Bai na kontenido

Bai na kontenido

 PREGUNTA 2

Dikon Mi Ta Preokupá ku Mi Aparensia?

Dikon Mi Ta Preokupá ku Mi Aparensia?

DIKON TA BON PA BO SA?

Tin kosnan mas importante ku djis loke bo ta mira den spil.

KIKO ABO LO HASI?

Imaginá bo e siguiente esena: Julia ta wak den spil i e úniko kos ku e ta mira ta ku e ta gordo. E ta bisa den su mes: “Mi tin ku baha di peso.” Pero su mayornan i su amigunan ta bis’é ku e ta hopi flaku.

E lastu dianan akí Julia ta pensa ki medida drástiko e por tuma pa baha “maske ta 2 kilo.” Úniko kos ku e tin ku hasi ta keda sin kome pa un par di dia . . .

Si bo ta sinti meskos ku Julia, kiko lo bo hasi?

PARA KETU I PENSA

E manera ku bo ta mira bo mes kisas ta meskos ku ora bo ta wak bo mes den un spil ku ta desfigurá kurpa di hende

No ta malu pa bo ta preokupá ku bo aparensia. De echo, Beibel ta papia di e nèchi aparensia di diferente hòmber i muhé, manera Sara, Rakel, Abigail, Yosef i David. Beibel ta bisa ku un muhé ku yama Abisag tabata “masha bunita.”—1 Reinan 1:4.

Pero tin hopi hóben ku ta opseshoná ku nan aparensia. Esei por hiba na problemanan serio. Konsiderá lo siguiente:

  • Un investigashon a saka na kla ku 58 porshento di mucha muhé tabata pensa ku nan ta muchu gordo, pero en realidat ta 17 porshento so tabatin sobrepeso.

  • Un otro investigashon a saka na kla ku 45 porshento di hende muhé ku eigenlijk tabata bou di peso tabata pensa ku nan ta muchu gordo.

  • Algun hóben, den nan esfuerso pa baha di peso, a bira víktima di anorexia, esta, un miedu apnormal di bira gordo ku ta pone un hende keda sin kome i asta muri di hamber.

 Si bo tin síntomanan di anorexia òf kualke otro problema ku komementu, buska yudansa. Kuminsá na papia ku un mayor òf un otro adulto ku bo ta konfia. Beibel ta bisa: “Un amigu ta stima tur ora bai, i un ruman ta nasí pa tempu di atversidat.” —Proverbionan 17:17.

E MIHÓ KAMBIO KU BO POR HASI!

Bon mirá, ta e persona ku bo ta di paden ta determiná si bo ta òf no ta atraktivo. Wak por ehèmpel Absalon, yu di rei David. Beibel ta bisa di dje:

“No tabatin ningun hende ku tabata risibí tantu elogio pa su bunitesa; . . . no tabatin ningun defekto na dje.”—2 Samuel 14:25.

Pero, e yònkuman akí tabata hopi orguyoso, ambisioso i traishonero. P’esei, Beibel no ta papia masha bon di Absalon; e ta pint’é komo un hòmber sinbèrgwensa i desleal, ku tabatin asina tantu odio ku e tabata kapas pa mata.

Pa un bon motibu anto Beibel ta duna nos e konseho akí:

“Bisti e personalidat nobo.”—Kolosensenan 3:10.

“No laga boso adorno ta di pafó so . . . , ma laga esei ta e hende ku boso ta di paden.”—1 Pedro 3:3, 4.

No ta nada malu si bo ke tin un bon aparensia, pero muchu mas importante ku esei ta bo personalidat. A lo largu, ta e bon kualidatnan akí ta hasi bo bunita pa otro hende, i no un kurpa bon di train òf nèchi figura! Un mucha muhé ku yama Phylicia ta bisa: “Si bo ta bunita, bo ta atraé hende su bista hopi lihé, pero e persona ku bo ta di paden i bo bon kualidatnan ta loke mas nan ta keda kòrda.”

KON BO TA MIRA BO MES?

Bo sa ta hopi biaha malkontentu ku bo aparensia?

Bo a yega di pensa pa hasi sirugia plástiko òf tene un dieta strèn pa drecha algu ku bo no ta gusta na bo aparensia?

Si bo por a kambia algu na bo aparensia, kiko lo bo a kambia? (Marka loke bo ta skohe.)

  • HALTURA

  • PESO

  • KABEI

  • FORMA DI KURPA

  • KARA KOLÓ DI KUERU

Si bo a kontestá sí na e promé dos preguntanan ariba i bo a marka tres òf mas di e karakterístikanan na e di tres pregunta, konsiderá lo siguiente: E chèns ta grandi ku otronan no ta mira bo den mesun forma negativo ku bo ta mira bo mes. Ta fásil pa bai den ekstremo i preokupá muchu hopi ku bo aparensia.—1 Samuel 16:7.