HESUS a yora ora su amigu Lázaro a muri. Bo ta kere ku Yehova a bira tristu ora Hesus a sufri anto muri?— Beibel ta bisa ku Dios por sinti duele i e por asta bira “tristu” dor di kos ku ta pasa.—Salmo 78:40, 41; Juan 11:35.

Bo por imaginá bo kuantu doló Yehova a sinti ora el a mira su Yu stimá muri?— Hesus tabata sigur ku Dios lo no lubidá riba dje. Ta p’esei mes e último kos ku el a bisa promé ku e muri tabata: “Tata, den bo mannan mi ta entregá mi [bida].”—Lukas 23:46.

Hesus tabata sigur ku Dios lo resusit’é; ku e lo no lag’é “den Hades,” òf “fiernu,” esta, den graf. Despues ku Hesus a lanta for di morto, apòstel Pedro a ripití e palabranan aki ku tin skirbí den Beibel tokante Hesus: “E no a wòrdu lagá den Hades, ni su karni no a mira korupshon.” (Echonan 2:31; E Testament Nobo; Salmo 16:10) Nò, e kurpa di Hesus no a haña chèns di mira korupshon, esta, di putri i kuminsá hole malu den graf.

 Tempu ku Hesus tabata na tera, el a asta yega di bisa su disipelnan ku e lo no keda morto hopi tempu. El a splika nan ku e lo “wòrdu matá, i wòrdu lantá riba e di tres dia.” (Lukas 9:22) P’esei, si bo wak bon, e disipelnan lo no mester a keda strañá ora Hesus a resusitá. Pero nan a keda strañá tòg?— Laga nos wak.

Ora e Gran Maestro a muri riba e staka di tormento tabata djabièrnè banda di tres or di mèrdia. Un miembro riku di Sanedrin tabata kere den Hesus, pero den sekreto. Su nòmber ta Hosé. Ora Hosé a tende ku Hesus a muri, el a bai serka Pilato e gobernadó romano. El a puntra Pilato si e tin mag di kita e kurpa di Hesus for di riba e staka pa der’é. Despues Hosé a hiba e kurpa di Hesus den un hòfi kaminda tabatin un graf, un kueba pa pone hende morto aden.

Ora nan a kaba di pone e kurpa den e graf, nan a lora un piedra grandi pone dilanti dje pa tapa e entrada. Dos dia a pasa, i a bira e di tres dia, djadumingu. Solo no a sali ainda, i ainda tabata skur. Un par di hòmber tabata kuida e graf. Ta e saserdotenan prinsipal a manda nan. Bo sa pakiko?—

E saserdotenan tambe a tende ku Hesus a bisa ku e ta bai resusitá. P’esei, pa Hesus su disipelnan no hòrta su kurpa anto bisa ku ta lanta Hesus a lanta for di morto, e saserdotenan a manda sòldá pa kuida e graf. Diripiente suela a kuminsá sagudí. Un lus skèrpi a kòrta den skuridat. Ta un angel di Yehova! E sòldánan a spanta asina tantu ku nan no por a move. E angel a bai na e graf, anto a lora e piedra kit’é. E graf tabata bashí!

Dikon e graf ta bashí? Ta kiko a pasa?

Sí, ta manera apòstel Pedro a konta despues: “E Hesus aki Dios a lanta.” (Echonan 2:32) Ora Dios a lanta Hesus for di morto, el a dun’é un kurpa manera Hesus tabatin promé ku el a bini na tera. El a resusitá ku kurpa di spiritu, manera kurpa di angel. (1 Pedro  3:18) P’esei, pa hende por a mira Hesus, e tabatin ku traha un kurpa di hende pa su mes. El a hasié?— Laga nos ban wak.

Solo a kuminsá sali. E sòldánan a bai. Maria Magdalena i mas hende muhé ku ta disipel di Hesus tabata bayendo n’e graf. Nan tabata bisa otro: ‘Ta ken ta bai lora e piedra pisá ei kit’é pa nos?’ (Marko 16:3) Pero ora nan a yega n’e graf, e piedra tabata kitá kaba. Anto, atá! E graf ta bashí! E kurpa morto di Hesus no t’ei mas! Mesora Maria Magdalena a kore bai buska un par di Hesus su apòstelnan.

E otro hende muhénan a keda na e graf. Nan lo a puntra nan mes: ‘Ta na unda e kurpa di Hesus por ta?’ Diripiente dos hòmber ku paña ku ta bria a aparesé. Nan tabata angel! Nan a bisa e hende muhénan: ‘Pakiko boso ta buska Hesus aki? El a lanta for di morto. Hasi lihé bai konta su disipelnan.’ Wèl, bo mes por imaginá bo kon duru e hende muhénan a kore! Riba kaminda nan a topa un hòmber. Bo sa ken e tabata?—

Sí, tabata Hesus! El a traha un kurpa di hende pa su mes. Anto e tambe a bisa e hende muhénan: ‘Bai konta mi disipelnan.’ E hende muhénan tabata tur aríbabou. Ora nan a haña e disipelnan, nan a bisa nan: ‘Hesus ta na bida! Nos a mir’é!’ E ora ei ya Maria a konta Pedro ku Juan kaba ku e graf ta bashí. Ora nan a tende ku Hesus ta na bida, nan a bai n’e graf, manera bo por mira riba e plachi. Nan a para mira e pañanan di lenen ku Hesus tabata lorá aden, sin sa kiko pa kere. Nan tabatin gana di kere ku Hesus ta na bida atrobe, pero e kos ei a parse muchu bon pa kere.

Kiko Pedro ku Juan por ta pensando?

Mas lat e djadumingu ei, Hesus a aparesé na dos di su disipelnan ora nan tabata riba kaminda pa bai e pueblito Emaus. Hesus a kana ku nan i papia ku nan, pero nan no tabata sa ku ta é, pasobra e kurpa di hende ku el a usa no ta meskos ku esun ku e tabatin promé ku el a muri. Ta te despues ku Hesus a kome ku nan i hasi orashon, nan a bin sa ken e ta. E disipelnan a bira asina kontentu ku nan a bai purá  te Yerusalèm bèk, maske nan mester a kana basta kilometer pa nan yega! Kisas ta djis despues di esei Hesus a aparesé na Pedro tambe pa mustr’é ku E ta na bida.

Mas anochi, riba e mesun djadumingu ei, hopi disipel tabata huntu den un sala. E portanan tabata na lòk. Ma diripiente Hesus tabata den e sala, ei mes huntu ku nan! Awor sí nan tabata sa sigur ku e Gran Maestro ta na bida atrobe. Imaginá bo kon kontentu nan a bira!—Mateo 28:1-15; Lukas 24:1-49; Juan 19:38–20:21.

Hesus a keda aparesé den diferente kurpa di hende pa 40 dia largu, pa e laga su disipelnan sa ku e ta na bida. E ora ei el a bandoná  tera i bai bèk serka su Tata den shelu. (Echonan 1:9-11) Poko tempu despues e disipelnan a kuminsá konta tur hende ku Dios a lanta Hesus for di morto. Asta ora e saserdotenan a bati nan i laga mata un par di nan, nan a sigui prediká. Nan tabata sa ku si nan muri, Dios lo kòrda riba nan meskos ku el a kòrda riba su Yu.

Riba kiko hende ta pensa ora yega e temporada di aña ku Hesus a resusitá? Pero riba kiko abo ta pensa?

E promé siguidónan ei di Hesus tabata basta diferente for di hopi hende di awendia! Awendia ora yega e temporada di aña ku Hesus a resusitá, ta riba konènchi di Pasku ku webu di Pasku pintá so hende ta pensa. Pero Beibel no ta bisa nada di konènchi ni webu di Pasku. Loke e ta papia di dje ta tokante sirbi Dios.

Nos tambe por ta manera e disipelnan di Hesus si nos konta hende ku Dios a hasi un kos masha grandi: el a resusitá su Yu. Nunka nos no tin nodi sinti miedu, ni si hende bisa nos ku nan ta mata nos. Si nos muri, Yehova lo kòrda riba nos anto resusitá nos, meskos ku el a hasi ku Hesus.

Nos no ta kontentu di sa ku Dios ta kòrda riba hende ku ta sirbié, i ku e lo asta resusitá nan for di morto?— Awor ku nos sa esei, nos mester haña gana di sa ta kon nos por hasi Dios kontentu. Bo tabata sa ku nos por hasi Dios kontentu?— Laga nos papia riba esei den e siguiente lès.

Si nos ta kere ku Hesus a resusitá, esei mester hasi nos speransa mas firme, i nos fe mas fuerte. Laga nos lesa Echonan 2:22-36; 4:18-20 i 1 Korintionan 15:3-8, 20-23.