Bai na kontenido

Bai na kontenido

 NOS BIDA KRISTIAN

Tene e Normanan Moral di Yehova na Haltu

Tene e Normanan Moral di Yehova na Haltu

Yehova Dios a pone norma moral pa hende. Por ehèmpel, el a stipulá ku matrimonio ta un union permanente entre un hòmber i un muhé. (Mat 19:4-6, 9) Yehova no ta aseptá niun sorto di inmoralidat seksual. (1Ko 6:9, 10) El a asta pone prinsipionan enkuanto nos aparensia i manera di bisti pa asina nos por ta diferente for di otro hende.—Deu 22:5; 1Ti 2:9, 10.

Awendia, hopi hende ta rechasá e normanan di Yehova. (Rom 1:18-32) Nan ta bisti, kuida nan aparensia i komportá nan mes di akuerdo ku opinion popular. Hopi di nan ta orguyoso di nan kondukta inmoral i ta kritiká hende ku ta biba segun normanan diferente for di esnan di nan.—1Pe 4:3, 4.

Komo Testigu di Yehova, ku kurashi nos mester defendé e normanan moral di Yehova. (Rom 12:9) Ku takto i rèspèt, nos mester laga hende komprondé loke ta agradabel den Dios su bista. Pero nos tambe tin ku biba segun Dios su normanan haltu. Por ehèmpel, nos por puntra nos mes: ‘Mi manera di bisti ta reflehá e normanan di Yehova òf esnan di mundu? Mi aparensia ta mustra ku mi ta un sirbidó di Dios?’ Ademas, ora di skohe ki programa òf pelíkula pa wak, nos por puntra nos mes: ‘Yehova ta haña e programa òf pelíkula akí bon? Ken su normanan moral e programa òf pelíkula akí ta promové? Loke mi ta skohe pa entretené mi mes kuné por debilitá mi defensa moral? (Sl 101:3) E por pone mi famia òf otro hende trompeká?’—1Ko 10:31-33.

Dikon ta importante pa nos kumpli ku e normanan moral di Yehova? Djis akí, Kristu Hesus lo destruí e nashonnan i tur maldat. (Eze 9:4-7) Ta hende ku ta hasi e boluntat di Dios so lo keda na bida. (1Hu 2:15-17) P’esei, laga nos sigui tene e normanan moral di Yehova na haltu pa asina hende por mira nos bon kondukta i duna gloria na Dios.—1Pe 2:11, 12.

Kiko mi paña i mi aparensia ta bisa tokante mi kreensianan?

DESPUES DI WAK E VIDIO BIRA AMIGU DI YEHOVA: ÚN HÒMBER, ÚN MUHÉ, KONTESTÁ E SIGUIENTE PREGUNTANAN:

  • Dikon ta sabí pa biba segun e normanan di Yehova?

  • Dikon mayornan mester siña nan yunan e normanan moral di Yehova for di chikitu?

  • Kon nos tur, asta mucha, por yuda otro hende benefisiá di e bondat di Dios?