Bai na kontenido

Bai na kontenido

 KAPÍTULO 16

Kiko Ta Mas Importante?

Ki problema e hòmber aki tabatin?

Kiko Ta Mas Importante?

UN DIA un hòmber a bini serka Hesus. E tabata sa ku Hesus ta hopi sabí. P’esei el a bis’é: ‘Maestro, bisa mi ruman duna mi un par di e kosnan ku e tin.’ E hòmber a kere ku e tabatin derecho di haña un par di e kosnan di su ruman.

Si t’abo tabata Hesus, kiko lo bo a bisa e hòmber?— Hesus a mira ku e hòmber tabatin un problema. Pero su problema no tabata ku e tabatin mester di e kosnan di su ruman. E problema dje hòmber tabata ku e no tabata sa kiko ta e kosnan mas importante den bida.

Laga nos pensa riba e kos aki un ratu. Kiko mester ta mas importante pa nos? Bo ta kere ku ko’i hunga, paña nobo i kosnan asina ta mas importante?— Nò, tin un kos hopi mas importante ku nan. I t’esei ta e lès ku Hesus kier a siña nos. P’esei el a konta un kuenta di un hòmber ku a lubidá riba Dios. Bo ke tend’é?—

E hòmber aki tabata hopi riku. E tabatin kunuku i mangasina. E kosnan ku e tabata planta tabata krese hopi bon. E no tabatin lugá den su mangasinanan pa warda tur su kosecha. P’esei, kiko e ta bai hasi awor? Wèl, el a pensa: ‘Mi ta basha mi mangasinanan abou anto traha otro mangasina mas grandi. E ora ei mi ta warda tur mi kosecha i tur mi bon kosnan den e mangasinanan nobo aki.’

 E hòmber riku a pensa ku ta hopi sabí di su parti pa warda yen di kos. El a pensa: ‘Mi tin hopi bon kos wardá. Nan lo dura mi hopi aña. Awor mi por biba trankil. Mi ta bai kome, bebe i gosa.’ Pero e hòmber riku a pensa robes. Bo sa dikon?— El a pensa riba su mes so, i riba kon e mes por gosa. El a lubidá riba Dios.

Riba kiko e hòmber riku aki ta pensando?

P’esei, Dios a papia ku e hòmber riku. El a bis’é: ‘Hòmber bobo. Awe nochi bo ta muri. Awor, ken ta bai keda ku tur e kosnan ku bo a warda?’ E hòmber riku por a usa e kosnan ei despues ku e muri?— Nò, otro hende lo a haña nan. Hesus a bisa: ‘Asina ta pasa ku e hende ku ta montoná tesoro pa su mes, i no ta riku den bista di Dios.’—Lukas 12:13-21.

Bo no ke ta manera e hòmber riku, no?— Haña kos material tabata e kos di mas importante den su bida. El a hasi fout. Semper e tabata ke mas, pero e no tabata ‘riku den bista di Dios.’

 Hopi hende ta manera e hòmber riku ei. Semper nan ke mas. Pero e kos ei por hinka nan den problema grandi. Por ehèmpel, abo tin ko’i hunga, no?— Ki ko’i hunga asina bo tin?— Kiko ta pasa si un di bo amigunan tin un bala òf un pòpchi òf un otro ko’i hunga ku abo no tin? Bo ta kere ku ta bon si bo purba pone bo mama ku bo tata kumpra un pa bo tambe?—

Tin bes un ko’i hunga ta parse hopi importante. Pero kiko ta pasa despues di tempu?— E ta bira bieu, kisas e ta kibra, i bo no kier e mes mas. Pero bo tin un kos ku tin hopi mas balor ku ko’i hunga. Bo sa ta kiko e ta?—

Kiko bo tin, ku tin mas balor ku ko’i hunga?

Wèl, esei ta bo bida. Bo bida ta hopi importante, pasobra sin dje bo no por hasi nada. Pero pa bo keda biba bo tin ku hasi kos ku ta hasi Dios kontentu, no ta bèrdat?— P’esei, no laga nos hasi kos di bobo manera e hòmber riku ku a lubidá riba Dios.

No ta mucha so sa hasi kos di bobo manera e hòmber riku. Hopi hende grandi tambe ta hasi asina. Tin hende grandi ku tur ora bai  ke mas ku loke nan tin. Kisas nan tin kuminda pa kome e dia ei, paña pa bisti i un lugá pa biba. Pero nan ke mas. Nan ke hopi paña. I nan ke kas mas grandi. E kosnan ei ta kosta plaka. P’esei nan ta traha duru pa gana hopi plaka. I mas plaka nan gana, mas plaka nan ke.

Tin hende grandi ku ta bira asina drùk purbando di gana plaka, ku nan no tin tempu pa nan famia. I nan no tin tempu pa Dios tampoko. Nan plaka por tene nan na bida?— Nò, e no por. Nan por usa e plaka despues ku nan muri?— Nò, pasobra hende morto no por hasi nada-nada.—Eklesiastés 9:5, 10.

Esei kier men ku ta malu pa nos tin plaka?— Nò. Nos por usa plaka pa kumpra kuminda i paña. Beibel ta bisa ku plaka ta un protekshon. (Eklesiastés 7:12) Pero si nos ta stima plaka, nos ta bai haña nos ku problema serio. Nos lo bira manera e hòmber riku bobo aya ku a warda un tesoro pa su mes, sin ku e tabata riku den bista di Dios.

Kiko nos mester hasi pa nos ta riku den bista di Dios?— Nos mester pone Dios na promé lugá den nos bida. Tin hende ta bisa ku nan ta kere den Dios. Nan ta pensa ku kere den dje mes ta basta. Pero nan ta riku den bista di Dios?— Nò, nan ta manera e hòmber riku ku a lubidá riba Dios.

Hesus sí nunka no a lubidá riba su Tata den shelu. E no a purba gana hopi plaka. I e no tabatin hopi kos material. Hesus tabata sa kiko ta mas importante den bida. Abo sa ta kiko?— Ser riku den bista di Dios.

Kiko e mucha aki ta hasiendo ku ta importante di bèrdat?

Konta mi, kon nos por ta riku den bista di Dios?— Nos por ta riku den bista di Dios dor di hasi kos ku ta hasié kontentu. Hesus a bisa: “Semper mi ta hasi e kosnan ku ta agrad’é.” (Juan 8:29)  Dios ta keda kontentu ora nos hasi e kosnan ku e ke. Awor, konta mi: Kiko ta algun kos ku bo por hasi pa Dios keda kontentu ku bo?— Sí, bo por lesa Beibel, bai reunion kristian, resa na Dios i yuda hende siña tokante dje. Eseinan ta e kosnan di mas-mas importante den bida.

Dor ku Hesus tabata riku den bista di Dios, Yehova a sòru p’e. El a rekompensá Hesus dor di lag’é biba pa semper. Si nos ta manera Hesus, Yehova lo stima nos i sòru pa nos tambe. P’esei, laga nos ta manera Hesus, i nunka manera e hòmber riku aya ku a lubidá riba Dios.

Ata un par di teksto di Beibel aki ku ta mustra kon nos mester pensa tokante kos material: Proverbionan 23:4; 28:20; 1 Timoteo 6:6-10 i Hebreonan 13:5.