Bai na kontenido

Bai na kontenido

Rebelion den e Region Spiritual

Rebelion den e Region Spiritual

Ora Satanas a usa un colebra pa papia cu Eva, Eva a uni den su rebelion contra Dios

Tur e personanan spiritual cu Jehova a crea tabata bon. Despues un angel a bira malbado. E ta Satanas e Diabel. Satanas tabata kier pa hende riba tera ador’é en bes di Jehova. Esaki ta loke a sosodé:

Den e hardin di Eden, tabatin hopi palu cu tabata duna fruta dushi. Jehova a bisa Adam i su esposa, Eva, cu nan por a come libremente di nan. Pero tabatin un palu cu Dios a bisa nan cu nan no mester come for di dje. El a bisa cu si nan a come for di dje, nan lo a muri sigur.—Génesis 2:9, 16, 17.

Un dia Eva tabata su so ora un colebra a papia cuné. Naturalmente, no tabata realmente e colebra cu tabata papiando; tabata Satanas e Diabel cu a laga parce como si fuera e colebra tabata papiando. Satanas a bisa Eva cu si el a come for dje fruta prohibí, lo el a bira sabí mescos cu Dios. Tambe el a bisa cu lo e no muri. Tur e dos declaracionnan aki tabata mentira. No obstante, Eva a kere Satanas i a come e fruta. Despues, el a duna pida na Adam i el a come tambe.—Génesis 3:1-6.

For dje historia real aki, nos ta siña cu Satanas ta un rebelde i un mentiroso. El a bisa Eva cu si el a desobedecé Dios, lo e no a muri. Esei tabata un mentira. El a muri i Adam tambe. Satanas no a muri n’e tempu ei, aunke cu tempu lo e muri pasobra el a peca. Mientras tantu, sin embargo, e ta na bida i ta sigui dwal humanidad. Te ainda e ta un gañador i e ta purba di  laga hende kibra Dios su leynan.—Juan 8:44.

Otro angelnan ta rebelá

Despues, otro angelnan a bai den mal caminda. E angelnan aki a ripará e muhernan bunita riba tera i tabata kier tene relacion sexual cu nan. Pues nan a bin na tera i a bisti curpa di homber humano. Anto despues nan a tuma e muhernan pa nan mes. Esaki tabata contra Dios su propósito.—Génesis 6:1, 2; Hudas 6.

Angelnan malbado a bin na tera pa cometé inmoralidad cu muhernan

Esaki a causa hopi problema pa humanidad tambe. E esposanan dje angelnan aki a haña yunan, pero nan no tabata yunan normal. Nan a crece bira gigantenan violento i cruel. Cu tempu e tera a bira asina yená cu violencia cu Jehova a dicidí na destruí e hendenan malbado mediante un diluvio grandi. E único hendenan cu a sobrebibá e Diluvio tabata hustu Noe i su famia.—Génesis 6:4, 11; 7:23.

Sin embargo, e angelnan malbado a bolbe n’e region spiritual; nan no a muri. Pero nan a ser castigá. Nan no tabata permití bek den Dios su famia di angelnan hustu. Ademas, Jehova no a permití nan bisti curpa humano mas. I cu tempu nan lo muri den e gran huicio.—2 Pedro 2:4; Hudas 6.

 Satanas sacá for di cielu

Satanas i su angelnan malbado tabata sacá for di cielu

Na principio di nos siglo, tabatin un guera den cielu. E buki bíblico di Revelacion ta describí loke a sosodé: “I guera a cuminsá den cielu: Miguel [Jesucristo resucitá] i su [bon] angelnan a combatí cu e dragon [Satanas], i e dragon i su [mal] angelnan a combatí pero e no a triunfá, ni un lugar no a wordu hañá mas pa nan den cielu. Pues, abou e dragon grandi a wordu tirá, e colebra original, esun yamá Diabel i Satanas, cu ta gaña tur e tera habitá; el a wordu tirá abou n’e tera, i su [mal] angelnan tabata tirá abou huntu cuné.”

Kico tabata e resultado? E relato ta sigui: “P’e motibu aki, alegrá cielu i boso cu ta biba den dje!” E bon angelnan por tabata contentu pasobra Satanas i e mal angelnan, of spiritunan, no tabat’ei mas den cielu. Pero ki tal di hende riba tera? E Bijbel ta bisa: “Ai di tera i di laman, pasobra e Diabel a baha cerca boso, mashá rabiá, sabiendo cu ta ked’é poco tempu mas.”—Revelacion 12:7-9, 12.

Sí, Satanas i su compañénan malbado ta gaña i ta causa gran ai pa hende riba tera. E angelnan malbado aki ta ser yamá demoño. Nan ta enemigo di Dios. Nan tur ta malbado.