Bai na kontenido

Bai na kontenido

 KAPÍTULO 14

E Pueblo di Dios Ta Apoyá e Gobièrnu di Dios So

E Pueblo di Dios Ta Apoyá e Gobièrnu di Dios So

PUNTO SENTRAL DI E KAPÍTULO

Lealtat na e Reino ta pone ku e pueblo di Dios ta sigui hasi esfuerso pa no ser parti di mundu

1, 2. (a) Ki prinsipio a guia e siguidónan di Hesus te den nos tempu? (b) Kon nos enemigunan a purba di vense nos, pero ku ki resultado?

HESUS tabata pará dilanti di Gobernador Pilato, e hues di mas poderoso di e nashon hudiu, i a deklará un prinsipio ku te awe ta guia Su berdadero siguidónan. Hesus di: “Mi reino no ta parti di e mundu akí. Si mi reino tabata parti di e mundu akí, mi sirbidónan lo a bringa pa mi no ser entregá den man di e hudiunan. Ma echo ta ku mi reino no ta djaki.” (Huan 18:36) Pilato a laga mata Hesus, pero e viktoria ei tabata di korto durashon pasobra Dios a resusitá Hesus. Emperadornan di e poderoso Imperio Romano a trata di aplastá e siguidónan di Kristu, pero nan intentonan tabata enbano. Kristiannan a plama e mensahe di Reino den henter e mundu di antigwedat.—Kol. 1:23.

2 Despues ku e Reino a keda establesé na 1914, algun di e potensianan militar di mas poderoso den historia a purba di kaba ku e pueblo di Dios. Pero niun di nan no a logra vense nos. Hopi gobièrnu i partido polítiko a purba di obligá nos pa tuma parti pa nan den nan konfliktonan. Ma nan no a logra trese divishon den nos. Awe, den kasi tur nashon tin siudadano di e Reino ta biba. Pero tòg nos ta uní den un berdadero hermandat mundial, i nos ta keda estriktamente neutral den asuntunan polítiko di mundu. Nos union ta un prueba konvinsente ku e Reino di Dios ta goberná i ku Rei Hesukristu ta sigui dirigí, refiná i protehá su siudadanonan. Ban wak kon el a hasi esei, i tuma nota di djis algun di e viktorianan legal ku el a duna nos segun ku nos ta sigui hasi esfuerso pa nos “no ta parti di mundu.”—Huan 17:14.

Un Kuestion Ku A Bira Importante

3, 4. (a) Kiko a tuma lugá ora e Reino a nase? (b) Akaso e pueblo di Dios semper a komprondé klaramente kiko e kuestion di neutralidat a enserá? Splika esei.

3 Despues ku e Reino a nase, guera a kuminsá den shelu, i Satanas a ser bentá abou riba tera. (Lesa Revelashon 12:7-10, 12.) Riba tera tambe tabatin un guera, i esaki a pone e determinashon di e pueblo di Dios na prueba. Nan tabata determiná pa sigui e ehèmpel di Hesus i no ser parti di mundu. Pero na promé  instante, nan no a komprondé klaramente kuantu esfuerso nan lo mester a hasi pa keda leu for di tur asuntu polítiko.

4 Por ehèmpel, Tomo VI di e seri Ourora di Milenio, * ku nan a publiká na 1904, a animá kristiannan pa evitá di partisipá den guera. Ma e buki a rasoná ku si outoridatnan obligá un kristian drenta servisio militar, e kristian mester hasi esfuerso pa haña un òf otro forma di servisio ku no ta enserá kombate. Si e no logra esei, i nan mand’é den kombate tòg, e mester sòru pa e no mata niun hende. Herbert Senior, un kristian ku a batisá na 1905 i ku tabata biba na Gran Bretaña, a komentá lo siguiente riba e situashon ei: “Tabata reina bastante konfushon entre e rumannan i no tabatin un konseho kla ku a mustra si tabata korekto pa drenta servisio militar komo sòldá basta esei tabata solamente pa trabou ku no a enserá kombate.”

5. Kon E Toren di Vigilansia di 1 di sèptèmber 1915 a kuminsá refiná nos komprondementu?

5 Pero E Toren di Vigilansia di 1 di sèptèmber 1915 a kuminsá refiná nos komprondementu di e kuestion akí. Relashoná ku e rekomendashon ku e buki Estudio di e Skritura a duna, esta, ku un kristian por drenta servisio militar i hasi trabou ku no ta enserá kombate, e revista a bisa: “Nos ta puntra nos mes si tal proseder no ta un violashon di prinsipionan kristian.” Pero kiko si outoridatnan menasá di tira un kristian mata pasobra e ta nenga di bisti unifòrm i traha den servisio militar? E artíkulo a rasoná: “Kiko ta mas pió? Laga nan tira bo mata pasobra bo ta keda leal na e Prens di Pas i ta nenga di desobedesé Su òrdu, òf ser tirá mata miéntras bo ta den servisio di e reinan terenal akí i aparentemente ta apoyá nan i ta violá—por lo ménos pa bista—e siñansanan di nos Rei Selestial? Di e dos opshonnan ei, nos ta preferá e promé: Nos ta preferá di muri pa kousa di fieldat na nos Rei Selestial.” Apesar di e deklarashon fuerte ei, e artíkulo a konkluí: “Nos no ta manda boso sigui e rumbo ei. Simplemente, nos ta sugerí boso pa hasié.”

6. Kiko bo a siña for di e ehèmpel di Ruman Herbert Senior?

6 Tabatin ruman ku a mira klaramente ku no tabata korekto pa drenta servisio militar, i nan tabata kla pa karga e konsekuensianan. Herbert Senior, sitá anteriormente, a bisa: “Pa mi, no tabatin niun diferensia entre deskargá munishon for di un barku [ku ta servisio ku no a enserá kombate] i arma un skopèt ku e munishon ei pa nan bai tira kuné.” (Luk. 16:10) Ruman Senior a ser enkarselá pasobra el a nenga di drenta servisio militar a base di su prinsipionan religioso. E ku kuater otro ruman hòmber tabata den un grupo di 16 persona ku a rechasá servisio militar pa motibu di konsenshi—inkluyendo algun hòmber di otro religion—i ku a sinta parti di nan kastigu na e prizòn di Richmond na Gran Bretaña. Dado momento, den sekreto, outoridatnan a manda Herbert i e 15 otro prezunan na e frente di bataya na Fransia. Ei, nan a keda sentensiá na morto. Outoridatnan a pone  Herbert ku vários di e prezunan ei dilanti di e peloton di fusilamentu, pero tòg no a tira nan mata. En bes di esei, nan a redusí nan sentensia na 10 aña di prizòn.

“M’a bin komprondé ku e pueblo di Dios mester ta na pas ku tur hende, asta ora tin menasa di guera.”—Simon Kraker (Wak paragraf 7)

7. Na kuminsamentu di Segundo Guera Mundial, kiko e pueblo di Dios a bin komprondé bon kla?

7 Pa ora Segundo Guera Mundial a kuminsá, e pueblo di Yehova kompleto ya tabatin un komprondementu mas kla di kiko ser neutral ta nifiká i kiko nan mester a hasi si nan kier a sigui e ehèmpel di Hesus. (Mat. 26:51-53; Huan 17:14-16; 1 Ped. 2:21) Por ehèmpel, E Toren di Vigilansia di 1 di novèmber 1939 tabatin un artíkulo masha importante, titulá “Neutralidat,” ku a bisa: “E regla ku e pueblo ku ta den pakto ku Yehova mester sigui awor ta di keda kompletamente neutral entre e nashonnan den guera.” Simon Kraker, kende despues a sirbi na e sede mundial na Brooklyn, New York, a bisa: “Dor di e artíkulo akí, m’a bin komprondé ku e pueblo di Dios mester ta na pas ku tur hende, asta ora tin menasa di guera.” E kuminda spiritual ei a yega nèt na ora i a prepará e pueblo di Dios pa un atake sin presedente kontra nan lealtat na e Reino.

Un “Riu” di Oposishon Ta Menasá e Pueblo di Dios

8, 9. Kon e profesia di apòstel Huan a kumpli?

8 Apòstel Huan a profetisá ku despues ku e Reino nase na 1914, e dragon, Satanas e Diabel, lo a purba di kaba ku e apoyadónan  di e Reino di Dios dor di skupi un riu simbóliko for di su boka. * (Lesa Revelashon 12:9, 15.) Kon e profesia di Huan a kumpli? Di dékada di 1920 en adelante tabatin un avalancha di oposishon kontra e pueblo di Dios. Ruman Kraker, meskos ku hopi otro ruman hòmber ku tabata biba na Norteamérika durante Segundo Guera Mundial, a haña kastigu di prizòn pa motibu di su lealtat na e Reino di Dios. De echo, durante e guera ei, mas ku dos tersera parti di tur prezu enkarselá den prizònnan federal na Merka pasobra nan a nenga di drenta servisio militar pa motibu religioso tabata Testigu di Yehova.

9 Diabel ku su kompinchinan tabata determiná pa kibra e integridat di siudadanonan di Reino, sin importá unda nan tabata biba. Den tur parti di Afrika, Europa i Merka nan a hiba e rumannan dilanti di korte i dilanti di komishonnan pa analisá nan libertat kondishonal. Komo ku e rumannan tabata firmemente determiná pa keda neutral, nan a ser enkarselá, maltratá i manká. Na Alemania, e pueblo di Dios a konfrontá un preshon enorme pasobra nan a nenga di deklará ‘heil Hitler’ òf di apoyá e guera. Segun kálkulo, rònt di 6.000 ruman tabata detené den kampamentunan pa prezu durante e era nazi, i mas ku 1.600 Testigu di Yehova aleman i no aleman a muri na man di e hendenan ku a torturá nan. Tòg Diabel no a logra kousa daño permanente na e pueblo di Dios.—Mar. 8:34, 35.

“Tera” Ta Guli “e Riu”

10. Kiko “tera” a simbolisá, i kon el a intervení na fabor di e pueblo di Dios?

10 E profesia ku apòstel Huan a skirbi a revelá ku “tera”—algun hende òf grupo poderoso di e mundu akí ku ta mas rasonabel—lo a guli “e riu” di persekushon, i asina yuda e pueblo di Dios. Kon e parti ei di e profesia a kumpli? Den e dékadanan despues di Segundo Guera Mundial, “tera” hopi biaha a intervení na fabor di e fiel apoyadónan di e Reino Mesiániko. (Lesa Revelashon 12:16.) Por ehèmpel, vários korte importante a protehá e derecho di Testigunan di Yehova di rechasá servisio militar i di nenga di partisipá den seremonia nashonalista. Pero promé, laga nos konsiderá djis algun di e viktorianan prinsipal ku Yehova a duna su pueblo relashoná ku e kuestion di servisio militar.—Sal. 68:20.

11, 12. Ki kuestion Ruman Sicurella i Ruman Thlimmenos a konfrontá, i ku ki resultado?

11 Merka. Anthony Sicurella ku su sinku rumannan a lanta den un famia Testigu di Yehova. El a batisá ku 15 aña. Ora el a hasi 21 aña, el a registrá serka e komishon di servisio militar obligatorio komo un sirbidó religioso. Dos aña despues, na 1950, el a yena un petishon pa kambia su registrashon i klasifik’é bou di e personanan ku ta nenga servisio militar a base di konsenshi. Aunke e rapòrt di FBI no a haña nada malu den Ruman Sicurella, Departamento di Hustisia a rechasá su solisitut. Despues  di vários proseso hudisial, Korte Supremo Merikano a trata e kaso di Ruman Sicurella i a anulá e desishon di e korte mas abou i a dikta fayo na fabor di Ruman Sicurella. E veredikto akí a yuda krea un presedente pa otro siudadanonan merikano ku nenga servisio militar a base di nan konsenshi.

12 Gresia. Na 1983, Iakovos Thlimmenos a nenga di bisti unifòrm militar. Nan a konden’é pa desobedensia na outoridat i a sentensi’é na kastigu di prizòn. Despues ku el a haña su libertat, el a pidi pèrmit pa traha komo akountent, pero nan a rechasá su petishon pasobra awor e tabatin un strafblat, òf karchi di kastigu. El a hiba e asuntu korte. Despues ku el a pèrdè su kaso den e kortenan di Gresia, el a hiba su kaso pa e Korte Europeo di Derechonan Humano (ECHR). Na aña 2000, e Gran Sala di ECHR, un pènel ku a konsistí di 17 hues, a dikta fayo na su fabor i asina a krea un presedente kontra diskriminashon. Promé ku e veredikto akí, mas ku 3.500 ruman na Gresia tabatin karchi di kastigu pasobra nan a bai será pa nan posishon neutral. Despues di e desishon faborabel akí di ECHR, Gresia a pasa un lei pa libra e rumannan ei di tur kargo penal. Ademas, un otro lei ku nan a pasa un par di aña promé i ku a duna tur siudadano griego e derecho di hasi servisio sivil alternativo a ser rekonfirmá ora ku nan a revisá e Konstitushon di Gresia.

“Promé ku m’a drenta sala di korte, m’a hasi orashon ferviente na Yehova, i m’a sinti kon el a duna mi un trankilidat.”—Ivailo Stefanov (Wak paragraf 13)

13, 14. Kiko ta e lèsnan ku bo ta kere ku nos por siña for di e kasonan di Ivailo Stefanov i Vahan Bayatyan?

13 Bulgaria. Ivailo Stefanov tabatin 19 aña ora nan a manda yam’é pa servisio militar obligatorio. El a nenga di drenta ehérsito òf di hasi trabou ku no a eksigí pa bai den kombate pero ku a kai sí bou di enkargo militar. Nan a sentensi’é na 18 luna di prizòn. Pero el a apelá e desishon, basá riba su derecho di rechasá servisio militar pa motibu di konsenshi. Ku tempu, su kaso a bai pa ECHR. Na 2001, promé ku e kaso por a bai dilanti, outoridatnan a yega na un akuerdo amikal ku Ruman Stefanov. Gobièrnu di Bulgaria a duna amnistia no solamente na Ruman Stefanov, sino na tur siudadano di Bulgaria ku tabata dispuesto pa hasi servisio sivil alternativo. *

14 Armenia. Vahan Bayatyan a yega edat pa drenta servisio militar obligatorio na 2001. * El a nenga di hasi esei pa motibu di su konsenshi pero a pèrdè tur kaso di apelashon den e kortenan di Armenia. Na sèptèmber 2002, el a kuminsá sinta su sentensia di 2 aña i mei di prizòn, pero nan a lag’é sali despues di a sinta 10 luna i mei. Den e periodo ei, el a apelá serka ECHR, i nan a trata su kaso. Pero dia 27 di òktober 2009, e Korte ei tambe a dikta fayo kontra dje. E veredikto a parse un gòlpi aplastante pa e rumannan na Armenia ku tabata konfrontá e kuestion akí. Sinembargo, e Gran Sala—e outoridat máksimo—di ECHR a bolbe analisá e veredikto. Dia 7 di yüli 2011, Korte a saka un veredikto na fabor di Vahan Bayatyan. Tabata promé biaha ku  ECHR a rekonosé ku un hende a base di su konsenshi tin mag di rechasá servisio militar pa motibu di su kreensianan religioso i ku mester protehá e derecho ei ya ku e ta kai bou di e derecho di libertat di pensamentu, di konsenshi i di religion. E veredikto ei ta protehá no solamente e derechonan di Testigunan di Yehova sino tambe di sientos di miónes di hende den paisnan ku ta miembro di e Konseho di Europa. *

Ruman hòmbernan na Armenia ta sali for di prizòn despues di e veredikto faborabel di ECHR

E Kuestion di Seremonianan Nashonalista

15. Dikon e pueblo di Yehova ta nenga di partisipá den seremonianan nashonalista?

15 E pueblo di Yehova ta keda leal na e Reino Mesiániko no solamente dor di nenga servisio militar sino tambe dor di nenga respetuosamente di partisipá den seremonianan nashonalista. Foral desde komienso di Segundo Guera Mundial, un ola di fervor nashonalista a plama rònt mundu. Hopi pais a bini ku e rekisito ku siudadanonan mester hura lealtat na patria; sea nan ta resitá un huramentu, kanta un himno nashonal òf saludá  bandera. Pero den nos kaso, nos ta duna deboshon eksklusivo na Yehova. (Éks. 20:4, 5, NW ) Komo resultado, nos a bira víktima di un ola di persekushon. Pero Yehova a bolbe usa “tera” pa guli un parti di e oposishon ei. Tuma nota di algun viktoria remarkabel ku Yehova, via Kristu, a duna nos den e asuntu akí.—Sal. 3:8.

16, 17. Ki kuestion Lillian ku William Gobitas a konfrontá, i kiko bo ta siña for di nan kaso?

16 Merka. Na 1940, den e kaso konosí komo Skol di Distrito di Minersville Kontra Gobitis, Korte Supremo Merikano a dikta fayo kontra di Testigunan di Yehova; e desishon tabata 8 kontra i 1 na fabor. Lillian Gobitas * (di 12 aña) ku su ruman hòmber William (di 10 aña) kier a keda leal na Yehova, pues nan a nenga di saludá bandera òf di resitá e huramentu di lealtat. Komo konsekuensia, outoridatnan a kita nan for di skol. Nan kaso a bai dilanti di Korte Supremo, i Korte a konkluí ku e akshon di e skol tabata na armonia ku konstitushon merikano, ya ku esei tabata na interes di “union nashonal.” E veredikto ei a start un periodo intenso di persekushon. Outoridatnan a kita mas mucha Testigu di Yehova for di skol, Testigunan adulto a pèrdè trabou i un kantidat di Testigu a sufri atake kruel na man di multitutnan razu. E buki “E Brio di Nos Pais” (na ingles) a deklará ku “persekushon di e Testigunan den e periodo di 1941 pa 1943 tabata e eksploshon mas grandi di intoleransia religioso na Merka den siglo 20.”

17 E viktoria di e enemigunan di Dios tabata di korto durashon. Na 1943, Korte Supremo a trata un otro kaso similar na esun di Gobitis. E tabata konosí komo Direktiva di Skol di Estado di Wèst Virginia Kontra Barnette. E biaha akí Korte Supremo a duna Testigunan di Yehova e viktoria. Tabata promé biaha den historia merikano ku Korte Supremo a revoká su mes desishon den un periodo di tempu asina kòrtiku. Despues di e veredikto ei, e persekushon abierto di e pueblo di Yehova na Merka a mengua drástikamente. Den e proseso, e derechonan di tur siudadano merikano a haña mas forsa.

18, 19. Segun Pablo Barros, kiko a yud’é keda firme, i kon otro sirbidónan di Yehova por imitá su ehèmpel?

18 Argentina. Na 1976, outoridatnan a kita Pablo ku Hugo Barros (di respektivamente 8 i 7 aña) for di skol, pasobra nan no kier a partisipá den un seremonia di hisa bandera. Na un okashon, e kabes di skol a pusha Pablo i dal e riba su kabes. E señora ei a laga tur e dos muchanan keda un ora despues di skol, miéntras ku e tabata trata di obligá nan pa partisipá den seremonianan patriótiko. Pablo, kòrdando e eksperensia troumátiko ei, a bisa: “Si Yehova no a yuda mi, lo mi no por a resistí e preshon pa kibra mi integridat.”

19 Ora e kaso a presentá dilanti di korte, e hues a sostené e desishon di e skol pa kita Pablo ku Hugo for di skol. Sinembargo,  e rumannan a apelá e kaso na Korte Supremo di Argentina. Na 1979, e Korte ei a anulá e desishon di e korte mas abou, bisando: “E kastigu ei [kitamentu for di skol] ta bai tantu kontra e derecho konstitushonal di risibí edukashon (Artíkulo 14) komo e deber di Estado pa sòru ku e muchanan ta haña edukashon primario (Artíkulo 5).” E viktoria ei a benefisiá rònt di 1.000 mucha Testigu di Yehova. Den kaso di algun mucha, outoridatnan a para e proseso di kita nan for di skol, i otro muchanan, manera Pablo ku Hugo, nan a tuma bèk na skol públiko.

Hopi mucha Testigu di Yehova a keda fiel bou di prueba

20, 21. Kon e kaso di Roel i Emily Embralinag ta fortalesé bo fe?

20 Filipinas. Na 1990, outoridatnan a kita Roel Embralinag[7] (di 9 aña) ku su ruman muhé Emily (di 10 aña), huntu ku mas ku 65 alumno Testigu di Yehova, for di skol pasobra nan no a saludá bandera. Leonardo, tata di Roel ku Emily, a purba di rasoná ku e outoridatnan di skol, pero sin resultado. Ora e situashon a bira mas intenso, Leonardo a entregá un petishon na Korte Supremo. Leonardo no tabatin plaka ni abogado pa represent’é.  E famia a hasi orashon ferviente na Yehova pa guia nan. Mientrastantu, hende tabata tenta e muchanan i hasi bofon di nan. Leonardo a sinti ku e no tabatin niun chèns di gana e kaso, ya ku e no tabata un hende ku a studia lei.

21 Pero manera kosnan a kana, e famia a bin haña un abogado pa representá nan, Felino Ganal, kende anteriormente tabata traha na un di e ofisinanan di abogado mas renombrá di e pais. Tempu ku e kaso a tuma lugá, Ruman Ganal no tabata traha mas pa e ofisina di abogado i a bira un Testigu di Yehova. Ora e kaso a presentá dilanti di Korte Supremo, Korte a disidí unánimamente na fabor di e Testigunan i a anulá e desishon di kita e muchanan for di skol. Un biaha mas, hende ku a purba di kibra e integridat di e pueblo di Dios a frakasá.

Nos Posishon Neutral Ta Uni Nos

22, 23. (a) Dikon nos a gana asina tantu viktoria legal históriko? (b) Nos hermandat mundial i pasífiko ta un prueba di kiko?

22 Dikon e pueblo di Yehova a gana asina tantu viktoria legal históriko? Nos no tin niun influensia polítiko. Tòg, den pais tras di pais i den korte tras di korte, huesnan imparsial a protehá nos di e atake tenas di opositornan i, den e proseso, nan a krea presedente den nan konstitushon. Nos no tin duda ku ta Kristu a apoyá nos esfuersonan pa gana e viktorianan ei. (Lesa Revelashon 6:2.) Dikon nos ta hiba e batayanan legal akí? Nos intenshon no ta pa trese reformanan legal. Mas bien, nos meta ta pa hasi sigur ku nos por sigui sirbi nos Rei Hesukristu sin opstákulo.—Echo. 4:29.

23 Den un mundu dividí pa konflikto polítiko i afektá pa odio profundo, nos Rei reinante, Hesukristu, a bendishoná e esfuersonan ku su siguidónan rònt mundu ta hasi pa mantené nan posishon neutral. Satanas a frakasá den su intentonan pa dividí nos i vense nos. E Reino a rekohé miónes di hende ku ta nenga di “train pa guera.” E solo echo ku nos hermandat mundial i pasífiko ta eksistí ta un milager; e ta un prueba irefutabel ku e Reino di Dios ta goberná!—Isa. 2:4.

^ par. 4 E tomo akí ta konosí tambe pa e título E Kreashon Nobo. Mas despues, nan a kambia e nòmber di e seri Ourora di Milenio pa Estudio di e Skritura.

^ par. 8 Pa un konsiderashon di e profesia akí, wak e buki Revelacion—su gran culminacion ta cerca!, kapítulo 27, página 184-186.

^ par. 13 E akuerdo akí a rekerí tambe pa gobièrnu di Bulgaria ofresé servisio sivil alternativo bou di atministrashon sivil na tur persona ku nenga servisio militar pa motibu di konsenshi.

^ par. 14 Pa un relato mas kompleto, wak La Atalaya di 1 di novèmber 2012, página 2.

^ par. 14 Durante un periodo di 20 aña, gobièrnu di Armenia a enkarselá mas ku 450 hóben Testigu di Yehova. Na novèmber 2013, nan a laga e último di nan den libertat.

^ par. 16 Den e registronan di korte nan a spèl e fam robes.

Den e registronan di korte nan a spèl e fam robes i a skirbi Ebralinag.