BISA mi, kua buki bo ta gusta mas ku tur?— Tin mucha ku ta skohe buki tokante bestia, i tin mucha ta skohe buki ku tin hopi plachi. Bukinan asina por ta dushi pa lesa.

Pero e mihó bukinan na mundu ta esnan ku ta siña nos e bèrdat tokante Dios. Un di e bukinan ei ta mas spesial ku tur. Abo sa ta kua?— Ta Beibel.

Dikon Beibel ta asina importante?— Debí ku ta Dios a duna nos e. Beibel ta konta nos di Dios i di e bon kosnan ku Dios ta bai hasi pa nos. Anto e ta mustra nos kiko nos mester hasi pa Dios keda kontentu ku nos. E ta manera un karta di Dios.

Dios por a skirbi henter Beibel den shelu anto duna nos e. Pero no ta esei el a hasi. Dios a usa su sirbidónan riba tera pa skirbi kasi tur parti di Beibel, maske e pensamentunan den dje sí ta di Dios.

Kon Dios a hasi e kos ei?— Wak un ehèmpel aki pa bo komprondé. Ora nos tende stèm di un hende na radio, e stèm por ta bini di un hende ku ta hopi leu. Ora nos wak televishon, nos por asta mira hende di otro parti di mundu, i nos por tende loke nan ta papia tambe.

Hende por yega te luna den nan rakètnan, anto for di aya riba manda mensahe pa nos aki riba tera. Bo tabata sa esei?— Si hende mes por hasi e kos ei, bo no ta kere ku Dios por manda mensahe for di shelu?— Klaru ku sí! I el a hasié hopi promé ku hende tabatin radio òf televishon.

Kon nos por sa ku Dios por papia ku nos for di leu aya?

 Tabatin un hòmber ku a yega di tende Dios papia. Su nòmber ta Moisés. Moisés no por a mira Dios, pero el a tende Dios su stèm sí. Miónes di hende tabat’ei ora e kos ei a pasa. Riba e dia ei Dios a pone henter un seru sagudí, i tabatin bos ku werlek. E hendenan tabata sa ku Dios a papia, pero nan tabatin hopi miedu. P’esei nan a bisa Moisés: “No laga Dios papia ku nos, pa nos no muri.” Despues Moisés a skirbi e kosnan ku Dios a bisa. I loke Moisés a skirbi ta pará den Beibel.—Eksodo 20:18-21.

Moisés a skirbi e promé sinku bukinan di Beibel. Pero no ta e so a skirbi Beibel. Dios a usa mas o ménos 40 hòmber pa skirbi diferente parti di Beibel. E hòmbernan aki a biba hopi, hopi  tempu pasá, i a dura hopi aña promé ku nan a kaba di skirbi Beibel. Sí, a dura mas o ménos 1.600 aña! E kos asombroso ta, ku maske algun dje hòmbernan aki no a yega di topa otro nunka, tur loke nan a skirbi ta klòp bon-bon ku otro.

Kon yama e skirbidónan di Beibel aki?

Un par di hòmber ku Dios a usa pa skirbi Beibel tabata hopi konosí. Promé, Moisés tabata un kuidadó di karné. Pero despues el a bira lider dje nashon di Israel. Salomon tabata un rei, i e tabata e hòmber mas sabí i mas riku na mundu. Pero tabatin otro skirbidónan di Beibel ku no tabata asina konosí. Amos tabata kuida palu ku ta pari figu.

Tambe tabatin un skirbidó di Beibel ku tabata dòkter. Bo sa kon yam’é?— Sí, Lukas. Un otro skirbidó di Beibel a yega di ta kobradó di belasting. E yama Mateo. I un otro tabata abogado, un eksperto den lei religioso hudiu. E a skirbi mas tantu buki di Beibel ku tur e otro skirbidónan. Bo sa kon yam’é?— Sí, Pablo. Anto Pedro ku Juan, dos disipel di Hesus ku tambe a skirbi parti di Beibel, tabata piskadó.

Hopi di e skirbidónan di Beibel aki a skirbi kosnan ku Dios tabata bai hasi den futuro. Kon nan por tabata sa e kosnan ei promé ku nan a sosodé?— Ta Dios a laga nan sa. El a bisa nan kiko ta bai pasa.

Tempu ku Hesus, e Gran Maestro, tabata na tera, kasi henter Beibel tabata skirbí kaba. Awor, kòrda ku e Gran Maestro a yega di biba den shelu kaba. E tabata sa kiko Dios a hasi. El a kere ku Beibel ta di Dios?— Sí.

Ora Hesus tabata papia ku hende tokante e kosnan ku Dios a hasi, e tabata lesa for di Beibel. Tin biaha e tabata bisa nan for di kabes loke Beibel ta bisa. I Hesus a trese mas informashon di Dios tambe pa nos. Hesus a bisa: “E kosnan ku mi a tende for di dje,  esakinan mi ta papia ku e mundu.” (Juan 8:26) Hesus a tende hopi kos for di Dios, pasobra el a yega di biba serka Dios. I unda nos por lesa e kosnan ku Hesus a bisa?— Den Beibel. Nan tur ta skirbí pa nos lesa.

Klaru ku e hendenan ku Dios a usa pa skirbi Beibel a skirbié den e idioma ku nan tabata papia tur dia. P’esei mayor parti di Beibel ta skirbí na hebreo, algun parti ta skirbí na arameo, i un parti basta grandi na griego. Dor ku mayoria hende awendia no por lesa e idiomanan ei, hende a tradusí Beibel na otro idioma. Awendia tin partinan di Beibel ku ta tradusí na mas ku 2.260 idioma pa hende por lesa. Imaginá bo! Beibel ta un karta ku Dios a manda pa hende rònt mundu. Pero maske hende a tradusié masha hopi bes, tòg e mensahe den dje ta keda di Dios.

 Loke Beibel ta bisa ta importante pa nos. Ta hopi tempu pasá nan a skirbié, pero e ta konta nos kos ku ta pasando awor. I e ta konta nos kiko Dios ta bai hasi aki poko tempu. E ta bisa kos emoshonante! E ta duna nos un speransa masha bunita.

Kiko ta algun kos ku bo por siña dor di lesa Beibel?

Tambe Beibel ta siña nos kon Dios ke pa nos biba. E ta bisa nos kiko ta bon i kiko ta malu. Abo mester sa e kosnan aki, i ami tambe. Beibel ta konta nos di hende ku a hasi malu i loke a pasa ku nan, pa nos no tin nodi pasa den e mesun problemanan ku nan a pasa aden. Tambe e ta konta nos di hende ku a hasi bon, i e ta mustra nos kon kos a bai bon pa nan dor di esei. Tur e kosnan aki ta skirbí pa nos bon.

Pero pa nos por probechá di tur e bon kosnan den Beibel, nos mester sa kontesta di un pregunta. E pregunta ta esaki: Ta ken a duna nos Beibel? Kiko abo lo kontestá?— Sí, henter Beibel ta di Dios. Wèl anto, kon nos por mustra ku nos ta sabí di bèrdat?— Dor di skucha Dios i hasi loke e ta bisa.

P’esei nos mester tuma tempu pa lesa Beibel huntu. Ora nos haña karta di un hende ku nos ta stima hopi, nos ta keda les’é kada bes. Nos ta stima e karta ei mashá. Asina nos mester stima Beibel tambe, pasobra e ta un karta di Esun ku ta stima nos mas tantu. E ta un karta di Dios, ku ta stima nos.

Awor, tuma djis un par di minüt mas pa lesa e tekstonan aki ku ta mustra ku di bèrdat Beibel ta e Palabra di Dios, skirbí pa nos bon: Romanonan 15:4; 2 Timoteo 3:16, 17 i 2 Pedro 1:20, 21.