Bai na kontenido

Bai na kontenido

 KAPÍTULO 23

Dikon Hende Ta Bira Malu

Dikon Hende Ta Bira Malu

BO KONOSÉ un hende ku ta malu?— Kasi sigur bo mes tambe sa bira malu. Bo por bira ferkout, òf bo por haña doló den bo barika. Tin hende ku ta hopi malu. Nan no por ni lanta para sin ku un hende yuda nan. Hopi bes e kos ei ta pasa ora hende bira hopi bieu.

Tur hende ta bira malu de bes en kuando. Bo sa ta dikon hende ta bira malu, bira bieu i muri?— Un dia, ora un par di hende a trese un hòmber ku no por a kana serka Hesus, Hesus a mustra ta dikon hende ta bira malu i muri. Laga mi konta bo kon el a hasi esei.

Hesus tabata kedando na un kas den un pueblo serka di Laman di Galilea. Masha hopi hende a bini serka dje. Asina tantu hende a bini, ku no tabatin lugá pa mas hende drenta e kas. Niun hende no por a ni sikiera yega serka di e porta. I tòg mas hende a sigui bini! Un par di hende a trese un hòmber lam ku no por a ni kana. Kuater hòmber mester a karg’é riba un kòt, un kos manera un kama chikitu.

Bo sa ta dikon nan kier a trese e hòmber malu serka Hesus?— Nan tabatin fe ku Hesus por a yud’é. Nan a konfia ku Hesus por a kur’é di su enfermedat. Bo sa kon nan a logra hiba e hòmber lam serka Hesus maske e kas tabata yen-yen di hende?—

Wèl, e plachi ku bo ta mira aki ta mustra kon nan a hasié. Promé nan a karga e hòmber hiba riba dak dje kas. E dak tabata  plat. E ora ei nan a traha un buraku grandi den e dak. Kaba nan a baha e hòmber malu ku tabata riba e kòt dor dje buraku, te abou den e kas. Nan tabatin hopi fe mes!

Tur hende den e kas a keda sorprendí ora nan a mira loke tabata pasa. E hòmber lam riba e kòt a baha te abou meimei di nan. Hesus a rabia ora el a mira kiko e hòmbernan a hasi?— Klaru ku nò! El a keda kontentu di mira ku nan tin fe. El a bisa e hòmber lam: “Bo pikánan ta pordoná.”

Kiko Hesus a bisa e hòmber lam hasi?

Un par di e hendenan den e kas a haña ku e kos ku Hesus a bisa no ta bon. Nan no a kere ku e por pordoná piká. P’esei, pa e  mustra nan ku e por, Hesus a bisa e hòmber: “Lanta, kohe bo kama i bai bo kas.”

Ora Hesus a bisa e kos ei, e hòmber a kura! E no tabata lam mas. Awor e por a lanta kana su so. E hendenan ku a mira e milager aki a keda babuká. Nunka di nan bida nan no a yega di mira un kos asina maravioso! Nan a alabá Yehova, pasobra el a duna nan un Gran Maestro ku por a asta kura hende malu.—Marko 2:1-12.

Kiko e milager aki ta siña nos?

Kiko e milager aki ta siña nos?— E ta siña nos ku Hesus tin poder pa pordoná piká i pone hende malu bira bon. Pero nos ta siña un kos mas tambe, un kos hopi importante. Nos ta siña ku ta piká ta pone hende bira malu.

Tur hende ta bira malu de bes en kuando. Esei kier men ku nos tur ta pekadó?— Sí, Beibel ta bisa ku nos tur a nase ku piká. Bo sa kiko kier men nase ku piká?— E kier men ku nos a nase imperfekto. Tin biaha nos ta hasi kos robes maske nos no ke. Bo sa ta kon bin nos tur ta pekadó?—

Nos ta pekadó dor ku e promé hòmber, Adam, no a obedesé Dios. El a peka, pasobra el a kibra Dios su lei. I nos tur a haña piká for di Adam. Bo sa kon nos a haña piká for di dje? Laga mi purba splika bo na un manera ku bo por komprondé.

Kon nos tur a bira pekadó?

Kisas bo a yega di mira un hende traha pan den un forma.  Kiko ta pasa ku e pan si e forma tin un doblá aden? Abo sa?— Tur e pannan ku bo traha den e forma lo sali ku e mesun doblá. Òf nò?—

Adam tabata manera e forma, anto nos ta e pan. Ora el a kibra e lei di Dios el a bira imperfekto. Ta komo si fuera el a haña un doblá òf un marka. P’esei, ora el a bira tata, kon e yunan a sali?— Tur su yunan a sali ku e mesun marka di imperfekshon ku e tabatin.

Mayoria mucha no ta nase ku un imperfekshon grandi ku bo por mira. Nan no falta un man òf un pia. Pero e imperfekshon ku nan tin ta grave sí, pasobra e ta pone nan bira malu, i muri un dia.

Manera bo mes sa, tin hende ta bira malu mas ku otro. Ta dikon? Ta dor ku nan a nase ku mas hopi piká?— Nò, tur hende ta nase ku mes tantu piká. Nos tur a nase imperfekto. P’esei, tardi òf trempan, tur hende ta haña un òf otro malesa. Asta hende ku ta purba kumpli ku tur Dios su leinan, i ku no ta hasi nada ku ta hopi malu, tambe por bira malu.

Kon nos salú lo ta ora nos piká kita por kompleto?

Pero ta dikon anto tin hende ta bira malu mas ku otro?— Tin hopi motibu. Tin hende ku no tin sufisiente kuminda pa kome. Òf kisas e kuminda ku nan ta kome no ta bon. Kisas nan ta kome muchu bolo ku mangel. Un otro motibu por ta ku nan ta bai drumi muchu lat i nan ta drumi muchu tiki. Òf kisas nan no ta tapa nan kurpa bon ora awa ta kai. Tin hende  ku ta asina suak di salú ku nan no por bringa malesa, maske nan purba kuida nan kurpa.

Lo yega un dia ku nos lo no bira malu mas? Nos ta bai skapa di piká un dia?— Wèl, kiko Hesus a hasi pa e hòmber lam?— Hesus a pordoná su pikánan i el a kur’é. Asina Hesus a mustra kiko e ta bai hasi un dia pa tur hende ku ta hasi nan bèst pa hasi bon.

Si nos mustra ku nos no ke hasi piká i ku nos tin rabia riba kos malu, Hesus ta bai kura nos. Den futuro e ta bai kita e imperfekshon ku nos tin awor. E ta bai hasi e kos aki komo Rei di e Reino di Dios. Pero no ta tur nos pikánan ta bai kita pareu. Pokopoko nan ta bai kita. Anto ora tur nos pikánan kaba di kita, nos lo no bira malu nunka mas. Nos lo tin salú perfekto. Esta dushi e kos ei lo ta!

Pa bo haña sa mas tokante kon piká ta afektá tur hende, lesa Jòb 14:4; Salmo 51:5 i Romanonan 3:23; 5:12 i 6:23.