Bai na kontenido

Instrukshon pa e Reunion Nos Bida i Sirbishi Kristian

Instrukshon pa e Reunion Nos Bida i Sirbishi Kristian

Kontenido

 

Paragraf

Introdukshon

 2

Tesoronan di e Palabra di Dios

 3

Sea Diligente den Sirbishi

 4

Nos Bida Kristian

 5

Konklushon

 6

Dediká Bo Mes na Lesamentu i na Dunamentu di Siñansa

 7

Konseho

 8

Tempu

 9

Bishita di Superintendente di Sirkuito

 10

Siman di Asamblea òf Kongreso

 11

Siman di Memorial

 12

Superintendente di e Reunion Nos Bida i Sirbishi Kristian

 13

Presidente di e Reunion Nos Bida i Sirbishi Kristian

 14

Koordinadó di e Kuerpo di Ansiano

 15

Konsehero Asistente

 16

Sala Adishonal

 17

Vidio

 18

1. E reunion Nos Bida i Sirbishi Kristian lo bai manera ta deskribí den Nos Bida i Sirbishi Kristian—Material i Tarea pa Reunion i segun e instrukshonnan ku ta sigui aki bou. Animá tur publikadó pa pone nan mes disponibel pa hasi e asignashonnan di studiante. Otro personanan ku ta asosiá regularmente ku e kongregashon tambe por partisipá si nan ta di akuerdo ku e siñansanan di Beibel i si nan ta biba na armonia ku prinsipio bíbliko.​—be pág. 282.

 2. Introdukshon: 3 minüt òf ménos. Despues di e kantika i orashon di apertura, e presidente di e reunion Nos Bida i Sirbishi Kristian mester krea ekspektativa pa e programa. Ademas, e tin ku resaltá e pregunta for di e Blachi di Kontesta pa e Reunion Nos Bida i Sirbishi Kristian.

 3. Tesoronan di e Palabra di Dios:

  • Diskurso: 10 minüt. Den Material i Tarea pa Reunion, bo ta haña e tema di e diskurso i un boskeho ku dos òf tres punto prinsipal. Asigná e parti akí na un ansiano òf sirbidó ministerial kualifiká. Den e siman ku mester kuminsá lesa un buki di Beibel nobo, lo pasa un vidio pa introdusí e buki akí. E oradó por trata algun punto ku ta konektá e vidio ku e tema. Pero, e mester hasi sigur ku e ta trata e puntonan ku tin den Material i Tarea pa Reunion. Ademas, si tempu ta permití, e mester usa e plachinan i e puntonan bíbliko ya ku esakinan a ser prepará pa komplementá e informashon ku mester trata.

  • Buska Hoyanan Spiritual: 8 minüt. E parti akí ta konsistí di pregunta i kontesta. No mester duna un introdukshon òf un konklushon. Asigná e parti akí na un ansiano òf  sirbidó ministerial kualifiká. E oradó por parti e tempu den e kuater preguntanan segun loke ta mas aplikabel pa e kongregashon. Pero e mester hasi e presentenan tur e preguntanan. Ademas, e mester disidí si lo lesa tur e versíkulonan menshoná den e promé dos preguntanan. Kontesta di e presentenan mester ta 30 sekònde òf ménos.

  • Lesamentu di Beibel: 4 minüt òf ménos. Un ruman hòmber mester haña e asignashon akí. E studiante mester lesa e material asigná sin duna un introdukshon òf konklushon. E presidente di e reunion lo yuda e studiantenan pa nan por lesa na un manera natural, komprendibel, vlòt, eksakto, ku énfasis ku ta komuniká sentido, ku bon modulashon i pousa adekuá.

  4. Sea Diligente den Sirbishi: 15 minüt òf ménos. A prepará e sekshon akí pa duna tur studiante oportunidat pa entrená nan mes pa sirbishi i pa mehorá nan abilidat di prediká i di siña hende. E studiantenan ku tin e asignashon di e promé kòmbersashon i di e rebishita mester usa e informashon di e ehèmpel di presentashon pa sirbishi ku tin na página 1 di nos Material i Tarea pa Reunion. E publikadónan por disidí si nan ta ofresé un publikashon òf mustra un vidio for di nos Hèrmèntnan pa Siña Hende e Bèrdat (Teaching Toolbox). Den Material i Tarea pa Reunion tin spesifiká kuantu minüt kada asignashon di studiante tin ku dura i, de bes en kuando, lo duna instrukshon adishonal. E studiantenan no mester agregá mas informashon djis pa kumpli ku e tempu asigná. Demostrashonnan bon prepará por kaba un minüt òf mas promé ku e tempu asigná. Si tin mester, un ansiano tambe por haña asignashon di studiante.

  • Vidio di Ehèmpel di Presentashon pa Sirbishi: Durante vários siman tras di otro lo pasa un vidio ku ta duna un ehèmpel di presentashon pa sirbishi. E vidionan akí lo mustra e promé kòmbersashon, e promé rebishita i e di dos rebishita. E presidente di e reunion Nos Bida i Sirbishi Kristian lo hasi e parti akí.

  • Promé Kòmbersashon: Duna e asignashon akí na un ruman hòmber òf ruman muhé. E ayudante mester ta di mesun sekso òf un miembro di famia. E studiante i su ayudante por hasi e parti akí sea sintá òf pará. E studiante mester usa un introdukshon ku ta pas den nan teritorio. E studiante mester usa e ehèmpel di presentashon pa sirbishi komo base pa su presentashon.

  • Promé Rebishita: Duna e asignashon akí na un ruman hòmber òf ruman muhé. E ayudante no mester ta di e sekso opuesto. (km 5/97 pág. 2) E studiante i su ayudante por hasi e parti akí sea sintá òf pará. E studiante ta demostrá kon e ta rebishitá un hende ku a mustra interes na e promé kòmbersashon. E studiante mester usa e ehèmpel di presentashon pa sirbishi ku tin den Material i Tarea pa Reunion komo base pa su presentashon.

  • Di Dos Rebishita: Duna e asignashon akí na un ruman hòmber òf ruman muhé. E ayudante no mester ta di e sekso opuesto. (km 5/97 pág. 2) E studiante i su ayudante por hasi e parti akí sea sintá òf pará. E studiante ta demostrá kon e ta rebishitá un hende ku a mustra interes na e promé rebishita. E studiante mester usa e ehèmpel di presentashon pa sirbishi komo base pa su presentashon.

  • Estudio di Beibel: Duna e asignashon akí na un ruman hòmber òf ruman muhé. E ayudante no mester ta di e sekso opuesto. (km 5/97 pág. 2) E studiante i su ayudante por hasi e parti akí sea sintá òf pará. Mester demostrá un sekshon di estudio ku ya a kuminsá. No tin nodi di hasi un introdukshon òf un konklushon a ménos ku esei ta e lès ku e studiante tin ku traha ariba. No tin nodi tampoko di lesa na bos haltu henter e material asigná, aunke por hasi esei sí. Mester desplegá bon kapasidat di siña hende.

  •   Diskurso: Duna e asignashon akí na un ruman hòmber i e mester dun’é den forma di diskurso na e kongregashon.

  5. Nos Bida Kristian: Despues di e kantika, e siguiente 15 minütnan di e sekshon akí lo tin un òf dos parti ku lo yuda e presentenan apliká loke nan ta siña for di e Palabra di Dios. A ménos ku tin otro instrukshon, asigná e partinan akí na ansiano òf sirbidó ministerial kualifiká, ku eksepshon di e nesesidat di kongregashon ku ta na enkargo di un ansiano.

  • Estudio di Beibel di Kongregashon: 30 minüt. Asigná e parti akí na un ansiano kualifiká. (Un kongregashon ku no tin sufisiente ansiano por asigná un sirbidó ministerial kualifiká.) E kuerpo di ansiano ta determiná ken ta esnan kualifiká pa dirigí e Estudio di Beibel di Kongregashon. Esnan ku a ser aprobá mester dirigí e estudio di tal forma ku nan ta keda den e tempu asigná. Nan mester enfatisá e tekstonan klave i yuda tur e presentenan komprondé e balor práktiko di e informashon. Nan por haña guia práktiko repasando artíkulonan ku ta trata kon pa dirigí un estudio di E Toren di Vigilansia. Si ta posibel, ta bon pa tur siman usa diferente ruman pa dirigí i lesa. Si e presidente di e reunion Nos Bida i Sirbishi Kristian bisa ku mester hasi e estudio di Beibel di Kongregashon mas kòrtiku, e ruman ku ta dirigí e estudio lo disidí kon lo e hasi esei. Kisas e por skohe pa keda sin lesa algun paragraf.

  6. Konklushon: 3 minüt òf ménos. E presidente di e reunion Nos Bida i Sirbishi Kristian lo resumí algun punto di e reunion, inkluso e pregunta i kontesta for di e Blachi di Kontesta pa e Reunion Nos Bida i Sirbishi Kristian. Ademas, e mester duna un kuadro general di e material di e siguiente siman, kisas menshonando un pregunta ku lo ser kontestá. E por menshoná nòmber di e studiantenan ku tin parti e siguiente siman. A ménos ku tin otro instrukshon, si ta nesesario, e presidente por hasi anunsio i lesa karta durante su konklushon. No mester anunsiá e areglonan pa sirbishi i di limpiesa. Mas bien mester pone esakinan riba e bòrchi di informashon. Si e presidente no por hasi anunsio ni lesa niun karta denter di e 3 minütnan di konklushon, e por pidi e rumannan ku tin parti den e sekshon Nos Bida Kristian pa nan hasi nan parti mas kòrtiku. (Wak  paragraf 5 9.) E reunion ta kaba ku kantika i orashon.

 7. Dediká Bo Mes na Lesamentu i na Dunamentu di Siñansa: Kuminsando ku e siman di 7 di yanüari 2019, e presidente di e reunion Nos Bida i Sirbishi Kristian mester usa e foyeto Dunamentu di Siñansa komo base pa duna elogio i konseho. Kada studiante lo traha riba e lès ku ta aparesé tras di e asignashon den Material i Tarea pa Reunion. Durante e promé siman di kada luna e presidente di e reunion Nos Bida i Sirbishi Kristian lo analisá huntu ku e presentenan un lès for di e foyeto Dunamentu di Siñansa. E sekshon “Marka Bo Progreso” ku tin den e foyeto ta pa e studiante usa i no pa e presidente marka aden.

  8. Konseho: Despues ku kada studiante duna nan parti, e presidente di e reunion Nos Bida i Sirbishi Kristian tin mas o ménos un minüt pa duna elogio i tambe konseho basá riba e foyeto Dunamentu di Siñansa. Ora e presidente introdusí un parti di un studiante, e no mester menshoná e lès ku e studiante tin ku traha ariba. Sinembargo, ora e studiante kaba ku su parti, i despues ku e presidente bis’é algun palabra di elogio, e presidente lo menshoná e lès ku e studiante mester a traha ariba. Ademas, lo e splika dikon e studiante a apliká e lès bon òf mustra na un manera amabel dikon e studiante mester paga mas tinu riba esaki. E presidente por duna komentario tambe riba algun punto ku el a haña interesante relashoná ku e demostrashon i ku e ta haña ku lo benefisiá e studiante òf e presentenan. Den privá, despues di reunion òf na un otro momento, e presidente por duna e studiante konseho adishonal útil basá riba e foyeto  Dunamentu di Siñansa òf e buki Skol di Ministerio, sea relashoná ku e lès asigná òf un otro lès.​—Pa mas informashon tokante e ròl di e superintendente di e reunion Nos Bida i Sirbishi Kristian i e ròl di e konsehero asistente, wak  paragraf 13 16.

    9. Tempu: Ningun di e partinan, ni e komentarionan di e presidente di e reunion Nos Bida i Sirbishi Kristian, no mag di bai overtaim. Ora un studiante pasa e tempu stipulá, mester stòp e diskretamente. Si e otro partinan di e reunion bai overtaim, e konsehero asistente mester duna e rumannan ku a bai overtaim konseho den privá. Durashon di henter e reunion, inkluso kantika i orashon, mester ta un ora i 45 minüt.

 10. Bishita di Superintendente di Sirkuito: Ora e kongregashon tin bishita di e superintendente di sirkuito, e programa ta sigui manera ta deskribí den Material i Tarea pa Reunion ku eksepshon di lo siguiente: Lo remplasá e parti di Estudio di Beibel di Kongregashon bou di e sekshon Nos Bida Kristian ku un diskurso di 30 minüt duná pa e superintendente di sirkuito. Promé ku e diskurso akí, e presidente di e reunion Nos Bida i Sirbishi Kristian lo duna un resúmen di e programa i loke lo siña e siguiente siman i, si ta nesesario, e ta duna algun anunsio i lesa karta. Kaba, e ta introdusí e superintendente di sirkuito. Despues di e diskurso, e superintendente di sirkuito lo konkluí e reunion ku un kantika ku e mes a skohe. Durante e bishita di e superintendente di sirkuito, lo no tene parti den e salanan adishonal. Un grupo di idioma estranhero por tene nan reunion normal ora e kongregashon anfitrion tin bishita di e superintendente di sirkuito. Sinembargo, ora e superintendente di sirkuito ta bai duna su diskurso, e grupo di idioma estranhero mester uni ku e kongregashon anfitrion.

 11. Siman di Asamblea òf Kongreso: Durante e siman di asamblea òf kongreso, lo no tin reunion di kongregashon. E rumannan mester studia e informashon di e siman ei individualmente òf komo famia.

 12. Siman di Memorial: Ora Memorial ta kai den siman, lo no tin e reunion Nos Bida i Sirbishi Kristian. Ta klaru ku riba dia di Memorial lo tene e reunion pa sirbishi di vèlt.

  13. Superintendente di e Reunion Nos Bida i Sirbishi Kristian: E kuerpo di ansiano lo skohe un ansiano ku lo bira e superintendente pa e reunion Nos Bida i Sirbishi Kristian. E tin ku sòru pa e reunion akí ta bon organisá i ta kana di akuerdo ku e instrukshonnan akí. E mester tin bon komunikashon ku e konsehero asistente. Asina ku Material i Tarea pa Reunion di un luna bira disponibel, e superintendente di e reunion Nos Bida i Sirbishi Kristian mester traha e asignashonnan di studiante di e luna ei. (Wak  paragraf 4.) Kada studiante ku tin parti mester haña e formulario Asignashon pa e Reunion Nos Bida i Sirbishi Kristian (S-89) por lo ménos tres siman promé ku e fecha di su parti.

 14. Presidente di e Reunion Nos Bida i Sirbishi Kristian: Tur siman, un ansiano mester fungi komo presidente di e reunion Nos Bida i Sirbishi Kristian. (E kongregashonnan ku no tin sufisiente ansiano por asigná un sirbidó ministerial kualifiká.) E presidente mester introdusí i konkluí e reunion. Ademas, e mester analisá e vidio di ehèmpel di presentashon pa sirbishi i tambe e vidionan ku ta introdusí un lès nobo di e foyeto Dunamentu di Siñansa. Aparte di introdusí tur e partinan, e mes por duna mas parti, dependiendo di e kantidat di ansiano ku tin den e kongregashon. E komentarionan entre e partinan mester ta breve. E kuerpo di ansiano lo disidí kua ta e ansianonan ku ta kualifiká pa fungi komo presidente. Periódikamente, e ansianonan akí lo haña e tarea pa sirbi komo presidente. Dependiendo di e situashon di e kongregashon,  por sosodé ku e superintendente di e reunion Nos Bida i Sirbishi Kristian ta fungi mas tantu biaha komo presidente ku e otro ansianonan. Si un ansiano ta kualifiká pa dirigí e Estudio di Beibel di Kongregashon, muy probablemente e ta kualifiká tambe pa ta presidente. Sinembargo, kòrda ku e ansiano ku ta presidente mester ta un persona ku ta duna konseho práktiko ku kariño i elogiá e studiantenan. Ademas, e ta responsabel pa e reunion kaba na tempu. (Wak  paragraf 6 9.) Si e presidente ta deseá i si tin sufisiente espasio, por pone un mikrofon mas riba plataforma asina ku e por introdusí kada parti miéntras e ruman hòmber ku tin e parti ta bai para na e stènt di oradó. E presidente por opta tambe pa sinta na un mesa riba plataforma durante e parti Lesamentu di Beibel i durante e sekshon Sea Diligente den Sirbishi. Esaki por spar tempu.

 15. Koordinadó di e Kuerpo di Ansiano: E koordinadó di e kuerpo di ansiano ta asigná tur parti pa e reunion ku eksepshon di e partinan di studiante. E tin ku asigná tambe e presidente di tur siman; e ta skohe un di e ansianonan ku e kuerpo di ansiano a aprobá. Den kooperashon ku e superintendente di e reunion Nos Bida i Sirbishi Kristian, e koordinadó lo sòru pa e programa ku tur e asignashonnan di henter e reunion ta pegá na bòrchi di informashon.

  16. Konsehero Asistente: Pa e tarea akí, ta bon pa skohe un ansiano ku tin eksperensia den duna diskurso. Si ta nesesario, e konsehero asistente ta duna konseho den privá na e ansiano- òf sirbidónan ministerial ku ta duna parti den e reunion Nos Bida i Sirbishi Kristian, ta duna diskurso públiko, ta dirigí e Estudio di E Toren di Vigilansia òf Estudio di Beibel di Kongregashon òf ta lesa na e reunionnan akí. (Wak  paragraf 9.) Si den kongregashon tin vários ansiano ku ta oradó i maestro kapas, lo por asigná kada aña un otro ansiano kualifiká pa sirbi komo konsehero asistente. No ta nesesario pa e konsehero asistente duna konseho despues di kada asignashon di un ansiano òf sirbidó ministerial.

 17. Sala Adishonal: Dependé di e kantidat di studiante, e kongregashon por opta pa usa sala adishonal. Kada sala adishonal mester tin un konsehero kapasitá, preferiblemente un ansiano. Si esei no ta posibel, por asigná e tarea akí na un sirbidó ministerial kualifiká. E kuerpo di ansiano lo disidí ken ta bini na remarke pa e asignashon akí i si ta nesesario pa kambia e ruman akí tur aña. E konsehero mester sigui e prosedura deskribí na  paragraf 8. Si tin sala adishonal, mester pidi e studiantenan pa bai na e sala akí despues di e parti Buska Hoyanan Spiritual di e sekshon Tesoronan di e Palabra di Dios. Despues di e sekshon Sea Diligente den Sirbishi, nan lo djòin e kongregashon atrobe. Ora ta trata un vidio, e personanan ku ta den e sala adishonal mester wak òf skucha e parti akí for di e sala adishonal mes, si ta posibel. Di otro manera, e ruman hòmber ku ta konsehero den e sala adishonal mester usa un aparato móbil pa analisá e vidio.

 18. Vidio: Durante e reunion Nos Bida i Sirbishi Kristian lo usa vidio. E vidionan pa e reunion di den siman lo ta disponibel riba e JW Library app i aksesibel ku vários aparato elektróniko. De bes en kuando, na e reunion di sirbishi di vèlt por pasa e vidionan di ehèmpel di presentashon pa sirbishi despues ku a pasa nan kaba na e reunion Nos Bida i Sirbishi Kristian.