Bai na kontenido

Bai na kontenido

Sigui Sirbi Yehova ku Goso

Sigui Sirbi Yehova ku Goso

BO TA kòrda kua tabata e dia di mas felis di bo bida? Kisas tabata e dia ku bo a kasa òf e dia ku bo promé yu a nase? Òf tabata e dia ku bo a batisá? Kasi sigur e dia ei ta e dia di mas importante i gososo di bo bida. E rumannan lo tabata masha kontentu di mira bo demostrá ku bo ta stima Dios di henter bo kurason, alma, mente i forsa.—Mar. 12:30.

Muy probablemente, despues di bo boutismo, bo tabata sirbi Yehova ku hopi goso. Pero algun ruman no tin e mesun tantu goso ku nan tabatin na ántes. Dikon? Ki motibunan nos tin pa sigui sirbi Yehova ku goso?

KIKO POR KITA NOS GOSO?

E mensahe di Reino ta duna nos hopi goso pasobra Yehova ta primintí ku pronto lo e kaba ku e sistema malbado akí i trese su mundu nobo. Ademas, Sofonías 1:14 ta sigurá nos: “E gran dia di SEÑOR ta serka; e ta serka i e ta bini masha lihé mes.” Pero kisas nos ta sinti ku nos mester warda mas di loke nos a ferwagt, i esei por kita nos goso i pone ku nos no ta hasi mes tantu ku nos tabata hasi den sirbishi na Yehova.—Pro. 13:12.

Asosiashon ku e pueblo di Dios tambe ta motivá nos pa sigui sirbi Yehova ku goso. De echo, kisas ta e kondukta ekselente di e sirbidónan di Yehova a atraé nos na e bèrdat i yuda nos kuminsá sirbi Dios ku goso. (1 Ped. 2:12) Pero kiko si un ruman a peka i a haña disiplina? Esei a pone algun ruman bira desanimá i pèrdè nan goso.

Materialismo tambe por pone nos pèrdè nos goso. Diabel ta usa su mundu pa laga nos pensa ku nos tin mester di algu ku en realidat nos no mester. Ma nos mester kòrda riba e palabranan di Hesus ku ta bisa: “Ningun hende no por ta esklabo di dos doño, pasobra sea lo e odia esun i stima e otro òf lo e pega na esun i despresiá e otro. Boso no por ta esklabo di Dios i di Rikesa.” (Mat. 6:24) Nos no por sirbi Yehova ku goso i na mes momento probechá di tur loke e mundu akí tin di ofresé.

SIRBI YEHOVA KU GOSO

Nos ta stima Yehova, i p’esei no ta un karga pa hasi su boluntat. (1 Huan 5:3) Kòrda kiko Hesus a bisa: “Bini serka mi, boso tur ku ta traha duru i ku ta kargá, i lo mi refreská boso. Tuma mi yugo riba boso skouder i siña di mi, pasobra mi tin un genio suave i un kurason humilde, i boso alma lo keda refreská. Pasobra mi yugo ta suave, i mi karga no ta pisá.” (Mat. 11:28-30) Pues nos tin goso pasobra nos ta disipel di Kristu. Laga nos konsiderá tres motibu pakiko sirbi Yehova ta hasi nos felis.—Hab. 3:18.

Nos ta sirbi Yehova, e Dios felis, kende a duna nos bida. (Echo. 17:28; 1 Tim. 1:11) Maske kuantu aña nos por tin batisá, nos ta sigui sirbi Yehova ku goso pasobra nos sa ku ta é a krea nos i duna nos bida.

Pa Héctor no pèrdè su goso, e ta tene na mente loke e Reino lo hasi p’e i ta keda aktivo den sirbishi

Tuma e ehèmpel di Héctor, kende tabata sirbi komo superintendente biahero pa 40 aña. E malesa di su kasá ta pone ku Héctor no por hasi mes tantu ku ántes. Pero te awor ku e ta hende grandi kaba, e ta sigui sirbi Yehova ku goso. (Sal. 92:12-14) Héctor a bisa: “No ta nada fásil pa kuida mi kasá, i ta tristu pa mira kon poko poko su salú ta bai atras, pero mi no a laga esei kita mi goso di sirbi e Dios berdadero. Mi ta stim’é i ta sirbié ku henter mi kurason pasobra mi sa ku el a krea hende ku un propósito, i ta danki na dje mi ta na bida. Pa mi no pèrdè mi goso, mi ta hasi tur mi esfuerso pa keda aktivo den sirbishi i tene na mente loke e Reino lo hasi pa nos.”

Yehova a proveé e reskate pa libra nos di piká i morto. Beibel ta kòrda nos ku “Dios a stima mundu asina tantu ku el a duna su Yu unigénito, pa tur ku pone fe den dje no bai pèrdí, ma haña bida eterno.” (Huan 3:16) Sí, ora nos ehersé fe den e sakrifisio di reskate di Hesus, nos por haña pordon pa nos pikánan, i nos por haña bida eterno. Esaki sigur ta un bon motibu pa nos mustra gratitut pa e regalo amoroso ei, i e ta motivá nos pa sirbi Yehova ku goso.

Jesús a simplifiká su bida i tin hopi aña ta sirbi Yehova ku goso

Un ruman na México ku yama Jesús a bisa: “Mi tabata katibu di mi trabou, i tin biaha, mi tabata asta traha sinku warda tras di otro apesar ku mi no tabata obligá pa hasi esei. Mi tabata hasié djis pa mi gana mas plaka. Pero despues mi a siña tokante Yehova i kon el a entregá su Yu stimá pa henter humanidat. Esei a duna mi un deseo fuerte pa sirbi Yehova, i mi a dediká mi bida na dje. Despues di a traha 28 aña pa e  kompania, mi a disidí di kita for di einan i a drenta den e trabou di sirbishi di tempu kompleto.” Esei tabata komienso di un etapa di bida hopi gososo.

Nos ta hiba un bida moralmente limpi, i esei ta hasi nos felis. Bo ta kòrda kon bo bida tabata promé ku bo a siña konosé Yehova? Apòstel Pablo a kòrda e kristiannan na Roma ku un tempu nan tabata “esklabo di piká” pero ku nan a bira “esklabo di hustisia.” Komo ku nan a hiba un bida moralmente limpi, nan lo haña bida eterno. (Rom. 6:17-22) Nos tambe ta hiba un bida limpi, i komo resultado, nos ta evitá e konsekuensianan di hiba un bida inmoral òf violento. Ki un goso!

“E añanan ku mi a sirbi Yehova ta e añanan di mas felis di mi bida.”—Jaime

Tuma por ehèmpel e kaso di Jaime, kende tabata un ateista, evolushonista i bòksdó. Jaime a kuminsá asistí na e reunionnan kristian, i e amor ku e rumannan tabata mustra na otro a impreshon’é. Pero pa e por a hasi kambio den su bida, el a pidi Yehova pa yud’é kere den Dje. Jaime a bisa: “Tiki tiki mi a siña ku ta eksistí un Tata amoroso i Dios yen di miserikòrdia. Anto biba segun e normanan hustu di Yehova ta ègt un protekshon pa mi. Si mi no a kambia, kisas mi tambe lo ta morto manera algun di mi amigunan bòksdó di ántes. E añanan ku mi a sirbi Yehova ta e añanan di mas felis di mi bida.”

NO ENTREGÁ!

Kon nos mester sinti nos miéntras nos ta warda riba fin di e sistema malbado akí? Kòrda ku nos ta “sembra ku bista riba spiritu santu” i lo “kosechá bida eterno.” P’esei, “laga nos no stòp di hasi loke ta bon, pasobra na e debido tempu nos lo kosechá si nos no kansa.” (Gal. 6:8, 9) Ku yudansa di Yehova, laga nos ta determiná pa sigui perseverá, hasi esfuerso pa kultivá e kualidatnan ku nos tin mester pa sobrebibí “e tribulashon grandi” i sigui sirbi Yehova ku goso asta bou di prueba.—Rev. 7:9, 13, 14; Sant. 1:2-4.

Nos por tin sigur ku Yehova lo bendishoná nos si nos perseverá. E ta mira ku nos ta traha duru i ta stima e i su nòmber. Si nos sigui sirbi Yehova ku goso, nos tambe por sinti meskos ku e salmista David, kende a bisa: “Mi a pone SEÑOR semper mi dilanti; pasobra e ta na mi man drechi, lo mi no wòrdu moví. P’esei mi kurason ta kontentu, i mi alma ta regosihá; mi karni tambe lo biba den siguridat.”—Sal. 16:8, 9.