Bai na kontenido

Bai na kontenido

Keda Neutral den un Mundu Dividí

Keda Neutral den un Mundu Dividí

“Duna . . . Dios loke ta di Dios.”—MAT. 22:21.

KANTIKA: 33,  137

1. Kon nos por obedesé tantu Dios komo gobièrnu humano?

E PALABRA DI DIOS ta bisa ku nos tin ku obedesé gobièrnunan humano. Pero, tambe e ta siña nos ku nos tin ku obedesé Dios en bes di hende. (Echo. 5:29; Tito 3:1) Akaso Beibel ta kontradisí su mes? Niun ora so! E prinsipio di sumishon relativo na outoridat gubernamental ta yuda nos komprondé i obedesé e mandamentunan ei. Hesus a resumí e prinsipio ei ora el a bisa: “Duna Sésar loke ta di Sésar, ma Dios loke ta di Dios.” [1] (Mat. 22:21) Kon nos ta sigui e guia ei di Hesus? Nos ta someté nos mes na outoridat di e gobièrnu kaminda nos ta biba ora nos ta obedesé su leinan, respetá su funshonarionan i paga belasting. (Rom. 13:7) Pero si gobièrnu manda nos desobedesé Dios, na un manera respetuoso nos ta nenga di obedesé.

2. Kon nos ta mustra ku nos no ta partisipá den asuntunan polítiko di mundu?

2 Un manera ku nos ta duna Dios loke e tin derecho riba dje ta ora nos keda neutral den asuntunan polítiko di mundu. (Isa. 2:4) Pues, nos no ta bai kontra gobièrnunan humano ya ku ta Yehova ta permití nan eksistí, ni nos no ta apoyá aktividatnan patriótiko òf nashonalista. (Rom. 13:1, 2) Tampoko nos no ta purba di influensiá polítikonan, bai vota,  bai riba lista di partido òf purba di trese kambio den gobernashon.

3. Dikon nos tin ku keda neutral?

3 Beibel ta duna vários motibu pakiko Dios ke pa nos keda neutral. Pa di promé, asina nos ta sigui e siñansanan i ehèmpel di su Yu, Hesukristu. Meskos kuné, nos “no ta parti di mundu,” pues nos no ta partisipá den polítika ni apoyá guera. (Huan 6:15; 17:16) Ademas, pa nos por ta súpditonan leal di e Reino di Dios, nos tin ku keda neutral. Sino kon nos lo por keda ku un konsenshi limpi i prediká e bon notisia ku ta e Reino di Dios so por solushoná e problemanan di humanidat? Por último, nos no ke ta manera religion falsu ku ta mete den polítika i asina ta separá su miembronan. Pa motibu ku nos sí ta keda neutral, nos ta uní ku nos rumannan rònt mundu.—1 Ped. 2:17.

4. (a) Kon nos por sa ku lo bira mas difísil pa keda neutral? (b) Dikon ta awor nos tin ku prepará nos mes pa keda neutral?

4 Kisas nos ta biba den un pais kaminda e situashon polítiko ta basta trankil i gobièrnu ta tolerá adorashon berdadero. Sinembargo, segun ku e sistema di Satanas ta yega su fin, nos por ferwagt ku por bira mas difísil pa keda neutral. Mundu ta yen di hende “kabesura” ku “no ta dispuesto pa sera ningun akuerdo,” pues nos por ferwagt ku nan lo bira mas i mas dividí. (2 Tim. 3:3, 4) Den algun pais, nos rumannan ya kaba a enfrentá e reto di keda neutral debí na e situashon polítiko ku ta kambia masha lihé. Bo ta mira pakiko ta awor nos tin ku fortalesé nos determinashon pa keda neutral? Si nos warda te ora nos haña nos den un situashon difísil, nos lo por haña nos ta sede i komprometé nos posishon. Pues kon nos por prepará nos mes pa keda neutral den un mundu dividí? Ban konsiderá kuater manera ku por yuda nos logra esei.

MIRA GOBIÈRNU HUMANO MANERA YEHOVA TA MIRA NAN

5. Kiko Yehova ta pensa di gobièrnu humano?

5 E promé manera pa keda neutral ta di mira sistemanan polítiko manera Yehova ta mira nan. Aunke algun gobièrnu por parse hustu, nunka no tabata e propósito di Yehova pa hende goberná otro hende. (Yer. 10:23) Gobièrnu di hende ta promové nashonalismo, ku ta dividí e famia humano. Ni e mihó lidernan humano no ta kapas pa solushoná tur problema. Fuera di esei, desde 1914, gobièrnunan humano a bira enemigu di e Reino di Dios, ku pronto lo ehekutá huisio kontra e nashonnan i destruí nan.—Lesa Salmo 2:2, 7-9.

6. Kon nos mester atendé ku hende ku tin outoridat den gobièrnu?

6 Dios ta permití e sistema polítiko di e mundu akí eksistí pasobra e ta trese un grado di stabilidat ku, na su turno, ta yuda nos prediká e bon notisia di e Reino. (Rom. 13:3, 4) Dios ta asta pidi nos pa resa pa esnan ku tin un puesto di outoridat, spesialmente ora nan tin ku tuma desishon ku por stroba nos di sirbi Dios libremente. (1 Tim. 2:1, 2) Meskos ku apòstel Pablo, nos ta apelá na outoridatnan gubernamental pa nos haña un trato hustu. (Echo. 25:11) Apesar ku Beibel ta bisa ku ta Dios su atversario, Satanas, tin outoridat riba e sistema polítiko, e no ta bisa ku ta Satanas ta kontrolá direktamente kada lider òf funshonario. (Luk. 4:5, 6) P’esei, nos tin ku evitá di insinuá ku ta Diabel ta kontrolá un sierto funshonario. Tampoko nos no ta ‘papia malu’ ku outoridatnan di gobièrnu  ora nos tin ku atendé ku nan.—Tito 3:1, 2.

7. Ki manera di pensa nos mester evitá?

7 Nos ta obedesé Dios i no ta faboresé ningun kandidato òf partido polítiko, sea nan ta parse di ta na nos fabor òf kontra nos. Relashoná ku esaki, kon nos posishon neutral por ser poné na prueba? Suponé ku un movementu popular ta purba di kore ku un gobièrnu ku ta oprimí e pueblo i ku ta pone sirbidónan di Dios tambe sufri. Aunke nos lo no bai marcha ku e manifestantenan, nos ta apoyá nan den nos kurason? (Efe. 2:2) Nos mester keda neutral, no solamente ku palabra i akshon, sino tambe den nos kurason.

SEA “KOUTELOSO” I TÒG “INOSENTE”

8. Ora ta difísil pa keda neutral, kon nos por ta “kouteloso” i tòg “inosente”?

8 Un di dos manera pa keda neutral ta di ser “kouteloso manera kolebra i tòg inosente manera palomba” ora nos haña nos den situashon difísil. (Lesa Mateo 10:16, 17.) Nos ta kouteloso ora nos ta rekonosé e peligernan for di trempan, i nos ta keda inosente ora nos no ta laga nan pone nos sukumbí. Ban konsiderá algun situashon ku nos por haña nos aden i kon nos por keda neutral.

9. Ku kiko nos tin ku tene kuidou ora nos ta papia ku otro hende?

9 Den kòmbersashon. Nos mester ta kouteloso ora hende papia tokante polítika. Por ehèmpel, ora nos ta papia tokante e mensahe di Reino, evitá di elogiá òf kritiká e ideanan di un partido òf lider polítiko. Purba di papia tokante un tópiko ku boso tin en komun i enfoká riba e problema fundamental en bes di papia tokante un posibel solushon polítiko. Despues, mustra e persona den Beibel kon e gobièrnu di Dios lo solushoná e problema kompletamente i na un manera permanente. Si tópikonan delikado manera matrimonio di mesun sekso òf aborto presentá, defendé e normanan di Dios i splika kon nos ta apliká nan den nos bida. Durante e kòmbersashon, keda kompletamente neutral riba e aspekto polítiko di e tópikonan ei. Nos no ta duna opinion tokante kua leinan mester pasa, anulá òf kambia, i nos no ta purba di konvensé otro hende pa bai di akuerdo ku nos.

10. Kon nos por hasi sigur pa no laga medionan di komunikashon influensiá nos?

10 Medionan di komunikashon. Hopi biaha, un “notisia” ta ser presentá na un manera ku ta faboresé un opinion riba un otro. Den algun pais, ta gobièrnu ta kontrolá medionan di komunikashon. Den e paisnan ei, hopi biaha notisia ta ser presentá den un forma ku ta faboresé e gobièrnu abiertamente. Ma asta den paisnan kaminda tin mas libertat di ekspreshon, kristiannan mester tene kuidou pa no bai tras di e ideanan di sierto periodista. Puntra bo mes: ‘Mi ta gusta skucha un sierto periodista pasobra mi ta di akuerdo ku su opinionnan polítiko?’ Si ta asina, lo ta mihó pa bo skucha di un fuente ku ta mas ophetivo. En todo kaso, lo ta sabí pa evitá di skucha i lesa informashon ku ta promové sierto ideanan polítiko. Ademas, ta bon pa kompará loke bo ta tende ku “e patronchi di palabra sano” ku tin den Beibel.—2 Tim. 1:13.

11. Dikon lo ta difísil pa keda neutral ora nos pertenensianan ta muchu importante pa nos?

11 Materialismo. Si nos pertenensianan ta pegá na nos kurason, ora nos haña nos ku prueba, ta bira mas difísil pa keda neutral. Ruth, na Malawi, a mira esei  pasa ku vários Testigu ora nan a ser persiguí den añanan ’70. E ta kòrda: “Nan no por a bandoná nan bida kómodo. Algun a bai den eksilio ku nos, pero mas despues nan a djòin e partido polítiko i a bai kas bèk pasobra nan no por a soportá di hiba un bida inkómodo den un kampo di refugiado.” Na kontraste, e gran mayoria di sirbidó di Dios sí a keda neutral apesar di problema ekonómiko òf asta ora nan a pèrdè tur loke nan tabatin.—Heb. 10:34.

12, 13. (a) Kiko Yehova ta pensa di hende? (b) Kon nos por sa si nos ta birando demasiado orguyoso di nos pais?

12 Orguyo inkorekto. Hopi biaha hende ta gaba nan rasa, tribu, kultura, stat òf nashon. Pero si nos bira muchu orguyoso di nos rasa, kultura òf nashon, nos ta bayendo kontra di Yehova su punto di bista di gobièrnu di mundu i di e famia humano. Klaru ku Dios no ta ferwagt ku nos ta bira lomba pa nos kultura. De echo, diferensia di kultura ta mustra kuantu variedat tin den e famia humano. Pero nos mester kòrda ku pa Dios tur hende ta igual.—Rom. 10:12.

13 En realidat, un hende ku ta demasiado orguyoso di su pais ta manifestando nashonalismo, i ya e no ta neutral mas. Kristiannan no ta imün pa e tipo di orguyo ei; asta algun kristian di e kongregashon di promé siglo a diskriminá nan rumannan debí na nan nashonalidat. (Echo. 6:1) Kon nos por sa si e orguyo akí a saka rais den nos kurason? Suponé ku un ruman di un otro pais ta duna bo un sugerensia. Lo bo rechas’é mesora i pensa: ‘Aki nos ta hasi esei mihó’? Na lugá di esei, nos tur mester apliká e siguiente konseho inspirá: “Ku humildat, konsiderá ku otro hende ta superior na boso.”—Flp. 2:3.

YEHOVA LO FORTALESÉ BO

14. Kon orashon por yuda nos, i ki ehèmpel bíbliko ta proba esaki?

14 Un di tres manera pa keda neutral ta di pidi Yehova pa forsa. Pidié pa spiritu santu, loke por duna bo pasenshi i dominio propio, kualidatnan ku bo tin mester di dje pa trata ku un gobièrnu ku por ta korupto òf inhustu. Tambe bo por pidi Yehova p’e duna bo sabiduria pa bo ripará ki situashonnan por pone bo posishon neutral komo kristian na peliger i kon pa trata ku esakinan. (Sant. 1:5) Si bo ta den prizòn òf a haña un ke otro kastigu debí na bo determinashon pa para firme pa adorashon berdadero, pidi Yehova pa e duna bo forsa pa bo defendé bo fe ku kurashi i wanta kualke persekushon ku por presentá.—Lesa Echonan 4:27-31.

15. Kon Beibel por yuda nos keda neutral? (Wak tambe e kuadro “E Palabra di Dios A Hasi Nan Konvikshon Mas Firme.”)

15 Yehova por fortalesé nos mediante su Palabra. Meditá riba tekstonan ku lo yuda bo keda neutral bou di prueba. Graba nan den bo mente pa nan por sostené bo si un dia bo no por tin un Beibel. Ademas, e Palabra di Dios por hasi bo speransa den e futuro bendishonnan di e Reino mas fuerte. Sin e speransa akí ta bira difísil pa wanta persekushon. (Rom. 8:25) Skohe algun pasashi di Beibel ku ta deskribí e bendishonnan ku abo lo ke mira kumpli i imaginá kon bo ta disfrutá di e bendishonnan ei den Paradeis.

SIÑA FOR DI SIRBIDÓNAN DI DIOS KU A MANTENÉ NAN INTEGRIDAT

16, 17. Kiko nos por siña for di ehèmpel di fiel sirbidónan di Dios ku a keda neutral? (Wak e promé plachi.)

16 Un di kuater manera pa keda neutral ta di pensa riba ehèmpel di fiel sirbidónan di Yehova ku a mantené nan integridat.  Nan ehèmpel por duna nos e sabiduria i forsa pa perseverá. Por ehèmpel, Sadrak, Mesak i Abed-nego a nenga di adorá un imágen ku a representá e gobièrnu di Babilonia. (Lesa Daniel 3:16-18.) Awe, ora Testigunan lesa tokante e determinashon di e hóbennan akí, nan ta haña e kurashi pa nenga di saludá bandera di e nashon kaminda nan ta biba. Hesus tambe a keda kompletamente neutral den konfliktonan sosial i polítiko di mundu. Ya ku e tabata sa ki efekto su ehèmpel por tin riba otro hende, el a urgi su disipelnan: “Tene kurashi! Mi a vense mundu.”—Huan 16:33.

17 Hopi Testigu den tempu moderno a keda neutral. Tin di nan a sufri maltrato físiko, kai será i a asta muri pa motibu di nan fe. Nan ehèmpel por yuda nos meskos ku esaki a yuda Barış, di Turkia, kende a bisa: “Franz Reiter tabata un Testigu yòn ku a ser ehekutá pasobra el a nenga di djòin e ehérsito di Hitler. E karta ku el a skirbi pa su mama e anochi promé ku el a muri a mustra kuantu fe i konfiansa e tabatin den Yehova, i mi ke sigui su ehèmpel si akaso mi mester enfrentá un prueba asina.” [2]

18, 19. (a) Kon e miembronan di bo kongregashon por yuda bo keda neutral? (b) Kiko bo ta determiná pa hasi?

18 Tambe bo por haña sosten di e rumannan di bo kongregashon. Si na e momento akí bo ta enfrentá un situashon ku ta pone bo posishon neutral na prueba, laga e ansianonan sa esei i pidi nan konseho bíbliko. Otro miembronan di e kongregashon tambe lo animá bo si nan sa di e pruebanan ku bo ta enfrentando. Pidi nan hasi orashon pa bo. Klaru ku si bo ke pa e rumannan sostené bo i resa pa bo, bo tambe tin ku hasi meskos. (Mat. 7:12) E artíkulo riba jw.org “Testigos de Jehová presos por sus creencias (por países)” (na spañó) bou di PRENSA > ASUNTOS LEGALES por yuda bo ser spesífiko den bo orashonnan. E ta kontené un lista di Testigu ku na e momentonan akí ta enkarselá pa motibu di nan fe. Skohe algun nòmber i hasi orashon pa nan por mantené nan integridat ku kurashi.—Efe. 6:19, 20.

19 Segun ku gobièrnunan humano ta yega na nan fin, nos lo no mester keda straño si nan bira kada bes ménos dispuesto pa aseptá ku nos ta keda leal na Yehova i su Reino. Pues, ta awor nos tin ku fortalesé nos determinashon pa keda neutral den un mundu dividí.

^ [1] (paragraf 1) Aki Hesus a usa Sésar, e gobernante humano di mas haltu den e tempu ei, komo símbolo di outoridat sivil òf estado.

^ [2] (paragraf 17) Wak Testigunan di Yehova—Proklamadónan di e Reino di Dios (na spañó), pág. 662, i e kuadro “El A Muri pa e Onor di Dios” na pág. 150 di e buki E Reino di Dios Ta Goberná!