“For di chikitu bo konosé e skrituranan santu ku por hasi bo sabí pa salbashon.”2 TIM. 3:15.

KANTIKA: 141, 134

1, 2. Dikon algun mayor por bira preokupá ora nan yu ke dediká su bida na Yehova i batisá?

TUR aña, míles di studiante di Beibel ta dediká nan bida na Yehova i ta batisá. Hopi di nan ta hóbennan ku a lanta den e bèrdat i ku a skohe e mihó manera di biba. (Sal. 1:1-3) Si bo ta un mayor kristian, sin duda bo ta anhelá e dia ku bo yu lo batisá.—Kompará 3 Huan 4.

2 Pero kisas bo tin algun preokupashon. Podisé bo a mira algun hóben batisá pero despues nan ta kuminsá duda si ta bon pa nan sigui biba segun e normanan di Beibel. Algun di nan asta a bai laga e bèrdat. Pues, kisas bo tin miedu ku bo yu lo pèrdè su amor pa e bèrdat despues ku e batisá. Bo yu lo por bira manera e kristiannan di promé siglo na Efeso, di ken Hesus a bisa: “Bo a pèrdè e amor ku bo tabatin na kuminsamentu.” (Rev. 2:4) Kon bo por evitá pa esei pasa ku bo yu, i kon bo por yud’é pa e “krese i haña salbashon”? (1 Ped. 2:2) Pa nos por haña kontesta pa e pregunta  akí, laga nos analisá e ehèmpel di Timoteo.

“BO KONOSÉ E SKRITURANAN SANTU”

3. (a) Na ki tempu i kon Timoteo a bira un kristian, i kon el a progresá den e bèrdat? (b) Segun Pablo su karta na Timoteo, siñamentu di e bèrdat ta enserá ki tres aspekto?

3 Probablemente ta rònt di aña 47, durante apòstel Pablo su promé bishita na Listra ku Timoteo a siña konosé e siñansanan di Hesus. E tempu ei, aunke kisas Timoteo tabata un tiner, sin duda el a traha duru pa apliká loke el a siña. Dos aña despues el a bira Pablo su kompañero di biahe. Despues di mas o ménos 16 aña, Pablo a skirbí Timoteo: “Sigui den e kosnan ku bo a siña i a keda konvensí di dje, pasobra bo sa for di ken bo a siña nan i ku ta for di chikitu bo konosé e skrituranan santu [e Skritura Hebreo] ku por hasi bo sabí pa salbashon mediante fe den Kristu Hesus.” (2 Tim. 3:14, 15) Tuma nota ku Pablo a bisa ku Timoteo (1) a konosé e skrituranan santu, (2) a keda konvensí di e kosnan ku el a siña i (3) a bira sabí pa salbashon mediante fe den Kristu Hesus.

4. Ki publikashonnan bo a usa pa siña bo yunan chikitu? (Wak e promé plachi.)

4 Komo un mayor kristian, bo ke pa bo yu konosé e skrituranan santu, ku awe ta konsistí di e Skritura Hebreo i e Skritura Griego Kristian. Asta mucha hopi chikitu por siña tokante e hende- i relatonan den Beibel. E organisashon di Yehova a proveé un kantidat di publikashon ku mayornan por usa pa siña nan yunan. Bo por pensa di algun di nan ku ta disponibel den bo idioma? Tene na mente ku pa bo yu forma un amistat fuerte ku Yehova, ta importante pa e konosé e Skritura.

“KEDA KONVENSÍ” DI E KOSNAN KU BO A SIÑA

5. (a) Kiko e ekspreshon “keda konvensí” ta enserá? (b) Kon nos por sa ku Timoteo a keda konvensí ku Hesus tabata e Mesías?

5 Konosementu di e skrituranan santu ta importante. Pero bo mester hasi mas ku djis siña bo yunan tokante e hende- i relatonan den Beibel. Timoteo a “keda konvensí” tambe di e kosnan ku el a siña. Den e idioma original, e ekspreshon “keda konvensí” ta enserá “ser sigur di” òf “ser konvensí di ku algu ta bèrdat.” Timoteo tabata konosé e Skritura Hebreo for di chikitu. Pero mas despues, loke el a siña a konvens’é ku Hesus tabata e Mesías. De echo, Timoteo su fe tabata asina fuerte ku el a batisá i a djòin Pablo den e trabou di misionero.

6. Kon bo por yuda bo yu keda konvensí di e kosnan ku e ta siña for di e Palabra di Dios?

6 Kon bo por yuda bo yu kultivá fe pa asina e por ta konvensí di e kosnan ku el a siña, meskos ku Timoteo? Di promé, tene pasenshi. Fe no ta algu ku ta bini djawe pa mañan ni bo no por pas’é pa bo yu djis pasobra abo a ser konvensí di e kosnan ku bo a siña. Kada yu mester usa su propio “kapasidat di pensa” pa e por haña fe den e bèrdatnan di Beibel. (Lesa Romanonan 12:1.) Abo komo mayor ta hunga un papel importante den e proseso ei, spesialmente si bo yu tin pregunta. Ban wak un ehèmpel.

7, 8. (a) Kon un tata a mustra pasenshi ora e tabata siña su yu? (b) Ki ora abo mester a demostrá pasenshi ku bo yu?

7 Thomas, kende su yu muhé tin 11 aña, ta bisa ku tin biaha su yu ta hasié preguntanan manera: “Yehova por a usa evolushon pa krea bida riba tera?” òf “Dikon nos no ta vota òf hasi kos pa  yuda e komunidat?” Tin biaha Thomas mester dominá su mes pa e no djis bisa su yu kiko e mester kere aden. Thomas sa ku ta mas fásil pa konvensé un hende usando yen di prueba chikitu en bes di djis bis’é un bèrdat.

8 Thomas sa ku e mester tin pasenshi pa e por siña su yu. De echo, ta importante pa tur kristian tin pasenshi. (Kol. 3:12) Thomas a ripará ku lo tuma tempu i vários kòmbersashon pa yuda su yu fortalesé su fe. Thomas mester rasoná riba e Skritura pa asina su yu por haña fe den loke e ta siña. E ta agregá: “Foral relashoná ku puntonan importante, ami ku mi kasá ke sa si nos yu di bèrdat ta kere loke el a siña i si e ta zona lógiko p’e. Pues, si e tin pregunta, esei ta bon. Pa ta sinsero, lo mi ta preokupá si e aseptá algu sin hasi niun pregunta.”

9. Kon bo por inkulká e Palabra di Dios den bo yunan?

9 Si mayornan ta tene pasenshi ora di siña nan yunan, poko poko e yunan lo kuminsá komprondé “e hanchura, largura, haltura i profundidat di e bèrdat.” (Efe. 3:18) Ora di siña nan, tene kuenta ku nan edat i kapasidat. Segun ku loke nan ta siña ta fortalesé nan fe, lo ta mas fásil pa nan defendé loke nan ta kere aden dilanti di kompañeronan di skol i otro hende. (1 Ped. 3:15) Por ehèmpel, bo yunan por usa Beibel pa splika kiko ta pasa ora un hende muri? E splikashon ku Beibel ta duna ta lógiko pa nan? * Sí, pa bo inkulká e Palabra di Dios den bo yunan bo mester tin pasenshi, pero bo esfuerso lo ta bale la pena.—Deu. 6:6, 7.

10. Kiko mas ta importante ora di siña bo yunan?

10 Naturalmente, bo ehèmpel tambe ta importante pa yuda bo yunan kultivá fe. Stephanie, kende ta mama di tres yu muhé, ta bisa: “For di tempu ku mi yunan tabata hopi chikitu, mi tabata puntra mi mes: ‘Mi ta papia ku mi yunan tokante dikon ami ta konvensí ku Yehova ta eksistí i ku e ta hustu i kariñoso? Mi yunan por mira ku di bèrdat mi ta stima Yehova?’ Mi no por ferwagt pa mi yunan kultivá fe si ami mes no ta konvensí.”

“SABÍ PA SALBASHON”

11, 12. Kiko ta sabiduria, i dikon nos por bisa ku sabiduria no ta dependé solamente di un hende su edat?

11 Manera nos a siña, Timoteo tabata (1) konosé e Skritura i (2) tabata konvensí di loke el a siña. Pero kiko Pablo tabata ke men ora el a bisa Timoteo ku e skrituranan santu por a hasié “sabí pa salbashon”?

12 E buki Perspikasia pa Komprondé e Skritura, na spañó, Tomo 2, ta splika ku, den Beibel, sabiduria ta inkluí “e kapasidat di usa konosementu i komprondementu pa resolvé problema ku éksito, evitá òf prevení peliger, logra algun meta òf konsehá otro hende pa hasi meskos. E ta lo kontrario di lokura.” Beibel ta bisa ku “lokura ta mará den kurason di un mucha.” (Pro. 22:15) Pues ta opvio ku sabiduria, ku ta kontrario di lokura, ta duna prueba di un hende su madures spiritual. Un hende su madures no ta dependé solamente di su edat sino di e echo ku e tin  un rèspèt profundo pa Yehova i ku e ta kla pa obedesé Dios su mandamentunan.—Lesa Salmo 111:10.

13. Kon un hóben por demostrá ku e ta sabí pa salbashon?

13 Hóbennan ku ta spiritualmente maduro no ta laga nan mes deseonan òf preshon di nan pareunan influensiá nan. Nan no ta ser “bentá tur kaminda pa ola i hibá p’aki i p’aya.” (Efe. 4:14) Mas bien, nan ta entrená ‘nan kapasidat di komprondé pa asina nan por distinguí loke ta bon for di loke ta malu.’ (Heb. 5:14) Nan ta demostrá ku nan ta birando mas maduro ora nan ta tuma desishon sabí asta ora nan mayornan òf otro adulto no ta wak nan. (Flp. 2:12) E tipo di sabiduria ei ta nesesario pa salbashon. (Lesa Proverbionan 24:14.) Kon bo por yuda bo yu haña tal sabiduria? Di promé, hasi sigur ku bo yunan sa kiko bo normanan basá riba Beibel ta. Pa medio di bo ehèmpel i loke bo ta bisa, laga bo yunan sa ku e normanan den e Palabra di Dios ta bo normanan tambe.—Rom. 2:21-23.

Dikon ta importante pa un mayor sigui hasi esfuerso pa yuda su yu sin kansa? (Wak paragraf 14-18)

14, 15. (a) Un hóben ku ke batisá mester pensa seriamente riba kiko? (b) Kon bo por yuda bo yu pensa riba e bendishonnan ku lo e haña ora e obedesé e normanan di Dios?

14 Sinembargo, djis bisa bo yu kiko ta bon i malu no ta sufisiente. Ta bon pa bo yuda bo yu rasoná riba preguntanan manera: ‘Dikon Beibel ta prohibí nos pa hasi kosnan ku por atraé nos? Kiko ta konvensé mi ku obedesé e normanan di Beibel semper ta pa mi mes bon?’—Isa. 48:17, 18.

15 Si bo yu ke batisá, bo mester yud’é pensa seriamente riba e responsabilidatnan ku boutismo ta trese kuné. Kiko ta e benefisionan? Ki difikultatnan e por ferwagt? Dikon e benefisionan ta muchu mas tantu ku e difikultatnan? (Mar. 10:29, 30) Ta importante pa e  pensa tokante e asuntunan akí promé ku e dal e paso di boutismo. Mayornan, yuda boso yu pensa seriamente riba e bendishonnan ku lo e haña ora e obedesé Yehova i yud’é mira kiko ta e konsekuensianan di desobedensia. E ora ei, e chèns lo ta mas grandi ku lo e ta konvensí ku e normanan di Beibel semper ta pa su mes bon.—Deu. 30:19, 20.

ORA UN HÓBEN BATISÁ TA KUMINSÁ DUDA

16. Kiko mayornan mester hasi si nan yu ku ta batisá kuminsá duda tokante e bèrdat?

16 Awor, kiko si bo yu ta kuminsá duda tokante e bèrdat despues ku el a batisá? Por ehèmpel, kisas e kosnan den mundu por kuminsá atraé un hóben batisá òf e por kuminsá duda si ainda ta sabí pa biba segun e prinsipionan di Beibel. (Sal. 73:1-3, 12, 13) Komo mayor, tene na mente ku e manera ku bo ta reakshoná por determiná si bo yu ta skohe pa sigui sirbi Yehova òf nò. Sea ku bo yu ta hopi yòn ainda òf un tiner, ser determiná pa no diskutí kuné. Mas bien, lag’é sa ku bo ta stim’é i ku bo ke yud’é.

17, 18. Si un hóben tin duda tokante e bèrdat, kon su mayornan por yud’é?

17 Klaru, un hóben ku ta batisá a hasi un dedikashon solèm na Yehova. E dedikashon ei ta un promesa pa stima Dios i pa pone su boluntat promé ku tur kos. (Lesa Marko 12:30.) Yehova ta mira e promesa ei komo algu serio, i un hende ku a hasi e promesa ei no mester tum’é komo algu leve. (Ekl. 5:4, 5) Na un momento apropiá, ku amor kòrda bo yu esei. Pero promé ku bo papia kuné, hasi bon uso di e materialnan ku e organisashon di Yehova a proveé pa mayornan. Ora bo hasi esei, bo ta pone e base pa mustr’é kon serio su dedikashon na Yehova ta i ki bendishonnan e ta haña komo un kristian dediká i batisá.

18 Por ehèmpel, bo por haña bon konseho den e apèndiks “Los padres preguntan” di e buki Lo que los jóvenes preguntan. Respuestas prácticas (volumen 1). E ta bisa pa no kore saka konklushon ku bo yu a rechasá bo fe, pero buska pa sa kiko realmente ta e problema. Kisas ta preshon di pareu, soledat òf kisas bo yu ta sinti ku otro hóbennan kristian ta progresando mas lihé kuné den e bèrdat. E apèndiks ta splika tambe ku e situashon akí no ta nifiká ku bo yu no ta di akuerdo ku e siñansanan di Beibel. Mas bien, e ta e resultado di otro difikultatnan ku bo yu ta pasa aden i ku ta hasié difísil pa e apliká loke e ta siña. Ademas, e apèndiks ta duna algun sugerensia kon mayornan kristian por yuda nan yu ku tin duda tokante e bèrdat.

19. Kon mayornan por yuda nan yunan bira “sabí pa salbashon”?

19 Komo mayor, bo tin e responsabilidat serio i e privilegio pa lanta bo yunan “den e disiplina di Yehova i inkulká su manera di pensa den nan.” (Efe. 6:4) Manera nos a mira, esei ta rekerí mas ku djis siña nan loke Beibel ta bisa, mas bien mester yuda nan haña fe den loke nan ta siña. Sí, nan mester tin un fe asina fuerte ku esei por motivá nan pa dediká nan bida na Yehova i pa sirbié ku henter nan kurason. Ku e Palabra di Yehova, su spiritu santu i bo esfuerso komo mayor yuda bo yu bira “sabí pa salbashon.”

^ par. 9 E blachinan di tarea “Kiko Beibel Ta Siña Realmente?” ta un ekselente publikashon ku por yuda tantu mucha komo adulto komprondé i splika bèrdatnan di Beibel. Bo por haña nan riba jw.org den diferente idioma bou di Guia pa Estudio. Bai na SIÑANSA DI BEIBEL > MATERIAL PA STUDIA BEIBEL.