“Pasobra e pueblo a ofresé su mes boluntariamente, bendishoná SEÑOR!”—HUES. 5:2.

KANTIKA: 84, 75

1, 2. (a) Kiko Elifaz i Bildad a insinuá tokante e manera ku Yehova ta mira nos sirbishi na dje? (b) Kon Yehova a laga sa kiko e ta pensa?

ELIFAZ a puntra: “Un hende yen di vigor por ta útil pa Dios? Òf un hende sabí por ta útil pa su mes? Ki probecho esei lo duna e Todopoderoso, ku bo ta hustu, òf ki ganashi, ku bo ta hasi bo kamindanan perfekto?” (Yòb 22:1-3) Bo a yega di hasi bo mes e tipo di preguntanan ei? Ora Elifaz e temanita a hasi Yòb e preguntanan ei, sin duda Elifaz a pensa ku e kontesta ta “nò.” Su amigu, Bildad e suhita, a asta bisa ku no ta posibel pa un hende tin un posishon hustu dilanti di Dios.—Lesa Yòb 25:4.

2 E konsoladónan falsu akí a insinuá ku nos esfuerso pa sirbi Yehova fielmente no ta di ningun probecho p’e i ku nos balor den bista di Dios no ta nada mas ku di un mòt òf un bichi. (Yòb 4:19; 25:6) Na promé bista, nos por pensa ku Elifaz i Bildad tabata hòmbernan humilde. (Yòb 22:29) Al fin i al kabo, for di tòp di un seru haltu òf for di un bentana di avion, e aktividatnan di hende por parse insignifikante. Ma ta asina Yehova ta mira tur loke nos ta hasi pa e Reino ora e wak nos for di shelu? Yehova a laga sa kiko e ta pensa ora el a skual Elifaz, Bildad i Sofar pa a lanta mentira ma a mustra ku e tabata kontentu ku Yòb ora el  a referí na dje komo “mi sirbidó.” (Yòb 42:7, 8) Pues, sin duda un hende “por ta útil pa Dios.”

“KIKO BO TA DUN’É?”

3. Kiko Eliú a bisa tokante nos esfuerso pa sirbi Yehova, i kiko Eliú tabata ke men ku esaki?

3 Yehova no a korigí Eliú ora el a puntra: “Si bo ta hustu, kiko bo ta dun’é [Dios]? Òf kiko e ta risibí for di bo man?” (Yòb 35:7) Akaso Eliú tabata bisando ku nos esfuerso pa sirbi Dios ta inútil? Nò. Loke e kier a bisa ta ku Yehova no ta dependé di nos adorashon na dje. Yehova ta un ser kompleto; nos no por hasié mas riku ni mas fuerte. Al kontrario, ta Dios a duna nos e kualidatnan, talentonan òf poder ku nos tin, i e ta tuma nota di kon nos ta usa nan.

4. Ku kiko Yehova ta kompará e bon obranan ku nos ta hasi pa nos rumannan?

4 Ora nos ta mustra amor leal na nos rumannan, Yehova ta konsiderá ku ta pa e mes nos ta hasi esei. Proverbionan 19:17 ta bisa: “Esun ku tene miserikòrdia di un hende pober [òf, “humilde,” NW] ta fia SEÑOR, i e lo pag’é bèk pa su bon obra.” Akaso e teksto akí ke laga nos komprondé ku Yehova ta tuma nota di tur echo di bondat ku nos ta mustra na hende di kondishon humilde? Nos tin ku konkluí ku e Kreador di universo ta konsiderá ku e tin un debe ku simpel ser humano kende ta hasi obranan di miserikòrdia i ku e ta mira e obranan akí komo fiansa ku e tin ku paga bèk ku fabor i bendishon? Sí, i e propio Yu di Dios a konfirmá esei.—Lesa Lukas 14:13, 14.

5. Ki preguntanan nos lo konsiderá den e artíkulo akí?

5 Yehova a invitá profeta Isaías pa papia den su nòmber i revelá e goso ku E tin ora su fiel sirbidónan ta partisipá den kumplimentu di Su propósito. Gustosamente Isaías a aseptá e invitashon ei i mesora a bisa: “At’ami aki! Manda ami!” (Isa. 6:8-10) Meskos ku Isaías, awe míles di sirbidó di Yehova ta demostrá e mesun spiritu ei ora nan aseptá asignashonnan ku por ta difísil den Yehova su sirbishi. Pero kisas bo ta rasoná: ‘Di bèrdat ta importá kiko ami ta hasi personalmente? Klaru ku mi ta masha gradisidu ku Yehova ta permití mi traha komo boluntario i partisipá den su sirbishi, pero e no tin mester di mi, tòg? E mes lo no hasi tur loke ta nesesario pa kumpli ku su Palabra sin importá kiko ami hasi den su sirbishi?’ Ban wak kon e susesonan ku a tuma lugá den e tempu di Débora i Barak ta kontestá e preguntanan akí.

MIEDU A PARALISÁ NAN, PERO DIOS A DUNA NAN KURASHI

6. Ki diferensia tabatin entre e israelitanan i e ehérsito di Jabin?

6 E rei kananeo Jabin a “oprimí” e israelitanan severamente pa 20 aña largu. E pueblo tabatin asta miedu pa hende mira nan den públiko. For di un punto di bista militar, nan no tabata bon ekipá ya ku nan no tabatin arma pa ataká ni armadura pa protehá nan mes, miéntras ku nan enemigunan sí tabatin 900 garoshi. *Hues. 4:1-3, 13; 5:6-8.

7, 8. (a) Ki instrukshon inisial Yehova a duna Barak? (b) Kon Israel a derotá e ehérsito di Jabin? (Wak e promé plachi.)

7 Sinembargo, mediante e profetisa, Débora, Yehova a bisa Barak presis kiko pa hasi: “Marcha bai Seru Tabor, i hiba huntu ku bo dies mil hòmber di e yu hòmbernan di Nèftalí i di e yu hòmbernan di Zabulon. I lo mi hasi Sísara, komandante di e ehérsito di Jabin, bini serka bo na Riu Kison ku  su garoshinan i su trupanan, i lo mi entreg’é den bo man.”—Hues. 4:4-7.

8 Notisia a plama tur kaminda. E boluntarionan a reuní na Seru Tabor. Mesora Barak a sigui Yehova su instrukshonnan. (Lesa Huesnan 4:14-16.) Durante e bataya prinsipal na Taanak, diripiente un pal’i áwaseru a kai i e region a keda tur na lodo. Barak a persiguí e ehérsito di Sísara pa 24 kilometer i a yega te na Haroset. Na un dado momento riba kaminda, Sísara a bandoná su garoshi temibel pero ku awor tabata inútil i a kore bai Zaanaim, kisas serka di Kedes. El a bai buska refugio den e tènt di Jael, esposa di Heber e keneo, i Jael a risibié gustosamente. Komo ku e tabata morto kansá di e bataya, el a pega soño. Awor Sísara su bida tabata den man di Jael, kende sin pensa dos biaha a mata Sísara. (Hues. 4:17-21) E enemigu di Israel a ser derotá. *

DIFERENSIA GRANDI DEN AKTITUT

9. Ki detaye Huesnan 5:20 i 21 ta duna relashoná ku e bataya kontra Sísara?

9 Pa nos por komprondé e susesonan mas mihó, nos mester studia Huesnan kapítulo 4 i 5 huntu, pasobra kada kapítulo ta revelá detaye ku e otro no ta menshoná. Por ehèmpel, Huesnan 5:20 i 21 ta relatá: “For di shelu e streanan tabata bringa, for di nan kurso nan tabata bringa kontra Sísara. Riu Kison a lastra nan bai kuné.” Akaso esaki ta nifiká ku ta angel a yuda e israelitanan òf ku ta un tipo di yobida di meteorit tabatin? E relato no ta duna detaye. Pero kiko otro, aparte di Dios, por a manda un áwaseru torensial asina, presis na e lugá i momento eksakto, ku a pone 900 garoshi di guera keda pegá den lodo? Tres biaha Huesnan 4:14 i 15 ta indiká ku ta Yehova a gana e bataya. Niun di e 10.000 israelitanan ku a ofresé nan mes komo boluntario no por a tuma e mérito pa esei.

10, 11. Kiko “Meros” tabata, i dikon Yehova a maldishon’é?

10 Ta interesante pa nota ku den e kantika di viktoria di Débora i Barak den kua nan ta alabá Yehova pa su hazaña milagroso, nan a kanta: “‘Maldishoná Meros,’ e angel di SEÑOR tabata bisa, ‘Maldishoná su habitantenan kompletamente; pasobra nan no a bini na yudansa di SEÑOR, na yudansa di SEÑOR kontra e guereronan.’”—Hues. 5:23.

11 Aparentemente, e maldishon riba Meros tabata asina pisá ku nos no por bisa sigur unda e lugá akí tabata keda. Podisé e tabata un stat di kua su habitantenan a nenga di aseptá e yamada pa bai sirbi komo boluntario den e bataya? Si e stat tabata riba e ruta di huida di Sísara, akaso su habitantenan a haña chèns di stòp e pero nan no a probechá di esei? Kon por ta posibel ku nan no a tende di e yamada di Yehova pa sirbi komo boluntario? Dies mil hende di e region a reuní pa bringa den e bataya. Imaginá bo kon e habitantenan di Meros a mira e guerero kruel i desesperá ei kore pasa den nan kayanan su so. Esei lo tabata nèt un bon chèns pa yuda den e kumplimentu di e propósito di Yehova i risibí su bendishon. Akaso nan a pèrdè interes nèt na e momento krusial ei ora nan a haña oportunidat pa skohe entre hasi algu òf keda sin hasi nada? Ki un kontraste grandi esei tabata ku e kurashi ku Jael a demostrá.—Hues. 5:24-27.

12. Ki diferensia den aktitut di hende Huesnan 5:9 i 10 ta trese padilanti, i ki lès nos awe por siña for di esei?

12 Na Huesnan 5:9 i 10 nos ta mira ki kontraste mas tabatin entre e aktitut di e hendenan ku a yuda Barak den e bataya i e aktitut di esnan ku no a yud’é. Débora i Barak  a elogiá “e komandantenan di Israel, e boluntarionan meimei di e pueblo.” Nan tabata masha diferente for di e hendenan ku tabata “kore riba buriku blanku,” esta, ku tabata muchu orguyoso pa partisipá, i esnan ku tabata “sinta riba tapeit kostoso,” esta, ku tabata gusta un bida di luho. Kontrario na e hendenan ku tabata “biaha riba kaminda,” esta, ku a preferá un bida mas fásil, esnan ku a bai ku Barak tabata dispuesto pa bringa riba e barika di seru yen di baranka di Seru Tabor i den e vaye di Kison ku tabata yen di muras. Na tur e hendenan ku tabata hiba un bida di plaser a ser bisá: “Pensa riba esaki [NW].” Sí, nan mester a meditá riba e oportunidat ku nan a pèrdè pa yuda e propósito di Yehova kumpli. Awe tambe, ken ku ta vasilá pa sirbi Yehova kompletamente mester saminá nan mes.

13. Ki diferensia tabatin entre e aktitut di e tribunan di Ruben, Dan i Aser i esun di e tribunan di Zabulon i Nèftalí?

13 Esnan ku a ofresé nan mes boluntariamente a mira ku nan mes wowo kon Yehova ta defendé su soberania. Awor nan tabatin algu konkreto pa konta ora nan tabata papia tokante “e echonan hustu di SEÑOR.” (Hues. 5:11) Di otro banda, manera Huesnan 5:15-17 ta mustra, e tribunan di Ruben, Dan i Aser a duna mas atenshon na nan mes interesnan material, esta, nan tounan, barkunan i wafnan, ku na loke Yehova tabata hasiendo. Na kontraste, e tribunan di Zabulon i Nèftalí a “riska [nan] bida te na morto” pa apoyá Débora i Barak. (Hues. 5:18) E kontraste akí di aktitut pa ku sirbishi boluntario ta siña nos un lès importante.

ALABÁ YEHOVA!

14. Kon nos ta apoyá Yehova su soberania awe?

14 Awe, nos no ta haña un yamada pa bai bringa den un guera literal, pero nos tin e privilegio sí pa prediká ku zelo i kurashi. Awe, e nesesidat pa rumannan sirbi komo boluntario den Yehova su organisashon ta mas grandi ku nunka promé. Miónes di ruman hòmber, muhé i hóben ta ofresé nan mes komo boluntario pa traha komo  pionero, pa sirbi na Bètel, pa yuda den konstrukshon di Salòn di Reino i pa yuda na asamblea i kongreso. Ademas, pensa riba e ansianonan ku tin responsabilidatnan grandi den Komiténan di Kontakto ku Hospital i den organisá kongresonan. Sea sigur ku Yehova ta apresiá bo deseo di yuda, i lo e no lubidá loke bo ta hasi p’e.—Heb. 6:10.

Promé ku bo tuma un desishon, pensa ki efekto esaki lo por tin riba bo famia òf riba e kongregashon (Wak paragraf 15)

15. Ki preguntanan por yuda nos determiná si nos no ta birando indiferente pa ku e trabou di Yehova?

15 Ta bon pa kada un di nos puntra nos mes: ‘Mi ta laga otro hende hasi gran parti di e trabou? Mi ta pone muchu énfasis riba kosnan material, strobando mi asina di duna mas pa Yehova? Meskos ku Barak, Débora, Jael i e 10.000 boluntarionan, mi tin e fe i kurashi pa usa loke mi tin na mi disposishon pa kumpli ku e mandato kla di Yehova? Si mi tin pensá di muda bai un otro stat òf pais pa mi por ta mihó pará finansieramente, mi ta pidi Dios yuda mi analisá ki efekto esaki lo por tin riba mi famia i riba e kongregashon?’ *

16. Kiko nos por duna Yehova ku e no tin kaba?

16 Yehova ta duna nos e onor di laga nos apoyá su soberania. Ya ku Diabel a gaña hende pa nan apoyá su soberania rival, ora nos tuma parti pa Yehova su gobernashon, nos ta manda un mensahe masha kla pa Satanas. Ora nos laga nos fe i integridat motivá nos pa sirbi komo boluntario, nos ta agradá Yehova. (Pro. 23:15, 16) E ta usa e apoyo leal ku bo ta dun’é pa kontestá e reproche di Satanas. (Pro. 27:11) Pues, ora bo obedesé Yehova lealmente, den un sentido bo ta dunand’e algu ku e ta konsiderá presioso, i e ta haña un goso profundo den esaki.

17. Kiko Huesnan 5:31 ta indiká pa futuro?

17 Pronto tera lo ta yen di hende ku ta preferá Yehova su soberania riba kualke otro. Nos ta anhelá mashá pa e dia ei yega pa kaba! Nos ta sinti meskos ku Débora i Barak, kendenan a kanta: “Laga tur bo enemigunan peresé, o SEÑOR; ma laga esnan ku ta stim’é ta manera solo ku ta sali den tur su forsa.” (Hues. 5:31) E petishon akí lo haña un kontesta ora Yehova pone fin na e mundu malbado di Satanas! Ora e guera di Armagedon kuminsá, lo no tin mester di hende pa sirbi komo boluntario pa kaba ku e enemigu. E ora ei nos lo mester ‘para mira e salbashon di’ Yehova. (2 Kró. 20:17) Turesten, tin hopi oportunidat pa nos apoyá e propósito di Yehova ku kurashi i zelo.

18. Ki efekto bo disposishon pa sirbi komo boluntario tin riba hende ku ta benefisiá di esaki?

18 Huesnan 5:1 i 2 ta bisa en parte: “Pasobra e pueblo a ofresé su mes boluntariamente, bendishoná SEÑOR [òf, “alabá Yehova,” NW]!” Pues, Débora i Barak a kuminsá nan kantika di viktoria ku alabansa, no na hende, sino na e Dios Haltísimo. Di igual manera awe, laga bo disposishon pa sirbi komo boluntario motivá otro hende ku ta benefisiá di e spiritu akí alabá Yehova!

^ par. 6 E garoshinan akí tabatin kuchú skèrpi i largu, tin biaha den forma di kurva, ku tabata pegá na as di e wilnan. Ken lo por a tribi di yega serka di un garoshi di guera spantoso asina?

^ par. 8 Pa mas detaye tokante e relato emoshonante akí, wak e artíkulo “‘Mi A Lanta Komo un Mama pa Israel’” den E Toren di Vigilansia di 1 di ougùstùs 2015.

^ par. 15 Wak e artíkulo “Ansiedat pa Motibu di Problema Finansiero” den E Toren di Vigilansia di 1 di yüli 2015.