ORA mucha hasi kos bon, e hendenan ku ta kria nan ta keda kontentu. Ora un mucha muhé hasi un kos bon, su tata ta sintié bon di por bisa hende: “Esaki ta mi yu muhé.” Òf, si un mucha hòmber hasi un kos bon, un tata ta felis di por bisa: “Esaki ta mi yu hòmber.”

Semper Hesus ta hasi kos ku su Tata ta gusta. P’esei su Tata ta orguyoso di dje. Bo ta kòrda kiko Hesus su Tata a hasi un dia ora Hesus tabata huntu ku tres di su siguidónan?— Sí, Dios a papia te for di shelu pa bisa nan: “Esaki ta mi Yu stimá, den kende mi tin goso.”—Mateo 17:5.

Semper Hesus ta gusta hasi kos ku ta pone su Tata bira kontentu. Bo sa dikon? Pasobra e ta stima su Tata di bèrdat. Si un hende hasi un kos djis pasobra e tin ku hasié, e kos ta parse difísil. Pero si e ta dispuesto, e kos ta bai mas fásil. Bo sa kiko kier men ser dispuesto?— E kier men ku bo mes tin gana di hasi un kos.

For di promé ku Hesus a bini na tera, e tabata dispuesto di hasi kiko ku su Tata pidié, pasobra e ta stima su Tata, Yehova Dios. Hesus tabatin un bida maravioso den shelu serka su Tata. Pero Dios tabatin un trabou spesial pa Hesus. Pa Hesus por a hasi e trabou ei, e mester a bai for di shelu. E mester a nase komo beibi riba tera. Hesus tabata dispuesto di hasi esei, pasobra Yehova tabata ke pa e hasié.

Kiko angel Gabriel a bisa Maria?

Pa Hesus por a nase komo beibi na tera, e tabatin mester di un mama. Bo sa ken su mama tabata?— Su nòmber tabata  Maria. Yehova a manda su angel ku yama Gabriel for di shelu pa papia ku Maria. Gabriel a bisa Maria ku e ta bai haña un beibi, un yu hòmber. E beibi lo a haña e nòmber Hesus. Anto ken a bira e beibi su tata?— E angel a bisa ku ta Yehova Dios lo ta Tata di e beibi. Ta p’esei nan lo a yama Hesus e Yu di Dios.

Kon bo ta kere ku Maria a haña e kos ei?— Bo ta kere ku el a bisa: “Mi no ke ta mama di Hesus”? Nò. Maria tabata kla pa hasi loke Dios tabata ke. Pero kon e Yu di Dios den shelu por a nase komo beibi na tera? Kon e nasementu di Hesus tabata diferente ku di tur otro beibi? Abo sa?—

Wèl, Dios a traha nos promé tata ku mama, Adam ku Eva, di tal manera ku nan por a bini serka otro na un manera hopi spesial. Despues di esei un beibi por a kuminsá krese den barika di e mama. Hende ta bisa ku e kos ei ta un milager! Mi ta sigur ku bo tambe ta haña ku ta asina.

Pero Dios a hasi un milager asta mas maravioso. El a tuma bida di su Yu Hesus for di shelu, anto pon’é den barika di Maria. Dios no a yega di hasi e kos ei nunka promé, i nunka mas el a bolbe hasié. Dor di e milager ei, Hesus a kuminsá krese den barika di Maria meskos ku otro beibi ta krese den barika di nan mama. Despues di esei Maria a kasa ku Hosé.

 Ora a bira tempu pa Hesus nase, Maria ku Hosé tabata di bishita na e stat di Bètlehèm. Pero e stat tabata yen-yen di hende. No tabatin ni sikiera ún kamber pa Maria ku Hosé. P’esei nan mester a keda den un lugá manera un stal, kaminda hende ta warda bestia. Ei Maria a haña Hesus, i nan a pon’é den un pesebre, manera bo por mira aki riba. Un pesebre ta un baki di kuminda pa baka i otro bestia.

Dikon nan ta pone Hesus den un pesebre?

Kosnan grandi a sosodé riba e anochi ku Hesus a nase. Serka di Bètlehèm, un angel a aparesé na un par di kuidadó di bestia. El a bisa nan ku Hesus tabata un hende importante. E angel a bisa: ‘Mira! Mi ta trese un bon notisia pa boso ku lo hasi hende bira kontentu. Awe un hende a nase ku ta bai salba e pueblo.’—Lukas 2:10, 11.

Ki bon notisia un di e angelnan aki a konta e kuidadónan di bestia?

 E angel a bisa e kuidadónan di bestia ku nan por haña Hesus na Bètlehèm, drumí den un pesebre. Anto di ripiente mas angel den shelu a aparesé huntu ku e promé angel, i nan a alabá Dios huntu. E angelnan a kanta: ‘Gloria na Dios, i na tera pas meimei di hende ku ta agrad’é.’—Lukas 2:12-14.

Ora e angelnan a bai, e kuidadónan di bestia a bai Bètlehèm. E kuidadónan di bestia a haña Hesus ei, anto nan a konta Hosé ku Maria e bon kosnan ku nan a tende. Bo por imaginá bo kon kontentu Maria a keda ku e tabata dispuesto di bira mama di Hesus?

Mas despues, Hosé ku Maria a bai ku Hesus n’e stat di Nazaret. Ei ta kaminda Hesus a krese. Ora el a bira  hende grandi el a kuminsá ku su gran trabou di siña hende. Esei tabata un parti dje trabou ku Yehova Dios tabata ke pa su Yu hasi riba tera. Hesus tabata dispuesto di hasi e trabou ei pasobra e tabata stima su Tata den shelu masha hopi.

Promé ku Hesus a kuminsá su trabou komo e Gran Maestro, el a laga Juan Boutista batis’é den Riu Hordan. N’e momentu ei un kos asombroso a sosodé! Ora Hesus a sali for di bou di awa, Yehova a papia for di shelu i bisa: “Esaki ta mi Yu stimá, den kende mi tin goso.” (Mateo 3:17) Bo no ta sinti bo bon ora bo mayornan bisa bo ku nan ta stima bo?— Nos por keda sigur ku Hesus tambe a sintié bon.

Semper Hesus tabata hasi kos bon so. E no a laga hende kere ku e ta algu ku e no ta. E no a bisa hende ku e ta Dios. Angel Gabriel a bisa Maria ku nan lo yama Hesus e Yu di Dios. Hesus mes tambe a bisa ku e ta e Yu di Dios. I e no a bisa hende ku e sa mas ku su Tata. El a bisa: “E Tata ta mas ku mi.”—Juan 14:28.

Asta den shelu, ora Hesus su Tata tabata dun’é trabou pa hasi, Hesus tabata hasié. E no tabata bisa ku lo e hasié, anto hasi otro kos na su lugá. E tabata stima su Tata. P’esei e tabata tende ora su Tata papia kuné. Anto ora Hesus a bini na tera, el a hasi loke su Tata den shelu a mand’é hasi. E no a pasa su tempu hasiendo otro kos. No ta nada straño antó ku Yehova ta kontentu ku su Yu!

Nos tambe ke pa Yehova ta kontentu ku nos, no?— E ora ei nos tin ku sòru tende di Dios, meskos ku Hesus a hasi. Dios ta papia ku nos via Beibel. Bo ta kere ku ta bon pa nos hasi manera kos ku nos ta tende di Dios, anto tòg kere òf hasi kos ku ta bai kontra loke Beibel ta bisa?— I kòrda ku si nos ta stima Yehova di bèrdat, nos lo gusta hasié kontentu.

Awor, lesa e otro tekstonan di Beibel aki ku ta mustra nos kiko nos mester sa i kere tokante Hesus: Mateo 7:21-23; Juan 4:25, 26 i 1 Timoteo 2:5, 6.