Bai na kontenido

Bai na kontenido

 KAPÍTULO 6

E Yu Primintí

E Yu Primintí

LUKAS 2:21-39

  • NAN TA SIRKUNSIDÁ HESUS I HIB’É NA E TÈMPEL

Hose ku Maria a disidí di keda Bètlehèm en bes di regresá Názarèt. Ora Hesus tabatin ocho dia, nan a laga sirkunsid’é manera e Lei ku Dios a duna Israel a manda. (Levítiko 12:2, 3) I e kustumber tabata pa duna un yu hòmber nòmber tambe riba e dia ei. Nan a yama nan yu Hesus, manera angel Gabriel a bisa nan.

Ora Hesus tabatin 40 dia, su mayornan a hib’é e tèmpel na Herúsalèm, ku tabata situá un par di kilometer for di unda nan tabata keda. Dikon nan a hiba Hesus na e tèmpel? Wèl, e Lei a stipulá ku 40 dia despues ku un muhé duna lus na un yu hòmber, e mester a hiba un ofrenda di purifikashon na e tèmpel.—Levítiko 12:4-8.

Maria a hasi presis manera e Lei a stipulá i a hiba dos para chikitu komo ofrenda na e tèmpel. Su ofrenda a bisa algu di nan situashon ekonómiko. Kon asina? Segun e Lei, un mama mester a ofresé un chubatu di karné yòn i un para. Pero si e no por a ofresé un chubatu di karné, e por a duna dos tòrteldùif òf dos pichon. P’esei, komo ku Maria tabata pober, el a ofresé dos para.

Na e tèmpel, tabatin un hòmber di edat ku yama Simeon, kende a aserká Hose ku Maria. Dios a revelá na e hòmber akí ku, promé ku e muri, lo el a mira e Kristu, òf e Mesías, primintí. I spiritu santu a guia Simeon na e tèmpel pa asina e por a mira Hose, Maria i e bebi e dia ei. Anto Simeon a tuma e yu den su brasa.

I ku Hesus den su brasa, Simeon a gradisí Dios, bisando: “Awor, Señor Soberano, bo ta laga bo sirbidó bai na pas di akuerdo ku bo palabra, pasobra mi wowonan a mira esun ku lo trese salbashon i ku bo a presentá pa tur hende por mira. E ta un lus pa kita e velo for di wowo di e nashonnan i un gloria pa bo pueblo Israel.”—Lukas 2:29-32.

Hose ku Maria a keda asombrá ora nan a tende e palabranan ei. Simeon a bendishoná nan i a bisa Maria: “Pa motibu di e yu akí algun hende den Israel lo kai i otronan lo lanta para.” I segun Simeon, Maria lo a bira asina tristu komo si fuera un spada skèrpi a pasa dor di su alma.—Lukas 2:34.

E dia ei, Ana, un profeta di 84 aña di edat, tambe tabata presente. Bon mirá, nunka e tabata falta tèmpel. Nèt na e momento ku Simeon tabata papia, el a aserká Hose, Maria i e bebi i a gradisí Dios i a kuminsá papia tokante e mucha ku tur esnan ku tabata ke skucha.

Bo por imaginá bo kon kontentu Hose ku Maria a keda? Tur esaki siguramente a konvensé nan ku nan yu tabata e Mesías Primintí.