akí.” (Flp. 3:16) Si bo sigui e konseho ei, pronto lo bo ke dediká bo bida na Yehova i batisá.