Bo ta haña ku tin biaha ta difísil pa bo prediká? Bo no ta e úniko; mayoria di nos sa sinti asina. Kisas ta pasobra den nos teritorio konstantemente nos ta haña nos ku hende ku ta indiferente òf ku tin mal manera. Òf kisas nos tin miedu di kuminsá un kòmbersashon ku hende ku nos no konosé. Tur e kosnan akí por kita nos goso. Pero, nos ta sirbi un Dios felis ku ke pa nos sirbié ku goso. (Sl 100:2; 1Ti 1:11) Kiko ta algun di e motibunan di nos goso den sirbishi? At’akí tres motibu:

Promé, nos ta prediká un mensahe ku ta duna speransa. Aunke tiki tiki hende ta pèrdiendo speransa, nos por yena nan kurason ku “bon notisia di algu mihó.” (Isa 52:7NW) Ademas, e bon notisia di e Reino di Dios por yena nos mes ku goso. Promé ku bo bai prediká, tuma un par di minüt pa meditá riba e bendishonnan ku e Reino di Dios lo trese na tera.

Di dos, e bon notisia ku nos ta prediká ta benefisiá hende tantu den sentido físiko komo spiritual. E ta yuda hende stòp ku nan mal hábitonan i ta duna nan e posibilidat di biba pa semper. (Isa 48:17, 18; Rom 1:16) Nos por kompará e trabou di prediká ku e trabou di salba bida. Maske algun hende no ke ser reskatá, nos no ta stòp di buska hende ku sí ke salba nan bida.—Mat 10:11-14.

E di tres motibu, i esun di mas importante, ta ku nos trabou di prediká ta duna onor na Yehova. Yehova ta balorá nos obra di prediká mashá. (Isa 43:10; Heb 6:10) E ta kontentu pa duna nos su spiritu santu pa kumpli ku e asignashon akí. P’esei, roga Yehova pa duna nos goso, loke ta un aspekto di e fruta di spiritu santu. (Gal 5:22) Ku su yudansa, nos por vense nos miedu i prediká ku kurashi. (Ech 4:31) E ora ei, sin importá kon hende den nos teritorio reakshoná, nos lo tin goso den nos trabou di prediká.—Eze 3:3.

Ki aktitut bo ke tin den sirbishi? Kon bo por demostrá bo goso?

DESPUES DI WAK E VIDIO MI A BOLBE HAÑA GOSO DEN MI SIRBISHI NA YEHOVA, KONTESTÁ E SIGUIENTE PREGUNTANAN:

  • Dikon ta masha importante pa nos alimentá nos mes bon den sentido spiritual maske nos ta dediká hopi ora tur luna den sirbishi?

  • Kon nos por imitá Maria?

  • Ki ora bo ta tuma tempu pa meditá riba e Palabra di Dios?

  • Kiko ta duna bo mas goso ora bo ta prediká?