Dikon no ta permití pa pone publikashon di Testigunan di Yehova riba website personal ni riba retnan sosial?

Komo ku nos organisashon ta ofresé publikashon basá riba Beibel grátis, algun hende ta pensa ku nan ta liber pa kopia i pone e publikashonnan akí riba otro website òf riba retnan sosial. Pero, esei ta violá e Kondishonnan di Uso * di nos websitenan i ta kousa problemanan serio pa nos. Manera e Kondishonnan ta mustra bon kla, niun hende no ta permití pa pone plachi òf potrèt, publikashon elektróniko, marka registrá, grabashon di oudio, vidio òf artíkulonan di nos website riba Internet (loke ta inkluí kualke website, website di kompartí fail òf ret sosial). Dikon e prohibishon akí ta nesesario?

Tur nos publikashonnan tin derecho di outor. No ta permití pa pone nan riba otro website

Tur informashon riba nos websitenan tin derecho di outor. Hende apóstata i otronan ku ta oponé nos ta purba di usa nos publikashonnan riba nan websitenan pa atraé Testigunan di Yehova i otro hende. E meta di e websitenan ei ta pa lanta duda den mente di e lektornan. (Sal. 26:4; Pro. 22:5) Tin hende ta usa informashon di nos publikashonnan òf e logo di jw.org den propaganda, riba produktonan ku ta na benta i riba nan aplikashonnan pa telefòn òf tablet. Pa protehá nos derecho di outor i marka registrá, nos organisashon tin e base legal pa prevení mal uso di informashon di nos website. (Pro. 27:12) Pero, si konsientemente nos organisashon ta permití hende, aunke ta nos rumannan, pone nos publikashonnan digital riba otro website òf usa e logo di jw.org pa bende merkansia, esei por pone ku korte lo no apoyá nos esfuersonan pa stòp opositornan òf empresanan komersial di hasi esei.

 Nos por ta den peliger si nos ta download nos publikashonnan for di otro website ku no ta jw.org. Ta “e esklabo fiel i prudente” so Yehova ta konfia ku e responsabilidat di suministrá kuminda spiritual.” (Mat. 24:45) I pa distribuí kuminda spiritual, e “esklabo” ta usa su websitenan ofisial so. Nan ta: www.jw.org, tv.jw.org i wol.jw.org. Ademas, e úniko tres aplikashonnan pa telefòn i tablet ku nos tin ta: JW Language®, JW Library® i JW Library Sign Language®. Nos por tin konfiansa ku e websitenan i aplikashonnan akí no tin niun propaganda riba nan i ku nan no ta kontaminá pa e mundu di Satanas. Si nos download kuminda spiritual for di otro fuente, nos no tin niun garantia ku e no a ser kambiá na un manera malisioso òf pèrvèrso.—Sal. 18:26; 19:8.

Ademas, ora nos pone nos publikashonnan riba websitenan ku ta permití hende duna komentario, nos ta habri kaminda pa hende apóstata i otro krítikonan lanta deskonfiansa den e organisashon di Yehova. Algun ruman ta partisipá den debatenan online, i di e manera ei, nan ta trese mas reproche riba e nòmber di Yehova. Un foro online no ta e lugá apropiá pa “instruí hende rebelde ku suavedat.” (2 Tim. 2:23-25; 1 Tim. 6:3-5) Ademas, nos a ripará ku riba retnan sosial i websitenan froudulento tin profile na nòmber di nos organisashon, di Kuerpo Gobernante i di su miembronan. Pero, niun miembro di Kuerpo Gobernante no tin un website personal ni nan no ta riba niun ret sosial.

Ora nos dirigí hende na nos website jw.org, nos ta yuda plama e “bon notisia.” (Mat. 24:14) E websitenan i aplikashonnan ku nos ta usa den sirbishi ta birando mas i mas mihó. Nos ke pa tur hende benefisiá di nan. P’esei, manera e Kondishonnan di Uso ta indiká, nos por manda ehemplar elektróniko di un publikashon pa un hende via e-mail òf manda un link p’e ku ta hib’é na informashon ku tin riba jw.org. Ora nos dirigí hende interesá na nos websitenan, nos ta yuda nan drenta den kontakto ku e úniko berdadero fuente di kuminda spiritual, esta, “e esklabo fiel i prudente.”

^ par. 1 Te abou na e página inisial riba jw.org bo por haña e link ku ta hiba bo na e Kondishonnan di Uso. I e restrikshonnan akí ta apliká na tur loke ta disponibel riba nos websitenan.