Bai na kontenido

Bai na kontenido

Yehova Ta Rekompensá Hende Ku Ta Hasi Esfuerso pa Busk’é

Yehova Ta Rekompensá Hende Ku Ta Hasi Esfuerso pa Busk’é

“Ken ku ta aserká [Dios] mester kere ku e ta eksistí i ku e ta bira Esun ku ta rekompensá esnan ku ta hasi esfuerso pa busk’é.”—HEB. 11:6.

KANTIKA: 85, 134

1, 2. (a) Kon amor i fe ta konektá ku otro? (b) Ki preguntanan nos lo kontestá den e artíkulo akí?

NOS ta stima Yehova “pasobra [el] a stima nos promé.” (1 Huan 4:19) Komo muestra di Yehova su tierno amor, el a tuma inisiativa pa bendishoná su sirbidónan leal. Mas nos ta stima nos Dios, mas fuerte nos fe lo bira, no solamente den e echo ku e ta eksistí, sino tambe den e echo ku semper e ta rekompensá hende ku e ta stima.—Lesa Hebreonan 11:6.

2 Un di e karakterístikanan prinsipal di Yehova i loke e ta hasi ta e echo ku e ta rekompensá su sirbidónan. Si nos no ta konvensí ku Dios ta rekompensá hende ku ta hasi esfuerso pa busk’é, nos fe lo no ta kompleto. Dikon? Pasobra “fe ta e konfiansa firme ku hende tin ku loke nan ta spera ariba lo keda realisá.” (Heb. 11:1) Sí, fe ta enserá ku nos tin tur konfiansa ku Dios lo bendishoná su fiel sirbidónan, manera el a primintí. Ma, kon e speransa di risibí un rekompensa ta benefisiá nos? Kon Yehova a rekompensá su sirbidónan den pasado, i kon e ta hasi esei den nos tempu? Laga nos mira.

 YEHOVA TA PRIMINTÍ DI BENDISHONÁ SU SIRBIDÓNAN

3. Ki promesa nos ta haña na Malakías 3:10?

3 Yehova Dios a komprometé su mes pa rekompensá su fiel sirbidónan, i e ta pidi nos pa hasi esfuerso pa haña su bendishon. Beibel ta bisa: “‘Pone mi na prueba . . . ,’ e SEÑOR di ehérsitonan ta bisa, ‘si mi lo no habri pa boso e bentananan di shelu, i basha asina tantu bendishon, ku boso lo no tin sufisiente lugá pa konten’é.’” (Mal. 3:10) Nos ta mustra gran apresio i gratitut ora nos aseptá Yehova su invitashon generoso.

4. Dikon nos por tin sigur di Hesus su palabranan na Mateo 6:33?

4 Hesus a sigurá su disipelnan ku si nan pone e Reino na promé lugá, Dios lo perkurá pa nan. (Lesa Mateo 6:33.) Hesus tabatin sigur di esei pasobra e sa ku Dios ta fiel na su palabra. (Isa. 55:11) Nos na nos turno por tin sigur ku si nos tin un fe firme den Yehova, lo e kumpli ku su promesa: “Hamas lo mi bandoná bo, i hamas lo mi laga bo desampará.” (Heb. 13:5) Nos por konektá e promesa ei ku loke Hesus a bisa tokante pone e Reino di Dios i su hustisia na promé lugá.

Hesus a bisa ku su disipelnan lo haña rekompensa pa nan sakrifisionan (Wak paragraf 5)

5. Dikon e manera ku Hesus a kontestá Pedro ta fortalesé nos fe?

5 Un biaha apòstel Pedro a puntra Hesus: “Nos a laga tur kos i a sigui bo; kiko realmente nos lo haña?” (Mat. 19:27) En bes di skual Pedro pa e pregunta ei, Hesus a bisa su disipelnan ku nan lo haña rekompensa pa nan sakrifisionan. E fiel apòstelnan i otro kristiannan lo goberná huntu kuné den shelu. Pero for di awor Yehova ta rekompensá nos. Hesus a bisa: “Tur hende ku a bandoná kas, ruman hòmber, ruman muhé, tata, mama, yu òf kunuku pa motibu di mi nòmber lo  haña hopi biaha mas tantu di esakinan, i tambe bida eterno.” (Mat. 19:29) Hesus su disipelnan lo haña bendishon muchu mas grandi ku kualke sakrifisio ku nan por hasi. No ta bèrdat ku tata-, mama-, ruman- i yunan spiritual ta muchu mas balioso ku kualke kos ku nos a laga atras òf sakrifiká pa motibu di e Reino?

“UN ANKER PA NOS ALMA”

6. Dikon Yehova ta primintí di rekompensá su sirbidónan?

6 E promesa di Yehova di rekompensá su sirbidónan ta sostené nan ora nan ta pasa den prueba di integridat. Banda di e bunita bendishonnan spiritual ku nan ta haña for di awor, nan ta spera ansiosamente di risibí bendishonnan mas grandi ainda den futuro. (1 Tim. 4:8) Sí, e echo ku nos ta plenamente konvensí ku Yehova “ta rekompensá esnan ku ta hasi esfuerso pa busk’é” lo yuda nos para firme den fe.—Heb. 11:6.

7. Den ki sentido nos por kompará speransa ku un anker?

7 Den e Sermon Riba Seru Hesus a bisa: “Sea kontentu i bula di alegria, ya ku boso rekompensa den shelu ta grandi, pasobra ta asina nan a persiguí e profetanan promé ku boso.” (Mat. 5:12) Ademas di hende ku lo risibí un rekompensa den shelu, e speransa di biba pa semper den Paradeis riba tera sin duda ta bon motibu pa nos ta “kontentu i bula di alegria.” (Sal. 37:11; Luk. 18:30) Sea kual sea e futuro ku ta warda nos, nos speransa por ta manera “un anker pa nos alma; e ta sigur i tambe firme.” (Heb. 6:17-20) Meskos ku un anker ta wanta un barku stabil durante mal tempu, nos speransa sigur di haña un rekompensa por yuda nos mantené nos stabilidat emoshonal, mental i spiritual. E por duna nos e forsa pa wanta difikultat.

8. Den ki sentido speransa tin poder pa mengua ansiedat?

8 Nos speransa basá riba Beibel tin poder pa mengua e ansiedat ku nos por ta enfrentando. Meskos ku un krema ta suavisá doló di un herida, asina tambe e promesanan di Dios ta kalma nos kurason anshá. Ta un konsuelo pa nos ‘tira nos karga riba Yehova,’ sabiendo ku ‘e lo sostené nos’! (Sal. 55:22) Nos por tin tur konfiansa ku Dios por “hasi infinitamente mas di tur loke nos ta pidi òf por imaginá.” (Efe. 3:20) Figura bo, e no ta djis yuda nos hopi òf hopi mas, ma “infinitamente mas.”

9. Kon nos por tin sigur ku Yehova lo bendishoná nos?

9 Pa nos por risibí e rekompensa akí, nos mester pone tur nos fe den Yehova i obedesé su guia. Moises a bisa e nashon di Israel: “SEÑOR siguramente lo bendishoná bo na e tera ku SEÑOR bo Dios ta duna bo komo herensia pa bo poderá di dje, si solamente bo skucha atentamente na e bos di SEÑOR bo Dios, pa perkurá di kumpli ku henter e mandamentu akí ku mi ta ordená bo awe. Pasobra SEÑOR bo Dios lo bendishoná bo manera el a primintí bo.” (Deu. 15:4-6) Abo tin pleno konfiansa ku Yehova lo bendishoná bo si bo sigui sirbié fielmente? Sin duda, tin bon motibu pa bo tin e konfiansa akí.

YEHOVA A REKOMPENSÁ NAN

10, 11. Kon Yehova a rekompensá Yosef?

10 Yehova a laga skirbi Beibel pa nos benefisio. E ta kontené hopi relato di kon Dios en bèrdat a rekompensá su fiel sirbidónan. (Rom. 15:4) Un ehèmpel sobresaliente di esei ta esun di Yosef. Komo resultado di un kòmplòt di su ruman hòmbernan i despues e traishon di e kasá di su doño, nan a ser’é den un prizòn egipsio. Su Dios a bandon’é? Di ningun  manera! Beibel ta bisa: “SEÑOR tabata ku Yosef i a mustr’é miserikòrdia . . . SEÑOR tabata kuné; i kiko ku e tabata hasi, SEÑOR tabata hasi prosperá.” (Gén. 39:21-23) Aunke Yosef a pasa den tempunan difísil, el a warda ku pasenshi riba su Dios.

11 Algun aña despues, Fárao a libra Yosef, un humilde esklabo, for di prizòn i a hasié e di dos hòmber di mas importante na Egipto. (Gén. 41:1, 37-43) Di e dos yu hòmbernan ku Yosef a haña ku su kasá, el “a duna e primogénito e nòmber Manases,” pasobra e di: “‘Dios a hasi mi lubidá tur mi problemanan i henter kas di mi tata.’ I el a duna esun di dos e nòmber Efraim: ‘Pasobra Dios a hasi mi fruktífero na e tera di mi aflikshon.’” (Gén. 41:51, 52) Komo ku Yosef a keda leal na Dios, Dios a rekompens’é ku e privilegio di konserbá bida di tantu e israelitanan komo e egipsionan. E punto ta ku Yosef a rekonosé ku ta Yehova a rekompens’é i bendishon’é.—Gén. 45:5-9.

12. Kon Hesus a keda fiel bou di prueba?

12 Hesukristu tambe a keda obediente na Dios atraves di vários prueba di su fe, i Dios a rekompens’é pa esei. Kiko a yud’é keda fiel? E Palabra di Dios ta splika: “Pa motibu di e goso ku tabata sper’é, el a soportá morto na un staka di tormento, sin preokupá ku e bèrgwensa ku esei a trese kuné.” (Heb. 12:2) Sin duda, Hesus a haña goso den santifiká e nòmber di Dios. Ademas, komo rekompensa, el a haña aprobashon di su Tata i hopi privilegio maravioso. Beibel ta bisa ku el “a sinta na man drechi di e trono di Dios.” Beibel ta bisa tambe: “Dios a hals’é na un puesto mas haltu i bondadosamente a dun’é e nòmber ku ta riba tur otro nòmber.”—Flp. 2:9.

YEHOVA NO TA LUBIDÁ LOKE NOS TA HASI

13, 14. Kiko Yehova ta pensa di tur loke nos ta hasi p’e?

13 Nos por ta sigur ku Yehova ta apresiá tur nos esfuersonan pa sirbié. E ta komprondé kualke duda òf sintimentu di insiguridat ku nos por tin. Ora problemanan finansiero ta desanimá nos òf ora problema ku salú òf sintimentunan negativo ta limitá loke nos por hasi den su sirbishi, e ta tene kompashon ku nos. I nos por tin pleno konfiansa ku Yehova ta balorá loke su sirbidónan ta hasi pa keda fiel na dje.—Lesa Hebreonan 6:10, 11.

14 Ademas, kòrda ku nos por aserká Esun “ku ta skucha orashon” ku e konfiansa ku lo e skucha nos preokupashonnan. (Sal. 65:2) “E Tata di tierno miserikòrdia i Dios di tur konsuelo” sin falta lo duna nos e sosten emoshonal i spiritual ku nos tin mester, kisas mediante nos rumannan. (2 Kor. 1:3) Anto di otro banda, ora nos mustra kompashon na otro hende, nos ta hasi Yehova su kurason masha kontentu. Beibel ta bisa: “Esun ku tene miserikòrdia di un hende pober ta fia SEÑOR, i e lo pag’é bèk pa su bon obra.” (Pro. 19:17; Mat. 6:3, 4) De echo, ora ku di kurason nos yuda hende ku ta den difikultat, Yehova ta mira nos bon obra komo un fiansa na dje. I e ta primintí ku lo e premia nos muestra di bondat.

REKOMPENSA AWOR I PA SEMPER

15. Ki futuro bendishon bo ta anhelá mas? (Wak e promé plachi.)

15 Loke ta sostené e kristiannan ungí ku spiritu ta nan speransa di haña e “korona di hustisia ku Señor, e hues hustu, lo duna . . . komo rekompensa den e dia di huisio.” (2 Tim. 4:7, 8) Pero si  Dios a duna bo un otro speransa, bo no ta sali pèrdí. Miónes di Hesus su ‘otro karnénan’ ta warda ansiosamente riba nan futuro rekompensa di bida eterno den Paradeis riba tera. Ei nan “lo deleitá nan mes den pas abundante.”—Huan 10:16; Sal. 37:11.

16. Ki konsuelo nos ta haña na 1 Huan 3:19 i 20?

16 Tin biaha, nos por sinti ku nos no ta hasiendo sufisiente den Dios su sirbishi, òf kisas nos ta puntra nos mes si Yehova ta kontentu ku nos esfuersonan. Nos por asta duda si nos ta meresé di haña un rekompensa. Pero nunka lubidá ku “Dios ta mas grandi ku nos kurason i sa tur kos.” (Lesa 1 Huan 3:19, 20.) E ta rekompensá kada kos ku nos ta hasi den su sirbishi sagrado ku ta bini for di un kurason motivá pa fe i amor, maske kon chikitu esei por parse den nos bista.—Mar. 12:41-44.

17. Ki rekompensa nos ta disfrutá di dje for di awor?

17 Yehova ta bendishonando su pueblo asta den e último dianan akí di e mundu malbado di Satanas. E ta sòru pa su fiel sirbidónan disfrutá di un paradeis spiritual kaminda nan ta sigui floresé den sentido spiritual. (Isa. 54:13) Manera Hesus a primintí, Yehova ta rekompensá nos awor ya ku e ta laga nos forma parti di un famia mundial di rumannan ku ta mustra amor na otro. (Mar. 10:29, 30) Ademas, Dios ta rekompensá hende ku ta hasi esfuerso pa busk’é ku pas mental, i nan lo ta satisfecho i felis.—Flp. 4:4-7.

18, 19. Kiko e sirbidónan di Yehova ta pensa di e rekompensanan ku nan ta haña?

18 Sirbidónan di Yehova rònt mundu por papia di e maravioso bendishonnan ku nan ta haña di dje. Por ehèmpel, Bianca di Alemania ta bisa: “Mi no por kaba di gradisí Yehova pa yuda mi dil ku mi preokupashonnan i pa ta na mi lado kada dia ku pasa. E mundu eifó ta kaótiko i skur. Pero segun ku mi ta traha estrechamente ku Yehova, mi ta sinti mi sigur den su brasanan. Pa kada sakrifisio ku mi hasi p’e, e ta duna mi shen biaha mas tantu bendishon.”

19 Un otro ehèmpel ta Paula ku ta biba na Canada. E tin 70 aña di edat i ta sufri hopi di un problema ku lomba ku yama spina bifida. El a bisa: “E echo ku mi no por move fásil no ta nifiká ku mi sirbishi ta limitá.” Anto el a agregá: “Mi ta partisipá den diferente forma di sirbishi, manera prediká via telefòn i di manera informal. Pa mi animá mi mes, semper mi tin un skref kaminda mi ta nota tekstonan di Beibel i pasashinan di nos publikashonnan ku mi por repasá tempu tempu. Mi ta yama e skref ei ‘Skref di Sobrebibensia.’ Ora nos enfoká riba Yehova su promesanan, nos no ta keda hopi tempu desanimá. Yehova semper t’ei pa yuda nos, sea kual sea nos sirkunstansianan.” Kisas bo situashon ta hopi diferente for di esun di Bianca òf Paula. Ma bo tambe lo por kòrda kon Yehova a rekompensá abo i hende rònt di bo den un òf otro manera. Ta bon pa meditá riba kon Yehova ta rekompensá bo awor i kon lo e hasi esei den futuro.

20. Si nos sigui sirbi Yehova ku henter nos alma, ki rekompensa nos por spera di haña?

20 Nunka no lubidá ku ora bo hasi orashon di kurason, Dios lo duna bo un “gran rekompensa pa esei.” Bo por tin sigur ku “despues ku [bo] a hasi e boluntat di Dios, [bo] por risibí kumplimentu di e promesa.” (Heb. 10:35, 36) Pues laga nos sigui fortalesé nos fe i traha ku henter nos alma pa Yehova, ku e pleno konfiansa ku nos lo haña nos debido rekompensa.—Lesa Kolosensenan 3:23, 24.