“Esnan ku ta biba segun spiritu, [ta fiha nan mente] riba e kosnan di spiritu.”—ROM. 8:5.

KANTIKA: 57, 52

1, 2. Dikon Romanonan kapítulo 8 ta di interes spesial pa kristiannan ungí?

KASI sigur bo a lesa Romanonan 8:15-17 durante e Konmemorashon anual di e morto di Hesus. E tekstonan klave akí ta splika kon un kristian por sa ku e ta ungí: spiritu santu ta duna testimonio huntu ku su spiritu. I Romanonan 8:1 ta referí na e ungínan komo “esnan ku ta den union ku Kristu Hesus.” Pero, Romanonan kapítulo 8 ta apliká solamente na kristian ungí? Òf e ta konta tambe pa e kristiannan ku tin e speransa di biba aki riba tera?

2 E kapítulo ei ta skirbí spesialmente pa e ungínan. Nan ta risibí “e spiritu” komo esnan ku ta ‘spera riba nan adopshon komo yu ora nan ser librá di nan kurpa di karni.’ (Rom. 8:23) Sí, nan lo ta yu di Dios den shelu. Esei ta posibel pasobra nan a batisá komo kristian, i a base di e reskate, Dios a pordoná nan pikánan i a deklará nan hustu komo su yunan spiritual.—Rom. 3:23-26; 4:25; 8:30.

3. Dikon kristiannan ku tin e speransa di biba riba tera mester ta interesá den Romanonan kapítulo 8?

3 Sinembargo, kristiannan ku tin e speransa di biba aki riba tera tambe ta masha interesá den Romanonan kapítulo 8  pasobra Dios, den un sentido, ta konsiderá nan hustu. Nos por komprondé esei for di loke Pablo a skirbi mas promé den su karta. Na kapítulo 4, el a papia tokante Abraham. E hòmber di fe ei a biba promé ku Yehova a duna Israel e Lei i hopi tempu promé ku Hesus a muri pa nos pikánan. Tòg Yehova a tuma nota di Abraham su fe sobresaliente i a konsider’é un hòmber hustu. (Lesa Romanonan 4:20-22.) Den un manera similar, Yehova por mira kristiannan fiel awe ku tin e speransa di biba pa semper riba tera tambe komo hustu. P’esei, nan tambe por benefisiá di e konseho na Romanonan kapítulo 8 ku ta skirbí pa esnan hustu.

4. Romanonan 8:21 mester yuda nos pensa riba ki pregunta?

4 Na Romanonan 8:21, nos ta haña un garantia ku e mundu nobo lo bini sigur. E teksto akí ta primintí ku “kreashon mes tambe lo ser librá di sklabitut na un kurpa ku ta kaba na nada i lo tin e glorioso libertat di e yunan di Dios.” E pregunta ku ta surgi ta si abo lo ta den e mundu nobo. Bo tin e konfiansa ku lo bo haña e rekompensa ei? Romanonan kapítulo 8 ta duna konseho pa yuda nos hañ’é.

“MENTE FIHÁ RIBA KARNI”

5. Ki asuntu serio Pablo tabata papia di dje na Romanonan 8:4-13?

5 Lesa Romanonan 8:4-13. Romanonan kapítulo 8 ta hasi un kontraste entre hende ku ta kana “segun karni” i hende ku ta kana “segun spiritu.” Algun hende ta pensa ku esaki ta un kontraste entre esnan ku ta den e bèrdat i esnan ku no ta den e bèrdat, esta, entre un kristian i un hende ku no ta kristian. Pero, Pablo a skirbi “na tur e stimánan di Dios ku ta biba na Roma, esnan yamá pa ta santu.” (Rom. 1:7) Pues, Pablo tabata hasi un kontraste entre kristiannan ku tabata kana segun karni i kristiannan ku tabata kana segun spiritu. Kiko tabata e diferensia entre nan?

6, 7. (a) Kua ta algun nifikashon di e palabra “karni” den Beibel? (b) Na Romanonan 8:4-13, den ki sentido Pablo a usa e palabra “karni”?

6 Di promé, tuma nota di e palabra “karni.” Na kiko Pablo tabata referí? Beibel ta usa e palabra “karni” den diferente sentido. Tin biaha, e ta referí na e kurpa físiko. (Rom. 2:28; 1 Kor. 15: 39, 50) Ademas, e por referí na famia. Hesus tabata “for di e desendensia di David,” i Pablo a mira e hudiunan komo su “famia segun karni.”—Rom. 1:3; 9:3.

7 Sinembargo, loke Pablo a skirbi na kapítulo 7 ta duna nos un idea kiko e tabata ke men ku e palabra “karni” na Romanonan 8:4-13. El a konektá “biba segun karni” ku e “pashonnan pekaminoso” ku e tempu ayá “tabata obra den [nan] kurpa.” (Rom. 7:5) Esaki ta aklará e nifikashon di e ekspreshon “esnan ku ta biba segun karni,” kendenan segun Pablo tabata “fiha nan mente riba e kosnan di karni.” E tabata referí na hende ku ta laga nan deseo- i inklinashonnan imperfekto dominá nan òf ku ta enfoká riba esakinan so. Ku otro palabra, nan ta hende ku ta laga nan deseo-, impulso- i pashonnan, sea seksual òf di otro tipo, kontrolá nan.

8. Dikon tabata nesesario pa spièrta asta e kristiannan ungí pa no biba “segun karni”?

8 Pero kisas bo ta puntra bo mes dikon Pablo a spièrta e kristiannan ungí enkuanto e peliger di biba “segun karni.” Algu similar por sosodé awe ku kristiannan, kendenan Dios a aseptá komo su amigunan i ta konsiderá nan hustu? Lamentablemente, kualke kristian por kuminsá kana segun e inklinashonnan di e karni pekaminoso. Por ehèmpel, Pablo a skirbi ku algun kristian na Roma tabata “esklabo di nan propio apetit,” loke por tabata apetit pa sèks, kuminda, bibida òf otro kos. Algun di nan tabata “sedusí kurason di hende inosente.” (Rom. 16:17, 18, nota; Flp. 3:18, 19; Hudas 4, 8, 12) Kòrda tambe ku pa un tempu, un ruman hòmber di Korinto tabata “biba ku esposa di su tata.” (1 Kor. 5:1) Pues ta bisto dikon Dios a usa Pablo pa spièrta e kristiannan pa no “fiha nan mente riba e kosnan di karni.”—Rom. 8:5, 6.

9. Na kiko e spièrtamentu di Pablo na Romanonan 8:6 no ta referí?

9 E spièrtamentu ei ta konta pa nos awe tambe. Despues di sirbi Dios pa añanan, un kristian por kuminsá fiha su mente riba e kosnan di karni. Klaru ku nos no ta papiando akí di un kristian ku de bes en kuando ta pensa riba kuminda, trabou, entretenimentu òf asta intimidat seksual. Eseinan ta kosnan normal di bida pa un sirbidó di Dios. Hesus tabata gusta kuminda, i el a alimentá  otro hende. El a mira ku tabata importante pa relahá. I Pablo a skirbi di e debido lugá ku pashon i intimidat seksual tin den matrimonio.

Bo kòmbersashonnan ta mustra ku bo mente ta fihá riba e kosnan di spiritu òf e kosnan di karni? (Wak paragraf 10, 11)

10. Kiko e ekspreshon “fiha nan mente riba” na Romanonan 8:5 i 6 ta nifiká?

10 Kiko Pablo tabata ke men anto ora el a papia tokante ‘fiha mente riba e kosnan di karni’? E palabra griego ku el a usa ta nifiká enfoká tur pensamentu- i plannan riba algu. Básikamente, hende ku ta biba segun karni ta laga nan tendensianan pekaminoso dirigí nan bida. Un eksperto a bisa ku e ekspreshon usá na Romanonan 8:5 ta referí na hende ku ta “fiha nan mente riba tur loke tin di haber ku nan mes deseonan karnal; esei ta loke nan ta interesá aden, loke konstantemente nan ta papia di dje, loke nan ta hasi i loke nan ta disfrutá di dje.”

11. Kiko ta algun kos ku por bira demasiado importante pa nos?

11 Tabata na su lugá pa e kristiannan na Roma saminá nan mes pa wak kiko en realidat tabata nan enfoke den bida. Akaso nan bida tabata drei rònt di “kosnan di karni”? Ta importante pa nos tambe saminá nos mes. Kiko ta interesá nos mas tantu, i rònt di kiko nos kòmbersashonnan sa drei? Kiko nos ta gusta hasi tur dia? Algun hende kisas ta ripará ku nan ta enfoká riba por ehèmpel purba diferente tipo di biña, dekorá kas, buska estilo di paña nobo, hasi invershon, plania fakansi i kosnan por estilo. Riba nan mes, e kosnan ei no ta nada malu; nan por ta kosnan normal di bida. Por ehèmpel, un biaha Hesus a kambia awa na biña, i Pablo a bisa Timoteo pa e bebe “un poko biña.” (1 Tim. 5:23; Huan 2:3-11) Pero biña tabata e kos di mas importante den Hesus i Pablo su bida? Akaso e tabata e kos ku mas nan tabata gusta i loke konstantemente nan tabata papia di dje? Nò. Kiko di nos? Kiko ta nos interes prinsipal den bida?

12, 13. Dikon nos tin ku tene kuidou ku loke nos ta fiha nos mente ariba?

12 Ta masha importante pa nos saminá nos mes. Dikon? Pablo a skirbi: “Mente fihá riba karni ta nifiká morto.” (Rom. 8:6) Esei ta algu serio; e ta nifiká morto spiritual aworakí i, den futuro, morto físiko. Pablo no tabata ke men sí ku ora un hende kuminsá ‘fiha su mente riba e kosnan di karni’ lo e muri sin mas. Hende por kambia. Pensa riba e hòmber inmoral di Korinto ku tabata biba segun “karni” i ku mester a ser ekspulsá for di e kongregashon. El a stòp di biba segun karni i a bolbe sirbi Yehova na e manera korekto.—2 Kor. 2:6-8.

13 Si e hòmber ei por a kambia, awe un kristian tambe por kambia, spesialmente si e no a yega dje leu ei den piká manera e hòmber di Korinto. Klaru ku Pablo su spièrtamentu tokante loke por pasa ku un kristian ku ‘fiha su mente riba e kosnan di karni’ mester motiv’é pa hasi kualke kambio nesesario.

“MENTE FIHÁ RIBA SPIRITU”

14, 15. (a) En bes di ‘fiha nos mente riba e kosnan di karni,’ riba kiko nos tin ku fih’é? (b) Na kiko Pablo no a referí ora el a papia di “mente fihá riba spiritu”?

14 Despues ku Pablo a spièrta kristiannan pa no ‘fiha nan mente riba karni,’ el a duna e siguransa akí: “Mente fihá riba spiritu ta nifiká bida i pas.” Ki un gran rekompensa esei ta! Nos por haña bida i pas! Kon nos por haña e rekompensa akí?

15 “Mente fihá riba spiritu” no ke men ku un hende, na moda di papia, tin ku kana ku kabes den nubia. E no ke men  tampoko ku e tin ku pensa òf papia solamente di tópikonan di Beibel òf di su amor pa Dios i su speransa pa futuro. Kòrda ku Pablo i otro kristiannan den promé siglo ku tabata agradá Dios tabata hiba un bida basta normal. Nan tabata kome i bebe. I hopi di nan tabata kasá i tabatin yu i tabata traha pa kria nan famia.—Mar. 6:3; 1 Tes. 2:9.

16. Aunke Pablo tabata hiba un bida normal, riba kiko e tabata enfoká?

16 Pero e sirbidónan di Dios ei no a laga e kosnan normal di bida bira e kosnan di mas importante pa nan. Beibel ta bisa ku Pablo su fishi tabata di traha tènt, pero mas aleu e ta mustra kiko tabata e kos di mas importante den su bida: e trabou di prediká i siña hende. (Lesa Echonan 18:2-4; 20:20, 21, 34, 35.) I ta eseinan ta e kosnan ku el a animá su rumannan na Roma pa hasi. Sí, Pablo a enfoká riba aktividatnan spiritual. E rumannan na Roma mester a imit’é, i nos tambe mester hasi esei.—Rom. 15:15, 16.

17. Kon nos bida lo ta si nos ‘fiha nos mente riba spiritu’?

17 Si nos sigui enfoká riba aktividatnan spiritual, kiko lo ta e resultado? Romanonan 8:6 ta bisa bon kla: “Mente fihá riba spiritu ta nifiká bida i pas.” Esei ta nifiká ku nos tin ku laga spiritu santu guia nos mente i biba na armonia ku Dios su manera di pensa. Nos por tin sigur ku si nos enfoká riba e “spiritu,” for di awor nos lo tin un bida yen di satisfakshon i propósito. I den futuro nos lo haña bida eterno, sea den shelu òf riba tera.

18. Den ki sentido nos tin pas ora nos ‘fiha nos mente riba spiritu’?

18 Anto kiko Pablo tabata ke men ora el a bisa ku “mente fihá riba spiritu ta nifiká . . . pas”? Miéntras hopi hende ta lucha desesperadamente pa haña pas mental, nos sí ta disfrutá di dje kaba. Debí na esei, nos ta purba di mantené pas ku nos famia i e rumannan di kongregashon. Nos ta realisá ku tantu nos komo nos rumannan ta imperfekto. P’esei, tin biaha por surgi problema. Si esei sosodé, nos a siña ku nos tin ku sigui e siguiente konseho di Hesus: “Hasi pas ku bo ruman.” (Mat. 5:24) Esaki ta bira mas fásil ora nos kòrda ku e otro ruman tambe ta sirbi “e Dios ku ta duna pas.”—Rom. 15:33; 16:20.

19. Ki tipo di pas úniko nos por tin ora nos fiha nos mente riba spiritu?

19 Ademas, tin un otro tipo di pas ku tin aun mas balor. Ora nos ‘fiha nos mente riba spiritu,’ nos ta na pas ku nos Kreador. Isaías a skirbi di algu ku a kumpli den su tempu, pero ku tin un mayor kumplimentu awe. El a bisa: “Lo bo [Yehova] warda den pas perfekto esun ku su pensamentu ta permanesé den bo, pasobra e ta konfia den bo.”—Isa. 26:3; lesa Romanonan 5:1.

20. Dikon bo ta gradisidu pa e konseho na Romanonan kapítulo 8?

20 Pues, sea nos ta ungí ku spiritu òf nos tin e speransa di biba pa semper den paradeis riba tera, nos por ta masha gradisidu pa e konseho inspirá na Romanonan kapítulo 8 pa no laga e “kosnan di karni” bira nos enfoke den bida. Mas bien, nos ta mira ku ta sabí pa biba segun e garantia ku Yehova ta duna nos, esta, ku “mente fihá riba spiritu ta nifiká bida i pas.” Ora nos hasi esei, nos lo haña un rekompensa eterno, pasobra Pablo a bisa: “E salario ku piká ta paga ta morto, ma e regalo ku Dios ta duna ta bida eterno pa medio di Kristu Hesus, nos Señor.”—Rom. 6:23.