TABATA mei 1910. Miéntras ku e barku tabata drenta e bahia, e grupito di pasahero ku tabata riba dèk por a mira kon e solo di mainta tabata sali riba e serunan bèrdè di Belfast Lough. Charles T. Russell tabata entre e pasaheronan akí. Esaki tabata su di sinku biahe pa Irlanda. Djaleu e por a mira dos barku krusero grandi di mesun kompania ku tabata den konstrukshon: Titanic ku despues a haña un final trágiko i Olympic. * Na haf tabatin un dozein di Studiante di Beibel ta warda e pasaheronan yega.

Un 20 aña mas promé, Ruman Russell a disidí di hasi un seri di biahe pafó di Merka pa plama e bon notisia rònt mundu. Su promé biahe a kuminsá na Irlanda, na yüli 1891. Segun e barku City of Chicago tabata yega kosta, Ruman Russell a mira kon solo tabata baha riba Queenstown. Probablemente, esaki lo a pon’é kòrda loke su mayornan a kont’é di nan pais natal. Segun ku e biaheronan tabata pasa den e pueblonan i paisahenan bunita, nan a komprondé ku e teritorio ei tabata “kla, wardando pa ser kosechá.”

Na tur, Ruman Russell a bai Irlanda shete biaha. Su promé bishita a lanta interes di hopi hende. Esei a pone ku durante su otro bishitanan sentenáres i tin biaha míles di hende a bai tende su diskurso. Durante su di dos biahe na mei 1903, korantnan lokal a anunsiá e diskursonan ku e tabata duna. Despues Ruman Russell a konta ku e “oyentenan a presta masha atenshon” na e diskurso ku tabatin e tema “Un Promesa Bou di Huramentu” ku a papia di Abraham su fe i e futuro bendishonnan pa humanidat.

Komo ku tabatin asina tantu hende interesá na Irlanda, Ruman Russell a bolbe bai Irlanda durante su di tres biahe pa Europa. Sinku ruman hòmber a bin risibié ora el a baha for di e barku na Belfast un mainta durante aprel 1908. E diskurso ku nan a anunsiá di antemano ku e tema “E Derota di e Imperio di Satanas” a hala un públiko e anochi ei di “mas o ménos 300 hende ku tabata interesá den e mensahe.” Durante su diskurso, Ruman Russell a usa su Beibel ábilmente pa kontestá e akusashonnan ku un opositor a bini kuné. Na Dublin tabatin un opositor—Sr. O’Connor, sekretario di YMCA—kende tabata desididu pa instigá un públiko di mas ku 1.000 kontra e Studiantenan di Beibel. Kiko a pasa?

Laga nos bai bèk den tempu i visualisá kiko lo por a pasa na e evento ei. Un hòmber ku tabata interesá den loke Beibel ta siña a disidí di asistí na e diskurso públiko ku e korant The Irish Times a anunsiá. Apénas el a haña lugá di sinta, pasobra e lugá tabata yen yen. E ta presta bon atenshon na  e oradó ku barba i kabei blanku i bistí na un bachi pretu. Segun ku e oradó ta duna su diskurso, e ta kana bai bini riba e plataforma, hasiendo yen di gesto. I usando un teksto un tras di otro, e ta yuda su oyentenan komprondé e bèrdatnan di Beibel. Aunke e oradó no tabatin ekipo di zonido, tur su oyentenan por a tend’é i nan a skuch’é ku atenshon durante un ora i mei. Despues, durante un seshon di pregunta i kontesta, O’Connor i su amigunan a yama e oradó afó. Pero na un manera ábil e oradó a usa Beibel pa defendé e mensahe. Demostrando nan aprobashon, e públiko a aploudí. Ora ku e situashon a kalma, e hòmber ta bai serka e oradó pa e siña mas. Segun e relato di testigunan okular, hopi hende a siña e bèrdat di e manera akí.

Na mei 1909 ora Ruman Russell a sali ku e barku Mauretania for di New York pa bai Irlanda pa di kuater biaha, el bai huntu ku Ruman Huntsinger, kende tabata sa stenografia. Di e manera ei, Ruman Russell por a usa e tempu riba laman pa dikta artíkulonan di E Toren di Vigilansia. Na e diskurso di Ruman Russell tabatin 450 hende, di kua 100 mester a keda pará pasobra no tabatin mas lugá.

Ruman C. T. Russell riba e boto Lusitania

E di sinku biahe ku ta ser menshoná na prinsipio di e artíkulo akí, no tabata diferente. Despues di e diskurso públiko, un teólogo renombrá ku O’Conner a bini kuné a risibí kontesta for di Beibel pa su preguntanan. I e presentenan a gosa esei mashá. E siguiente dia, e pasaheronan a subi un boto ku tabata hiba pòst Liverpool pa di einan nan subi e famoso Lusitania bai New York. *

Un diskurso públiko ku a ser anunsiá den The Irish Times di 20 di mei 1910.

Durante Ruman Russell su di seis i di shete biahe na 1911 tambe el a duna diskursonan ku a ser anunsiá di antemano. Na Belfast, durante lènte, 20 Studiante di Beibel a risibí 2.000 hende ku a tende e diskurso “Bida Despues di Morto.” Na Dublin, O’Connor a bolbe presentá ku un otro pastor i nan a hasi yen di pregunta, pero e oyentenan a aploudí e kontestanan ku nan a haña di for di e Skritura. Durante hèrfst di e mesun aña ei, Ruman Russell a bishitá otro statnan kaminda hopi hende a bai skucha su diskursonan. O’Connor i 100 bochinchero a purba di stroba e reunion na Dublin un biaha mas, pero e biaha akí tambe e oyentenan a apoyá e diskursante.

Aunke e tempu ei, Ruman Russell tabata esun ku prinsipalmente tabata duna diskurso públiko, el a rekonosé ku “niun hende no ta indispensabel,” pasobra “esaki no ta obra di hende, si no di Dios.” E diskursonan ku nan tabata anunsiá di antemano, e base pa nos Reunion Públiko djawe, tabata un bon oportunidat pa presentá bèrdatnan bíbliko. Kiko tabata e resultado? E diskursonan públiko a yuda plama e bon notisia i kongregashonnan a ser formá den diferente stat rònt Irlanda.—For di nos archivo na Gran Bretaña.

^ par. 3 Denter di dos aña Titanic a senk.

^ par. 9 Lusitania a ser torpediá serka di e kosta sur di Irlanda na mei 1915.