Bai na kontenido

Bai na kontenido

Hóben​​—⁠Bo Ta Kla pa Batisá?

Hóben​​—⁠Bo Ta Kla pa Batisá?

“Kua di boso ku ke traha un toren no ta sinta kalkulá e gastu promé pa wak si e tin sufisiente pa kab’é?”—LUK. 14:28.

KANTIKA: 120, 64

E artíkulo akí i esun siguiente ta dirigí na hóbennan ku tin pensá di batisá

1, 2. (a) Awe, kiko ta duna e pueblo di Dios goso? (b) Kon mayornan kristian i ansianonan por yuda hóbennan komprondé kiko boutismo ta nifiká?

“MI KONOSÉ bo for di dia ku bo a nase, i mi ta masha kontentu di tende ku bo ke batisá.” Asina un ansiano a bisa Christopher tempu ku e tabatin 12 aña. Pero despues e ansiano a puntr’é: “Dikon bo ke batisá?” E pregunta ei tabata na su lugá. Klaru ku nos ta keda masha kontentu ku tur aña míles di hóben rònt mundu ta batisá. (Ekl. 12:1) Pero na mes momento, mayornan kristian i ansianonan di kongregashon ke hasi sigur ku e desishon ei ta bini di e hóbennan mes i ku nan ta komprondé kiko boutismo ta nifiká.

2 E Palabra di Dios ta indiká ku dedikashon i boutismo ta  komienso di un bida kristian, un bida ku lo trese hopi bendishon di parti di Yehova pero tambe oposishon di Satanas. (Pro. 10:22; 1 Ped. 5:8) P’esei, mayornan kristian ta tuma tempu pa siña nan yunan kiko realmente ta nifiká ser disipel di Kristu. Den kaso di hóbennan ku no tin mayornan kristian, ansianonan di kongregashon lo yuda nan komprondé kiko dedikashon i boutismo ta nifiká. (Lesa Lukas 14:27-30.) Meskos ku un hende tin ku plania un proyekto di konstrukshon p’e por kab’é, asina tambe, un hóben tin ku prepará su mes promé ku e batisá p’e por sirbi Yehova fielmente “te na fin.” (Mat. 24:13) Kiko por duna un hóben e determinashon pa sirbi Yehova pa restu di su bida? Laga nos ban wak.

3. (a) Kiko e palabranan di Hesus na Mateo 28:19 i 20, i e palabranan di Pedro na 1 Pedro 3:21 ta siña nos di e importansia di boutismo? (b) Ki preguntanan nos lo konsiderá, i dikon?

3 Bo ta un hóben ku tin pensá di batisá? Si ta asina, nos ta elogiá bo pa esei! Ta un gran privilegio pa batisá komo Testigu di Yehova. Ademas, boutismo ta un rekisito kristian, i e ta un paso importante pa haña salbashon. (Mat. 28:19, 20; 1 Ped. 3:21) Ora bo batisá, bo ta mustra ku bo a primintí di sirbi Yehova pa semper. I klaru ku di kurason lo bo ke kumpli ku bo promesa. P’esei, ta bon pa bo analisá e siguiente tres preguntanan pa wak si bo ta kla pa batisá: (1) Mi ta sufisiente madurá pa tuma e desishon pa batisá? (2) E desishon ei ta bini di mi mes? (3) Mi ta komprondé kiko dediká mi bida na Yehova ta nifiká? Laga nos konsiderá e preguntanan akí.

BO TA SUFISIENTE MADURÁ?

4, 5. (a) Dikon boutismo no ta solamente pa hende grandi? (b) Kiko ta nifiká ser un kristian maduro?

4 Beibel no ta bisa ku boutismo ta solamente pa hende ku a yega un sierto edat òf pa hende grandi. Proverbionan  20:11 ta bisa: “Te asta un mucha ta konosí pa su echonan, si su kondukta ta puru i rekto.” Ke men, asta un mucha por komprondé kiko ta nifiká hasi loke ta korekto i dediká su bida na su Kreador. Pues, boutismo ta un paso importante i apropiá pa un hóben ku a demostrá ku e tin sufisiente madures spiritual i ku a hasi un dedikashon na Yehova.—Pro. 20:7.

5 Kiko ta madures? Madures ta enserá mas ku djis kresementu físiko. Beibel ta bisa ku hende madurá a ‘entrená nan kapasidat di komprondé pa distinguí loke ta bon for di loke ta malu.’ (Heb. 5:14) Pues, un persona madurá sa kiko ta korekto den bista di Yehova i ta determiná pa hasi esei. Komo resultado, hende lo no influensi’é fásilmente pa hasi malu. Pero tampoko hende lo tin ku bis’é kada ratu kiko ta e kos korekto pa hasi. Pues un hóben ku batisá lo pega na e normanan di Dios asta ora su mayornan òf otro hende grandi no ta huntu kuné.—Kompará ku Filipensenan 2:12.

6, 7. (a) Ki retonan Daniel a enfrentá tempu ku e tabata na Babilonia? (b) Kon Daniel a demostrá ku e tabata un yònkuman maduro?

6 Un hóben realmente por demostrá tal madures? Wèl, wak e ehèmpel bíbliko di Daniel. Muy probablemente e tabata un tiner ora nan a rank’é for di su mayornan i hib’é den koutiverio na Babilonia. Di un dia pa otro, el a hañ’é ta biba entre hende ku tabatin nan mes konsepto di kiko ta bon i kiko ta malu. Riba esei, el a hañ’é ku un otro reto: El a haña un trato spesial na Babilonia; e tabata un di e poko hóbennan ku a ser skohé pa sirbi e rei. (Dan. 1:3-5, 13) Ta parse ku Daniel a haña oportunidatnan na Babilonia ku nunka lo e por a haña na Israel.

7 Kon e hóben Daniel a reakshoná? El a bai tras di tur e kosnan atraktivo di Babilonia? Akaso el a laga e habitantenan di Babilonia influensi’é òf suak su fe? Di ningun manera! Beibel ta bisa ku Daniel a disidí den su kurason pa “no kontaminá su mes” ku nada ku tabatin di haber ku adorashon falsu. (Dan. 1:8) Pues Daniel a demostrá un madures eksepshonal.

Un hóben spiritualmente maduro lo no komportá su mes komo amigu di Dios na Salòn di Reino i na mes momento amigu di mundu ora e ta na skol (Wak paragraf 8)

8. Kiko bo por siña for di e ehèmpel di Daniel?

8 Kiko bo por siña for di e ehèmpel di Daniel? Pa kuminsá, un hóben maduro lo para pa su kreensianan. E no ta manera un kamaleon ku ta kambia di koló pa e adaptá su mes na su ambiente. E no ta komportá su mes komo amigu di Dios na Salòn di Reino i na mes momento amigu di mundu ora e ta na skol. En bes di ser bentá p’aki p’aya den e mundu akí, e ta keda fiel asta bou di prueba.—Lesa Efesionan 4:14, 15.

9, 10. (a) Dikon ta bon pa un hóben pensa riba kon el a reakshoná ora el a hañ’é ku pruebanan mas resien? (b) Kon serio boutismo ta?

9 Klaru ku niun hende no ta perfekto, i nos tur, tantu hende grandi komo hóben, ta faya. (Ekl. 7:20) Pero si bo tin pensá di batisá, ta bon pa bo analisá kon determiná bo ta pa obedesé e mandamentunan di Yehova. Kon bo por hasi esei? Wèl, puntra bo mes: ‘Mi a demostrá ku mi ta hasi mi bèst pa pega na e normanan di Dios? Kon mi a reakshoná riba e pruebanan mas resien ku mi a haña mi kuné? Mi a demostrá ku mi tin e kapasidat  pa distinguí bon for di malu? Kiko si un hende den e mundu di Satanas ke duna mi un trato spesial, meskos ku Daniel a haña? Si akaso esei ta un tentashon pa mi, mi sa “kiko ta e boluntat di Yehova”?’—Efe. 5:17.

10 Dikon ta importante pa bo sa e kontesta pa e preguntanan personal akí? Pasobra nan lo yuda bo mira kon serio boutismo ta. Manera nos a bisa anteriormente, boutismo ta un muestra di un promesa solèm ku bo a hasi na Yehova. Bo a primintié ku pa semper lo bo stim’é i sirbié ku henter bo kurason. (Mar. 12:30) Tur hende ku batisá mester ta determiná pa kumpli ku nan promesa.—Lesa Eklesiástes 5:4, 5.

E DESISHON PA BATISÁ TA BINI DI BO MES?

11, 12. (a) Un persona ku tin pensá di batisá mester hasi sigur di kiko? (b) Kiko por yuda bo mira boutismo manera Yehova ta mir’é?

11 Beibel ta bisa ku e pueblo di Yehova, inkluso e hóbennan, lo sirbié di buena gana. (Sal. 110:3) Pues un persona ku tin pensá di batisá mester tin sigur ku e desishon ei ta bini di su mes. P’esei bo tin ku analisá pakiko bo ke batisá, spesialmente si bo a lanta den e bèrdat.

12 Den transkurso di tempu, kisas bo a mira yen di hende batisá, inkluso algun hóben di bo edat i podisé bo mes rumannan. Si esei ta e kaso, tene kuidou pa bo no pensa ku bo tin ku batisá djis pasobra bo a yega un sierto edat òf pasobra tur otro hende ta batisá. Kiko por yuda bo hasi sigur ku bo ta mira boutismo manera Yehova ta mir’é? Wèl, para ketu i puntra bo mes pakiko boutismo ta asina importante. E artíkulo akí i esun siguiente lo duna bo diferente bon motibu pakiko ta importante pa bo batisá.

13. Kon bo por sa si e desishon pa batisá ta bini di bo mes?

13 Un manera pa bo sa si di bèrdat e desishon pa batisá ta bini di bo mes ta di analisá bo orashonnan. Kuantu biaha bo sa hasi orashon? Kon spesífiko bo orashonnan ta? E kontesta riba e preguntanan akí por revelá kon será bo relashon ku Yehova ta. (Sal. 25:4) Un manera importante ku Yehova ta kontestá nos orashonnan ta mediante su Palabra. Pues, si bo ta hasi esfuerso pa studia Beibel, bo ta mustra ku di bèrdat bo ke hala mas serka Yehova i sirbié di kurason. (Hos. 1:8) P’esei, puntra bo mes: ‘Mi ta hasi estudio personal riba un base regular? Si mi ta forma parti di un famia kristian, mi ta partisipá di buena gana den Adorashon Komo Famia?’ Bo kontesta riba e preguntanan ei lo yuda bo mira si e desishon pa batisá ta bini di bo mes.

KIKO TA NIFIKÁ DEDIKÁ BO BIDA NA YEHOVA?

14. Splika kiko ta e diferensia entre dedikashon i boutismo.

14 Algun hende kisas no sa kiko ta e diferensia entre dedikashon i boutismo. Por ehèmpel, algun hóben ta bisa ku nan a hasi un dedikashon na Yehova pero ku nan no ta kla pa batisá. Pero esei ta zona lógiko? Ora bo dediká bo bida na Yehova den orashon, bo ta primintiendo e ku lo bo sirbié pa semper. Na momento ku bo batisá, bo ta mustra públikamente ku ya bo a dediká  bo bida na Yehova den orashon. Pues, promé ku bo batisá, bo mester hasi sigur ku bo ta komprondé kiko dedikashon ta.

15. Kiko ta nifiká dediká bo bida na Yehova?

15 Ku poko palabra, ora bo dediká bo bida na Yehova, bo ta bis’é ku awor bo ta pertenesé na dje. Bo ta primintí Yehova ku bo sirbishi na dje lo ta e kos di mas importante den bo bida. (Lesa Mateo 16:24.) Tur promesa ku bo hasi ta serio, pero e promesa akí na Yehova Dios ta aun mas serio. (Mat. 5:33) P’esei kon bo por demostrá ku realmente bo a nenga bo mes i ku awor bo ta pertenesé na Yehova?—Rom. 14:8.

16, 17. (a) Duna un ehèmpel di kiko ke men nenga bo mes. (b) Kiko un persona ku hasi un dedikashon na Yehova ta bisand’e eigenlijk?

16 Por ehèmpel, imaginá ku un amigu ta regalá bo un outo. E ta pon’é na bo nòmber i ta bisa bo: “E outo akí ta pa bo.” Pero imaginá ku e bisa bo: “Ami lo keda ku e yabi. I ami ta esun ku lo stür e outo, no abo.” Kon lo bo sinti bo ku un “regalo” asina? Kiko lo bo pensa di bo amigu?

17 Awor, pensa riba un persona ku ta bisa Yehova: “Mi ta dediká mi bida na bo. Mi ta pertenesé na bo.” Yehova tin derecho di ferwagt ku e persona akí ta tene su mes na su palabra, no ta bèrdat? Awor, imaginá ku e persona kuminsá hiba un bida dòbel i kisas ta ‘date’ un hende ku no ta sirbi Yehova. Òf e ta aseptá un trabou ku ta limitá e tempu ku e por traha den sirbishi òf ta strob’é di bai su reunionnan. Lo e ta kumpliendo ku su promesa na Yehova? E no ta kedando, na moda di papia, ku e yabi di e outo? Un persona ku dediká su bida na Yehova, de echo, ta bis’é: “Si mi tin ku skohe entre hasi bo boluntat i hasi loke ami mes ta deseá di hasi, semper lo mi skohe pa hasi loke abo ke.” Pues semper nos lo hasi loke Yehova ke, asta ora ta algu ku nos mes no tin gana di hasi. Asina nos ta imitá Hesus, kende a bisa: “Mi no a baha for di shelu pa hasi mi boluntat, ma pa hasi boluntat di esun ku a manda mi.”—Huan 6:38.

18, 19. (a) Kon loke Rose i Christopher a bisa ta mustra ku boutismo ta un privilegio ku ta trese bendishon? (b) Kiko abo ta pensa di boutismo?

18 Ta bisto anto ku boutismo ta un asuntu masha serio. Na mes momento, ta un gran privilegio pa dediká bo bida na Yehova i batisá. Hóbennan ku ta stima Yehova i ku ta komprondé kiko dedikashon ta lo no vasilá pa batisá ni lo no duel nan ku nan a tuma e desishon ei. Rose, un hóben batisá, a bisa: “Mi ta stima Yehova, i mi ta masha kontentu di por sirbié. Anto mi desishon pa batisá ta e desishon ku mi tabatin mas sigur di dje.”

19 I kiko di Christopher, menshoná na komienso di e artíkulo akí? Kiko e ta pensa tokante su desishon pa batisá tempu ku e tabatin 12 aña? E ta masha kontentu ku el a tuma e desishon ei. El a kuminsá traha pionero regular ku 17 aña, el a bira sirbidó ministerial ku 18 aña i awor e ta sirbi na Bètel. El a bisa: “Boutismo tabata e desishon korekto. Mi ta traha pa Yehova i su organisashon, i esei ta duna mi hopi satisfakshon.” Si abo tin pensá di batisá, kon bo por prepará p’e? E siguiente artíkulo lo trata e pregunta ei.