DIKON TA BON PA BO SA?

Ora bo pega na bo norma- i balornan, abo ta esun ku ta disidí kiko bo ta hasi den bo bida i no otro hende.

KIKO ABO LO HASI?

Imaginá bo e siguiente esena: Brian ta sinti un stek den su stoma ora e mira dos mucha hòmber di su skol kana bini den su direkshon. Dos biaha kaba e siman akí nan a purba di pone preshon riba dje pa e huma. Esaki lo ta di tres biaha.

E promé mucha hòmber ta bisa:

“Hey, bo ta bo so atrobe? Mi tin un amigu pa bo.”

Ku un kinipí di wowo pa pone énfasis riba e palabra “amigu,” e ta saka algu for di su saku pa duna Brian.

Brian ta mira e sigaria den su man. E stek den su stoma ta bira mas fuerte.

Brian ta bis’é: “Sòri, mi a bisa boso kaba ku mi no ta . . . ”

E di dos mucha hòmber ta interumpí Brian i ta bis’é: “Kobarde bo ta?”

Brian ta respondé ku kurashi: “Ami nò!”

E di dos mucha hòmber ta pone su man riba Brian su skouder i ta bis’é: “Djis tum’é.”

E promé mucha hòmber ta hala e sigaria mas serka di Brian su kara i ta flùister: “Nos no ta bisa niun hende. Niun hende no ta haña sa.”

Si ta abo ta Brian, kiko lo bo hasi?

 PARA KETU I PENSA

E mucha hòmbernan ei di bèrdat a pensa riba loke nan ta hasiendo? Ta riba nan mes nan ta hasiendo e kos ei? Kasi sigur ku nò. E chèns ta grandi ku nan lo a laga otronan influensiá nan. Nan ke keda bon ku nan amigunan i p’esei nan ta permití otro hende disidí loke nan ta hasi.

Si abo haña bo den e mesun situashon, kon bo por evitá di hasi meskos ku nan i asina resistí preshon di pareu?

  1. PREPARÁ BO MES

    Beibel ta bisa: “Hende sabí ta mira peliger i ta evit’é, esun sin eksperensia ta dal bai i haña su kastigu.”—Proverbionan 22:3, BPK.

    Hopi biaha, bo por mira problema djaleu. Por ehèmpel, suponé ku bo ta mira un grupo di mucha di skol pará ta huma sigaria. Si bo pensa di antemano ki problema lo por presentá, lo bo ta kla pa dil ku e situashon.

  2. PENSA

    Beibel ta bisa: “Mantené un konsenshi limpi.”—1 Pedro 3:16.

    Puntra bo mes, ‘Kon lo mi sinti mi despues ku mi bai tras di e mayoria?’ Ta bèrdat ku pa un ratu bo pareunan lo ta kontentu ku bo. Pero kon lo bo sinti bo despues? Bo ta dispuesto pa sakrifiká bo norma- i balornan djis pa tene e muchanan di bo klas kontentu?—Éksodo 23:2.

  3. TUMA DESISHON

    Beibel ta bisa: “Un hende sabí ta kouteloso.”—Proverbionan 14:16.

    Tardi òf trempan nos mester tuma un desishon i biba ku e konsekuensianan. Beibel ta menshoná hòmbernan manera Yosef, Yòb i Hesus, ku a tuma desishon korekto. Tambe e ta menshoná Kain, Esou i Hudas, ku a tuma mal desishon. Kiko abo lo hasi?

Beibel ta bisa: “Trata ku fieldat.” (Salmo 37:3, NW) Si bo pensa adelantá riba e konsekuensianan i sa ki desishon bo ta bai tuma, ta mas fásil pa bo mustra kiko ta bo posishon, i no tin nada mas mihó ku esei.

No wòri, bo no tin nodi di duna henter un spich. Un simpel firme mes ta sufisiente. Òf, pa mustra nan bon kla ku bo no ta kambia di opinion, bo por bisa:

  • “No konta ku mi!”

  • “Mi no ta hasi e tipo di kosnan ei!”

  • “Ai nò, bo konosé mi kaba tòg!”

E punto ta pa bo kontestá mesora sin bira rònt. Si bo hasi asina, lo bo keda sorprendí kon lihé nan lo stòp di pone preshon riba bo!

 KON PA TRATA KU BOFON

Si bo no resistí preshon di pareu, lo bo keda manera un robòt den man di bo pareunan

Kiko si bo pareunan ta hasi bofon di bo? Kiko si nan bisa bo: “Ki’ a pasa bo? Kobarde bo ta?” Bo tin ku kuminsá na mira e bofon akí komo un tipo di preshon di pareu. Kon bo por reakshoná? Bo tin por lo ménos dos opshon.

  • Bo por aseptá loke nan bisa. (“Boso tin rason, mi tin miedu!” Anto duna un splikashon kòrtiku dikon.)

  • Bo por tira e bala bèk. Bisa nan dikon bo no ta huma sigaria i despues lanta duda riba nan inteligensia. (“M’a hasi boso mas sabí!”)

Si bo pareunan sigui hasi bofon di bo, kana bai! Kòrda bon, mas largu bo keda kaminda nan ta, mas preshon nan lo pone riba bo. Si bo kana bai, bo ta mustra ku abo sigur no ta bai laga nan kambia e tipo di hende ku bo ta.

Echo ta ku bo no ta bai skapa di preshon di pareu. Pero, bo por disidí sí kiko bo ke hasi, mustra kiko ta bo posishon anto aktua ku firmesa. Al fin i al kabo, ta bo desishon!—Hosue 24:15.