“Mi a papia; di bèrdat lo mi kumpli kuné. Mi a plania esaki, siguramente lo mi hasié.”—ISA. 46:11.

KANTIKA: 147, 149

1, 2. (a) Kiko Yehova a revelá na nos? (b) Ki siguransa nos ta haña na Isaías 46:10 i 11 i 55:11?

E PROMÉ teksto di Beibel ta kontené un deklarashon simpel pero a la bes profundo: “Na prinsipio Dios a krea e shelunan i tera.” (Gén. 1:1) Ta bèrdat ku nos sa masha tiki di tur loke Dios a krea, por ehèmpel, di espasio, lus i gravedat, i nos ta mira solamente un parti masha chikitu di universo. (Ekl. 3:11) Sinembargo, Yehova a revelá su propósito pa tera i pa humanidat na nos. Tera lo mester a bira un hogar ideal pa hende hòmber i muhé ku Dios a krea den su imágen. (Gén. 1:26) Nan lo mester tabata su yunan, i Yehova lo mester tabata nan Tata.

2 Génesis kapítulo 3 ta splika ku Yehova su propósito a topa ku un opstákulo. (Gén. 3:1-7) Pero esei di ningun manera no a stroba Yehova. Niun hende no por para den Yehova su kaminda. (Isa. 46:10, 11; 55:11) P’esei, nos por ta sigur ku Yehova su propósito original lo kumpli presis na e tempu ku el a stipulá.

3. (a) Ki bèrdatnan bíbliko ta fundamental pa nos por komprondé e mensahe di Beibel? (b) Dikon ta bon pa nos repasá e siñansanan ei aworakí? (c) Ki preguntanan nos lo analisá?

3 Sin duda, nos sa kiko Beibel ta siña tokante Dios su propósito pa tera i pa humanidat i tokante e papel fundamental  ku Hesukristu ta hunga den kumplimentu di e propósito ei. E bèrdatnan bíbliko ei ta masha importante i kasi sigur nan ta algun di e promé kosnan ku nos a siña ora nos a kuminsá studia e Palabra di Dios. Awor nos, na nos turno, ke yuda hende di bon kurason konosé e siñansanan importante akí. Den e siman akí ku nos ta trata e artíkulo akí den nos kongregashon, nos ta hasiendo nos bèst pa invitá mas tantu hende posibel na e Konmemorashon di e morto di Kristu. (Luk. 22:19, 20) Esnan ku asistí lo siña hopi tokante Dios su propósito. Pues, den e último dianan akí promé ku e Konmemorashon, òf Memorial, ta na su lugá pa nos pensa riba algun pregunta spesífiko ku por lanta interes di nos studiantenan di Beibel i otro hende interesá pa e reunion tan importante akí. Nos lo trata tres pregunta: Kiko tabata Dios su propósito original pa tera i pa humanidat? Kiko a bai robes? I dikon Hesus su sakrifisio di reskate ta e klave ku ta habri e kaminda pa Dios su propósito kumpli?

KIKO TABATA E PROPÓSITO ORIGINAL DI E KREADOR?

4. Kon kreashon ta duna gloria na Yehova?

4 Yehova ta un Kreador impreshonante. Tur su obranan ta eksepshonal. (Gén. 1:31; Yer. 10:12) Kiko nos por siña di e bunitesa i órden ku nos ta mira den kreashon? Ora nos opserv’é, nos ta keda masha impreshoná ku e echo ku tur loke Yehova a krea, tantu kosnan chikitu komo grandi, ta kumpli ku un funshon. Ken no ta keda impreshoná ora e mira kon kompliká un sèl humano ta hinká den otro, kon delikado un bebi resien nasí ta òf ki bunita un bahada di solo ta? Nos ta atmirá e kreashonnan akí pasobra Dios a traha nos ku e kapasidat pa apresiá loke di bèrdat ta bunita.—Lesa Salmo 19:1; 104:24.

5. Kon Yehova ta sòru pa tur loke el a krea funshoná armoniosamente ku otro?

5 Kreashon ta siña nos ku Yehova a pone límite. Debí na su amor, el a traha tantu leinan físiko komo leinan moral pa sòru pa tur kos funshoná armoniosamente ku otro. (Sal. 19:7-9) De echo, kada kos den universo tin su lugá i funshon di akuerdo ku e propósito di Dios. Yehova ta determiná kon loke el a krea tin ku funshoná. Por ehèmpel, e lei di gravedat ta mantené e atmósfera serka di tera, e ta regulá fluktuashon di marea i ta mantené tur loke ta esensial pa bida riba tera den balansa. Henter kreashon, inkluso hende, ta move i funshoná denter di e límitenan akí. Ta bisto anto ku e órden den kreashon ta duna prueba ku Dios tin un propósito pa tera i pa humanidat. Ora nos ta prediká, nos por hala atenshon na Esun ku a kousa e órden impreshonante akí?—Rev. 4:11.

6, 7. Kua ta algun regalo ku Yehova a duna Adam ku Eva?

6 E propósito original di Yehova tabata pa hende biba pa semper riba tera. (Gén. 1:28; Sal. 37:29) Komo un Dios generoso, el a duna Adam ku Eva un variedat di regalo presioso pa nan por a disfrutá di bida. (Lesa Santiago 1:17.) Yehova a duna nan boluntat liber i e kapasidat pa rasoná, pa stima i pa disfrutá di amistat. E Kreador a papia ku Adam i a siñ’é kon pa ta obediente. Tambe el a siñ’é kon pa kuida su mes, e bestianan i e tera. (Gén. 2:15-17, 19, 20) Ademas, Yehova a krea Adam ku Eva ku e sentidonan di smak, takto, bista, oido  i olfato. Pues, nan por a disfrutá plenamente di e bunitesa di tur loke tabatin den e Paradeis. E promé pareha humano tabatin sufisiente chèns di sinti nan satisfecho ku nan trabou i di sigui siña i deskubrí kosnan nobo pa semper.

7 Kiko mas tabata parti di e propósito di Dios? Yehova a krea Adam ku Eva ku e kapasidat di haña yu perfekto. Dios tabata ke pa nan yunan haña yu te ora e famia humano yena henter e tera. E tabata ke pa Adam ku Eva i tur mayor despues di nan stima nan yunan meskos ku Yehova a stima su promé yunan humano ku tabata perfekto. Tera i tur su rekursonan tabatin ku bira nan hogar pa semper.—Sal. 115:16.

KIKO A BAI ROBES?

8. Dikon Yehova a duna Adam ku Eva e lei na Génesis 2:16 i 17?

8 Kosnan no a resultá mesora manera tabata e propósito di Dios. Dikon nò? Yehova a duna Adam ku Eva un lei simpel pa wak si nan a respetá e límitenan di nan libertat. El a bisa: “Di tur palu di e hòfi bo mag kome libremente, ma di e palu di konosementu di bon i malu lo bo no kome, pasobra e dia ku bo kome di dje, lo bo muri sigur.” (Gén. 2:16, 17) No tabata difísil pa Adam ku Eva komprondé e lei akí ni no tabata difísil pa nan obedes’é. Al fin i al kabo, nan tabatin mas ku sufisiente kuminda.

9, 10. (a) Ki akusashon Satanas a lansa kontra Yehova? (b) Kiko Adam ku Eva a skohe p’e? (Wak e promé plachi.)

9 Satanas e Diabel a usa un kolebra pa gaña Eva pa pon’é desobedesé su Tata, Yehova. (Lesa Génesis 3:1-5; Rev. 12:9) Satanas a hasi parse ku e echo ku e yunan humano di Dios no por a kome for “di tur palu di e hòfi” tabata un problema. Ta komo si fuera el a bisa Eva: ‘Bo ke men ku bo no por hasi loke bo ke?’ Despues, el a bisa un mentira di marka mayor: “Siguramente boso lo no muri!” Anto despues el a purba di konvensé Eva ku e no mester a tende di Dios, bisando: “Dios sa ku e dia ku boso kome di dje, boso wowo lo habri.” Satanas a insinuá ku Yehova no tabata ke pa nan kome di e fruta pasobra si nan a hasi esei, nan lo a haña konosementu spesial. Ademas, Satanas a hasi e promesa falsu akí: “Boso lo ta manera Dios, konosiendo bon i malu.”

10 Awor Adam ku Eva mester a skohe kiko pa hasi. Nan lo a obedesé Yehova òf nan lo a skucha di e kolebra? Nan a skohe pa desobedesé Dios, i asina nan a djòin Satanas den su rebelion. Nan a rechasá Yehova komo nan Tata i a pèrdè e protekshon ku su gobernashon lo a duna nan.—Gén. 3:6-13.

11. Dikon Yehova no ta tolerá rebelion?

11 Debí ku Adam ku Eva a rebeldiá kontra Yehova, nan no tabata perfekto mas. Es mas, nan rebelion a alehá nan for di Yehova pasobra su “wowonan ta muchu puru pa aprobá [òf, “mira,” NW] maldat.” P’esei, Dios “no por wak maldat ku toleransia.” (Hab. 1:13) Si Dios a tolerá nan rebelion, e bienestar di tur ser bibu, tantu den shelu komo riba tera, lo tabata na peliger. Mas importante ainda, si Dios no a hasi nada enkuanto e piká ku Adam ku Eva a kometé den Edén, su kriaturanan inteligente lo a duda si en realidat e ta un persona konfiabel. Pero Yehova ta tene su mes na su normanan; e mes no ta bai kontra nan. (Sal. 119:142) Pues, e echo ku Adam ku Eva tabatin un boluntat liber no a duna nan e derecho pa desobedesé  Dios su lei. Komo konsekuensia di nan rebelion kontra Yehova, nan a muri i a bolbe na stòf, for di kua nan a ser kreá.—Gén. 3:19.

12. Kiko a sosodé ku e yunan di Adam?

12 Ora Adam ku Eva a kome di e fruta, Dios no por a aseptá nan mas komo parti di su famia universal. El a saka nan for di Edén, i nan no tabatin speransa mas pa bolbe drenta. (Gén. 3:23, 24) Debí na Yehova su hustisia, el a pone nan enfrentá e konsekuensianan di nan desishon. (Lesa Deuteronomio 32:4, 5.) Komo ku nan no tabata perfekto mas, nan no por a imitá Dios su kualidatnan perfektamente mas. Adam no solamente a pèrdè un bunita futuro pa su mes, sino tambe el a pasa imperfekshon, piká i morto pa su yunan. (Rom. 5:12) El a stroba su desendientenan di por a sigui biba pa semper. Ademas, ni Adam ku Eva ni nan yunan no por a haña yu perfekto. Despues ku Satanas e Diabel a pone Adam ku Eva bira lomba pa Dios, el a sigui gaña humanidat te dia djawe.—Huan 8:44.

E RESKATE TA ELIMINÁ UN BARERA

13. Kiko Yehova ke pa humanidat?

13 Apesar di e rebelion di Adam ku Eva, ainda Yehova ta stima humanidat, i e ke pa nan tin un bon relashon kuné. E no ta deseá pa ningun hende muri. (2 Ped. 3:9) Pues djis despues di e rebelion, Dios a tuma medida pa humanidat por a bolbe drecha nan relashon kuné i a la bes tene su mes na su normanan hustu. Kon Yehova a logra esaki?

14. (a) Segun Huan 3:16, kiko Dios a hasi pa salba humanidat? (b) Ki pregunta nos por trata ku hende ku a mustra interes?

14 Lesa Huan 3:16. Hopi hende ku nos invitá na Memorial konosé e teksto akí bon. Pero e pregunta ku ta lanta ta: Kon Hesus su sakrifisio ta hasi bida eterno posibel? E kampaña di parti invitashon pa Memorial, e Memorial mes i e echo ku nos ta rebishitá hende ku a asistí na dje ta duna nos e oportunidat di yuda hende sinsero ku ta buska e bèrdat haña kontesta riba e pregunta importante akí. E hendenan akí lo por keda impreshoná ora nan kuminsá komprondé mas mihó kon e reskate ta demostrá e amor i sabiduria di Yehova. Ki aspektonan di e reskate nos por hala atenshon na dje?

15. Kon Hesus tabata diferente for di Adam?

15 Yehova a proveé un hòmber perfekto ku por a duna su bida komo reskate. E hòmber perfekto ei mester tabata leal na Yehova i mester tabata dispuesto pa duna su bida pa humanidat ku tabata sin speransa. (Rom. 5:17-19) Yehova a transferí e bida di su promé kreashon for di shelu pa tera. (Huan 1:14) Asina Hesus a bira un hòmber perfekto, meskos ku Adam tabata. Pero kontrali na Adam, Hesus sí a biba segun e normanan ku Yehova a pone pa hende perfekto. Asta ora Hesus tabata bou di e pruebanan di mas severo, nunka el a peka ni kibra niun lei di Dios.

16. Dikon e reskate ta un regalo asina presioso?

16 Ya ku Hesus a muri komo un hòmber perfekto na fabor di humanidat, e por a salba hende for di piká i morto. E tabata eksaktamente loke Adam mester tabata, un hòmber perfekto ku tabata kompletamente leal i obediente na Dios. (1 Tim. 2:6) Hesus a bira e sakrifisio di reskate ku a habri kaminda pa “hopi hende,” tantu hende hòmber, hende muhé komo mucha, haña bida eterno. (Mat. 20:28)  Sí, e reskate ta e klave ku ta habri e kaminda pa Dios su propósito original kumpli. (2 Kor. 1:19, 20) E reskate ta duna tur fiel sirbidó di Dios e oportunidat pa biba pa semper.

YEHOVA A HABRI E KAMINDA PA NOS BOLBE SERKA DJE

17. Kiko e reskate ta hasi posibel?

17 Yehova a paga un preis haltu pa salba nos. (1 Ped. 1:19) E ta stima humanidat asina tantu ku e tabata dispuesto pa laga su Yu unigénito muri pa nos. (1 Huan 4:9, 10) Den un sentido, Hesus ta tuma e lugá di Adam, nos promé tata humano. (1 Kor. 15:45) Asina Hesus a hasi mas ku duna nos bida; el a duna nos e oportunidat pa nos bolbe forma parti di e famia di Dios. Sí, a base di e sakrifisio di Hesus, Yehova por bolbe aseptá hende komo parti di su famia sin bai kontra su normanan di hustisia. I den futuro, tur hende fiel na Dios lo bira perfekto. Esaki no ta konmové bo? E parti selestial i terenal di su famia lo ta kompletamente uní. Nos tur lo ta yu di Dios den pleno sentido di e palabra.—Rom. 8:21.

18. Na ki tempu Yehova lo bira “tur kos pa tur hende”?

18 E rebelion di Satanas no a stroba Yehova di ekstendé su amor na humanidat ni e no ta stroba hende imperfekto di ta leal na Yehova. Mediante Yehova su provishon di e reskate, lo e yuda tur su yunan bira kompletamente hustu. Imaginá kon bida lo ta ora tur hende “ku rekonosé e Yu i pone fe den dje haña bida eterno.” (Huan 6:40) Danki na Yehova su gran amor i sabiduria, lo e hasi e famia humano perfekto, di akuerdo ku su propósito original. E ora ei, nos Tata, Yehova, lo bira “tur kos pa tur hende.”—1 Kor. 15:28.

19. (a) Gratitut pa e reskate mester motivá nos pa hasi kiko? (Wak e kuadro “ Laga Nos Sigui Buska Hende di Bon Kurason.”) (b) Ki aspekto di e reskate nos lo trata den e siguiente artíkulo?

19 Gratitut pa e reskate mester motivá nos pa hasi tur loke nos por pa hasi otro hende konsiente ku nan por benefisiá di e regalo presioso ei. Hende mester sa ku Yehova ta usa e reskate pa demostrá su amor i pa ofresé tur hende e oportunidat di biba pa semper. Pero e reskate a logra mas ku esei. E siguiente artíkulo lo analisá kon e sakrifisio di Hesus a resolvé tambe e kuestionnan moral ku Satanas a lanta den e Hòfi di Edén.