Bai na kontenido

Bai na kontenido

Sirbi Yehova, e Dios di Libertat

Sirbi Yehova, e Dios di Libertat

“Kaminda e spiritu santu di Yehova ta, ei tin libertat.” —2 KOR. 3:17.

KANTIKA: 49, 73

1, 2. (a) Dikon sklabitut i libertat tabata preokupá e hendenan den tempu di apòstel Pablo? (b) Segun Pablo, ken ta e Fuente di berdadero libertat?

E HABITANTENAN di e Imperio Romano tabata orguyoso di nan leinan, nan sistema hudisial i e libertat ku nan tabatin. Pero, un gran parti di e poder i gloria di e imperio akí tabata debí na trabou duru di e esklabonan. Na dado momento, mas o ménos 30 porshento di e poblashon tabata esklabo. Sin duda, sklabitut i libertat tabata tópikonan ku tabata preokupá hende komun, inkluso e kristiannan.

2 Apòstel Pablo a skirbi hopi tokante libertat. Sinembargo, e meta di su sirbishi no tabata pa trese kambio riba tereno sosial òf polítiko, lokual e hendenan den e tempu ei tabata ke. Mas bien, Pablo i su kompañeronan kristian a traha duru pa siña hende tokante e bon notisia di e Reino di Dios i e balor inkomparabel di e sakrifisio di reskate di Kristu Hesus. El a siña su kompañeronan den fe ken ta e Fuente di berdadero libertat. Por ehèmpel, den su di dos karta na e kristiannan na Korinto, el a bisa klaramente: “Yehova ta un Spiritu; i kaminda e spiritu santu di Yehova ta, ei tin libertat.”—2 Kor. 3:17.

3, 4. (a) Tokante kiko Pablo a papia den e versíkulonan promé ku 2 Korintionan 3:17? (b) Kiko nos mester hasi pa nos por tin e libertat ku ta bini di Yehova?

 3 Mas promé den Pablo su karta na e korintionan, el a papia tokante loke a pasa ku Moises ora el a baha for di Seru Sinaí despues ku e tabata den presensia di un angel di Yehova. Moises su kara tabata bria i el a pone un velo dilanti di su kara pasobra ora e israelitanan a mir’é, nan a haña miedu. (Éks. 34:29, 30, 33; 2 Kor. 3:7, 13) Pablo a splika: “Pero ora un hende kombertí pa adorá Yehova, e velo ta kita for di riba dje.” (2 Kor. 3:16) Kiko e palabranan di Pablo ta nifiká?

4 Manera nos a siña den e artíkulo anterior, Yehova, e Kreador di tur kos, ta e úniko Persona ku tin libertat apsoluto i sin límite. P’esei, ta lógiko ku tin libertat den Yehova su presensia i “kaminda e spiritu santu di Yehova ta.” Sinembargo, pa nos por tin e libertat ei i benefisiá di dje, nos mester “kombertí pa adorá Yehova.” Esei ta nifiká ku nos mester kultivá un relashon será kuné. E israelitanan ku tabata den desierto despues ku Yehova a libra nan for di Egipto no tabata mira kosnan for di Yehova su punto di bista. Tabata komo si fuera nan kurason i mente tabata tapá ku un velo. E úniko kos ku nan tabata ke ta usa nan libertat pa satisfasé nan deseonan.—Heb. 3:8-10.

5. (a) Ki tipo di libertat e spiritu santu di Yehova ta duna nos? (b) Kon nos por sa ku sklabitut literal no ta kita e libertat ku Yehova ta duna? (c) Ki preguntanan nos lo kontestá?

5 Sinembargo, e libertat ku e spiritu santu di Yehova ta trese kuné ta mas ku libertat for di sklabitut literal. E spiritu di Yehova por logra hopi mas ku esfuersonan di hende; e ta libra hende for di sklabitut na piká i morto i for di sklabitut na adorashon falsu i su práktikanan. (Rom. 6:23; 8:2) Ki un libertat maravioso! Asta un persona ku ta esklabo òf será den prizòn por disfrutá di e benefisionan di e libertat ei. (Gén. 39:20-23) Esaki tabata e kaso ku Ruman Harold King, kende pa hopi aña tabata den prizòn pa motibu di su fe. Bo por wak su eksperensia riba JW Broadcasting. (Bai na ENTREVISTA I EKSPERENSIA > NAN A ENFRENTÁ PRUEBA.) Awor, kon nos por demostrá ku nos ta balorá nos libertat? I kon nos por hasi bon uso di nos libertat?

LAGA NOS BALORÁ E LIBERTAT KU DIOS TA DUNA NOS

6. Den ki manera e israelitanan a demostrá falta di apresio pa e libertat ku Yehova a duna nan?

6 Ora un hende duna nos un regalo di gran balor, nos ta gradisié mashá. E israelitanan no a balorá e libertat ku Yehova a duna nan ora el a libra nan for di sklabitut na Egipto. Apénas algun luna despues ku nan a haña libertat, nan a kuminsá anhelá kuminda i kos di bebe ku tabatin na Egipto. Nan tabata keha tokante e manera ku Yehova tabata perkurá pa nan, i nan kier a asta bai Egipto bèk. Figurá bo! Nan a preferá ‘piská, kònkòmber, melon, prei, siboyo i konofló’ riba e libertat di adorá e Dios berdadero, Yehova. Pues, ta ku bon motibu Yehova a rabia ku su pueblo. (Num. 11:5, 6, 10; 14:3, 4) Esei ta siña nos un lès importante.

7. Kon nos por sigui e konseho di Pablo na 2 Korintionan 6:1?

7 Apòstel Pablo a supliká tur kristian pa no hasi mal uso di e libertat ku  Yehova bondadosamente a duna nos mediante su Yu Hesukristu. (Lesa 2 Korintionan 6:1.) Kòrda riba e tristesa i remordimentu di konsenshi ku Pablo tabatin debí ku e tabata esklabo di piká i morto. Sinembargo, el a bisa: “Mi ta gradisí Dios ku lo e hasi esaki pa medio di Hesukristu, nos Señor!” Dikon Pablo a bisa esei? El a splika su kompañeronan kristian: “Pasobra e lei di e spiritu ku ta duna bida na esnan ku ta den union ku Kristu Hesus a libra boso di e lei di piká i di morto.” (Rom. 7:24, 25; 8:2) Siguiendo e ehèmpel di Pablo, nunka nos mester hasi mal uso di e libertat for di sklabitut na piká i morto ku Yehova a duna nos. Mediante e reskate, nos por sirbi Dios ku un konsenshi limpi i ku goso.—Sal. 40:8.

Bo ta usa bo libertat di skohe pa sirbi Yehova òf pa bo propio interes? (Wak paragraf 8-10)

8, 9. (a) Ki spièrtamentu apòstel Pedro a duna tokante uso di libertat? (b) Dikon e spièrtamentu ei ta asta mas importante awe?

8 Ademas di mustra gratitut, nos mester tene kuidou pa nunka nos hasi mal uso di nos libertat di skohe. Apòstel Pedro a spièrta nos pa nos no usa nos libertat komo èksküs pa satisfasé nos deseonan karnal. (Lesa 1 Pedro 2:16.) E spièrtamentu ei no ta laga bo kòrda loke a sosodé ku e israelitanan den desierto? Awe e spièrtamentu ei ta asta mas importante. Dikon? Pasobra Satanas i su mundu ta ofresé kosnan mas i mas atraktivo riba tereno di bistimentu i kuido di nos aparensia, kuminda i kos di bebe, rekreo i entretenimentu i un kantidat di otro kos. Hopi biaha, propagandanan ta presentá hende bunita ku ta purba di konvensé nos pa kumpra artíkulonan ku en realidat nos no tin mester. Pues, ta masha fásil pa nos ser engañá i hasi mal uso di nos libertat.

9 Pedro su konseho ta apliká tambe na aspektonan mas importante di nos bida, manera skol òf trabou. Por ehèmpel, hóbennan na skol ta haña hopi preshon pa sigui enseñansa superior. Algun hende ke laga hóbennan kere ku nan por haña trabou prestigioso i gana hopi plaka si nan kaba enseñansa superior. Hopi biaha, nan ta asta usa estadístikanan ku ta mustra ku un hende ku kaba enseñansa superior ta gana mas plaka ku esun ku kaba skol sekundario so. Tur esaki por ta un gran tentashon pa un hóben ku mester tuma un desishon ku lo tin efekto riba su bida pa semper. Pero kiko e hóbennan i nan mayornan mester kòrda?

10. Kiko nos tin ku tene na mente ora di tuma desishon relashoná ku asuntunan personal?

10 Algun hende kisas ta pensa ku, komo ku asuntunan manera eskoho di skol i trabou ta kosnan personal, nan tin e libertat di skohe loke nan ta haña ta bon tanten ku nan konsenshi ta permití esei. Podisé nan ta pensa riba loke Pablo a bisa e kristiannan na Korinto relashoná ku kuminda: “Pakiko mi mester laga konsenshi di un otro persona husga mi libertat?” (1 Kor. 10:29) Ta bèrdat ku nos tin libertat pa tuma nos mes desishonnan relashoná ku asuntunan manera skol i trabou. Pero, nos mester kòrda ku nos libertat ta relativo i ku tur nos desishonnan tin konsekuensia. Pa e motibu ei, mas promé, Pablo a bisa: “Tur kos ta permití; ma no ta tur kos ta kumbiní. Tur kos ta permití; ma no ta tur kos ta edifiká.” (1 Kor. 10:23) Siguramente esei ta yuda nos komprondé ku ora di tuma desishon, nos tin ku tene kuenta ku algun faktor ku ta muchu mas importante ku nos preferensia personal.

 NOS TA USA NOS LIBERTAT NA UN MANERA SABÍ ORA NOS TA SIRBI YEHOVA

11. Pakiko Yehova a libra nos?

11 Ora Pedro a spièrta nos pa no hasi mal uso di nos libertat, el a bisa tambe ku e mihó manera pa usa nos libertat ta “komo esklabo di Dios.” Pues, e berdadero propósito pakiko Yehova, mediante Hesus, a libra nos for di e lei di piká i morto ta pa nos usa henter nos bida pa sirbi É.

12. Ki ehèmpel Noe i su famia a pone pa nos?

12 E mundu ta purba di konvensé nos pa hasi mal uso di nos libertat i bolbe bira esklabo di dje. E mihó manera ku nos por protehá nos mes ta di usa nos tempu i energia pa sirbi Yehova plenamente. (Gal. 5:16) Tuma por ehèmpel, e patriarka Noe i su famia. Nan tabata biba den un mundu violento i inmoral. Apesar di esei, nan no a enbolbé nan mes den loke e hendenan rònt di nan tabata hasi. Kon nan a logra esei? Nan a skohe pa okupá nan mes ku e trabou ku Yehova a duna nan: nan a konstruí e arka, warda kuminda pa nan mes i e bestianan i prediká na otro hende. Beibel ta bisa: “Asina Noe a hasi; konforme tur loke Dios a orden’é, el a hasi.” (Gén. 6:22) Kiko tabata e resultado? Noe i su famia a sobrebibí e fin di e mundu ei.—Heb. 11:7.

13. Ki trabou Yehova a duna nos?

13 Ki trabou Yehova a duna nos awe? Komo disipel di Hesus, nos sa ku Dios a manda nos prediká. (Lesa Lukas 4:18, 19.) Lamentablemente, e dios di e sistema di kosnan akí a siega mayoria di hende. Nan no ta mira ku nan ta esklabo di religion falsu, di kosnan material i di e sistema polítiko. (2 Kor. 4:4) Nos tin e privilegio di sigui Hesus su ehèmpel i yuda hende siña konosé Yehova, e Dios di libertat, i ador’é. (Mat. 28:19, 20) Esei no ta un trabou fásil, e tin su  retonan kuné. Den algun pais, hende ta birando mas indiferente i algun di nan ta asta oponé nos. Un pregunta ku kada un di nos mester hasi nos mes ta: ‘Mi por usa mi libertat pa apoyá e trabou di Reino mas ainda?’

14, 15. Kiko hopi ruman a disidí di hasi? (Wak e promé plachi.)

14 Ta animante pa mira kon hopi ruman ta konsiente ku e fin ta serka. Nan a simplifiká nan bida pa nan por drenta sirbishi di tempu kompleto. (1 Kor. 9:19, 23) Algun di nan ta sirbi den nan mes teritorio, miéntras otronan ta bai sirbi kaminda tin mester di mas predikadó di Reino. Sifranan ta mustra ku den e último sinku añanan mas ku 250.000 a bira pionero regular. Awor tin mas ku 1.100.000 ruman den sirbishi di tempu kompleto. Ta bunita pa mira kon nos rumannan ta hasi bon uso di nan libertat pa sirbi Yehova.—Sal. 110:3.

15 Kiko a yuda e rumannan akí usa nan libertat na un manera sabí? Tuma komo ehèmpel, John ku Judith, kendenan durante e último 30 añanan a sirbi na vários pais. Nan ta kòrda ku tempu ku e Skol di Sirbishi di Pionero a kuminsá na 1977, nos organisashon tabata animá e rumannan pa bai sirbi kaminda tabatin mester di mas predikadó di Reino. John a bisa ku pa nan por a keda enfoká riba e meta ei, el a kambia di trabou vários biaha pa asina mantené un bida simpel. Despues di tempu, nan a muda bai un otro pais. Einan, nan a enfrentá difikultatnan manera un idioma nobo, kultura nobo i klima severo. Pero semper nan a hasi orashon na Yehova i dependé riba dje. Ki efekto e añanan di sirbishi akí tabatin riba nan? John a bisa: “Mi a sinti ku mi tabata kompletamente enbolbí den e mihó aktividat ku mi a yega di konosé. Yehova a bira mas real pa mi, manera un tata yen di amor. Awor mi a komprondé mihó kiko ke men ‘hala serka Dios, i lo e hala serka boso,’ manera Santiago 4:8 ta bisa. Mi sa ku mi a haña loke mi tabata buska, esta, un bida felis i ku propósito.”

16. Kon hopi ruman a usa nan libertat na un manera sabí?

16 Distinto for di John ku Judith, sirkunstansia di algun ruman ta permití nan sirbi fultaim pa solamente un periodo kòrtiku. Apesar di esei, hopi di nan ta probechá di e oportunidat pa traha komo boluntario den proyektonan di konstrukshon rònt mundu. Por ehèmpel, tempu ku tabata konstruí sede mundial na Warwick, New York, mas o ménos 27.000 ruman a ofresé nan mes pa yuda. Algun a bai yuda pa dos siman, pa algun luna, pa ún aña òf asta mas. Hopi di nan a hasi sakrifisio pa nan por a bai sirbi einan. Esta un maravioso ehèmpel di rumannan ku ta usa nan libertat pa alabá i onra Yehova, e Dios di libertat.

17. Ki bendishonnan nos lo haña si nos usa nos libertat na un manera sabí?

17 Nos ta kontentu ku nos a siña konosé Yehova i ku nos por tin e libertat ku adorashon berdadero ta trese kuné. Laga nos demostrá mediante nos desishonnan ku nos ta balorá e libertat ei. En bes di hasi mal uso di nos libertat, laga nos us’é pa nos por sirbi Yehova lo mihó posibel. Ora nos hasi asina, nos lo disfrutá di e bendishonnan ku Yehova a primintí ora e palabranan di e siguiente profesia kumpli: “Kreashon mes tambe lo ser librá di sklabitut na un kurpa ku ta kaba na nada i lo tin e glorioso libertat di e yunan di Dios.”—Rom. 8:21.