“Pa medio di dje henter e kurpa ta armoniosamente uní i ta kooperá ku otro.”—EFE. 4:16.

KANTIKA: 53, 107

1. Kiko tabata bisto for di prinsipio di kreashon?

FOR di prinsipio di kreashon, Yehova i Hesus tabata uní. Hesus, e promé kreashon di Dios, a bisa: “Mi tabata na [Yehova] su lado, manera un trahadó eksperto, i dia tras dia mi tabata su delisia.” (Pro. 8:30) Tata ku Yu a traha huntu i a produsí e gran variedat di bida ku nos ta mira awe. E sirbidónan di Dios tambe a kooperá ku otro pa kumpli ku trabou ku el a duna nan. Por ehèmpel, Noe i su famia a traha e arka huntu. Despues, e israelitanan a kooperá ku otro pa traha e tabernakel, pa desmantel’é i transport’é miéntras ku nan tabata biaha den desierto. Na e tèmpel, nan tabata kanta huntu i toka instrumènt pa alabá Yehova. Tur e aktividatnan akí tabata posibel pasobra nan a kooperá ku otro.—Gén. 6:14-16, 22; Num. 4:4-32; 1 Kró. 25:1-8.

2. (a) Kiko tabata remarkabel tokante e kristiannan di promé siglo? (b) Ki preguntanan nos lo konsiderá den e artíkulo akí?

2 Union a karakterisá e kristiannan di promé siglo; nan a traha huntu bou di direkshon di Hesukristu, kabes di e  kongregashon. Apòstel Pablo a splika ku maske kada un di e kristiannan ungí ei tabatin “diferente tipo di don” i a partisipá den “diferente tipo di sirbishi” i “diferente tipo di aktividat,” nan tur tabata parti di “ún kurpa.” (Lesa 1 Korintionan 12:4-6, 12.) Pero kiko di awe? Kon nos por ta uní den e trabou di prediká, den kongregashon i den famia?

KOOPERÁ KU OTRO DEN E TRABOU DI PREDIKÁ

3. Ki vishon apòstel Huan a haña?

3 Na final di e promé siglo, apòstel Huan a haña un vishon di shete angel ku tabata supla tròmpèt. Ora e di sinku angel a supla su tròmpèt, Huan a mira “un strea” kai for di shelu riba tera. E “strea” tabatin un yabi ku el a usa pa habri e buraku di un abismo. Huma a sali for di e buraku, i un plaga di dalakochi a sali for di e huma. En bes di destruí mata ku palu, e dalakochinan simbóliko akí ta atakando “e hendenan ku no tin e seyo di Dios riba nan frenta.” (Rev. 9:1-4) Sin duda, Huan tabata sa kuantu daño un plaga di dalakochi por kousa, ya ku nan a hasi hopi daño na Egipto den tempu di Moises. (Éks. 10:12-15) E dalakochinan figurativo ku Huan a mira ta representá e kristiannan ungí ku ta proklamando Yehova su mensahe di huisio kontra religion falsu. I miónes di hende ku tin e speransa pa biba riba tera ta djòin e kristiannan ungí den e trabou ei. Sin duda, nan ta uní den e trabou di prediká i ta yuda hopi hende sali for di religion falsu i libra nan mes for di kontrol di Satanas.

4. Ki trabou e pueblo di Dios mester hasi, i kua ta e úniko manera ku nan por kumpli kuné?

4 E pueblo di Yehova tin e enorme trabou di prediká e “bon notisia” rònt mundu promé ku e fin di e sistema akí yega. (Mat. 24:14; 28:19, 20) Esaki ta inkluí invitá tur esnan “ku tin set” pa bin bebe di “e awa di bida pòrnada.” (Rev. 22:17) Komo miembro di e kongregashon kristian, nos por hasi esei solamente ora nos ta “uní i ta kooperá ku otro.”—Efe. 4:16.

5, 6. Kon e trabou di prediká ta uni nos?

5 Pa nos por alkansá mas tantu hende posibel ku e bon notisia di e Reino, nos tin ku prediká na un manera organisá. E instrukshonnan ku nos ta haña den kongregashon, manera por ehèmpel na e reunion pa sali den sirbishi di vèlt, ta yuda nos ku esei. Nos ta plama e mensahe di Reino i ta laga miónes di publikashon basá riba Beibel. Tin biaha asta nos tin kampañanan spesial di prediká. Abo ta hasi esfuerso pa partisipá den esakinan? Ora bo hasi esei, bo ta djòin miónes di otro hende ku tambe ta proklamá e mensahe di e ‘angel ku ta bula meimei di shelu,’ manera Revelashon 14:6 ta bisa.

6 Ta masha emoshonante pa lesa den e Anuario tokante e bon resultadonan di nos trabou mundial di prediká. Ademas, nos ta traha huntu pa parti invitashon pa kongresonan regional, spesial i internashonal. Einan nos ta haña diskurso-, drama- i demostrashonnan basá riba Beibel ku ta motivá nos pa duna Yehova lo mihó. E konmemorashon di e morto di Hesus tambe ta uni nos. Pa obedesé e mandato di Hesus, tur aña nos ta reuní riba 14 di nisan  despues ku solo baha pa mustra apresio pa Dios su bondat inmeresí. (1 Kor. 11:23-26) Den e simannan promé ku e Konmemorashon, nos ta hasi esfuerso pa invitá mas tantu hende posibel pa asistí na e okashon importante ei.

7. Kiko nos por logra ora nos traha huntu?

7 Ún dalakochi so no por hasi muchu daño. Meskos tambe, ku nos esfuersonan so, nos no ta logra mashá. Pero ora nos traha huntu, nos por papia ku miónes di hende tokante Yehova, esun ku meresé tur onor i alabansa. Pero tin mas manera ku nos por yuda fortalesé e union di e pueblo di Dios.

KOOPERÁ KU OTRO DEN KONGREGASHON

8, 9. (a) Ki ilustrashon Pablo a usa pa siña kristiannan pa nan keda uní? (b) Kon nos por kooperá ku otro den kongregashon?

8 Den Pablo su karta na e efesionan, el a splika nan kon e kongregashon ta hinká den otro. El a animá nan tambe pa ‘krese den tur kos.’ (Lesa Efesionan 4:15, 16.) Kiko lo yuda kada un di nos alkansá e meta ei? Pablo a usa e ehèmpel di un kurpa pa splika e kristiannan ku kada un di nan por a yuda e kongregashon keda uní i sigui Hesukristu, kabes di e kongregashon. El a splika ku tur e partinan di e kurpa ta kooperá ku otro “mediante tur e djòintnan ku ta duna loke tin mester.” Kon kada un di nos, sea grandi òf chikí, fuerte òf débil, por yuda fortalesé e union i spiritualidat di e kongregashon?

9 Un faktor importante pa logra esei ta ora nos ta mustra rèspèt i sumishon na e rumannan ku Hesus a nombra pa dirigí e kongregashon. (Heb. 13:7, 17) Kisas no ta semper fásil pa hasi esaki. Pero nos por pidi Yehova yuda nos, i su spiritu santu por yuda nos obedesé instrukshon di henter nos kurason. Si nos no ta sinti nos inkliná pa hasi esei, nos mester djis pensa kuantu nos lo por yuda fortalesé e union di nos kongregashon ora nos ta sigui instrukshon ku un aktitut humilde. Ademas, nos amor pa otro lo krese.

10. Kon sirbidónan ministerial ta yuda e kongregashon keda uní? (Wak e promé plachi.)

10 Sirbidónan ministerial tambe ta yuda mantené union den kongregashon, i nos ta apresiá esei mashá. Sin importá nan edat, e ruman hòmbernan akí di kurason ta hasi trabou ku ta benefisiá tur hende. Por ehèmpel, nan ta sòru pa nos tin sufisiente literatura pa traha kuné den sirbishi. Ademas, nan ta traha duru pa mantené e Salòn di Reino i ten’é limpi, i tambe nan ta duna un bon biní na tur bishitante ku asistí na e reunion. Segun ku nos ta kooperá ku e rumannan akí, nos ta yuda pa tur kos kana bon den e kongregashon.—Kompará ku Echonan 6:3-6.

11. Kiko rumannan yòn por hasi pa promové union den kongregashon?

11 Hopi ansiano a traha duru den kongregashon pa hopi aña. Pero kisas debí na edat avansá, nan no por hasi hopi manera ántes, i p’esei ruman hòmbernan mas yòn por yuda. Aunke nan no tin hopi eksperensia, segun ku nan ta haña entrenamentu, nan por kumpli ku mas responsabilidat. I ora nan traha duru, nan por kualifiká pa sirbi komo ansiano. (1 Tim. 3:1, 10) Algun ansiano yòn a progresá te ku nan a  kualifiká pa sirbi komo superintendente di sirkuito i ta yuda rumannan den hopi kongregashon. Siguramente nos ta masha gradisidu pa tur e trabou ku e rumannan yòn akí ta hasi di buena gana.—Lesa Salmo 110:3; Eklesiástes 12:1.

KOOPERÁ KU OTRO DEN FAMIA

12, 13. Kiko por yuda miembronan di famia kooperá ku otro?

12 Awor, kon nos por promové union den nos famia? Adorashon Komo Famia tur siman por yuda fortalesé e union entre grandi i chikí. Durante e momentonan agradabel akí, nos ta enfoká riba kosnan spiritual, i esei ta uni e famia. Nos por prepará pa sirbishi, i esei lo yuda nos prediká na un manera efikas. I ora kada miembro di famia tende otro miembro papia tokante e bèrdat i mira ku henter e famia ta stima Yehova i ke agrad’é, nan ta hala mas serka di otro.

Adorashon Komo Famia ta fortalesé e union entre grandi i chikí (Wak paragraf 12, 15)

13 Kiko parehanan kasá por hasi pa kooperá ku otro i asina duna alabansa na Yehova? Ora tur dos ta fiel sirbidó di Yehova, nan lo ta felis i uní den nan matrimonio. Tuma por ehèmpel, Abraham ku Sara, Isak ku Rebeka i Elkana ku Ana. Nan tur a mustra kariño na nan kasá, i nos tambe mester hasi meskos. (Gén. 26:8; 1 Sam. 1:5, 8; 1 Ped. 3:5, 6) Esaki lo uni nos ku nos kasá i hala nos mas serka di nos Tata selestial.—Lesa Eklesiástes 4:12.

14. Si bo kasá no ta sirbi Yehova, kiko bo por hasi pa mantené bo matrimonio fuerte?

14 Kristiannan no mester kasa ku hende ku no ta sirbi Yehova. (2 Kor. 6:14) Pero kiko di rumannan ku ta kasá ku hende ku no ta Testigu? Algun ruman a haña e bèrdat despues ku nan a kasa, i nan kasá no ta Testigu. Apesar di esei, ora nan apliká prinsipio bíbliko, nan por logra union den nan famia. Esei ta enserá ku nan ta kooperá te kaminda nan por, sin desobedesé Yehova. Kisas esei no ta fásil, pero pensa riba e bon resultado ku esei por trese kuné. No ta fásil tampoko pa apliká prinsipio bíbliko ora un kasá ku tabata sirbi Yehova fria. Esaki ta nèt loke a sosodé ku un ruman ku yama Mary. E ku su kasá, David, tabata sirbi Yehova huntu, pero mas o ménos 25 aña pasá, su kasá a stòp di bai reunion. Mary a sigui bai e reunion- i kongresonan i a hasi tur su esfuerso pa apliká prinsipio bíbliko na kas, inkluso siña su yunan tokante Yehova. Ora e muchanan a bira grandi i a bai for di kas, Mary a sintié su so. Anto David a kuminsá lesa e revistanan ku Mary tabata laga p’e. Ku tempu el a kuminsá asistí na reunion atrobe, i su ñetu di seis aña tabata warda lugá p’e. Si David no a bai reunion, su ñetu tabata bis’é: “M’a sinti falta di Opa awe na reunion.” Awor, David ta sirbi Yehova ku goso, i Mary ta felis ku nan por hasi esei huntu.

15. Kon parehanan di mas edat por yuda e parehanan mas yòn?

15 Komo ku Satanas ta ataká famianan awe, ta importante pa tur sirbidó di Dios kooperá ku otro den nan matrimonio. Sin importá kuantu aña bo tin kasá, pensa kiko bo por bisa òf hasi pa fortalesé bo matrimonio. Parehanan di mas edat den kongregashon por yuda parehanan mas yòn den esaki. Abo ku bo kasá por invitá un  pareha mas yòn pa djòin boso Adorashon Komo Famia. Ora nan ta huntu ku boso, nan por mira ku ta masha importante pa mustra kariño na otro i keda uní ku otro, sin importá kuantu aña boso tin kasá.—Tito 2:3-7.

“LAGA NOS SUBI BAI NA E SERU DI SEÑOR”

16, 17. Kiko e sirbidónan di Dios ku ta uní ta anhelá pa futuro?

16 Purba di imaginá e israelitanan den tempu bíbliko ta duna alabansa na Yehova durante un fiesta den su tèmpel na Herúsalèm. Nan lo a prepará pa e biahe, kuida otro riba kaminda i despues adorá huntu na e tèmpel. Pa nan a logra esei, nan mester a kooperá ku otro. (Luk. 2:41-44) Segun ku nos awe ta sigui prepará pa drenta e mundu nobo, nos tambe mester ta armoniosamente uní i kooperá ku otro. Nos mester hasi esfuerso kontinuo pa logra esei. Abo lo tin ku duna mas atenshon na esaki?

17 Pensa riba e bendishonnan ku ta spera nos. Ya nos no ta parti mas di e desunion i konfushon ku ta reina den e sistema di kosnan akí. I awor nos ta mira kumplimentu di loke Isaías i Mikéas a profetisá di dje, esta, e pueblo di Dios lo uni i bai na “e seru di SEÑOR.” (Isa. 2:2-4; lesa Mikéas 4:2-4.) Sí, “den e último dianan,” e pueblo di Yehova ta mas uní ku nunka. Imaginá kon felis i kontentu nos lo ta den futuro ora tur hende lo ta armoniosamente uní i ta kooperá ku otro pa adorá Yehova.